Iyaakha 100 Nilaleyaka Omwene!
1. Exeeni atthu a Yehova yaatumereriwe aya opaka mwa iyaakha sowiiraka 100 sivinre?
1 Mwa iyaakha sowiiraka 100 sivinre, munna Rutherford aahilavula masu oovara murima yaahimya so: “Mooneke, Mwene onnilamulela! Nyuwo ti munrowa omulaleya. Nto, mmulaleye, mmulaleye, mmulaleye, Mwene ni omwene awe”. Atthu a Yehova yaahitumereriwa olaleya ihapari sa Omwene. Nave ti yeeyo enipaka ahu olelo-va! Ntoko maKristau oopacerya, ninnilaleya ihapari sooreera sa Omwene mulaponi motheene. (aKol. 1:23) Nto nuupuwelelaka iseekulu sivinre, exeeni epanke ahu wira nilaleye Omwene? Ninrowa ovikaniha sai opaka eyo vaavo vanaattamela ahu iyaakha 100 sa Omwene?
2. Irevista sahu sinilaleya sai Omwene?
2 Wuupuwelela Itthu Sivinre: Mwa iyaakha sinceene, iliivuru sahu sinnilaleya Omwene wa Muluku. Mwa ntakiheryo, okhuma 1939, erevista ahu yuulupale ehaana muru oni: Owehaweha Elaleyaka Omwene wa Yehova. Erevista ela ennitthokiherya ele ekhanle Omwene ni ele enrowa opakiwa ni Omwene owo. Nave-tho, erevista Despertai! ennittittimiherya Omwene wa Muluku ntoko yoolipelela ya apinaatamu. Nto ti vookhalela maana irevista iya sinnitaphuleliwa vanceene ni okaiwa molumwenkuni!—Wis. 14:6.
3. Inamuna xeeni sitonko ahu orumeela wira nilaleye Omwene?
3 Atthu a Yehova annirumeela inamuna soovirikana wira alaleye Omwene. Iyaakha sa khalai, naanirumeela ikaaro saarumiha masu, raadio, ni ifonoografo. Inamuna iyo saahinikhaliherya olaleya ihapari sooreera wa atthu anceene okathi yoowo yaari aya anamalaleerya a Omwene vakhaani. (Esal. 19:4) Mahiku ala, ninnirumeela esaite jw.org wira naalaleerye atthu anceene, ohela muhina ilapo seiye muteko ahu onikhoottihiwa aya.
4. Itthu xeeni sa vameekhaaya ninrumeela ahu wira nilaleye Omwene wa Muluku?
4 Nave, atthu a Yehova, annirumeela inamuna sa vameekhaaya wira alaleye Omwene. Mwa ntakiheryo, okhuma mwaakha wa 1990 nihincererya olaleya wahu khula empa orweela wa olaleerya mapuro anipwehiwa ikaaro, ni mapuro aniiriwa nakoso. Mahiku ala, nootthokiha olaleerya wa vameekhaaya mapuro otheene ari atthu. Muteko owo onipakiwa ipooma suulupale. Nave, miloko sinci sinnilaleerya mapuro otheene ari atthu mmuttettheni mwaya arumeelaka ikarinyu ni meesa sirina iliivuru sinipwehiwa mphironi anivira atthu anci. Masi, nlelo olaleerya khula empa ti enamuna yuulupale ya olaleya wahu Omwene.—Mit. 20:20.
5. Eparakha xeeni anamunceene anrowa aya okhalana mwaakha wa muteko musya?
5 Wuupuwelela Itthu sa Muhoolo: Mwaakha wa muteko onipacerya Setembro, nto anamunceene anoopacerya opioneero wookilaatheya mweeri yoowo. Niireke ni nyuwo munimwiilepiha? Wala munookela opioneero wookhaliherya? Tthiri, hata mukelaka opioneero wala muhikelaka, Yehova onimooreelihani mwaha wa wiimananiha wira mulaleye Omwene.—Mal. 3:10.
6. Xeeni Outubro oryaaya mweeri wa vameekhaaya?
6 Mweeri wa Outubro 2014, Omwene wa Muluku onimwiiriha iyaakha 100 sa olamulelo. Nto erevista Owehaweha enikawa ahu ya Outubro enrowa ottittimiheryaka Omwene. Mwiimananihe vanci wira mwaakawele atthu anceene. Nto, nuupuwelelaka itthu sa muhoolo, nrowe nivikanihe ‘olaleya ihapari sorera sa Omwene wa Muluku’ wa atthu otheene aniphavela owiriyana.—Mit. 8:12.