Niilokiherye Wira Nuupuwelele Okhwa wa Yesu
Waari 13 a Nisani mwaakha wa 33 EC. Yesu aanisuwela wira ole waari ohiyu wookiserya aarowa awe okhala ni awiixutti awe ohinatthi wiiviwa. Owo aarowa omwiira Paasikha ookiserya ni awiixutti awe, nto nuumala-vo opaceriheke Yoolya ya Ohiyu y’Apwiya. Okhala wira owo waari okathi wootthuneya, nto Yesu ni awiixutti awe yaahaana wiilokiherya. Tivonto aamurumme awe Pedru ni Yohani wira yalokiherye niira nlo. (Luka 22:7-13) Mpakha mahiku ala, ti vootthuneya wira maKristau anuupuwelela okhwa wa Yesu yiilokiheryeke voohimya sa niira nlo. (Luka 22:19) Itthu xeeni nintthuneya ahu olokiherya mwaha wa niira nlo na 3 a Abril?
Moota Axitokweene Anrowa Aya Wiilokiherya:
• Mpake mareheryo a orumeela empa ya Omwene wala opuro mukina wooreerela. Opuro owo ohaana oreerihiwa vahinatthi, okhalana ikhattera siniphiyerya, wookokola ni wooreera.
• Mmuthanle mulipa oolavula mwaha oophwanelela, muhooleli a eprograma, ni anna anrowa ovekela wira sivirihiwe ephau ni eviinyu.
• Akhala wira ehaavo-tho egrupu ekina enrowa orumeela opuro owo, muhaana ovaanela voohimya sa okathi wookela ni wookhuma vamosa ni opuro woopweha mikukutta.
• Mwaathanle ni waatthokiha anamathoonyerya ni ale anrowa oviriha ithoonyeryo.
• Mpake mareheryo wira ekhale ephau ni eviinyu sooreerela, iparatho, ikoopho sa eviinyu, meesa ookhalela ni ekuwo ya vameesa.
Moota Anamalaleerya Anrowa Aya Wiilokiherya:
• Mwiilokiherye wira mwiirele mpantta ekampaanya ya okawa malattulo.
• Mpake elista ya atthu mukhale anyu owaalattula ntoko: ale munaasomiha anyu Biibiliya, amusi, anaxikola akhwiinyu, ale anivarana anyu muteko, ni atthu akina munaasuwela anyu.
• Musome ni muupuwelele soolepa sa Biibiliya sa okathi wa Wuupuwelela.
• Mwiilokiherye wira mwawaakheleke aletto.