Moota Woolokiherya Masu Oopaceriha Anivara Murima
1. Xeeni varyaaya vootthuneya olokiherya masu oopaceriha oovara murima?
1 Yoolya yoowunkhela saana, ennimwiiriha mutthu ophavela olya. Moolikanasa, olavula masu oovara murima wira nipacerihe olaleerya, onnikhaliherya wira ovaanela wahu okhale wooloka. Moolumo ahu oopacerya, pooti opisa vakhaani wala hiyo pooti ohimya itthu soovirikana. Masi ntoko eyoolya yoosiva ni yoowunkhela saana, ti vootthuneya wuupuwelela ele enrowa ahu opaka. (Mir. 15:28) Ninrowa olokiherya sai masu oopaceriha anivara murima?
2. Ninrowa olokiherya sai masu oovara murima wira nipacerihe olaleerya?
2 Muthanleke Myaha Sinaasivela Atthu: Moolumo ahu oopaceriha, avareke murima. Naahipake eyo, ole onilavulana ahu pooti ohiphavela ovaanela ni hiyo. Nto, okathi oniilokiherya anyu, muupuweleke itthu sinaasivela atthu a mmuttettheni. Niireke onaasivela ovaanela myaha sa epoliitika, okumi wa vatthokoni, wala omala wa ikhotto? Okhala wene, atthu waasivela ohimya moonelo aya. Nto mpakeke nikoho ninwiiriha atthu awo wuupuwelela. Etthu ekina enikhaliherya, ori orumeela olaleerya wookhweya onikumiheriwa ni Orummwa Ahu wa Omwene ni olokiherya moovarihana ni muttetthe anyu. Aahiiso okathi wa Omulompa Muluku Vatthokoni, pooti winsayari inamuna sikina sa olaleerya.
3. Itthu xeeni-tho sikina ninreerela ahu wuupuwela, okathi ninlokiherya ahu itthu soohimya wanipacerya?
3 Muupuweleleke Makhalelo ni Sookupali sa Atthu: Mittetthe sikina, ti vooloka wira niphiyakaru vatthokoni, nihimyeke ele nirwenle ahu. Masi mapuro makina, ohihimya opuro onikhuma ahu wala ohikoha ihaali sa atthu a vatthokoni, pooti othokoreriwa ntoko mutthu ohirina nttittimiho. Mittetthe seiye atthu animuttittimiha aya Biibiliya, hiyo pooti omuromola Biibiliya okhuma nihiku noopacerya. (Mit. 2:14-17) Masi, mittetthe seiye anamunceene ahikhanle aya maKristau wala ahirina aya etiini, pooti okhala vooreerela omuromola Biibiliya nihiku nikina.—Mit. 17:22-31.
4. Ephoole xeeni nintthuneya ahu okhalana voohimya sa masu ahu oopaceriha?
4 Muthanleke Saana Masu Oopaceriha: Nilokiheryeke saana moolumo ahu oopacerya. Ti vooloka ohaattiha soohimya ni olavula masu ookhweya. Nave-tho, moota nimpacerya ahu olavula ti vootthuneya. Nikhaleke oohakalala. Otheya onnooniherya wira ninnimuthokorerya ole onilavulana ahu. Tthiri otthara malakiheryo ala, onoonikhaliherya olokiherya masu oopaceriha ‘oowunkhela saana’ wira atthu a mmuttettheni alye ‘vamesa va Yehova’.—1 aKor. 10:21.