Yehova Onikoonela Sai?
1. Moota xeeni Biibiliya oryaawe ntoko eloola?
1 Niireke nyuwo munnirumeela eloola ikwaha sinceene? Atthu anceene annirumeela eloola khula nihiku, maana eyo ennikhaliherya wira nilokiherye erutthu ahu. Biibiliya onnilikanyihiwa ni eloola. Okathi onimusoma ahu, nnoowerya oweha omutthu ahu, maana Yehova oniweha murima. (1 Sam. 16:7; Yak. 1:22-24) Biibiliya onoowerya ‘otokosa sowupuwela ni sotthuna sa mmurimani mwa mutthu’. (aHéb. 4:12) Osoma ni wuupuwelela Nuulumo na Muluku, onnikhaliherya sai oweha ipantte sintthuneya ahu olokiherya wira nikhale anamalaleerya ooloka?—Esal. 1:1-3.
2. Biibiliya onnikhaliherya sai wiitokosa mmensihu?
2 Mmurumeele Biibiliya Ntoko Eloola: Arumeyi owaamini aniromoliwa mBiibiliyani, anniniixuttiha mikhalelo sinivahiwa efaita ni Yehova. Mwa ntakiheryo, Davidi, aahooniherya oluttuweliwa ni nsina na Muluku. (1 Sam. 17:45, 46) Yesaya, moolipa murima aahiivahererya olaleerya muttetthe wooxankiha. (Yes. 6:8, 9) Yesu, mwaha womphenta Tiithi awe a wiirimu, aanoona muteko woolaleerya okhala etthu yoohakalaliha ohiya etthu yoolemela. (Yoh. 4:34) MaKristau a eseekulu yoopacerya yaanilaleerya mooluttuweliwa, ni yaanimuroromela Yehova. (Mit. 5:41, 42; 2 aKor. 4:1; 2 Tim. 4:17) Nto wuupuwelela matakiheryo awo, onoonikhaliherya wiitokosa wira nilokiherye muteko ahu woolaleerya.
3. Xeeni vanireerela ahu opaka marukunuxo moohipisa?
3 Mulokiheryeke Itthu Sihilonke: Khivanireerela oweha valoolani etthu yoohiloka nto khuhiyaka siiso. Nto nihaana onvekelaka Yehova wira owehe murima ahu ni onikhaliherye opaka marukunuxo. (Esal. 139:23, 24; Luka 11:13) Okhala wira okathi onnihalela ori vakhaani, nto opaka marukunuxo moohipisa pooti woopola okumi ahu.—1 aKor. 7:29; 1 Tim. 4:16.
4. Exeeni eniireya ni mutthu onimusoma Biibiliya nto khiyapaka marukunuxo?
4 Murima ahu yoowo Yehova oniweha awe, ti wootepa otthuneya ovikana makhalelo ahu a erutthu. (1 Ped. 3:3, 4) Exeeni eniireya ni mutthu onimusoma Biibiliya nto khiyapaka marukunuxo moovarihana ni ele esomme awe? Owo onnikhala mutthu ‘ohinliyala nananoru, masi onimaliherya ikano iyo; nto owo onophwanya oreeriwa mwaha wootthara ikano seiyo’. (Yak. 1:25) Tthiri, weettela ele enisoma ahu, onooniiriha okhala anamalaleerya oohakalala ni ooloka, maana ninnoona muloolani moovuwa mwa Yehova.—2 aKor. 3:18.