Mmurumeeleke Biibiliya Ntoko Exipelyu

Mwiixutti Yakobo, aahimulikanyiha Biibiliya ni exipelyu yeeyo ennikhaliherya osuwela mikhalelo sahu. (Yak. 1:​22-25) Ninrowa omurumeela sai oratteene Biibiliya ntoko exipelyu?

Mmusomeke Biibiliya ni ephoole. Vakhala wiira nnimwiiweha vaxipelyuni naakuveyasaka, pooti ohiweha itthu soohiloka siri owiitho wahu. Mwa enamuna emosa-ru, akhala wiira nnoomusoma Biibiliya naakuveyasaka, pooti ohiweha marukunuxo ninreerela ahu opaka mookumini mwahu.

Nweheke itthu munreerela anyu olokiherya. Ikwaha sikina, okathi nniiweha ahu vaxipelyuni, pooti waaweha atthu akina akhumelaka vaxipelyuni. Okathi owo, hiyo pooti owehexexaka itthu soohiloka sa atthu akina. Mwa enamuna emosa-ru, pooti omusoma Biibiliya niwehexexaka soovonya sa atthu akina. Masi opaka eyo, khonrowa onikhaliherya olokiherya mikhalelo sahu soohiloka.

Mukhalaneke moonelo wooloka. Akhala wiira nnoowehexexa itthu soohiloka paahi sinikhumela vaxipelyuni, eyo pooti onikhulumula. Ntoko exipelyu, okathi nimmusoma ahu Biibiliya, nikhalaneke moonelo wooloka. Nihuupuweleke wiira nihaana opaka itthu Yehova ohinnivekela awe. — Yak. 3:17.