Nooniherye Oxukhurela Wahu
Wuupuwelela Okhwa wa Yesu, 17 a Abril
1. Masu xeeni a nasalimo anireerela okathi wa Wuupuwelela okhwa wa Yesu?
1 Omuxukhurelaka Yehova mwaha wa okhaliheriwa ni woopoliwa nuuwo, nasalimo aakonhe so: “Kaxukhuru sai Apwiya mwaha wa sorera sothene sikìrenlyaya?” (Esal. 116:12) Moolikanasa, arumeyi a Muluku olelo-va aakhalana mathowa manceene aniwiiriha oxukhurela. Nuuvira iyaakha sinceene nuumala olempwa moolumo ala, Yehova ohaavaha apinaatamu etthu yootepexa oreera, eyo piiyo, yowoopola. Tthiri, vaavo vaniireherya ahu wira nuupuwelele okhwa wa Yesu 17 a Abril, nohaana mathowa ooloka anniiriha oxukhurela.—aKol. 3:15.
2. Mathowa xeeni anniiriha oxukhurela yowoopola?
2 Mareeliho a Yowoopola: Orweela mwa yowoopola, hiyo pooti “oleveleliwa itampi” sahu. (aKol. 1:13, 14) Yowoopola ennineemererya omukokhorela Yehova ni yowuupuxerya ya murima yooloka. (aHéb. 9:13, 14) Ohiya-vo, Yowoopola tennikhaliherya olavula ni Yehova mohoova etthu vaavo vaninvekela ahu. (aHéb. 4:14-16) Otheene anaamini yowoopola aakhalana yoolipelela yuulupale ya waakhela okumi woohimala!—Yoh. 3:16.
3. Ninrowa omuxukhurela sai Yehova mwaha wa yowoopola?
3 Nooniherye Oxukhurela: Nnimooniherya oxukhurela wahu wuulupale, nimusomaka Biibiliya ni wupuwelela ele enisoma ahu khula nihiku nittharaka eprokrama ya okathi owo. Muru oni: “Você está preparado para o dia mais importante do ano?”, A Sentinela 1 ya Feverero, 2011, olempwale wira onikhaliherye mmwaha owo. Nave-tho, orweela mwa mavekelo ahu a vamurimani nnoowerya omuleela Yehova wira ninnivaha efaita yowoopola. (1 aTes. 5:17, 18) Ohicompela wahu Niira nna, niiwelelaka yooruma ya Yesu, enooniherya oxukhurela wahu yowoopola. (1 aKor. 11:24, 25) Nto, nnoowerya otakiha niphento nuulupale na Yehova, naalattulaka atthu anceene wira yuupuwelele ni hiyo okhwa wa Yesu.—Yes. 55:1-3.
4. Tiivi enitthuneya okhala yoolakela ahu?
4 Arumeyi ooxukhurela a Yehova khanithokorerya Niira nna, ntoko mithukumano sikina. Masi, anoona okhala muthukumano wootepa otthuneya vamwaakhani! Vaavo vanaattamela aya Wuupuwelela okhwa wa Yesu, yoolakela ahu ekhale ntoko ya nasalimo, yoowo aalempe so: “Murim’aka onnattottopela Apwiya: khunliyala sovaha saya nnákhala vakhani”.—Esal. 103:2.