Niireke Wira Mweeri wa Outubro Munoopaceriha Yoosoma ya Biibiliya?
1. Ninrowa okawaka exeeni mweeri wa Outubro?
1 Mweeri wa Outubro ninrowa okawaka irevista A Sentinela ni Despertai!. Wira niwiirihe atthu wunnuuherya ophavela osuwela ekeekhai, hiyo ninnitumereriwa wiimananiha orumeela etratato Munniphavela Osuwela Ekeekhai?, wira nipacerihe yoosoma ya Biibiliya. Ninrowa opaka sai eyo okathi onitthikela ahu omuxukurya mwaneene etthoko?
2. Ninrowa orumeela sai etratato Osuwela Ekeekhai, wira nipacerihe yoosoma ya Biibiliya vaavo vanitthikela ahu omuxukurya ole aamuhiyenrya ahu irevista?
2 Moota Woorumeela Etratato: Hiyo pooti ohimya so: “Irevista soohiyenryakani sinnaatumererya atthu a mikhalelo sotheene vamosa ni ale aneettela etiini wira avarerye ele Biibiliya eniixuttiha awe. [Munvahererye mwaneene etthoko etratato Osuwela Ekeekhai, ni mmooniherye makoho ari vakaapani.] Ala makoho ootthuneya yaawo Biibiliya onaakhula awe mooreerela. Niireke wira mootoko wiikoha makoho ala?” Nuumala mwaneene etthoko waakhula, muthokorerye hoothe waakhuliwa wa nikoho nimosa mutratatoni mmo, ni musome yoolepa emosa mwa soolepa siri muttimani mmo. Vano, mmuleele wira nna ntakiheryo nimosa na ele Biibiliya eniixuttiha awe, nto munvahe eliivuru Biibiliya Oniixuttiha Exeeni. Hiyo pooti othokorerya ittima soopacerya sa muru onrowa awe othanla. Aahiiso hiyo pooti othanla muru yoole onoona ahu wira onnaakhula saana mwaha owo olavunle ahu mutratatoni mmo. Hiyo pooti orumeela ireferensia iya sinittharelana:
● Niireke wira Muluku onninthokorerya tthiri? (ipax. 9-11, itti. 6-10)
● Niireke wira ekhotto ni ohaawa onoomala? (epax. 12, itti. 12-13)
● Exeeni enniiraneela vaavo vanikhwa ahu? (ipax. 59-60, itti. 7-8)
● Niireke wira nookhala nlipelelo wa ale akhwiiye? (epax. 71, itti. 13-15)
● Kilompeke sai wira Muluku aakhule olompa waka? (ipax. 166-167, itti. 5-8)
● Kinrowa ophwanya sai ohakalala mookumini mwaka? (epax. 9, itti. 4-5)
3. Ninrowa opakaka exeeni akhala wira ninniphwanya mikhalelo soovirikana vatthokoni-vo?
3 Masi, akhala wira mikhalelo sikhanle vatthokoni-vo khasineemererya opaceriha aahiiso wooniherya moota wowiixutta eliivuru Biibiliya Oniixuttiha Exeeni, vaavo vanipacerya ahu omuxukurya mwaneene etthoko, okathi wotheene hiyo pooti opaka marehereryo wira nitthikele opuro ole wira nivikanihe othokorerya wahu. Moovarihana ni ophavela orina awe mutthu owo, hiyo pooti othanla othokorerya nikoho nikina nri mutratatoni khuta okathi onimuxukurya ahu nihinatthi opacerya othokorerya eliivuru. Tivonto, nirumeele saana etratato ela yookhweya mweeri wa Outubro, wira nipacerihe yoosoma ya Biibiliya, ni waakhaliherya atthu a murima saana wira ‘asuwele ekekhai’.—Yohani 8:31, 32.