Olaleerya Wookhweya

Ninrowa Ophwanya Woowi Waakhuliwa wa Makoho Ootthuneya Mookumini?

Muhimyeke so: “Ehaali! Niri ekampaanya ya olumwenku wotheene yookawa efolyeeto ela yootthuneya. Nto ela ti yawiyu”. Munvahe efolyeeto eyo mwaneene etthoko mwa enamuna onoona awe muru muulupale.

Akhala wira muniphavela ohiya efolyeeto ipa soohikhala atthu, mpweheke opuro ohinooniwa aya ni atthu anivira, ni musyake okhuna moohikhalela.

Akhala wira mutthu owo ennimusivela ekeekhai wala onniphavela ovaanela, pooti omukoha moonelo awe murumeelaka nikoho niri ohoolo wa efolyeeto. Muhule efolyeeto ni mmooniherye masu a Esalimo 119:144, 160. Mmuhimeerye wira efolyeeto ela ennimooniherya Web saite onrowa omukhaliherya ophwanya waakhuliwa wa makoho a mBiibiliyani. Murumeelaka esaite ahu jw.org, pooti omooniherya eviidiyu eni: “Xeeni Vanitthuneya Anyu Omusoma Biibiliya?” Muhinatthi okhuma, mmooniherye makoho mararu ari wanikisa wa efolyeeto nto mmukohe wira: Nikoho xeeni muniphavela anyu osuwela waakhuliwa waya? Okathi wootthikela, muthokorerye nikoho nlo mukilikariki opuro oni: SOWIIXUTTIHA SA BIIBILIYA > WAAKHULIWA WA MAKOHO A MBIIBILIYANI.

Mittetthe seiye anamunceene ahirina aya interneti, nvaheke ebroxura Ihapari Sooreera Sinikhuma wa Muluku!. Muhimyeke so: “Kiniphavela owooniheryani moota onihakalaliha aya osoma Nuulumo na Muluku”. Mmooniherye mutthu owo epaaxina yookiserya wira othanle mwaha oniphavela awe. Nto muhimye so: “Nyuwo mwaanisuwela wira mwa minutu vakhaani paahi munoowerya ophwanya waakhuliwa wa nikoho nla?” [Mpake yowooniherya murumeelaka nikoho na mwaha othanliwe ni mwaneene ettthoko.] Murumeelaka muru mwaamukhaani onittharelana ntoko nikoho, muleehane nihiku nootthikela wira nvikanihe ovaanela. Mwiimananihe ohiya khula empa efolyeeto Ninrowa Ophwanya Woowi Waakhuliwa wa Makoho Ootthuneya Mookumini?

Akhala wira munikawa efolyeeto enimulattula kongresu a muttetthe anyu, munvahe-tho mutthu owo nlattulo okathi omosaru ni muhimye so: “Nave, nnaavaha atthu efolyeeto ela enilattula muthukumano wa atthu otheene yoowo ohiniliviwa etthu onaattamela”.

Owehaweha 1 ya Agosto

Wuumalani wa esumana, okathi onikawa anyu erevista Owehaweha akhala wira vannireerela, muhimyeke so: “Nave, nimphavela woovahani irevista sahu sa mweeri ola. Erevista ela ennaakhula nikoho nni: ‘Niireke Muluku Onnookhapelelani?’”

Despertai! a Agosto

Wuumalani wa esumana, okathi onikawa anyu erevista Despertai! akhala wira vannireerela, muhimye so: “Nave, nimphavela woovahani irevista sahu sa mweeri ola. Erevista ela ennaakhula nikoho nni: ‘Atthu anrowa wataana sai mukina ni mukhwaaya?’”