Makoho Oowaakhuliwa

◼ Niireke murokora ohaana owara nleeso, vaavo oniiriha awe yoosoma ya Biibiliya eemenle ene masi oryeene ni munna?

Vaavo murokora oniiriha awe yoosoma ya Biibiliya yookilaatheya oryeene ni munna, murokora owo ohaana owara nleeso. (1 aKor. 11:3-10) Erevista A Sentinela (Owehaweha) 15 ya Julyo, 2002, epaaxina 27 enihimya so: “Yoosoma eyo, mutthu onooleehana ni ole onimusomiha awe, nave ole oniiriha yoosoma eyo tonihoolela tthiri. Nto mwaha wa yeeyo, yoosoma eyo enniirela mpantta yowiixuttiha ya muloko. Tivonto, vaavo murokora oobatiziwa oniiriha awe yoosoma ya Biibiliya oryeene ni munna oobatiziwa, ohaana owara nleeso”. Malakiheryo ala, annivareleya-tho muteko vaavo murokora onihooliwa awe wiiriha yoosoma ya Biibiliya ni munna oohibatiziwa. Nto murokora owo, ohaana owara nleeso hata yoosoma eyo epakiwaka vasaala, wala atthu yeemenle ene, aahiiso opuro mukina.

Masi, akhala wira yoosoma eyo khenatthi olipa, murokora khonitthuneya owara nleeso nnaamwi oryeene ni munna. Hata yoolakela ya oxukurya iwo oryeene wooniherya yoosoma ya Biibiliya wala othokorerya mwaha onikhuma muliivuruni mwahu ya omwiixuttiha Biibiliya, murokora owo khonitthuneya owara nleeso. Okhala wira hiyo nihaana opaka mikwaha sootthikela oxukurya sinceene wira soosoma sinipakiwa mutthu eemenle ene silipe, nto anna ahaana oweha makhalelo otheene ni okhala ooreera murima vaavo anithanla aya okathi wooreerela wira arokora aware nleeso.