Moota Woopaka Muthukumano wa Muteko Woolaleerya

Ntoko mithukumano sahu sotheene, muthukumano wa muteko woolaleerya mareheryo a Yehova, yaawo annikhaliherya olipihana mukina ni mukhwaawe. (aHe 10:24, 25) Muthukumano wa muteko woolaleerya ohaana okhala wa minutu 5 wala 7. Muhooleli a muthukumano owo ohaana olavula mwaha, okawa ikrupu, muttetthe woolaleerya ni opaka nivekelo muhina mwa minutu iyo. (Vakhala wira muthukumano owo onipakiwa nuumala muthukumano wa mmulokoni, ohaana opakiwa moowaakuveya.) Nave muhooleli owo ohaana olokiherya mwaha onrowa waalipiha anamalaleerya. Mwa ntakiheryo, muthukumano onipakiwa saabadu muhooleli pooti ovaha malakiheryo a etthu anrowa aya olavulaka okathi woolaleerya, okhala wira anna anceene khanwerya olaleerya mahiku ootheene. Itthu xeeni sikina sinreerela othokoreriwa okathi wa muthukumano owo?

• Pooti orumeela malakiheryo aniphwanyaneya Okumi ni Orummwa Ahu wa Ekristau Ekaderno—Enirumeeliwa Omuthukumanoni

• Pooti orumeela ihapari sa niinano wala etthu eniiraneya mmuttettheni wira nipacerihe ovaanela

• Moota womwaakhula mutthu ohimphavela ovaanela

• Etthu mukhale anyu ohimya mwamphwanya mutthu onihimya wira khonikupali wira Muluku ookhala, onikupali wira itthu siroothatuwa, mutthu onilavula nttaava nikina wala oneettela etiini ekina ehinsuweliwa muttetthe anyu

• Moota woorumeela itthu siniphwanyaneya aplikativo JW Library^®

• Moota woorumeela itthu sinnikhaliherya wiixuttiha

• Moota woorumeela inamuna soovirikana wira nilaleerye nimurumeelaka telefoni, ikarta, olaleerya mapuro oowaatta atthu, opaka mikwaha sootthikela oxukurya wala wiiriha soosoma sa Biibiliya

• Soowuupuxerya voohimya sa ovareleleya, okhala oowaakuveya, moota wookhalana mweettelo wooloka okathi woolaleerya, ni moota wookhalana moonelo wooloka voohimya sa atthu akina wala mwaha mukina

• Murumeeleke yoosoma wala eviidiyu ya ebroxura ahu Wiixuttiha

• Moota wowaakhaliherya ni waalipiha anamalaleerya akina

• Murumeeleke yoolepa enivarihana ni muteko woolaleerya wala yowiiraneya yoohakalaliha