“Munniwerya Wiixutta Sotheene Yehova Onoovahaaweni?”

1. Exeeni enooniherya wira Yehova onnivaha efaita wiixuttiha?

¹ Yehova ori “Mwixuttihi” ahu Muulupalexa, oniphavela wira nikhale atthu oowiixutta. (Yes. 30:20) Okhuma okathi yoole ompattunxe awe Mwanawe oopacerya, eyo piiyo, Yesu Kristu, Muluku aahipacerya wiixuttiha. (Yoh. 8:28) Nuumala Adamu ottheka, Yehova aahivikaniha owiixuttiha atthu. Moophenta, aahivikaniha waavaha malakiheryo apinaatamu oottheka.—Yes. 48:17, 18; 2 Tim. 3:14, 15.

2. Ekampaanya xeeni ya owiixuttiha atthu eniiraneya vano?

² Olelo va, Yehova onnikumiherya ekampaanya yuulupale ya owiixuttiha atthu. Ntoko aalavunle awe profeta Yesaya, imilyau sinceene sa atthu olumwenku wotheene, annirowa mwaako wa nthoonyeryo waatekiwe-vo empa ya Yehova. (Yes. 2:2) Nthowa xeeni? Wira yiixuttihiwe iphiro sa Yehova Muluku! (Yes. 2:3) Mwaakha wa muteko wa 2010, Anamoona a Yehova aaviriha iwoora sinivikana 1.6 ibilyau sene, alaleyaka ni owiixuttiha atthu ekeekhai ya mBiibiliyani. Nave-tho khuta esumana, miloko sinivikana 105.000, anniixuttihiwa atthu masu a Muluku. Ohiya-vo, murumeyi oororomeleya ni ankhili, onnipaka iliivuru sinimwiixuttiha Biibiliya, seiyo siniphwanyaneya mattaava anivikana 500.

3. Muttottenle sai mureerelo wiixuttiha Yehova onivaha awe?

³ Muttottele Mureerelo Oratteene: Tthiri, hiyo ninnaattottela mureerelo akursu anikumiheriwa ni Muluku! Mwaha wa eyo, nihiixutta wira Muluku ookhalana nsina ni toophenta. (Esal. 83:19; 1 Ped. 5:6, 7) Nave, nihiixutta waakhuliwa wa makoho maalupale voohimya sa okumi, ntoko ala: Nthowa xeeni atthu anihaawa aya ni okhwa? Kinrowa ophwanya sai ohakalala wekeekhai? Tiivi eri yoolakela ya okumi? Yehova oonivaha malakiheryo ooloka yaawo annikhaliherya, wira ‘nireriwe okathi wothene w’ekumi ahu’.—Yox. 1:8.

4. Akursu xeeni Muluku onaavaha awe arumeyi awe, nto xeeni vanitthuneya ahu wiixuttaka sotheene Yehova onnivaha awe?

⁴ Ohiya vo, Yehova onaakumiherya akursu a vameekhaaya yaawo aniwiiriha arumeyi awe wunnuuherya muteko aya weeKristau. Ipaaxina 4-6 sinniwooniherya akursu yaawo anna akina aniwerya aya owiira. Nnaamwi mikhalelo sahu sa vano sihineemereryaka owiira akursu awo, niireke wira ninnaattottela muraarelo akursu yaale nnaawerya ahu owiira? Niireke wira ninnaatumererya amiravo yaale ikwaha sinceene anikhanyereriwa ni maPrusoore ni atthu akina wira aphavelase osoma wuulupale wa mulaponi? Nihaana waakhaliherya wira akhalaneke soolukama sinimuhakalaliha Muluku weiwo ori osoma wuulupale, eyo piiyo, wiixuttihiwa ni Muluku. Wiixutta sotheene Yehova onnivaha awe, onoonikhaliherya ophwanya okumi woohakalaliha vano, ni muhoolo mwaya okumi woohimala.—Esal. 119:105; Yoh. 17:3.

Akursu Akina Anikumiheriwa ni Mulokiheryo wa Yehova

Exikola Eniixuttiha Osoma ni Olepa

• Yoolakela Aya: Owiixuttiha atthu osuwela osoma ni olepa, wira aweryeke omusoma ni omwiixutta Biibiliya aya vamosa ni owiixuttiha akina ekeekhai.

• Olekela Waya: Moovarihana ni mikhalelo sa mapuro awo.

• Opuro Oniiriwa Aya: Osalau ya Omwene.

• Ale Anilattuliwa Omwiira Kursu Ola: Anamalaleerya otheene ni atthu anooniherya osiveliwa ekeekhai.

• Moota Woowiirela Mpantta: Axitokweene ammulokoni tanilokiherya exikola ela moovarihana ni sootthuneya sa muloko. Nto awo annaatumererya otheene anireerela wira attottele mureerelo exikola.

Exikola ya Orummwa wa Muluku

• Yoolakela Aya: Owiixuttiha anamalaleerya “wira ‘yaasomiheke saana atthu ni olaleerya oratteene ihapari sooreera.

• Olekela Waya: Khula esumana.

• Opuro Oniiriwa Aya: Osalau ya Omwene.

• Ale Aniphwanelela Wiilepiha: Anamalaleerya Otheene. Nave, pooti wiilepiha atthu yaale ari mmulokoni anikupali sowiixuttiha sa Biibiliya ni aneettela malakiheryo a Muluku.

• Moota Woowiirela Mpantta: Mulavule ni mutokweene oniiriha Exikola ya Orummwa wa Muluku.

Exikola Eniixuttiha Nttaava na Elapo Ekina

• Yoolakela Aya: Owiixuttiha anamalaleerya moota woolaleya ihapari sooreera ni nttaava na elapo ekina.

• Olekela Waya: Myeeri 4 wala 5. Ikwaha sinceene kursu aya oniiriwa Saabadu voosiisu ni khula yoosoma enikhala ewoora emosa wala piili.

• Opuro Oniiriwa Aya: Ikwaha sinceene exikola ela eniiriwa Osalau ya Omwene.

• Ale Aniphwanelela Wiilepiha: Anamalaleerya arina ekumi yooloka yaale aniphavela olaleerya ni nttaava na elapo ekina.

• Moota Woowiirela Mpantta: Kursu aya onilokiheriwa ni efiliyaali, moovarihana ni otthuneya waya.

Oteka Isalau sa Omwene

• Yoolakela Aya: Oteka ni olokiherya Isalau sa Omwene. Ela khahiyo exikola, masi ale aniivahererya oteka Isalau anniixuttihiwa inamuna sinceene sa oteka; nto inamuna iyo sinnaakhaliherya osuwela moota wooteka.

• Olekela Waya: Moovarihana ni makhalelo a munna owo wiivaherenrye.

• Opuro Oniiriwa Aya: Khuta nipuro ninthanliwa ni Ekomisau ya Muteko Wooteka Mmuttettheni. Anna akina owiivahererya pooti olattuliwa waakhaliherya atthu aphwanyiwe ihasara mapuro oorakamela.

• Ale Aniphwanelela: Anna ni arokora oobatiziwa yaawo aneemereriwa ni nikhuuru na axitokweene a mmulokoni. Anna ala pooti okhala yaale anisuwela wala ahinisuwela oteka ipa.

• Moota Woowiirela Mpantta: Nuumala waavekela axitokweene epaphelo eni: Petição Para o Serviço Voluntário em Construções de Salões do Reino (A-25-T), mmalelihe olepa mpapheloni mmo.

Exikola ya Muteko wa Opioneero

• Yoolakela Aya: Waakhaliherya mapioneero wira ‘anvareleke Muluku muteko womalela’.—2 Tim. 4:5.

• Olekela Waya: Isumana piili.

• Opuro Oniiriwa Aya: Onithanliwa ni efiliyaali; ikwaha sinceene exikola ela eniiriwa Osalau ya Omwene.

• Ale Aniphwanelela: Anna ni arokora amalinhe mwaakha mmosa aryeene mapioneero ookilaatheya.

• Moota Woowiirela Mpantta: Mapioneero aniphwanelela, annilattuliwa ni mutokweene a esirkwitu.

Exikola ya Anna Anipacerya Orumeela oBetheli

• Yoolakela Aya: Exikola ela enipakiwa wira yaakhaliherye anna aphin’ye niinano oBetheli wira avareke saana muteko ovahiwe aya.

• Olekela Waya: Isumana 16. Khula esumana, enisommwa ewoora emosa.

• Opuro Oniiriwa Aya: OBetheli.

• Ale Aniphwanelela: Anna ni arokora yeemereriwe okhala oBetheli okathi wotheene, wala ale yeemereriwe okhala okathi vakhaani (eyaakha emosa wala ovikana).

• Moota Woowiirela Mpantta: Khuta Bethelita oniphwanelela, onnilattuliwa aphiya.

Exikola ya Orummwa wa Omwene

• Yoolakela Aya: Owiixuttiha axitokweene ni arummwa oorumeela weettiha saana miritti avahiwe aya mmulokiheryo wa Yehova. (Mit. 20:28) Exikola ela enipakiwa nuuvira iyaakha vakhaani; nto okathi ene onithanliwa ni Nikhuuru Noolamulela.

• Olekela Waya: Iyaakha sivinre niinano, exikola ela yaapakiwe nihiku nimosa ni nimeya wa axitokweene, ni nihiku nimosa wa arummwa orumeela.

• Opuro Oniiriwa Aya: Ikwaha sinceene exikola ela eniiriwa Osalau ya Omwene wala Esalau ya Muthukumano Muulupale.

• Ale Aniphwanelela: Axitokweene wala arummwa oorumeela.

• Moota Woowiirela Mpantta: Axitokweene ni arummwa oorumeela oophwanelela annilattuliwa ni mutokweene a esirkwitu.

Exikola ya Axitokweene a Mmulokoni*

• Yoolakela Aya: Waakhaliherya axitokweene ovara saana miteko avahiwe aya mmulokoni.

• Olekela Waya: Mahiku mathanu.

• Opuro Oniiriwa Aya: Onithanliwa ni efiliyaali; ikwaha sinceene exikola eyo eniiriwa Osalau ya Omwene wala Esalau ya Muthukumano Muulupale.

• Ale Aniphwanelela: Ahaana okhala axitokweene.

• Moota Woowiirela Mpantta: Axitokweene aniphwanelela annilattuliwa ni efiliyaali.

Exikola ya Axitokweene Ooweetteetta ni Axaaraya*

• Yoolakela Aya: Waakhaliherya axitokweene a esirkwitu ni a edistritu ovara saana muteko avahiwe aya wa orumeela miloko ni ‘ohawela [okhalela nthithi] muteko w’olaleya ni wo wixuttiha’. Nave-tho, exikola ela ennaakhaliherya okukhula saana ipwittipwitthi sa Muluku.—1 Tim. 5:17; 1 Ped. 5:2, 3.

• Olekela Waya: Myeeri miili.

• Opuro Oniiriwa Aya: Onithanliwa ni efiliyaali.

• Ale Aniphwanelela: Axitokweene a esirkwitu wala a edistritu.

• Moota Woowiirela Mpantta: Axitokweene ooweetteetta ni axaaraya yaale aniphwanelela annilattuliwa ni efiliyaali.

Exikola ya Biibiliya ya Anna Oohithela*

• Yoolakela Aya: Waareherya axitokweene ni arummwa oorumeela oohithela wira yincererye miritti sirinaaya. Nuumala kursu ola, anamunceene mwa anna ala, annithanliwa orowa orumeela mapuro a elapo aya yaale anitthuneya anamalaleerya. Nto, anna vakhaani pooti othanliwa orowa orumeela elapo ekina akhala wira annaakhulela.

• Olekela Waya: Myeeri miili.

• Opuro Oniiriwa Aya: Onithanliwa ni efiliyaali; ikwaha sinceene onikhala Osalau ya Muthukumano Muulupale wala Esalau ya Omwene.

• Ale Aniphwanelela: Ahaana okhala anna oohithela arina iyaakha 23 mpakha 62, arina ekumi yooloka, ni aniphavela waarumeela anna ni opaceriha soophavela sa Omwene khuta nipuro nootthuneya. (Mar. 10:29, 30) Masi vahinatthi, ahaana oviriha iyaakha piili arumeelaka ntoko mutokweene wala murummwa oorumeela.

• Moota Woowiirela Mpantta: Akhala wira exikola ela enrowa wiraneya ofiliyaali ya elapo anyu, onookhala muthukumano wa ale aniphavela wiilepiha exikola ela, okathi wa muthukumano wa esirkwitu. Itthu sikina sinivekeliwa sinnihimmwa mmuthukumano owo.

Exikola ya Biibiliya ya MaKristau Oothela*

• Yoolakela Aya: Waavaha malakiheryo a vameekhaaya anna oothela wira arumeeliweke saana ni Yehova vamosa ni mulokiheryo awe. Nuumala kursu ola, anamunceene mwa anna ala, annithanliwa orowa orumeela mapuro a elapo aya yaale anitthuneya anamalaleerya. Nto, anna vakhaani pooti othanliwa orowa orumeela elapo ekina akhala wira annaakhulela.

• Olekela Waya: Myeeri miili.

• Opuro Oniiriwa Aya: Akursu vakhaani yiiriwe, apakiwe Centro de Educação Bíblica Patterson, Nova Iorque, EUA. Muhoolo, animwiiriwaka mapuro anrowa othanliwa ni efiliyaali, vanceenexa Osalau ya Muthukumano Muulupale wala Osalau ya Omwene.

• Ale Aniphwanelela: Anna oothela arina iyaakha 23 mpakha 50, ni arina ekumi yooloka. Mikhalelo saya, sihaana oweemererya orumeela khuta opuro onitthuneya anamalaleerya, ni ophavela omutakiha Yesaya, aahimmye so: “Miyo kiri va: kirumekeni”. (Yes. 6:8) Ohiya-vo, anna ala ahaana oviriha iyaakha piili nuumala othela, ni akhale yaale nlelo anirumeela mmuteko wa okathi wotheene, ni avirinhe iyaakha piili arumeelaka.

• Moota Woowiirela Mpantta: Akhala wira exikola ela enrowa wiraneya ofiliyaali ya elapo anyu, onookhala muthukumano wa ale aniphavela wiilepiha exikola ela, okathi wa muthukumano wa esirkwitu. Itthu sikina sinivekeliwa sinnihimmwa mmuthukumano owo.

Exikola Enimwiixuttiha Biibiliya ya oGileadi

• Yoolakela Aya: Waalakiherya mapioneero ni anna akina a muteko wa okathi wotheene, wira akele muteko wa omisionaario.

• Olekela Waya: Myeeri mithanu.

• Opuro Oniiriwa Aya: Centro de Educação Bíblica, Patterson, Nova Iorque, EUA.

• Ale Aniphwanelela: Anna oothela ni avirinhe iyaakha tthaaru abatiziwe ene, arina iyaakha sinikhuma 21 mpakha 38, okathi animaleliha aya olepa eformulaario aya yoopacerya. Ohiya-vo, anna ala ahaana olavulaka Enkelexi, nave-tho, ahaana oviriha iyaakha piili nuumala othela, ni akhale yaale nlelo anirumeela mmuteko wa okathi wotheene, ni avirinhe iyaakha piili arumeelaka. Anna ala ahaana okhalana ekumi yooloka. Nave-tho, pooti ovahererya eformulaario aya akhala wira annimaleliha itthu sinivekeliwa anna ala anittharelana: mapioneero anirumeela elapo ekina, (waahela muhina ale anivara muteko onilikana ni omisionaario); axitokweene ooweetteetta; anna anirumeela oBetheli; anna amwinre kursu a Exikola ya Biibiliya ya Anna Oothela, ni Exikola ya Biibiliya ya Anna Oohithela yeele khalai yiiriwa Exikola Eniixuttiha Muteko wa Orummwa.

• Moota Woowiirela Mpantta: Ifiliyaali seemereriwe, onnipakiwa muthukumano wa ale aniphavela orowa exikola ela okathi wa muthukumano wa edistritu. Itthu sikina sinivekeliwa sinnihimmwa mmuthukumano owo. Akhala wira okathi wa muthukumano wa edistritu elapo anyu khonkhala muthukuman ola, masi nyuwo khiyaphavela exikola ela, pooti olepela efiliyaali anyu wira musuwele itthu sikina.

Exikola ya Anna a Ekomisau ya Efiliyaali ni Axaaraya

• Yoolakela Aya: Waakhaliherya anna anirumeela Ekomisau ya Efiliyaali ovara saana muteko avahiwe aya wa oweherya eBetheli, osuwela myaha sinireerela olakiherya miloko, waalakiherya axitokweene a esirkwitu ni a edistritu mittetthe anirumeela aya. Ohiya vo, wiixuttihiwa moota woolakiherya edepartamento enitaphulela iliivuru sahu, wimpirimiri, oroihiwa wa iliivuru mmilokoni ni oweherya idepartamento sinceene.—Luka 12:48b.

• Olekela Waya: Myeeri miili.

• Opuro Oniiriwa Aya: Centro de Educação Bíblica, Patterson, Nova Iorque, EUA.

• Ale Aniphwanelela: Anna yaale anirumeela wala anrowa orumeelaka ntoko munna a Ekomisau ya Efiliyaali wala Ekomisau ya Elapo ehikhale eBetheli.

• Moota Woowiirela Mpantta: Anna oophwanelela ni axaaraya annilattuliwa ni Nikhuuru Noolamulela.

[Inoota]

Nenna-va ilapo sikina exikola ela khekhanle.

Nenna-va ilapo sikina exikola ela khekhanle.

Nenna-va ilapo sikina exikola ela khekhanle.

Nenna-va ilapo sikina exikola ela khekhanle.