MAKHALELO A MAKRISTAU

**Murumeeleke Ebroxura ni Eliivuru Okumi Woohimala! Okathi Woolaleerya**

Noohakalala vanceene waakhela ebroxura ni eliivuru esya, wira nirumeeleke okathi nniiriha ahu yoosoma ya Biibiliya. Ninninvekela Yehova wira oreelihe wiimananiha wahu wira naapake awiixutti anceene. (Mat 28:18-20; 1 aKo 3:6-9) Ninrowa orumeela sai ikaruma iyo isya?

Okhala wira ebroxura ni eliivuru Okumi Woohimala!, kurso a Biibiliya, ennooniherya inamuna isya sa wiixuttiha, mutthareke malakiheryo awo khula okathi muniilokiherya anyu wira mwiirihe soosoma sa Biibiliya.a

Musomeke ittima ni mpakeke makoho
Musomeke soolepa sini “musome wala mmusome”, ni mwaakhaliheryeke anaxikola anyu moota woovarihela muteko mookumini mwaya
Mooniheryeke ni muthokoreryeke iviidiyu, murumeelaka makoho ari mbroxurani
Mwiimananiheke othokorerya khula yoosoma

Okathi woolaleerya, nvaheke ebroxura eyo paahi vakhala wira mutthu owo ohooniherya osiveliwa. (Nwehe ekaaxa eni: “Moota Woovaha Ebroxura Okumi Woohimala! Okathi wa ovaanela woopacerya.”) Vakhala wira moomaliha osoma ebroxura eyo ni naxikola anyu nave onaphavela ovikaniha, nyuwo pooti opacerya ni yoosoma 04. Vakhala wira munirumeela eliivuru Biibiliya Onniixuttiha wala Muhihiye Omphenta Muluku, muhaana oturuka ni eliivuru Okumi Woohimala! Ni nvarihaneke opuro munrowa anyu opacerya.

Anamathelana amosaru amusomiha aka mulopwana mmosa owannya awe arumeelaka “Ebroxura Okumi Woohimala!”.

NWEHE EVIIDIYU ENI: MUNNAAKHELIWA YOOSOMA ANYU YA BIIBILIYA, NUUMALA-VO MWAAKHULEKE MAKOHO ALA ANITTHARELANA:

Exeeni anaxikola anirowa aya wiixutta ni eliivuru ela esya?
Xeeni vanireerela aya owooniherya eviidiyu ela anaxikola asya?
Soolukama xeeni mukhanle anyu oomukhaliherya naxikola anyu okhalana?—Nwehe ekaaxa eni “Yoolakela ya Khula Yoosoma”

a Enoota: Nnaamwi opuro oni “Nwehe Itthu Sikina” khula mutthu othanlaka othokorerya okathi oniiriha awe yoosoma ya Biibiliya, musomeke wala oweha myaha siri opuro owo okathi muniilokiherya anyu. Nuumala-vo, munoowerya osuwela vakhala wira mwaha owo onoovareleya muteko aahiiso onoomukhaliherya ole munimusomiha anyu Biibiliya. Nave eformaatu eletroniko sooheliwa muhina ilinkhi sa iviidiyu ni myaha sikina.

YOOLAKELA YA KHULA YOOSOMA NI ETTHU MUKHANLE ANYU OOPAKA
	YOOSOMA	ETTHU MUKHANLE ANYU OOPAKA	ETTHU EKHANLE AWE OOPAKA NAXIKOLA ANYU
1	01-12	Muthokoreryeke moota Biibiliya okhanle awe oowookhaliheryani ni moota mukhanle anyu oomusuwela Mwaneene Biibiliya	Mmutumereryeke naxikola anyu omusoma Biibiliya, olokiherya eliivuru awe, ni opacerya orowela mithukumano
2	13-33	Nweheke itthu Muluku opanke awe wa mureerelo ahu ni enamuna yookokhorela enimusivela	Mmutumereryeke naxikola anyu waaleela atthu akina itthu oniixutta awe ni okhala namalaleerya
3	34-47	Mwiixutteke etthu Muluku onilipelela awe wa arumeyi awe	Mmutumereryeke naxikola anyu ovahererya okumi awe wa Yehova ni opatisiwa
4	48-60	Mwiixutteke moota woophenta Muluku	Mmukhaliheryeke naxikola anyu osuwela itthu sooloka ni soohiloka ni olipiha waataana wawe ni Yehova