Muttottele Mureerelo Ekrupu Anyu ya Muteko Woolaleerya
1. Mireerelo xeeni sa Yowiixutta ya Eliivuru ya Mmulokoni nlelo siniphwanyaneya orweela mwa ekrupu ahu ya muteko woolaleerya?
1 Nyuwo munnuupuwela Yowiixutta ya Eliivuru ya Mmulokoni? Mwa ntakiheryo, ikrupu saari saamukhaani ni soomaaleleya. Eyo yaanikhweiherya opatthani weiwo waanikhaliherya olipiha waamini wahu. (Mir. 18:24) Ohiya-vo, mutokweene a yowiixutta ya eliivuru aanisuwela mixankiho sahu ni aaniwerya omukhaliherya khula mutthu. (Mir. 27:23; 1 Ped. 5:2, 3) Nto, mireerelo iyo nlelo sinniphwanyaneya orweela mwa ekrupu ahu ya muteko woolaleerya.
2. Ninrowa wunnuuherya sai opatthani eriyari ya ekrupu ahu ya muteko woolaleerya wira nilipihaneke mukina ni mukhwaawe?
2 Mpaceriheke: Ikrupu sa muteko woolaleerya sinoolikana ni ikrupu sa Yowiixutta ya Eliivuru. Akhala wira munoolaleerya ni “murima mmosaru” ni anna akina, eyo enookumiherya opatthani wekeekhai. (aFil. 1:27) Nto, atthu akavi a ekrupu anyu mutonko anyu orowana olaleerya? Niireke munoowerya ‘watthukulela murima anyu’? (2 aKor. 6:13) Nave-tho, pooti omulattula mutthu mukina a ekrupu ahu wira nikhale vamosa okathi Woomulompa Muluku vatthokoni, wala okathi wa eyoolya. Miloko sikina sinnirumeela ikrupu sa muteko woolaleerya wira emwaakhele mulipa oolavula mwaha onixukurya. Mwa esumana enirowa aya oxukuriwa, ekrupu ennithukumana wira elye hoothe ni olipihana, pooti mulipa oolavula mwaha owo ohirowaka okhala okathi wa eyoolya eyo.
3. Moota xeeni nikhanle ahu ooxukuriwa ni axitokweene a ekrupu ahu ya muteko woolaleerya?
3 Nnaamwi mahiku ala muloko othukumanaka ikwaha piili vasumanani, eyo khentaphulela wira anamalaleerya ahaana oxukuriwaka vakhaani ni axitokweene. Khula ekrupu annithanliwa axitokweene wira amulipiheke khula namalaleerya ni wiixuttiha moota woolaleerya. Akhala wira mutokweene a ekrupu anyu nlelo khopanke eprokrama wira murowane olaleerya, nyuwo pooti onvekela wira mwalaleerye hoothe. Ohiya-vo, mutokweene oniwerya muteko woolaleerya, onnilaleerya ni ekrupu yoovirikana woomalani wa esumana khula mweeri. Nto, miloko saamukhaani sirina ikrupu vakhaani, mutokweene owo onnixukurya khula ekrupu ikwaha piili vamwaakhani. Niireke nyuwo munniilokiherya wira murowe olaleerya vaavo mutokweene owo onixukurya awe ekrupu anyu?
4. (a) Moota xeeni mithukumano sa olaleerya sinilokiheriwa aya? (b) Xeeni nikhanle ahu oweemererya orumeeliwa empa ahu wira sipakiweke mithukumano sa olaleerya?
4 Vannireerela wira khula ekrupu ethukumaneke mekhaya yaarowaka olaleerya wuumalani wa esumana. Akhala wira ikrupu sa muteko woolaleerya sinoothukumana mapuro oovirikana masi okathi omosaru, eyo enimwaakhweiherya anamalaleerya orowa muthukumano woolaleerya. Nave-tho, eyo enimwiiriha wira anamalaleerya etthokihiwe mowaakuveya ni orowa muttetthe woolaleerya moohipisa. Ohiya-vo, eyo enoomukhweiherya mutokweene oniwerya ekrupu waakhaliherya oratteene ale a ekrupu awe. Masi, pooti okhala mathowa makina yaarowa wiiriha ikrupu piili wala soovikana othukumana opuro omosaru. Nto, akhala wira muloko wotheene onithukumana hoothe eSaabadu yoopacerya ya khula mweeri, wala nuumala yoosoma ya A Sentinela (Owehaweha), vanitthuneya wira khula ekrupu evalaaneke ni ikrupu sikina okathi vakhaani. Nto mutokweene a ekrupu ovahiwe minutu vakhaani wira olokiherye ekrupu awe vahinatthi opakiwa nivekelo na muthukumano wa olaleerya.—Nwehe ekaaxa eni: “Empa Anyu Yookhala Oorumeeliwa?”
5. Nnaamwi marehereryo a Yowiixutta ya Eliivuru ya Mmulokoni amanle ene, exeeni enitthuneya ahu ororomela?
5 Nnaamwi marehereryo a Yowiixutta ya Eliivuru ya Mmulokoni amanle ene, Yehova onnivikaniha onikhaliherya wira nipakeke yootthuna awe. (aHéb. 13:20, 21) Nto nikhaliheriwaka ni Yehova, khiivo ennithowa. (Esal. 23:1) Tthiri, mareeliho manceene anniphwanyaneya orweela mwa ekrupu ya muteko woolaleerya. Nto, akhala wira nnoopaceriha opaka etthu ni ‘wàla vanjene’, ninrowa ‘ohepha vanjene’.—2 aKor. 9:6.
[Ekaaxa epaaxina 6]
Empa Anyu Yookhala Oorumeeliwa?
Miloko sikina sinnithukumana ni ikrupu sotheene woomalani wa esumana mwaha woowi muttetthe aya woolaleerya khoreere oyeva. Mithukumano sa muteko woolaleerya siniirela mpantta marehereryo a muloko. Nto okhalana mithukumano iya owannyihu eri eparakha yuulupale. Niireke empa anyu yookhala oorumeeliwa? Muhixanke akhala wira empa anyu khahiyo yooreerexa. Axitokweene anirowa othokorerya muttetthe oniphwanyaneya aya empa anyu ni itthu sikina ntoko siira aya okathi wa yowiixutta ya eliivuru. Nto, akhala wira muniphavela wira empa anyu erumeeliwe, mmuleele mutokweene a ekrupu anyu.