Nyuwo Amiravo a Mmulokoni, Niireke Munniphavela Orumeela?
1. Silini mmiravo muKristau onitthuneya awe opacerya ovarihela muteko yoolepa ya 1 Timótheyo 3:1?
1 “Akhalá omphavela muteko wo wettiha muthukumano, muteko worera t’umphavelawe”. (1 Tim. 3:1) Moolumo awo oowuupuxeriwa, annaatumererya anna wiimananiha ophavelasa iparakha sa orumeela mmulokoni. Niireke muhaana okhala mutthu owunnuwela wira mpake eyo? Ti vooreerela opacerya ophavelasa orumeela, nlelo muryeene mmiravo. Mwapaka eyo, munoowerya wiixuttihiwa ni ophwanelela okhala murummwa oorumeela okathi munrowa anyu wunnuwa. (1 Tim. 3:10) Nto, akhala wira nyuwo mwa mmiravo oobatiziwa, munrowa ophavela sai orumeela?
2. Munrowa owerya sai okhalana ni wooniherya munepa wowiivahererya?
2 Wiivahererya: Muupuweleke wira nyuwo muniphavela muteko wooreera, ohiya ottittimihiwa. Tivonto, mphaveleke waakhaliherya anna ni arokora. Enamuna emosa yoopaka eyo, ori wuupuwelela ntakiheryo nooloka na Yesu. (Math. 20:28; Yoh. 4:6, 7; 13:4, 5) Munvekeleke Yehova wira ookhaliheryeni ophavela waakhaliherya akina. (1 aKor. 10:24) Niireke munoowerya waakhaliherya anna a mmulokoni yuuluvanle wala aniwereiwa? Niireke munniivahererya wira mureerihe esalau, okwesa, wala olokiherya itthu sikina siniphwaneliha Esalau ya Omwene? Aahiiso munniivahererya wira mulavule mwaha wa Exikola ya Orummwa wa Muluku akhala wira mwaneene khokhanle? Tthiri wiivahererya opaka eyo wira mwaakhaliherye akina, onimoophwanyihani ohakalala.—Mit. 20:35.
3. Xeeni oryaaya vootthuneya okhalana mikhalelo somunepani, nto ninrowa ophwanya sai?
3 Mikhalelo sa Omunepani: Mikhalelo sa omunepani ti sootepa otthuneya, ohiya osuwela itthu sinci wala okhalana osuwela wooyaraniwa. Mulopwana oowunnuwa momunepani onnimananiha opaka itthu ntoko Yehova ni Yesu sinipaka aya. (1 aKor. 2:15, 16) Owo onnooniherya yoowiima ya munepa wa Muluku. (aGal. 5:22, 23) Nave, owo ti namalaleerya ooluttuweliwa onipaceriha soophavela sa Omwene. (Math. 6:33) Nyuwo munoowerya wunnuuherya mikhalelo sa omunepani orweela mwa okhalana yoosoma yoomwaneene yoohihiyererya. Ela enihela muhina omusoma Biibiliya khula nihiku, Owehaweha ni Despertai! sa khuta mweeri, wiilokiherya ni orowa omuthukumanoni. (Esal. 1:1, 2; aHéb. 10:24, 25) Vaavo Paulo aamutumererya awe mmiravo Timootheyo orowa vahoolo momunepani, aalempe so: “Mwipasope . . . n’itthu sinixuttihanyu”. (1 Tim. 4:15, 16) Nto mwiilipiheke mwavahiwa myaha sa Exikola ya Orummwa wa Muluku. Mwiilokiheryeke mwaarowaka olaleerya, ni mulaleeryeke moohihiyererya. Mwiimananiheke okhalana soolukama somunepani ntoko, okhala pioneero, orumeela oBetheli, wala orowa Exikola ya Biibiliya ya Anna Oohithela. Opaka eyo onimookhaliheryani ‘ohitthara [itthu] sohiloka s’omiravo’.—2 Tim. 2:22.
4. Ororomeleya ni wamini orina efaita xeeni?
4 Ororomeleya ni Waamini: Anna yaathanliwe waakawela eyoolya maKristau oothoiwa eseekulu yoopacerya yaari “òttittimiheya”. Maana awo yaanisuweliwa okhala oororomeleya ni owaamini, tivonto arummwa khiyaaxankale wira muteko waamweetta saana. Eyo yaahiwiiriha arummwa ale othokorerya itthu sikina sootthuneya. (Mit. 6:1-4) Tivonto, mwavahiwa muteko mmulokoni, nvareke saana ni owerya wanyu wotheene. Mmutakiheke Nowe, yoowo aatthanre saana malakiheryo aavahiwe awe a oteka ekalawa. (Maph. 6:22) Tthiri, ole oniroromeleya onnivahiwa efaita ni Yehova ni onnooniherya wunnuwa womunepani.—1 aKor. 4:2; nwehe ekaaxa eni: “Mireerelo Sinikhumelela Mwaha wa Wiixuttihiwa”.
5. Xeeni amiravo maKristau anitthuneya aya ophavela orumeela?
5 Ntoko saahimmwale aya, Yehova onnaakuviha muteko woohepha. (Yes. 60:22) Olelo-va, atthu oowiiraka 250.000, annibatiziwa khula mwaakha. Nto okhala wira anamunceene anniixutta ekeekhai, annitthuneya alopwana omunepani oophwanelela wira akhapeleleke miritti sa mmulokoni. Vano, khasireere itthu soovara mmutekoni wa Yehova. (1 aKor. 15:58) Nyuwo amiravo, niireke munniphavela orumeela? Akhala ti siiso, nyuwo munniphavela muteko wooreera tthiri!
[Eponto yuulupale epaaxina 2]
Okhala wira anamunceene anniixutta ekeekhai, annitthuneya alopwana omunepani oophwanelela wira akhapeleleke miritti sa mmulokoni
[Ekaaxa epaaxina 3]
Mireerelo Sinikhumelela Mwaha wa Wiixuttihiwa
Amiravo maKristau oophwanelela annittottela mureerelo vaavo axitokweene anaavaha aya miteko ni owiixuttiha. Mwa ntakiheryo, nuumala muthukumano, mutokweene a esirkwitu aahikilaathi opalkuni wira omulipihe namalaleerya mmosa. Owo aahimoona mmiravo eemenle ene moomwaattamela, nto khumukoha akhala wira aaphavela olavulana. Mmiravo ole aahaakhula wira aavahiwe muteko woolokiherya epalku nuumala mithukumano. Nto anamuyari awe yaaphavela orowa owaani, masi khiyaaphavela okhuma mmiravo ole ohivarale muteko awe. Mutokweene ole aahitikinihiwa moohakalala. Owo aahimyale so: “Axitokweene a muloko ole yaanivaha ephoole wira awiixuttihe anna oophwanelela yaavahaka miteko sa mmulokoni. Mwaha wa yeeyo, axitokweene ale yaamakela waathanla amiravo anna wira akhale arummwa oorumeela okathi kaaxukurya aka muloko aya”.