Mukhalelo Wootepa Otthuneya wa Mulipa Osuwela Wiixuttiha Saana
1. Mukhalelo xeeni ori wootepaxa otthuneya wa mulipa oosuwela wiixuttiha saana?
1 Etthu xeeni enimwiiriha mutthu okhala oosuwela omwiixuttiha saana Biibiliya? Niireke wira osoma wa mulaponi? Olimalela osomiha? Aahiiso osuwela wooyaraniwa? Nnaari. Ophenta ti etthu enikhaliherya, okhala wira Mukhalelo owo tonimaleliha Nlamulo nenne nnasuwanyeiha atthareli a Yesu. Maana ophenta ti mukhalelo muulupalexa wa Muluku. (Yoh. 13:35; aGal. 5:14; 1 Yoh. 4:8) Tivonto mulipa oosuwela wiixuttiha ohaana okhalaka oophenta.
2. Xeeni vari aya vootthuneya wiimananiha waaphenta atthu?
2 Mwaaphenteke Atthu: Mwaha wa waaphenta atthu, Yesu yoowo ori Mwiixuttihi Muulupale, aaniwiriyana ele atthu awo yaahimya aya. (Luka 5:12, 13; Yoh. 13:1; 15:13) Waathokorerya atthu onooniiriha ophavelaka waalaleerya khuta okathi onireerela. Nto mixankiho ntoko olupatthiwa wala ohicaleliwa, khasinrowa onikhoottiherya olaleerya. Tivonto vanitthuneya ahu waathokoreryaka saana atthu yaale anaalaleerya ahu, ni olokiherya saana malavulelo ahu wira niwerye waakhaliherya. Nihaana waavya okathi woolokiherya khuta yoosoma enrowa ahu wiiriha, ohiya waavya okathi paahi woowiiriha yoosoma ya Biibiliya.
3. Moota xeeni ophenta ekeekhai eri mBiibiliyani onnikhaliherya aya mmuteko ahu woolaleerya?
3 Mphenteke Ekeekhai Eri mBiibiliyani: Yesu aaniphenta-tho ekeekhai eri mBiibiliyani ni oona okhala etthu ya muhakhu muulupale. (Math. 13:52) Akhala wira hiyo ninniphenta ekeekhai, ninrowa olavulaka moohakalala, nto eyo enowiirihaka atthu awo ophavelaka wiiwa. Ophenta wa moota owo ononiirihaka ovaha efaita masu aniixuttiha ahu, ohiya omakelaka wuupuwela itthu sihiniwerya ahu, nto eyo enoonikhaliherya ovukula woova naalaleeryaka.
4. Ninrowa wunnuuherya sai ophenta wahu?
4 Munnuuherye Ophenta Wanyu: Ninrowa wunnuuherya sai waaphenta wahu atthu? Nilattihaka ophenta wa Yehova ni wa Mwanawe, ni noonelaka othunku ohaawa wa atthu a muttetthe ahu mwaha woohisuwela ekeekhai. (Mar. 6:34; 1 Yoh. 4:10, 11) Ophenta wahu ekeekhai eri mBiibiliyani onrowa wunnuwaka orweela mwa yoosoma ahu yookilaatheya ni wuupuwelela saana ele enisoma ahu. Ophenta, ti enamuna emosa ya yoowiima ya munepa wa Muluku. (aGal. 5:22) Nto nihaana oveka wa Yehova wira onivahe munepa awe wootteela wira ninnuuherye ophenta wahu. (Luka 11:13; 1 Yoh. 5:14) Hata niryeene wala nihikhanle atthu oosomexa, alimalenle osomiha ekeekhai, wala arina osuwela wooyaraniwa, hiyo nnoowerya okhala mulipa oosuwela osomiha saana akhala wira ninnooniherya ophenta.