Inamuna Tthaaru Siniiriha Wiixuttiha Saana
1. Xeeni vanireerela ahu ophavelaka wiixuttiha saana?
1 Anamalaleerya otheene alipa owiixuttiha. Naalaleeryaka khuta empa, opaka mikwaha sootthikela oxukurya, wala wiiriha soosoma sa Biibiliya, nnimwiixuttiha. Masu anilaleya ahu tootthuneya. Hiyo ninnitthokiherya “solempwa sowarya” seiyo sinaaphwanyiha atthu ankhili wira ‘yòpowe’. (2 Tim. 3:15) Tthiri ela eparakha yuulupale! Nrowe niwehe inamuna tthaaru siniiriha wiixuttiha saana.
2. Ninrowa wiixuttiha sai mookhweiherya?
2 Okhweiherya: Nnaamwi nisuwelaka saana itthu sinilaleya ahu, nihiliyaleke wira atthu akina pooti waavila osuwela. Tivonto, okathi oniiriha anyu yoosoma ya Biibiliya, muhilavuleke itthu sinceene sihintthuneya. Masi, muttittimiheryeke iponto suulupale. Olavula vanceene khonitaphulela wiixuttiha saana. (Mir. 10:19) Musomeke paahi soolepa sinittittimiherya iponto suulupale. Mwasoma yoolepa, muttittimiheryeke paahi eponto enivarihana ni mwaha onilavula anyu. Mwaha Yesu alavunle awe oMwaako, ori mMatheyo ikapiitulu 5- 7, wookhalana ikeekhai suulupale, masi Yesu aahilavula mookhweiherya ni othanla masu ooloka.
3. Efaita xeeni malikanyiho arina aya, ni malikanyiho xeeni ari ooloka?
3 Malikanyiho: Malikanyiho anniiriha wuupuwela, ovara murima ni annikhaliherya ohiliyala. Khivantthuneya okhala nahantisi wira musuwele orumeela saana malikanyiho. Ikwaha sinceene, Yesu aarumeela malikanyiho ookhuveya ni oohixankiha. (Math. 7:3-5; 18:2-4) Opaka elatarato vapapheloni nitakiheryaka etthu, pooti okhaliherya vanceene. Mwaitthokiha saana, munoowerya opaka malikanyiho oovara murima.
4. Ninrowa orumeela sai makoho moovara murima?
4 Makoho: Makoho annimwiiriha ole onimusomiha anyu wuupuwelela. Tivonto, mpixeke murima mwapaka nikoho. Mwaakuvela waakhula, khamunrowa osuwela saana akhala wira ole onimusomiha anyu onniiwexexa. Aahaakhule saana, mpake makoho makina wira ophwanye mmensawe waakhuliwa waya ohiya omuleeliha mowaakuveya. (Math. 17:24-27) Ekeekhai wira hiyo khahiyo mwiixuttihi oomalela. Tivonto Biibiliya onnitumererya awe wiipasoopa mmoota oniixuttiha ahu. Niira siiso, nnoophwanya okumi woohimala vamosa ni ale anniwiriyana.—1 Tim. 4:16.