Muhuupuweleke Wira Khimureere Waatteliwa Miteko
1. Xeeni atthu akina anoovelela aya wiiriha yoosoma ya Biibbiliya?
1 Anna akina annoovelela wiiriha yoosoma ya Biibiliya mwaha wowaatteliwa miteko. Olokiherya yoosoma ya Biibiliya, wiiriha, ni omukhaliherya ole onimusoma Biibiliya oxintta mixankiho sawe onitthuneya okathi. Murummwa Paulo aahimmye wira aahivaha okumi awe wira aakhaliherye axinna awe oTesalonika omusuwela Yehova. (1 aTes. 2:7, 8) Nto, ninrowa owerya sai wiiriha yoosoma ya Biibiliya hata naatteliwe ene miteko?
2. Moota xeeni omphenta wahu Yehova onniiriha aya orumeela saana okathi?
2 Omukokhorela Yehova Onnikuxa Okathi: Ekeekhai wira omukokhorela Yehova onitthuneya okathi. Mwa ntakiheryo, ninnirowa omuthukumanoni moohihiyererya, olaleerya, omusoma Biibiliya, ni opaka mavekelo. Anamathelana oowaatteliwa miteko anoohakalala akhala wira anooviriha okathi nuule athelanne aya. Tthiri, nihaana ohakalala vanceene nirumeelaka okathi ahu wira nimulompe Yehova mwaha womphenta. (aÉf. 5:15-17; 1 Yoh. 5:3) Yesu aahimyale wira waapaka awiixutti mpantta muulupale wa omukokhorela wahu Yehova. (Math. 28:19, 20) Wuupuwela ela, onoonikhaliherya ohoovelela wiiriha yoosoma ya Biibiliya.
3. Ninrowa wiiriha sai yoosoma ya Biibiliya hata nirina ene mixankiho sinnooceeliha olaleerya?
3 Nto sai akhala wira mwaha wa muteko ahu, wala muxankiho wa eretta, aahiiso miteko sa Muluku khanniwerya wiiriha yoosoma eyo? Anamalaleerya akina anniwerya wiiriha yoosoma amurumeelaka telefoni wala komputadore. Ale ahiniwerya wiiriha yoosoma mwaha muxankiho wa eretta ehinimala, annimulattula ole onimusomiha aya orwa owannya aya osoma. Akina annaavekela anamalaleerya arina okathi wira yiirihe yoosoma aya vaavo ahiniwerya aya.
4. Mareeliho xeeni ninrowa ahu ophwanya akhala wira nnimwiiriha yoosoma ya Biibiliya?
4 Paulo aahihakalala vanceene mwaha woorumeela okathi ni ikuru sawe wira aakhaliherye akina wiixutta ekeekhai. (Mit. 20:35) Vaavo aawuupuwela awe atthu aawenrye awe waakhaliherya oTesalonika, eyo yaahimwiiriha omuxukhuru Yehova. (1 aTes. 1:2) Nto, otteeliwa wahu murima mmutekoni woolaleerya, onimuncerereya akhala wira khaninrowa ohiya wiiriha yoosoma ya Biibiliya hata naatteeliwe ene miteko.