Nilokiherye Inamuna Sahu Soolaleerya: Mwaakhaliherye Ale Anaavaha Anyu Irevista Khuta Mweeri
Otthuneya Waya: Anamunceene yaale onaasivela osoma irevista sahu khaniphavela omusoma Biibiliya. Waaniheryasa etiini aya tenaasivela wala anuupuwela wira kharina okathi woomusoma Biibiliya. Masi, mwaha woomakelaka osoma irevista sahu, pooti ophavela osuwela Nuulumo na Muluku. (1 Ped. 2:2) Mwaha mmosa pooti waavara murima, wala makhalelo aya pooti oturukeya. Waaxukurya moohihiyererya ni moohipisa onimwaalipiha vamosa ni onikhaliherya osuwela itthu sinaasivela wala waaxankiha. Nto muhoolo, mutthu owo pooti ophavela omusoma Biibiliya.
Moota Woopaka Eyo:
• Khula mweeri munvaheke irevista sa niinano sa Owehaweha ni Despertai! Nave-tho pooti omuxukurya okathi mukina mweeri yoowo wira mmwiirihe ophavela osoma mwaha mmosa wa erevista mwaamuhiyenrye anyu wala onvaha eliivuru enikaiwa mweeri owo. Mulepeke itthu sotheene sinitthuneya. [Munwehe Orummwa ahu wa Omwene Janero 2014, epax. 3.]
• Mwiilokiheryeke okathi wooxukurya. Ohiya paahi ophavela onvaha irevista, nvaaneleke ni opatthana ni yena wira mmwiirihe osiveliwa ekeekhai.
• Mwaavyeke okathi woopaceriha yoosoma ya Biibiliya. Akhala wira mutthu owo onnookohani mwaha mmosa wa Biibiliya, mmuruuhele eliivuru enaakhula nikoho nawe ni muthokorerye hoothe. Muhinatthi okhuma, mpake nikoho munrowa anyu othokorerya mukwaha wootthikela. Akhala wira munimakela ovaanela ni mutthu mmurumeelaka Biibiliya wala eliivuru enirumeela ahu wira nimusomihe Biibiliya, nyuwo muniiriha yoosoma ya Biibiliya. Niireke mootoko onvaha mwaaneene etthoko ebroxura Ihapari Sooreera ni mmooniherya yoosoma ya Biibiliya yowaakuveya? Wala mootoko omooniherya iviidiyu sini: Xeeni Vanitthuneya Anyu Omusoma Biibiliya? ni Enipakiwa Sai Yoosoma ya Biibiliya? Hata ohitonko weemya omusoma Biibiliya, makhalelo anniturukeya. Nto vaamureera weererya-tho!
Mweererye Ela Mweeri Yoola:
• Mpake elista ya atthu akhanle anyu oowaavaha irevista khuta mweeri. Mwaavaheke irevista sa niinano, ni mwaahimeeryeke wira munooruha-tho irevista sa mweeri mukina.