Munoowerya ‘Orowa oMasedonia’?
1. Exeeni yaamwiirinhe Paulo ni apatthani awe orowa oMasedonia?
1 Eyaakha ya 49 E.C., murummwa Paulo aahikhuma wAntiyokiya ooSiria wira apacerihe ekwaha awe ya nenli ya omisionaario. Owo, aaphavela oxukurya wEefeso ni mittetthe sikina sa wAsia Menore. Masi, Paulo aahitthokiheriwa ni munepa wa Muluku wira ‘orowe oMasedonia’. Owo vamosa ni apatthani awe, moohakalala yaaheemererya orowa okhaliherya opaka muloko muttetthe ole. (Mit. 16:9, 10; 17:1, 2,4) Olelo va, olumwenku wotheene, ahaavo mapuro makina oothowa vanceene alipa-oohepha. (Math. 9:37, 38) Nto nyuwo mwaaniphavela okhaliherya?
2. Exeeni eniwiiriha atthu akina woovelelaka othaamela mittetthe sikina?
2 Waaniheryasa, nyuwo munniphavela omutakiha misionaario Paulo, masi khamunatthi othokorerya saana makhalelo anyu wira muthaamele elapo ekina. Mwa ntakiheryo, pooti wira mwaha wa makhalelo wala iyaakha sanyu, aahiiso pooti wira mwaha woohitheliwa, wala okhalana anamwane acikhaani aahiiso mixankiho sikina khivanweryaneya nyuwo orowa Exikola ya oMisionaario. Waaniheryasa khimunatthi wuupuwela othaamela muttetthe mukina, mwaha wa woovelela wiixutta nttaava nikina. Wala pooti wira nyuwo murwiiye mittetthe sikina sa elapo enikhala anyu mwaha wa muteko nto khiyoovelela otthikela muttetthe anyu. Nuumala onvekela Muluku, nyuwo munrowa woona wira mixankiho iyo khasinrowa wookhoottiheryani othaamela mittetthe seiye sinitthuneya anamalaleerya.
3. Xeeni vahinitthuneya aya omwiira kursu omisionaario wira mutthu olaleeryeke saana mittetthe sa elapo ekina?
3 Niireke Vanitthuneya Omwiira Kursu oMisionaario? Exeeni yaamukhalihenrye Paulo ni apatthani awe okhumela saana? Yaamuroromela Yehova ni munepa awe wootteela. (2 aKor. 3:1-5) Nnaamwi muhimwiirale kursu owo, munoowerya olaleerya saana mittetthe sikina. Muupuwele-tho wira Exikola ya Orummwa wa Muluku ni Muthukumano wa Orummwa, enniniixuttiha moota woolaleerya saana. Akhala wira munniphavela omwiira kursu a Exikola ya oMisionaario wala Exikola ya Biibiliya ya moota mukina, othaamela wanyu mittetthe sikina onoowiirihani wiixutta itthu sinceene sinrowa wookhaliheryani muhoolo mwalattuliwa orowa omwiira kursu.
4. Nthowa xeeni anna oowunnuwela aniwerya aya orowa mapuro makina wira yakhaliheryeke mmuteko woolaleerya?
4 Anna Oowunnuwela: Anna owunnuwela anisiveliwa ni miteko sa Muluku, arina ekumi yooreerela, pooti okhaliherya ilapo seiye sinitthuneya anamalaleerya. Niireke wira mooreformari? Atthu akina yaale ari ooreformari masi anithaamela ilapo soohiraaliwa, nnaamwi musurukhu onaakhela aya ohaattaka anniwerya othuma itthu sinitthuneya, okhala wira ilapo iyo itthu ntoko olooliwa saana oxipitaali musurukhu aya onnikhweya ovikana elapo aya.
5. Muhimye yowiiraneya emosa ya munna oreformanri khuthaamela elapo ekina.
5 Munna mmosa ohin’ye ovara muteko onikhuma elapo enilavuliwa Enkelexi, yoowo ori pioneero ni mutokweene a mmulokoni, aahirowa wAsia elapo yowaattela oxukuriwa ni atthu a ilapo sikina; munna owo aahirowa wira akhaliherye ekrupu ya anamalaleerya athanu naxexe anilavula Enkelexi. Ekrupu ele ya anna yahaalaleerya atthu anikhuma ilapo sikina oophiyeryaka 30.000 amanke muttetthe ole. Nuumala ovira iyaakha piili, atthu 50 yaahipacerya orweela mithukumano. Munna ole aahilepa oriki: “Mwaha wothaamela mapuro ala, koophwanya mareeliho manceene ahitonko aka ophwanya. Kaaniphavela olavula sotheene, masi okathi tokithonwe!”
6. Muhimye yowiiraneya emosa ya murokora oohitheliwa aaronwe olaleerya muttetthe woothowa anamalaleerya.
6 Axirokora Oohitheliwa: Yehova onnaarumeela vanceene axirokora mmuteko woolaleerya mihupi sooreera, mittetthe soothowa anamalaleerya. (Esal. 68:12) Murokora mmosa mmiravo ohitheliwa, aaniphavela othaamela mapuro makina oothowa anamalaleerya, wira akhaliherye olaleerya mapuro ale, masi anamuyari awe yaahimoonela othunku yuupuwelaka wira aarowa ophwanya maxakha. Tivonto murokora ole aathanlale orowa elapo yahaarina mixankiho, nto aahilepela ofiliyaali, khukhaliheriwa moota woovara muteko mapuro ale. Nuuvira iyaakha thanu namosa athaamenle ene muttetthe ole, aahiphwanya mareeliho manceene. Murokora ole aahilepa oriki: “Elapo aka, nkaarowa waaphwanya atthu anceene wira kaasomiheke Biibiliya. Orowa olaleerya mapuro oothowa anamalaleerya, wookiiriha waasomiha Biibiliya atthu anceene, nave-tho wookilimaleliha wiixuttiha saana”.
7. Muhimye yowiiraneya emosa ya emusi yaathaamenle muttetthe woothowa anamalaleerya.
7 Itthoko: Niireke wira mwaha wookhalana anamwane, onnookhoottiheryani othaamela muttetthe woothowa anamalaleerya wira mwakhaliherye? Emusi emosa erina anamwane anli, a iyaakha 10, mukina orina iyaakha 8, yaaheererya othaamela mapuro makina. Maama aahilepa oriki: “Ninnihakalala waahuwa aniihu mapuro ala okhala wira annipatthana ni mapioneero a vameekhaaya, ni mamisionaario. Noophwanya mareeliho manceene mwaha wa orowa okhaliherya muttetthe woothowa anamalaleerya”.
8. Niireke wira vanniweryaneya othaamela mittetthe voohitthuneya wiixutta nttaava nikina? Mutthokiherye.
8 Muxankiho wa Nttaava: Niireke wira mwaha wa nttaava toniwooceelihani othaamela mapuro makina wira mwaakhaliherye? Mapuro oothowa anamalaleerya Omwene, waaniheryasa pooti nilavuliwaka nttaava nenno nyuwo munilavula anyu. Mulopwana mmosa ni mwaarawe yaawo anilavula Englexi, yaahithaamela elapo enilavuliwa Espanhola, weiwo ohireere atthu anilavula Englexi. Nuumala efiliyaali waahimeerya miloko sinceene sa Englexi satthuneya okhaliheriwa, awosa yaahithanla muloko mmosa waalavuliwa nttaava naya ni yaahixukurya ikwaha piili. Nuumala otthikela owaani, yaanisuka musurukhu khuta mweeri mpakha mwaakha mmosa. Nuumala etthoko ele wiilokiherya wira ethaamele mapuro ale, anna a muttetthe owo yahaakhaliherya ophwanya empa yaaliviwa musurukhu vakhaani.
9, 10. Exeeni anireerela aya othokorerya atthu yaale akhumme ilapo saya, ni nthowa xeeni?
9 Anamurwa: Niireke nyuwo mwa namurwa, wala muthaamenle esidade ekina ya oMoçambique, waaniheryasa muhinatthi wiixutta ekeekhai? Waaniheryasa, eprovinsia anyu wala edistritu anyu, annitthuneya vanceene anamalaleerya. Niireke mwaaniphavela otthikela mapuro ale wira mwaakhaliherye? Mwaha wa okhala elapo anyu, pooti okhala vookhweya ophwanya muteko ni nipuro nookhala onvikana mutthu onikhuma elapo ekina. Waaniherya nyuwo munnilavula nttaava na mapuro ale. Nto, atthu anoosiveliwa woowiriyanani mwaalaleeryaka Omwene wa Muluku, onvikana mutthu ori namurwa.
10 Mulopwana mmosa aakhuma wAlbania, aahithaamela wItalia ntoko namurwa, khuphwanya muteko wooloka, nto anaaroihela musurukhu amusi awe wAlbania. Nuumala wiixutta ekeekhai, owo aahipacerya wiixuttiha elavulelo ya wAlbania wa mapioneero a vameekhaaya yaakhuma wItalia, wira yakhaliherye mapuro oothowa anamalaleerya. Munna ole aahilepa oriki: “Mapioneero ale, yaanilaleerya mwa nthiti muttetthe yoole kaahin’ye aka. Awosa khiyaasuwela nttaava nne, masi yaahihakalala orowa mapuro ale. Nttaava naka ni soolimalela saka ti sa wAlbania. Nto kiirani wItalia?”. Munna ole, aahitthikela wAlbania wira akhaliherye olaleerya ihapari sooreera. Owo onihimya so: “Niireke wira kinnithanana mwaha wa ohiya muteko onikumiherya musurukhu wItalia? Nnakhala vakhaani! Koophwanya muteko wekeekhai wAlbania. Kinnikupali wira muteko wekeekhai ni onikumiherya ohakalala ori omurumeela Yehova ni itthu sotheene sirina ahu!”
11, 12. Etthu xeeni enireerela aya othokorerya atthu aniphavela othaamela mapuro oothowa anamalaleerya?
11 Itthu Sinireerela Oothokorerya: Paulo ni apatthani awe ahinatthi orowa oMasedonia, yaaphavela orowa ilapo sa wAsia; masi ‘yahikhottiheriwa ni [“munepa wottela”]’ nto khurowa elapo ya oBitinia. (Mit. 16:6, Biblya Exirima) Okathi yaattamenle aya oBitinia, Yesu ahaakhoottiherya. (Mit. 16:7) Yehova onnimurumeela Yesu wira ohooleleke muteko woolaleerya. (Math. 28:20) Nto, akhala wira munniphavela othaamela mapuro oothowa anamalaleerya, munvekele Yehova wira ookhaliheryeni.—Luka 14:28-30; Yak. 1:5; nwehe ekaaxa eni: “Mittetthe Muloko soothowa anamalaleerya oMoçambique”
12 Mwaavekeleke miruku axitokweene a mmulokoni ni maKristau akwiinyu anisiveliwa miteko sa Muluku. (Mir. 11:14; 15:22) Musomeke iliivuru sinilavula moota wookhaliherya ilapo sikina soothowa anamalaleerya, nave-tho, mutokoseke mittetthe sikina munuupuwela nyu. Nyuwo pooti orowa oxukurya muttetthe yoole oniphavela anyu othaamela, pooti okhala mahiku vakhaani paahi. Nto, akhala wira munniphavela tthiri othaamela muttetthe owo, pooti olepela ofiliyaali wira nvahiwe malakiheryo makina voohimya sa mapuro awo. Masi, muhaana waavahererya axitokweene a mmulokoni wira ahimye moonelo aya ahinatthi oruuha epaphelo eyo ofiliyaali.—Nwehe Esuplemento ya Orummwa Ahu wa Omwene wa Akosto 2007, epax. 4 etti. 6-epax. 5 etti. 3.
13. Makhaliheryo xeeni efiliyaali enivaha aya, masi muritti xeeni nyuwo murina anyu?
13 Efiliyaali enrowa woovahani malakiheryo ooloka voohimya sa muttetthe onrowa anyu; masi muhaana osuwela wira khenrowa wooliveryani empa yookhala wala itthu sinivarihana ni othaama wanyu. Okhala wira ola prokrama a mutthu mmensawe onireerela ompaka palano ooloka ohinatthi othaama. Atthu anithaama, ahaana okhalana moota woophwanya itthu sinikhaliherya erutthu aya, ni etthoko aya.—aGal. 6:5.
14. Ephoole xeeni enireerela ahu okhalana okathi ninthaamela ahu ilapo seiye ninkhoottiheriwa ahu olaleerya?
14 Moota Woolaleerya Ilapo Ninkhoottiheriwa ahu: Ilapo sikina, nthowa na olupatthiwa, anna anitthuneya okhalana ephoole yuulupale moota animukokhorela aya Yehova. (Math. 10:16) Anamalaleerya anixukurya wala othaamela mapuro ale, ahaana okhalana ephoole wira ahiwoonelelihe anna akhwa aya wala muteko woolaleerya wa atthu annilupattha. Akhala wira muniphavela othaamela ilapo ntoko iyo, muhaana olepa epaphelo yeeyo axitokweene a muloko anyu anrowa aya oroiha ofiliyaali ya elapo anyu, muhinatthi othaama.
15. Exeeni akhanle aya opakaka yaale ahiniwerya othaamela mapuro makina?
15 Akhala Wira Khamuniwerya Othaama: Ekeekhai wira atthu anceene khaniwerya orowa okhaliherya mittetthe sikina soothowa anamalaleerya. Akhala wira khamuniwerya othaamela mapuro makina, muhikhumuwe. Waaniheryasa, pooti ophwanya ‘murerelo mulupale onikhweiherya olaleya’. (1 aKor. 16:8, 9) Mutokweene a esirkwitu anyu, pooti asuwelaka mapuro a esirkwitu oothowa anamalaleerya; nto nyuwo pooti orowa okhaliheryaka nnaamwi muhithaamale. Waaniheryasa, pooti okhaliheryaka muloko wala ekrupu yaattamenle anyu. Wala pooti wunnuuherya muteko anyu woolaleerya hata muhikhumme muloko ori anyu. Nnaamwi mikhalelo sivirikanaka, etthu ya faita ori olaleerya ni murima anyu wotheene.—aKol. 3:23.
16. Naathokoreryeke sai anna aniivahererya okhaliherya mittetthe soothowa anamalaleerya?
16 Niireke wira moomusuwela munna wala murokora, oniphavela orumeela mapuro oothowa anamalaleerya a Omwene? Nto, mmukhaliheryeke ni omulipiha! Paulo aahikhuma wAntiyokiya ooSiria, esidade yaneeraru yuulupale ya olamulelo wa oRoma, (nuumala Roma ni Alexandriya). Okhala wira muttetthe ole waari muulupale, muloko wa Antiyokiya waanitthuneya okhaliheriwa ni Paulo, masi Paulo aamukhuma muttetthe ole. Hata vari siiso, Biibiliya khonihimya wira anna yaahimukhoottiherya Paulo okhuma mapuro ale. Masi yaanoona otthuneya waya olaleiwa masu okhala wira “ematta . . . olumwenku”.—Math. 13:38.
17. Xeeni vanitthuneya ahu othokorerya mwaha ola onihimya wira ‘murowe oMasedonia’?
17 Paulo ni akhwaawe, yaahiphwanya mareeliho manceene mwaha wa weemererya orowa oMasedonia. Ari ene oMasedonia, esidade ya oFilipi, yaahimphwanya Lidia, nto Yehova ‘ahimutthukula murima wira aiwexexe itthu sahimyawe Paulo’. (Mit. 16:14) Nkahaya muupuwele ohakalala Paulo ni apatthani awe a muteko yaarina aya vaavo Lidia ni atthu a etthoko awe yaabatiziwe aya! Ilapo sinceene, ahaavo atthu aniphavela wiixutta anilikana ni Lidia, yaawo nlelo ahisuwenle ihapari sooreera. Nto, akhala wira munoorowa “oMasedonia”, eyo piiyo, mittetthe soothowa anamalaleerya, munoophwanya ohakalala mwaha wowaakhaliherya atthu.
[Ekaaxa ipaaxina 5]
Mittetthe Muloko soothowa anamalaleerya oMoçambique
Edistritu Nttaava Atthu (2007) Anamalaleerya
Chiure, Cabo Delgado Macua 230.044 4
Sanga, Niassa Yao 56.282 0
Moma, Nampula Macua 329.181 3
Mag. da Costa, Zambêzia Chuabo 282.173 10
Changara, Tete Chichewa 156.738 31
Mossurize, Manica Shona 195.182 21
Chemba, Sofala Sena 65.107 44
Inharrime, Inhambane Chope 97.471 27
Chicualacuala, Gaza Tsonga 38.780 13
Namaacha, Maputo Tsonga 41.914 15
Nwehe: Sihaavo mittetthe sinceene sikina soothowa anamalaleerya oMoçambique. Xontte, mwaaphavelaka orowa okhaliherya mittetthe iyo, pooti olepela ofiliyaali.