Ti Pani Onirowa Osiveliwa ni Irevista Sahu?

1. Okathi onisoma ahu irevista sahu Owehaweha wala Despertai!, exeeni enireerela ahu othokorerya, ni nthowa xeeni?

¹ Irevista Owehaweha ni Despertai! sinitthokihiwa yuupuweliwaka atthu a olumwenku wotheene. Tivonto, myaha saya sinithokorerya itthu soovirikana. Nto vaavo ninsoma ahu khula mwaha wa erevista ahu, nihaana wuupuwelaka tani akhanle oosiveliwa ni irevista iyo; nuumala-vo nihaana ompaka palano onvaha mutthu owo.

2. Myaha xeeni sinirwa vakaapani sa irevista sahu sikhanle owaasivela atthu akina?

² Niireke erevista Owehaweha ya naanano enithokorerya mwaha wa Biibiliya yoowo nyuwo ni ole onivara nanyu muteko mwaavaanela anyu niinano? Wala niireke erevista eyo yookhalana mwaha okhanle oomukhaliherya mmusi anyu? Niireke ookhala mutthu onimusuwela anyu oniphavela weetta mukwaha orowaka opuro oniromoliwa mu Despertai!? Aahiso niireke yookhala erevista erina myaha sinirowa waasivela atthu animwiira nakoso wala mapuro anivariwa miteko sa guvernu mmuttettheni mwanyu? Mwa ntakiheryo, erevista enilavula voohimya sa mixankiho sa atthu oowuuluvala, pooti okhala yootthuneya wa ipa seiye anikhapeleliwa alipa oowuuluvala. Atthu anivara miteko sa otribunaali pooti osiveliwaka ni myaha siri vakaapani seiyo sinilavula sa ekrime.

3. Muhimye yowiiraneya enooniherya efaita erina aya wakawela irevista atthu yaale nnuupuwela ahu wira anirowa osiveliwa ni myaha siri murevistani-mmo.

³ Sookhumelela: Nuumala omwaakhela Despertai! a Outubro 2011, muru waahimya wira: “Como criar filhos responsaveis”, etthoko emosa ya Anamoona wAfrica do Sul yaahitelefonarela ixikola 25 saari mmuttettheni mwaya. Nto ixikola 22 sahemeererya irevista iye ni khaakawela anaxikola aya. Etthoko ekina elapo yeeyo yaahikhalana muupuwelo mmosaru nto khukawela irevista mmaxikolani sa muttetthe aya. Nto prusoore exikola emosa, aahithanla orumeela erevista eyo mwa eprograma ya khula esumana ya osuwela osoma ni waalakiherya anaxikola. Etthoko eyo yaahimuleela mutokweene a esirkwitu sa yowiiraneya ela. Nto owo aahitumererya miloko sa esirkwitu awe olaleerya ixikola saari mmuttettheni. Efiliyaali yahaakhelela ipaphelo sinci sivekelaka erevista sinci mpakha erevista ele otthikela wimpirimiriwa.

4. Xeeni nimphavela ahu waakawela atthu anceene irevista sahu?

⁴ Irevista sahu sinnitthokiherya yootaphulela ya itthu siniiraneya mahiku ala, ni sinnimuttittimiherya Biibiliya ni Omwene wa Muluku. Tthiri, mulaponi motheene irevista sahu paahi ‘tisinilaleya wopoliwa’. (Yes. 52:7) Tivonto, hiyo nimphavela waakawela atthu anceene irevista sahu. Enamuna yooloka opaka eyo, ori wiikoha so: ‘Ti Pani Onirowa Osiveliwa ni Irevista Sahu’?