Murumeele Etratato Ela Khuta Okathi
1. Etratato Osuwela Ekeekhai epakiwe wira enikhaliheryeke sai?
1 Etratato Munniphavela Osuwela Ekeekhai?, epakiwe wira enikhaliheryeke opaceriha soosoma sa Biibiliya. Nave, etratato ela ennikhaliherya omwarya-mwarya ekeekhai. (Mus. 11:6) Malakiheryo anittharelana annooniherya moota wookawa saana etratato ela.
2. Ninrowa orumeela sai etratato ela wira nipacerihe ovaanela?
2 Opaceriha Ovaanela: Nyuwo pooti onvaha mwaneene etthoko etratato eyo, ni omooniherya makoho 6 ari vakaapani, nto khiyakoha so: “Nikoho xeeni nniphavela anyu osuwela?” Nuumala othanla nikoho nene, mmooniherye moota Biibiliya onaakhula awe ni musome yoolepa eromoliwe ettima eyo. Musome wala muhimye masu ari epaaxina yookiserya, ni munvahe eliivuru Biibiliya Oniixuttiha Exeeni. Hata okhoottaka eliivuru eyo, owo ohaakhela etratato enrowa omwiiriha ophavela osuwela ekeekhai.—Math. 13:23.
3. Nipakeke exeeni mwaneene etthoko aatteliwa miteko?
3 Mwaneene Etthoko Aatteliwa Miteko: Nyuwo pooti ohimya so: “Okhala wira muhaatteliwa miteko, kinoohiyeryani etratato ela paahi. Nto, yookhalana makoho 6 animakela ahu okoha ni ennaakhula moovarihana ni Biibiliya. Vano kirweeke silini?”
4. Nihimyeke exeeni naakawaka etratato mphironi?
4 Naalaleeryaka Mphironi: Nyuwo pooti ohimya so: “Sai ehaali? Wa makoho ala 6, nookhala nitonko anyu wiikoha? [Nwehereryeke waakhuliwa.] Etratato ela ennivaha waakhula wa Biibiliya weiwo ori wowiiwanyeya, ni wookhalela”. Akhalana okathi mutthu owo, nyuwo pooti omooniherya waakhuliwa wa nikoho nimosa mutratatoni, ni onvaha eliivuru Biibiliya Oniixuttiha Exeeni.
5. Nirumeeleke sai etratato itthoko sihikhanle atthu?
5 Etthoko Ehikhanle Atthu: Mittetthe sikina, anamalaleerya annihiya iliivuru itthoko sihikhanle atthu. Akhala wira mmuttettheni mwanyu ela etthu yookhalela, nyuwo pooti ikwaha sikina ohiya etratato Osuwela Ekeekhai. Okathi onitthikela anyu pooti ohimya so: “Nihiku naavinre ahu va khaakhanle mutthu, nto naahihiya etratato ela vamukhora. Wa makoho ala 6, tinivi nimphavela anyu osuwela waakhuliwa waya?”
6. Exeeni eniiriha etratato Osuwela Ekeekhai okhweya okawa naalaleeryaka?
6 Etratato Osuwela Ekeekhai enniwiixuttiha ekeekhai atthu mookhweya ni woovara murima. Atthu aneettela etiini ni a makhalelo otheene annisiveliwa etratato ela. Vannikhweya okawa; hata amiravo ni anamalaleerya a niinano pooti owerya okawa. Niireke wira munnirumeela etratato ela khuta okathi?