“Mweeri wa Agosto Onrowa Okhala Woohiliyaleya!”—Olumwenku Wotheene Enrowa Okaiwa Efolyeeto Esya
1. Ekampaanya xeeni ya vameekhaaya enrowa opakiwa olumwenku wotheene?
1 Moohipisa, Omwene wa Muluku onimwiiriha iyaakha 100 sa olamulelo. Nto ti vootthuneya onvuwiha Yehova nipakaka ekampaanya ya vameekhaaya! Mweeri wa Agosto, olumwenku wotheene nnookawaka efolyeeto esya eni: Ninrowa Ophwanya Woowi Waakhuliwa wa Makoho Ootthuneya Mookumini?. Efolyeeto ela, ennaatumererya atthu waavya waakhuliwa wa makoho aya mBiibiliyani, ni ennitthokiherya moota esaite ahu jw.org ekhanle aya oowaakhaliherya.
2. Mweeri wa Agosto ninrowa wiirela sai mpantta ‘okhuwela n’ilulu sulupale, nimutthapelaka Yehova’?
2 Okhuwela Moomutthapela Yehova: Wira akhaliheriwe anna olaleerya vanci, aapakiwa mareheryo wa ale aniphavela okela opioneero wookhaliherya, Agosto. Awo pooti ovaha iwoora 30 mweeri yoowo. Okhala wira Agosto orina Inamathanu, Isaabadu, ni Ittiminku 5, anamalaleerya anci anivara muteko wala osoma, anoowerya okela opioneero. Mwaarina ene ole onimusomiha anyu Biibiliya onirowa vahoolo, wala mwaana oniphavela okhala namalaleerya, mulavule ni mutokweene onuuraanyiha nikhuuru na axitokweene moohipisa. Tthiri, vanoohakalaliha vanci akhala wira awo anoolaleerya ni hiyo okathi owo! Nnaamwi mapioneero ookilaatheya anci akumihaka ifeeriya mweeri wa Agosto nuumaleliha iwoora saya sa khula mwaakha, waaniheryasa awo anrowa olokiherya eprograma aya wira akhaliherye vanci ekampaanya ela. Vano imusi sihaana ovaanela moota sinrowa aya wiirela mpantta ‘okhuwela n’ilulu sulupale, simutthapelaka Yehova’, mweeri wa Agosto.—Ézi. 3:11; Mir. 15:22.
3. Exeeni ekhanle ahu oolipelela mwa ekampaanya ela ya vameekhaaya?
3 Nnaamwi nitonko ene wiirela mpantta ekampaanya ntoko ela, ninnilipelela wira ela enrowa okhala yoohiliyaleya. Woonasa wene, nnoookhalana mwaattelo musya wa iwoora, anamalaleerya ni mapioneero ookhaliherya. Tthiri, vaavo mwaakha wa muteko wa 2014 oniphiya awe wanikisa, Yehova onooreeliha wiimananiha wahu niluttuweliwaka olaleerya mweeri wa Agosto!—Math. 24:14.