Muxukhurele Mukuttho wa Yesu Niira na Wuupuwelela Ninnaattamela
1. Eparakha xeeni ninrowa ahu okhalana okathi wa Wuupuwelela?
1 Wuupuwelela okhwa wa Yesu 14 a Abril, onoonivaha eparakha yuulupale ya oxukhurela oreera murima wa Yehova. Luka 17:11-18 onnooniherya moota Yehova ni Yesu animoonela aya mutthu onixukhuru. Mooriipiha murima, namakuttula mmosa paahi wa ale 10 yaavonihiwe, taatthinke wira oxukhuru. Olelo-va, sinniniphwanya iretta sinci, masi mukuttho wowoopola onirowa omaliha iretta iyo ni oniphwanyiha okumi woohimala! Moohaaniherya, hiyo nnoomuxukhurela Yehova mahiku otheene mwaha wa mareeliho awo. Masi, ninrowa wooniherya sai oxukhuru isumana iyo sinirwa?
2. Ninrowa wuncererya sai oxukhurela yowoopola?
2 Muncererye Oxukhurela: Oxukhurela onipacerya mmuupuweloni. Wira nikhaliheriwe ovaha efaita yowoopola, ehaavo eprograma yoomusoma Biibiliya okathi wa Wuupuwelela. Eyo eniphwanyaneya mfolyeetoni Examine as Escrituras Diariamente, ni Calendário de 2014. Vaamureerela othokorerya soolepa iyo ni emusi anyu. Eyo enimuncererya oxukhurela wahu yowoopola ni oniiriha okhalana mweettelo wooloka.—2 aKor. 5:14, 15; 1 Yoh. 4:11.
3. Ninrowa wooniherya sai oxukhurela okathi wa niira na Wuupuwelela?
3 Mooniherye Oxukhurela: Oxukhurela onnooniheriwa ni miteko. (aKol. 3:15) Namakuttula ole aahimananiha omphwanya Yesu wira omuxukhurele. Moohaaniherya, owo anaaleela akina moohakalala wira aahipenuxiwa mootikiniha. (Luka 6:45) Oxukhurela wahu yowoopola onooniiriha oluttuweliwa ekampaanya enilaleya okhwa wa Yesu. Okela opioneero wookhaliherya wala wuncererya olaleerya wahu, inamuna sikina sooxukhurela. Nave-tho, ohiyu wa niira na Wuupuwelela, oxukhurela wahu ni murima wotheene onooniiriha owaakhela saana ale anirwa, ni wiivahererya waakhula makoho aya.
4. Exeeni eniphavela ahu opaka okathi wa niira na Wuupuwelela?
4 Niireke Wuupuwelela wa mwaakha ola ti wookiserya? (1 aKor. 11:26) Khinisuwenle. Masi, enisuwela ahu tiila: Ola okathi wa vameekhaaya wira mooniherye oxukhurela. Nto, masu ahu ooxukhurela ni wuupuwelela wa murima ahu anoomuhakalaliha Yehova, yoowo okumihenrye yowoopola.—Esal. 19:15.