Mwiilokiherye Okathi wa Wuupuwelela ni Murima Woohakalala
1. Okathi wa Wuupuwelela Okhwa wa Yesu, onnivaha eparakha yoopaka exeeni?
1 Nihiku na Wuupuwelela Okhwa wa Yesu, Namanli, 26 a Março, ninnireerela ohakalala mwaha wa ele Muluku opanke awe wira onoopole. (Yes. 61:10) Hata nihiku nno nihinatthi ophiya, okhalana murima woohakalala onoonikhaliherya wiilokiherya saana. Moota xeeni?
2. Exeeni enniiriha wiilokiherya okathi wa Wuupuwelela Okhwa wa Yesu?
2 Mwiilokiherye Okathi Owo: Eyoolya ya Ohiyu ya Apwiya, niira nuulupale masi noohaatta itthu. Masi, vanitthuneya wiilokiherya vahinatthi, wira sihiliyaliwe olokiheriwa itthu sootthuneya. (Mir. 21:5) Mwa ntakiheryo, okathi ni opuro wooreerela ohaana ohimmwa vahinatthi. Nave ehaana okhala ephau ni eviinyu yooreerela. Opuro wa muthukumano ohaana okhala wooratteliwa ni wootthokihiwa saana. Ohiya-vo, munna onirowa olavula mwaha, anna anirowa oviriha ephau ni eviinyu, vamosa ni anamakhaliherya ahaana wiilokiherya saana. Moohaaniherya, itthu sinceene sootthokihiwa. Tthiri, oxukhurela mukuttho wowoopola wa Yesu, onniniiriha wiilokiherya saana mwaha wa okathi ola woottittimiheya.—1 Ped. 1:8, 9.
3. Ninrowa olokiherya sai murima ahu okathi wa Eyoolya ya Ohiyu ya Apwiya?
3 Mulokiherye Murima: Olokiherya murima ahu ti wootthuneya wira nivahe efaita ele enitaphulela aya Wuupuwelela Okhwa wa Yesu. (Ézi. 7:10) Mpakha ophiya okathi owo, nihaana ovirihaka okathi wira nithokorerye eprograma ya vameekhaaya ya omusoma Biibiliya ya okathi wa Wuupuwelela Okhwa wa Yesu, ni otthokelela mahiku ookiserya a okumi wa Yesu valaponi. Nto, oxukhurela mukuttho wowoopola wa Yesu onooniiriha omutakiha.—aGal. 2:20.
4. Mireerelo xeeni sa yowoopola ya Yesu siniwiirihani ohakalala vanci?
4 Okhwa wa Kristu woovuwiha okhulupale wa Yehova. Onnimaliha yoottheka ni okhwa. (1 Yoh. 2:2) Nave-tho, onnihula ephiro wira naataane ni Muluku ni ophwanya okumi woohimala. (aKol. 1:21, 22) Okhwa wa Kristu onnilipiha yoolakela ahu wira nikhaleke moovarihana ni wiivahererya wahu wa Yehova ni ovikaniha okhala awiixutti a Kristu. (Math. 16:24) Nto, muhakalaleke vanci vaavo muniilokiherya anyu wira murowe Wuupuwelela Okhwa wa Yesu onaattamela!