Nilokiherye Inamuna Sahu Soolaleerya: Nitthokiheke Masu Ahu Oopaceriha

Otthuneya Waya: Masu ahu oopaceriha yaahivareke murima awe ole onilavulana ahu, owo pooti omaliha ovaanela iwo nihimulalenrye. Tivonto, anna anceene anoona wira masu oopacerya, tootthuneya vanci wira olaleerya wahu oloke. Ekeekhai wira Orummwa Ahu wa Omwene ni eliivuru Raciocínios sinnikumiherya ipantte sa olaleerya wookhweya. Wira vakhweyeke orukunuxa masu ahu, iyo khasiniruuha okathi wotheene masu oomalela wira nipacerihe olaleerya. Masi, hata ipantte iyo sikhalaka soomalela, anna pooti orukunuxa wala olokiherya masu aya. Nto, nnookhumela saana natthokiha oratteene masu ahu oopaceriha, ohiya olavula khula etthu enuupuwela ahu okathi nimphiya ahu vatthokoni.​—Mir. 15:28.

Moota Wootthokiha Masu Oopaceriha:

• Muthanle mwaha onivarihana ni eliivuru munivaha anyu, yeeyo enaasivela atthu a mmuttettheni.

• Mutthokihe saana masu oopacerya anrowa anyu olavula nuumala waakhomasa atthu awo. Woonasa wene pooti opacerya so: “Miyo kihoorwa owannyu-va mwaha woowi . . . ”, “Anamunceene annixanka mwaha wa . . . ”, “Kiniphavela osuwela moonelo anyu voohimya sa . . . ”, wala pooti ohimya etthu ekina. Masu ookhweya ni ookhuveya annikhaliherya. Anna akina annihela mmuruni masu oopaceriha.

• Mpake nikoho nimmwiiriha mwaneene etthoko ohimya moonelo awe. (Math. 17:25) Muupuweleke wira owo iira atthokelelaka itthu sikina muhinatthi ophiya vatthokoni vawe. Tivonto, nikoho nanyu nihikhale noovilexa wala nimmuulihiha muru.

Mweererye Ela Mweeri Yoola:

• Vaavo munimulompa anyu Muluku vatthokoni, mwaavye okathi wira mutthokihe ni mwinsayari masu anyu oopaceriha.

• Okathi munilaleerya anyu, mwaaleeleke anna akina masu oopaceriha mutthokinhe anyu. (Mir. 27:17) Muturukeke masu awo yaahikhumeleke saana.