Nvikaniheke ‘Wira Ela’ Wuupuwelela Okhwa wa Yesu, 5 a Abril
1. Nthowa xeeni Wuupuwelela okhwa wa Yesu oryaaya wootepa otthuneya?
1 ‘Mwireke ela, mukupuwelaka miyo’. (Luka 22:19) Orweela wa masu ala, Yesu ohaaruma atthareli awe wuupuwelela okhwa wawe wowoopola. Mwaha wa eyoopoli Yesu ovanhe awe, khinivo nihiku nikina vamwaakhani nootepa otthuneya ni na efaita wa maKristau, ohiya nihiku na Wuupuwelela okhwa wawe. Nto ninrowa omuxukhurela sai Yehova vaavo nihiku na 5 a Abril na wuupuwelela okhwa wa Apwiya onaattamela?—aKol. 3:15.
2. Ninrowa ovaha sai efaita Wuupuwelela okhwa wa Yesu orweela mwa osoma ni otthokelela?
2 Mwiilokiherye: Hiyo ninniitthokiha naaphavelaka opaka etthu yootthuneya. Nto akhala wira nnoosoma ni etthoko ahu itthu saamwiiranenle Yesu ohalaka vakhaani okhwa ni wuupuwelela itthu iyo, nnootthokiha murima ahu wira Nuupuwelele okhwa wawe. (Ézi. 7:10) Kalendaario ni efolyeeto Examine as Escrituras Diariamente, enniruuha elista yaamukhaani ya soolepa, masi elista yoomalela ya soolepa iyo vamosa ni miru sinivarihana aya, sinikhuma muliivuruni Maior Homem, iponto iyo sinniphwanyaneya murevistani A Sentinela, 1 a Feverero 2011, ipax. 23-24.
3. Ninrowa ovaha sai efaita ya Wuupuwelela okhwa wa Yesu nancererya muteko ahu woolaleerya?
3 Mulaleeryeke: Hiyo nnoowerya nave ovaha efaita orweela mwa olaleerya vanceene okathi wa Wuupuwelela okhwa wa Yesu. (Luka 6:45) Ekampaanya ya waalattula atthu olumwenku wotheene wira Yuupuwelele okhwa wa Yesu, enrowa opacerya Saabadu 17 a Marso. Niireke wira munoolokiherya eprokrama anyu wira mulaleerye vanceene, waaniheryasa murumeelaka ntoko pioneero ookhaliherya? Nto nyuwo pooti ovaanela mwaha owo ni etthoko anyu okathi wa Omulompa Muluku vatthokoni.
4. Mireerelo xeeni nniwerya ahu ophwanya mwaha wa Wuupuwelela okhwa wa Yesu?
4 Tthiri ninnittottela mureerelo munceene mwaha wa Wuupuwelela okhwa wa Yesu khuta mwaakha! Ohakalala wahu ni omphenta wahu Yehova, onnincerereya vaavo nnuupuwelela ahu mahala a Yehova mwaha wa onivaha mwanawe mmoseene wira onoopole. (Yoh. 3:16; 1 Yoh. 4:9, 10) Eyo enniniiriha ohiphavela wiihakalaliha hiyo paahi mmensihu. (2 aKor. 5:14, 15) Nave-tho, ninniphavela vanceene onvuwiha Yehova ohoolo wa atthu. (Esal. 102:20-22) Moohaaniherya, ntoko arumeyi ooxukhurela a Yehova, ninnilipelela moohakalala eparakha enrowa ahu okhalana okathi wa Wuupuwelela okhwa wa Yesu 5 a Abril, wira ‘nilaleye okhwa wa Apwiya’.—1 aKor. 11:26.