Mpacerihe Soosoma sa Biibiliya ni Ale Anaavaha Anyu Irevista
1. Xeeni okhuma khalai, nintumereriwa ahu okhalana atthu anaavaha ahu irevista khula mweeri?
1 Atthu anceene ahiniphavela omusoma Biibiliya, waasivela osoma irevista sahu. Tivonto, okhuma khalai nikhuuru nootthokiheya na Yehova ninnaatumererya anna okhalana atthu anaavaha aya irevista khula mweeri. Vaavo atthu ansoma aya irevista sahu, eyo enoowiiriha osiveliwa ni masu Muluku. (1 Ped. 2:2) Woonasa wene, ehaavo etthu ekina murevistani enrowa ovara murima aya ni owiiriha weemya omusoma Biibiliya.
2. Nipakeke exeeni wira ale anaahiyerya ahu irevista khula mweeri esiveliwe ekeekhai?
2 ‘Mukhuwariki’ Ipyo sa Ekeekhai: Ohiya ovaha irevista paahi nto khiyarowa, niimananiheke ovaanela ni mwaneene etthoko ni opaka ompatthani. Osuwela makhalelo awe, soophavela, ni sookupali sawe, onoonikhaliherya olavulana mwa miruku. (Mir. 16:23) Nto mwiilokiheryeke mwaarowaka omuxukurya. Vaweryaneya, muhimye etthu ni yoolepa emosa enivarihana ni irevista iyo. Opaka eyo, onoowiirihani okhuwari ipyo sa ekeekhai siri vamurimani vawe. (1 aKor. 3:6) Nave, mulepeke nihiku mmuxukunrye anyu, irevista sene, mwaha ni soolepa musomme anyu.
3. Naaxukuryeke ikwaha kavi ale anaavaha ahu irevista khuta mweeri?
3 Naaxukuryeke Ikwaha Kavi? Pooti waaxukurya ekwaha emosa khuta mweeri, wira naavahe irevista sa niinano. Masi, moovarihana ni makhalelo ni osiveliwa waya ekeekhai, pooti waaxukurya ikwaha sikina. Mwa ntakiheryo, nuuvira esumana emosa wala piili, pooti omuxukurya-tho ni khiyahimya so: “Ekiruuhale-va, mwaha woowi kiniphavela owooniheryani mwaha mmosa okisivenle ori muhina mwa irevista seiye koovalyaakani”. Eyo enoomwiiriha ophavela osoma erevista eyo. Akhala wira oosoma, mmukoheke ele enuupuwela awe mmwaha owo ni nvaanele vakhaani. Nave, akhala wira onnisiveliwa osoma iliivuru sahu, hiyo pooti otthika ekwaha ekina wira ninvahe etratato, ebroxura, wala eliivuru enikawa ahu mweeri yoowo.
4. Nipakeke exeeni okathi mukina wira nipacerihe yoosoma ya Biibiliya ni ale anaavaha ahu irevista?
4 Muhimulipeleleke mutthu owo woovekelani yoosoma ya Biibiliya. Mpaceriheke yoosoma eyo. Hata otonko ene okhootta omusoma Biibiliya, pooti othokorerya ni yena okathi mukina, epantte ya erevista Owehaweha eni: “Waakhuliwa wa Makoho a mBiibiliyani”. Nto moone aaphavelaka osuwela mwaha owo. Woonasa wene, munoowerya opaceriha yoosoma ya Biibiliya hata mweemenle ene. Masi, akhala wira khamunwerya opaceriha yoosoma eyo, muhihiye onvaha irevista wira mmukhaliherye osiveliwa ekeekhai.