Niireke Munootakiha Nthiti na Yehova ni na Yesu Okathi wa Wuupuwelela?
1. Moota xeeni Anamoona a Yehova aniimananiha aya okathi wa Wuupuwelela okhwa wa Yesu?
1 Yehova onniimananiha vanci wira omalelihe soolakela sawe. Yesaya onniromola mareeliho a Omwene oriki: ‘Nthiti na Yahvéh ànakhotto nnimwakhwanihera sothene seiya’. (Yesaya 9:6, Biblya Exirima) Nave, okathi Yesu aalaleerya awe valaponi, aahikhalela nthiti okokhorela wekeekhai. (Yoh. 2:13-17; 4:34) Khula mwaakha okathi wa Wuupuwelela, anna imilyau sene anniimananiha otakiha nthiti na Yehova ni na Yesu yincereryaka olaleerya waya. Niireke nyuwo munoopaka etthu emosaru?
2. Exeeni enrowa ahu opaka mwa nthiti okhuma 7 a Março?
2 Ekampaanya ya Wuupuwelela: Mwaakha ola, ekampaanya ya waalattula atthu enipacerya Saabadu, 7 a Março. Mumpake palano nenna-va wira mwaluttuweliwe olaleerya. Anna animwiimananiha wira yaalattule atthu anceene. Mwiimananihe wira mwaalattule ale anaasomiha anyu Biibiliya, ale animakela anyu waaxukurya, amusi, ale anivarana anyu muteko, ni ale aneettana anyu oxikola, mwaavahaka efolyeeto ya nlattulo wala omurumeela jw.org.
3. Ninrowa wuncererya sai olaleerya wahu myeeri sa Março ni Abril?
3 Opioneero Wookhaliherya: Nthiti nnooniiriha-tho wuncererya olaleerya wahu. Anna anci anookela opioneero wookhaliherya Março ni Abril, maana pooti othanla ovaha iwoora 30. Okathi wa Omulompa Muluku Vatthokoni wala yoosoma ya omwaneene, munvekele Yehova wira moone moota woopaka eyo. (Mir. 15:22) Oluttuweliwa wanyu ekampaanya pooti owiiriha akina opaka etthu emosaru. Tthiri munoomutakiha Yesu mwapaka marukunuxo wira muncererye olaleerya wanyu.—Mar. 6:31-34.
4. Mareeliho xeeni ninrowa ahu ophwanya natakiha nthiti na Yehova ni na Yesu?
4 Omutakiha wahu Yehova ni Yesu okathi wa Wuupuwelela onooniphwanyiha mareeliho. Mwa ntakiheryo, atthu anceene animwiiwa ihapari sahu. Ohiya-vo, nnoophwanya ohakalala mwaha wa omurumeela Yehova ni waakhaliherya akina. (Mit. 20:35) Nave-tho, nnoomutakiha Yehova ni Yesu, maana awo aniluttuweliwa ni muteko woolaleerya.