MAKHALELO A MAKRISTAU
“Paulo, ahimuxukhuru Muluku, khulipihiwa murima”
Okathi anna a muloko wa oRoma yaasuwenle aya wira Paulo aanirwa, anna akina yaaheetta ikiloomo sowiiraka 40 wira yakumane ni yena. Moota xeeni wiivahererya waya ni ophenta wanvanre aya murima Paulo? “Paulo vawehalyawe atthu awo, ahimuxukhuru Muluku, khulipihiwa murima”. (Mit 28:15) Nnaamwi Paulo aalimaleliwe okhala mutthu aalipiha miloko aaxukurya awe, nihiku nle owo taalipihiwe.—2 aKor 13:10.
Olelo-va, axitokweene a isirkwitu annixukurya miloko wira yaalipihe anna ani arokora. Moolikanasa ni maKristau makina, ikwaha sikina, axitokweene awo annikhulumuwa, ovelavela, ni oriipiwa murima. Mukwaha mutokweene a esirkwiitu ni mwaarowa anrowa aya oxukurya muloko anyu, etthu xeeni munrowa anyu opaka wira mwaakhaliherye okhala oolipa wira otheene anyu mulipihane?—aRo 1:11, 12.
Orowa muthukumano wa muteko woolaleerya. Mutokweene a esirkwiitu onnilipiheya vanceene vaavo onaaweha awe anna ehiyaka miteko saya wira ekhaliherye moomalela miteko sa esumana ya vameekha aya. (1 aTe 1:2, 3; 2:20) Muupuwelele okhala pioneero ookhaliherya mweeri munixukuriwa anyu. Niireke munniivahererya olaleerya nuuwo ni aahiiso mwaarawe, wala orowa hoothe wiiriha yoosoma ya Biibiliya? Awo waasivela olaleerya ni anamalaleerya oovirikana, waahela muhina ale a niinano yaawo woonasa wene anuupuwela wira khansuwela olaleerya.
Nwaakheleke aletto. Niireke munninvaha opuro woorupa ni eyoolya mutokweene a esirkwiitu ni mwaarawe? Eyo enniwooniherya wira munnaaphenta. Awo khanivekela opuro wooreerexa wala eyoolya ya musurukhu munceene.—Luk 10:38-42.
Nwiriyaneke ni mweetteleke miruku ni malakiheryo awe. Mutokweene a esirkwiitu moophenta onninikhaliherya oweha moota woolokiherya muteko oninvarela ahu Yehova. Okathi mukina, owo pooti onipwapwelaka. (1 aKor 5:1-5) Owo onnitteeliwa murima vakhala wira ninnimwiiwelela ni murima wotheene.—aHéb 13:17.
Mooniheryeke oxukhurela wanyu. Mmuleeleke mutokweene a esirkwiitu anyu ni mwaarawe wira nyuwo munnixukhurela vanceene wiimananiha waya. Nyuwo pooti opaka eyo mmansinyu aahiiso pooti waalepela epaphelo.—aKol 3:15.