Mithukumano sa Muteko Woolaleerya Seiyo Sinaakhwaniherya Yoolakela Aya
1. Yoolakela xeeni erina aya mithukumano sa muteko woolaleerya?
1 Okathi omosa, Yesu aahithukumana ni awiixutti awe 70 ahinatthi orowa olaleerya. (Luk. 10:1-11) Owo aahaalipiha vaavo aawuupuxenrye awe wira khiyaakhanle mekhaya. Masi yaamukhala ni “Mwanene ematta”, Yehova. Yesu aahaavaha-tho malakiheryo a moota woovara muteko, ni khwaaruma orowa “anli-ànli”. Olelo-va, mithukumano sa muteko woolaleerya sookhalana yoolakela emosaru: onilipiha, oniixuttiha ni onitthokiha.
2. Okhuma mweeri wa Abril, muthukumano wa muteko woolaleerya onrowa okhalana minutu mikavi?
2 Mpakha vano, mithukumano sa olaleerya sinimaliha minutu 10 wala 15. Okathi owo, sinnitthokihiwa igrupu, muttetthe woolaleerya ni opakiwa nivekelo. Masi okhuma Abril, muthukumano wa muteko woolaleerya onrowa okhalaka wa minutu 5 mpakha 7. Nave, akhala wira muthukumano ola onipakiwa nuumala muthukumano mukina wa mmulokoni, nto ohaana opakiwa mowaakuveya maana anna awiriyanne niinano myaha sa mBiibiliyani. Opaka muthukumano wa olaleerya ohinipisa onimwaakhaliherya otheene olaleerya vanceene. Ohiya-vo, akhala wira mapioneero wala anna akina aapacerya olaleerya ohinatthi muthukumano wa olaleerya, anrowa ohiyereryaka olaleerya iwo mwa okathi vakhaani paahi.
3. Mithukumano sa muteko woolaleerya sitthokihiweke sai?
3 Mithukumano sa muteko woolaleerya sihaana otthokihiwa mwa enamuna enaakhaliherya aya anna. Miloko sinci sinnoona oreerela wira igrupu sa muteko woolaleerya sithukumaneke mapuro oovirikana. Eyo pooti waakhweiherya anna orowela muthukumano ola ni orowa olaleerya. Nave, vannikhweya waatthokiha anna, ni ennaakhaliherya axitokweene a igrupu omukhapelela khula munna. Nikhuuru na axitokweene nihaana oweha makhalelo a mapuro awo ni othanla etthu yooreerela. Ohinatthi omalihiwa muthukumano ni opakiwa nivekelo noohipisa, atthu otheene ahaana osuwela muttetthe ni ole anrowana aya.
4. Xeeni mithukumano sa muteko woolaleerya siri aya sootthuneya ntoko mithukumano sikina?
4 Ti Sootthuneya Ntoko Mithukumano Sikina sa Mmulokoni: Okhala wira mithukumano sa muteko woolaleerya sinipakiwa mmureerelo wa ale anrowa olaleerya, nto sihipakiweke ohoolo wa atthu otheene. Masi eyo khentaphulela wira sihaana wooniwaka ntoko etthu ehirina efaita. Mithukumano sa muteko woolaleerya ti yoovaha ya Yehova wira nilipihaneke ni ophentana mukina ni mukhwaawe ni ovara miteko sooreera. (aHéb. 10:24, 25) Nto ole onihoolela ohaana wiilokiherya saana wira muthukumano owo onvuwihe Yehova ni waakhaliherya ale ari opuro owo. Vaaweryaneyaka, otheene yaale anirowa olaleerya ahaana ophwanyaneyaka muthukumano ola.
5. (a) Muteko xeeni orina awe mutokweene oniweherya muteko woolaleerya voohimya sa otthokiha mithukumano sa orowa olaleerya? (b) Moota xeeni arokora akhanle aya oowiiriha muthukumano wa olaleerya?
5 Wiilokiherya wa Ole Oniiriha: Wira mutthu olokiherye saana epantte awe, ohaana osuwela vahinatthi. Eyo enlikanasa ni mithukumano sa olaleerya. Vaavo igrupu sa muteko woolaleerya sinithukumana aya mapuro oovirikana, ahooleli a igrupu iyo wala anamakhaliherya aya ahaana ohoolela. Masi, vaavo muloko wotheene onithukumana aya opuro omosa, mutokweene oniweherya muteko woolaleerya ohaana omuthanla munna onrowa wiiriha. Axitokweene akina aniweherya muteko woolaleerya annaavaha eprograma anna aniiriha muthukumano ola ni annihela vakwaaduruni va soohimmwa eprograma eyo. Wira muthukumano ola okhale wooloka, onlipa ni ale aniiriha akhala wira anniixuttiha ni otthokiha saana. Nto mutokweene oniweherya muteko woolaleerya okhaleke a miruku vaavo onaathanla awe anna awo. Akhala wira mahiku makina khonikhala mutokweene, murummwa oorumeela, wala munna oobatiziwa oophwanelela, mutokweene oniweherya muteko woolaleerya ohaana omuthanla murokora oobatiziwa oophwanelela wira ohoolele muthukumano owo.—Moone muru oni: “Akhala Wira Murokora Toniiriha Muthukumano”.
6. Xeeni vanitthuneya awe wiilokiherya saana ole oniiriha muthukumano wa muteko woolaleerya?
6 Vaavo ninvahiwa ahu epantte ya Exikola ya Orummwa wa Muluku wala Muthukumano wa Orummwa, ninnivaha efaita ni olokiherya saana. Waaniheryasa khuuvo aarowa olipelela opacerya weetta orowaka omuthukumanoni wira uupuwelele ele enirowa awe olavula. Moolikanasa, ole othanliwe wiiriha muthukumano ola ohaana wiilokiheryaka saana, maana okathi wa muthukumano onookhalaka vakhaani. Ohiya-vo eyo enookhaliherya wira muthukumano okhale woolipiha ni omaleke okathi wooreerela. Nave, wiilokiherya saana onooniiriha osuwela vahinatthi muttetthe woolaleerya.
7. Itthu xeeni ole oniiriha muthukumano okhanle awe oolavula okathi wa muthukumano wa olaleerya?
7 Myaha Soolavula: Okhala wira mikhalelo sinnivirikana khula muttetthe, murumeyi òroromeleya, khonilokiherya esbosu ya muthukumano wa olaleerya. Ekaaxa eni: “Myaha Soothokorerya Okathi wa Muthukumano wa Olaleerya” ennivaha malakiheryo makina. Okhala wene, muthukumano ola ohaana opakiwa ntoko mwaha ni makoho vakhaani. Okathi mukina pooti opakiwa yowooniherya yoolokiheriwa saana wala eviidiyu ya jw.org enivarihana ni olaleerya. Okathi oniilokiherya awe, ole oniiriha muthukumano ohaana wuupuwelela ele enirowa waalipiha ni waatthokiha ale anirowa olaleerya nihiku nle.
8. Itthu xeeni sinireerela olavula okathi wa muthukumano wa olaleerya wuumalani wa esumana?
8 Mwa ntakiheryo, eSaabadu anna annivaha irevista Owehaweha ni Despertai! Anamunceene anirowa olaleerya eSaabadu khanikhuma eriyari ya esumana, nto pooti waaxankiha wuupuwela olaleerya wookhweya yaalokihenrye aya okathi wa omulompa Muluku vatthokoni. Nto ole oniiriha muthukumano pooti wuuluula olaleerya wookhweya onikhumela epaaxina yookiserya ya Orummwa ahu wa Omwene. Nave, pooti orumeela ihapari sa muttetthe owo, yowiiraneya, wala eferiado wira nikawe irevista, aahiiso opaka nikoho ninrowa onikhaliherya otthikela ovaanela ni mutthu owo akhala wira oheemya irevista. Akhala wira anna akina aarumeela irevista sa mweeri owo, ole oniiriha pooti waavekela anna wira ahimye malakiheryo makina wala sowiiraneya soolipiha. Ettiminku, mulipa oniiriha muthukumano pooti othanla opaka etthu emosaru voohimya sa yoovaha ya mweeri owo. Eliivuru Biibiliya Oniixuttiha Exeeni ni ibroxura Ihapari Sooreera ni Munwiriyaneke Muluku, pooti okaiwa khula nihiku. Nto ole oniiriha muthukumano pooti mowaakuveya ohimya moota wookawa iliivuru iyo.
9. Vaavo muloko onipaka aya ekampaanya ya vameekhaaya wuumalani wa esumana, exeeni enitthuneya othokoreriwa?
9 Vaavo muloko onipaka aya ekampaanya ya vameekhaaya wuumalani wa esumana, ole oniiriha muthukumano pooti othokorerya moota wookawa irevista vamosa ni nlattulo wala efolyeeto, aahiiso pooti otthokiherya etthu yoolavula vaavo vanimphwanya ahu mutthu onisiveliwa ekeekhai. Etthu ekina ti ohimya sowiiraneya sinooniherya otthuneya waya ikampaanya iyo.
10, 11. Xeeni anamalaleerya anitthuneya aya wiilokiherya wira muthukumano wa muteko woolaleerya okhumele saana?
10 Wiilokiherya wa Anamalaleerya: Wira mithukumano sa olaleerya sikhumele saana anamalaleerya nave ahaana wiilokiherya. Wiilokiherya vahinatthi, waaniheryasa okathi wa omulompa Muluku vatthokoni, onimwaakhaliherya ohimya etthu okathi wa muthukumano. Wiilokiherya saana onihela muhina okhalana irevista ni iliivuru vahinatthi, wira otheene ahu nikhume moohipisa nuumala muthukumano.
11 Nave-tho ti vootthuneya ophiya muthukumano ohinatthi opacerya. Moohaaniherya, hiyo ninnimananiha ophiya okathi wooreerela wa mithukumano sotheene. Nto, pooti owaakanyerya akina vaavo nimpisa ahu ophiya. Moota xeeni? Munna onihoolela onnithokorerya itthu sinci ohinatthi otthokiha egrupu. Akhala wira anna ari vakhaani, owo onnimuthanla khula munna wira orowe muttetthe ovariwe muteko vakhaani. Akhala wira akina arimweetta wira ephiye omuthukumanoni, wala muttetthe woolaleerya ti woorakamela, owo pooti waakawa anna awo wira akhume ni ale arina mikukutta. Muttetthe wakhala wowoopiha mwaha wa ikrime, owo pooti waathanla anna wira yalaleeryeke vakhiviru ni egrupu ya arokora. Anamalaleerya aniwereiwa pooti othanliwa wira evareke mphironi wala ipredio saamukhaani. Anamalaleerya asya pooti othanleliwa anna oolimalela. Masi akhala wira anna annipisa ophiya, mareheryo awo annirukunuxiwa mwaha wa ale apinse ophiya. Ekeekhai wira ikwaha sikina pooti okhalana mathowa ookhalela anniiriha opisa ophiya. Masi akhala wira opisa ophiya yoolema ahu, waaniheryasa nihaana wiikoha akhala wira khinnivaha efaita muthukumano wa muteko woolaleerya wala mwaha wa ohilokiherya vahinatthi iprograma sahu.
12. Akhala wira nyuwo munimakela omuthanla ole onirowana anyu olaleerya, exeeni enireerela anyu othokorerya?
12 Anamalaleerya pooti omuthanla ole onirowana aya olaleerya ohinatthi opacerya muthukumano wa muteko woolaleerya, wala pooti othanleliwa. Masi akhala wira nyuwo munimakela opaka mareheryo anyu, niireke mookhala ‘owaatthukulela murima’ akina nvaranaka muteko hoothe ohiya omakela okhuma ni apatthani anyu? (2 aKor. 6:11-13) Mookhala oovara ni namalaleerya a niinano wira mmukhaliherye ottottela mureerelo wiixuttiha wanyu? (1 aKor. 10:24; 1 Tim. 4:13, 15) Nwiriyaneke saana malakiheryo otheene munivahiwa anyu, ohela muhina opuro woopacerya olaleerya. Nuumala muthukumano, musyake oturuka mareheryo nave moohipisa muroweke muttetthe othanleliwe anyu.
13. Mureerelo xeeni ninrowa ahu ophwanya akhala wira otheene ahu nnimwiimananiha otthara malakiheryo ala?
13 Nuumala olaleerya, awiixutti ale 70 a Yesu “yahihokolowa n’utteliwa murima”. (Luka 10:17) Moohaaniherya, muthukumano yoole Yesu aapanke awe ni awiixutti awe ahinatthi opacerya olaleerya, waahaakhaliherya. Olelo-va mithukumano sa muteko woolaleerya sookhalana efaita emosaru. Akhala wira otheene ahu nnoomananiha otthara malakiheryo ala, nto mithukumano sa muteko woolaleerya sinrowa onilipiha, oniixuttiha ni onitthokiha wira niwerye waakhwaniherya muteko ahu wa ‘olalerya mulaponi mothene’.—Math. 24:14.
[Ekaaxa ya epaaxina 4]
Mithukumano sa muteko woolaleerya sihoniweke ntoko etthu ehirina efaita maana ti sootthuneya ntoko mithukumano sikina sa mmulokoni
[Ekaaxa ya epaaxina 5]
Okathi oniilokiherya awe, ole oniiriha muthukumano ohaana wuupuwelela ele enirowa waalipiha ni waatthokiha ale anirowa olaleerya nihiku nle
Akhala Wira Murokora Toniiriha Muthukumano
Murokora ohaana owara nleeso ni ohaana okilaathi vaavo oniiriha awe muthukumano wa muteko woolaleerya. Ele enithanla awe olavula ehaana olikanaka ni ele munna aarowa awe othokorerya. owo ohaana osyaka wooniherya wira oniwiixuttiha alipa-oowiriyana, nto ohaana ovekela egrupu eyo okomentari. Akhala wira owo oomulattula murokora mukina wira opake nivekelo, murokora owo ohaana owara nleeso nave. Vaavo munna oobatiziwa oniphiya awe nuumala opacerya muthukumano, murokora owo ohaana omulattula wira omaliherye muthukumano owo. Mutokweene oniweherya muteko woolaleerya ohaana wuupuwelela itthu sootutuxerya sikhanle ookhumela ni ovaha malakiheryo ooreerela wira ovukule mixankiho sikina. Mwa ntakiheryo, pooti wira munna ooyeveela oobatiziwa ori opuro yoowo vaavo murokora oniiriha awe muthukumano, masi axitokweene enoona wira owo khoniphwanelela wiiriha mithukumano. Akhala wira ti siiso, mutokweene oniweherya muteko woolaleerya ohaana waaleela oowanli aya wira murokora ohaana ohoolela muthukumano, masi munna owo ohaana opaka nivekelo akhala wira axitokweene anoona wira onniphwanelela. Pooti wira mmosa a atthu ari opuro owo, ti munna ovahiwe yoolopola ni axitokweene nto ohineemereriwa ohoolela muthukumano wala ovekela mmulokoni. Nto voohitthuneya ohimya esiiri, axitokweene ahaana waasuweliha arokora athanliwe wira awo ahaana ohoolela muthukumano ni ovekela nnaamwi munna owo oryeene vaavo. Nave, axitokweene ahaana omuleela munna owo voohimya sa mahiku athanleliwa aya arokora wira ahoolele muthukumano wa olaleerya.
[Ekaaxa ya epaaxinai 6]
Myaha Soothokorerya Okathi wa Muthukumano wa Olaleerya:
• Olaleerya wookhweya onikhuma Orummwa Ahu wa Omwene.
• Eviidiyu enivarihana ni olaleerya enikhuma va jw.org.
• Enamuna emosa yooloka ya olaleerya, ntoko masu oopaceriha, moota woohimya etthu enrowa othokoreriwa mukwaha wootthikela, wala ohimya marehereryo a waakhela soosonkherya.
• Yoolepa yoolipiha enivarihana ni olaleerya.
• Yowiiraneya ya muteko woolaleerya ya mapuro awo wala ya muliivuruni mwahu.
• Mwaha mmosa onikhuma Orummwa Ahu wa Omwene.
• Mwaha onikhuma epantte ya Muthukumano wa Orummwa wa niinano.
• Mwaha onivarihana ni olaleerya onikhuma murevistani Owehaweha.
• Mwaha onivarihana ni olaleerya onikumihiwa muliivuruni mwahu ntoko Escola do Ministério, ni ‘Murwé Mukitthareke’.
• Epantte emosa ya jw.org ekhanle oorumeeliwa okathi woolaleerya.
• Mattaava makina pooti orumeela ilivirinyu sini: Masu Oopacerya a Nuulumo na Muluku (igw) ni Malakiheryo Anikhaliherya Osoma Nuulumo na Muluku (sgd).
• Moota woovaanela ni atthu oovirikana ntoko ale ahinkupali wira Muluku ookhala, wala anikupali wira mutthu oroothatuwa, aHindu, wala maBudista.
• Moota womwaakhula mutthu onnikwasa masu.
• Moota woomukhaliherya ole onivarana anyu muteko wira olaleerye saana eemenle ene.
• Moota woomulaleerya mutthu onilavula nttaava nikina.
• Moota wookhaliherya enamuna emosa ya olaleerya yeeyo anna akina aniirela aya mpantta, ntoko muteko wa owaavya atthu, olaleerya nimurumeelaka telefoni, olaleerya mapuro otheene ari atthu, opaka mikwaha sootthikela, wala wiiriha soosoma sa Biibiliya.
• Soowuupuxerya voohimya sa mapuro oowoopiha, okhala oowaakuveya vaatthuneyaka, okhalana makhalelo ni moonelo wooloka, wala etthu ekina.