Muhuupuweleke Wira Khamuniphwanelela Wiiriha Yoosoma ya Biibiliya
1. Xeeni atthu akina anoovelela aya wiiriha yoosoma ya Biibiliya?
1 Munnoovelela wiiriha yoosoma ya Biibiliya mwaha wowuupuwela wira khamunrowa okhumela saana? Arumeyi a Muluku a khalai, ntoko Moise ni Yeremiya, ikwaha sikina yoona wira khiyaaphwanelela miteko yaarummwale aya. (Okhu. 3:10, 11; 4:10; Yer. 1:4-6) Tivonto, anna anceene anuupuwela siiso. Nto vaniweryaneya sai oxintta muxankiho owo?
2. Xeeni vahinitthuneya ahu osiveliwaka olaleerya khula empa paahi, khiyaahiyerya atthu akina muteko oowiiriha yoosoma ya Biibiliya?
2 Nihaana wuupuwela wira Yehova khonnivekela etthu ehiniwerya ahu. (Esal. 103:14) Tivonto, muteko nirummwale ahu woowaapaka awiixutti ni ‘owixuttiha’, eri etthu eniwerya ahu. (Math. 28:19, 20) Tthiri, ti voohakalaliha osuwela wira Yehova khiwavanhe eparakha ela atthu oosuwela ni oowerya a mulaponi. (1 aKor. 1:26, 27) Nto, ohinisiveleke olaleerya khula empa paahi khiyaahiyerya atthu akina muteko oowiiriha yoosoma ya Biibiliya.
3. Yehova onnikhaliherya sai wira niweryeke wiiriha yoosoma ya Biibiliya?
3 Yehova Tonnivaha Owerya: Muteko ahu woowaapaka awiixutti onikhuma wa Yehova. (2 aKor. 3:5) Orumeelaka nikhuuru nawe nootthokiheya, Yehova ooniixuttiha ikeekhai sa Biibiliya seiyo atthu oowerya a elapo ela ahinisuwela aya. (1 aKor. 2:7, 8) Nave-tho, owo ohiiriha olempwa mBiibiliyani sowiixuttiha sa Mwiixuttihi Muulupale, Yesu, wira nimutakiheke, ni onnivikaniha oniixuttiha orumeelaka muloko. Ohiya-vo, onninivaha ikaruma nikhanle ahu oorumeela wira nimwiixuttihe Biibiliya. Owo ookumiherya iliivuru, ntoko Biibiliya Oniixuttiha Exeeni?, seiyo siniixuttiha ekeekhai mmukhalelo wooreerela ni wookhweya wiiwexexa. Tthiri, wiiriha yoosoma ya Biibiliya khahiyo muxankiho muulupale ntoko sinuupuwela ahu.
4. Xeeni nikhanle ahu oororomela wira Yehova onirowa onikhaliherya?
4 Moise ni Yeremiya yaahiwerya ovara muteko yaarummwale aya akhaliheriwaka ni Yehova. (Okhum. 4:11, 12; Yer. 1:7, 8) Nto, pooti onvekela Yehova wira onikhaliherye. Okathi oniiriha ahu yoosoma ya Biibiliya, nimmwiixuttiha mutthu ekeekhai voohimya sa Yehova, etthu yeeyo enimuhakalaliha Muluku. (1 Yoh. 3:22) Tivonto, ekhale yoolukama anyu wiiriha yoosoma ya Biibiliya, yeeyo eri etthu yootepa ohakalaliha mmutekoni woolaleerya.