Mwaakhaliheryeke Akina Ovilela Mixankiho

1. Ikwaha sinceene, Yehova onaakhula sai mavekelo arumeyi awe?

NIIREKE mwaanisuwela wiira Yehova pooti woorumeelani wiira aakhule nivekelo na munna mukina? Nyuwo munoowerya waakhaliherya anna awo hata muri ene mutokweene, murumeyi ookhaliherya, pioneero aahiiso namalaleerya a mmulokoni. Nave munoowerya waakhaliherya anna awo, hata muri ene mmiravo, oowuuluvala, munna aahiiso murokora. Okathi mutthu onimphenta Yehova onivekela awe nikhaliheryo, ikwaha sikina Yehova onnaarumeela axitokweene ni arumeyi awe akina wiira ‘omulipihe’ mutthu owo. (aKol. 4:11) Tthiri ti voohakalaliha omurumeela Yehova vamosa ni anna nirumeelaka enamuna eyo! Nave nnoowerya waakhaliherya anna awo okathi onikhumelela aya oretta wowaakuva wuulaana, ehasara aahiiso olupatthiwa.

MWAAKHALIHERYEKE AKINA OKATHI WA ORETTA WOOWAAKUVA WUULAANA

2. Xeeni vari aya vooxankiha waakhaliherya anna aaphwannye oretta wowaakuva wuulaana?

² Okathi onikhumelela aya oretta onaakuva wuulaana pooti onixankihaka waakhaliherya atthu akina. Mwa ntakiheryo, hiyo pooti ophavelaka waaxukurya apatthani ahu, masi opaka eyo pooti okhala vowoopiha. Nave pooti ophavelaka waalattula anna yaale aniviriha muxankiho woothoiwa musurukhu, wiira arwe owannyihu nilye hoothe, masi vahiniweryaneya. Aahiiso hiyo pooti ophavelaka waakhaliherya anna akina, masi vahinaweryaneya mwaha wookhalana mmusi ahu oniwereiwa. Okathi nniimananiha ahu waakhaliherya anna awo, hata vaxankihaka, Yehova onnihakalala okathi oniweha awe wiimananiha wahu. (Mir. 3:27; 19:17) Exeeni nikhanle ahu oopaka?

3. Ntakiheryo na axitokweene na muloko na murokora Ana, ninniixuttiha exeeni? (Yeremiya 23:4)

³ Itthu xeeni axitokweene akhanle aya oopaka? Vakhala wiira nyuwo mwa mutokweene, musuweleke saana ipwittipwitthi sanyu. (Mmusome Yeremiya 23:4.) Murokora Ana yoowo nimuromonle ahu mwaha ovinre, onihimya so: “Axitokweene a ekhurupu aka ya muteko aka woolaleerya, khula okathi yaanikhuma ni miyo muteko woolaleerya ni yaanikilattula orowa otthekula hoothe”.b Wiimananiha wa axitokweene ale, waahimukhaliherya murokora Ana, ovilela muxankiho awe mwaha wookhweliwa mmusi awe.

4. Axitokweene yaawenrye sai omukhaliherya murokora Ana, nto nniixutta-ni?

⁴ Murokora Ana onitthokiherya so: “Mwaha wookhala apatthani axitokweene, vaahikhweya waaleela moota koonelaka itthu saakixankiha”. Etthu xeeni axitokweene akina aniixutta aya? Nyuwo axitokweene mwaakhapeleleke ale nvahereriwe anyu ehinatthi okhumelela ehasara. Mukhaleke apatthani aya. Vakhala wiira wookhala oretta onookhoottiheryani orowa waaxukurya anna ni arokora, murumeeleke inamuna sikina. Murokora Ana onihimya so: “Ikwaha sikina axitokweene oovirikana yaanikilikarela ni yaanikinviyarela mensaxe nihiku nimosa-ru. Nnaamwi kaasuwela saana soolepa iye axitokweene yaakoonihenrye aya, saahikivara murima vanceene”.

5. Axitokweene anrowa owerya sai osuwela itthu sinaaxankiha anna ni arokora? Ni moota xeeni anrowa aya waakhaliherya?

⁵ Enamuna emosa axitokweene akhanle aya oosuwela etthu enaaxankiha anna ni arokora, ori ovaanelana ni waakoha mooreerela murima. (Mir. 20:5) Niireke kharina eyoolya yinceene, sinnaathowa mirette, aahiiso itthu sikina? Niireke anniviriha mixankiho saarowa owiiriha woomoliwa muteko aahiiso kharina musurukhu wooliverya empa aya? Vakhala wiira elapo ahu kuvernu onnaakhaliherya atthu oothoiwa, niireke anna awo anniphavela nikhaliheryo nahu? Anna yaahimukhaliherya murokora ole anvahaka itthu saamuthowa. Masi niphento ni soolepa axitokweene yaamoonihenrye aya, saahimukhaliherya vanceene ovilela muxankiho ole. Murokora owo onihimya so: “Axitokweene yaahivekela hoothe ni miyo. Nnaamwi kihuupuwelaka etthu yaahimmye aya, kinnuupuwela moota kaatteeliwe aka murima. Vaakhala ntoko Yehova aakileela so: ‘Muhoove miyo kiri ni nyuwo’”. — Yes. 41:10, 13.

6. Exeeni nikhanle ahu oopaka wiira naakhaliherye anna akina? (Nwehe efootu.)

⁶ Itthu xeeni anna akina akhanle aya oopaka? Nnaamwi axitokweene, ari ene muritti wowaakhapelela anna akina, Yehova oniphavela wiira makristau ootheene alipihaneke ni okhaliheryana. (aGal. 6:10) Hata nipakaka etthu yaamukhaani wiira nimukhaliherye munna aahiiso murokora oniwereiwa, eyo enimwaalipiha vanceene anna akina. Mwaana pooti olepa ekarta aahiiso edesenyo wiira omulipihe munna. Amiravo anoowerya waakhaliherya arokora avaraka miteko sa vate ni opaka itthu sikina. Munoonela sai oowaapeela eyoolya anna aniwereiwa aahiiso waaroihela eyoolya? Ekeekhai wiira okathi oretta onuulaana aya, anna ootheene a mmulokoni annireerela olipihiwa. Hiyo pooti opaka eyo, nivirihaka okathi vakhaani nuumala mithukumano, wira nivaanele ni anna ni arokora awo, hata nimurumeelaka vídeo-confêrençia. Nave-tho, axitokweene annireerela olipihiwa. Anna akina annilepa ikarta, yaaxukhurelaka axitokweene mwaha wa oluttuweliwa waya okathi ola wa coronavírus. Tthiri ti voohakalaliha okathi nniimananiha ahu ‘olipihana ni okhaliheryana mukina ni mukhwaawe’! — 1 aTe. 5:11.

MWAAKHALIHERYEKE ANNA APHWANYIWE NI IHASARA

7. Mixankiho xeeni sinikhumelela mwaha wa ihasara?

⁷ Okathi enikhumelela aya ehasara mootutuxerya, pooti otepaka okhala vooxankiha. Okhala wiira anamunceene pooti opweteiwaka mireerelo saya, ipa saya, aahiiso emusi aya. Nave anna ni arokora pooti waakhumelelaka mixankiho iyo. Exeeni nikhanle ahu oopaka wiira naakhaliherye?

8. Etthu xeeni axitokweene ni ahooleli a etthoko akhanle aya oopaka ehinatthi okhumelela ehasara ya ephattu?

⁸ Exeeni axitokweene akhanle aya oopaka? Nyuwo axitokweene, mwaakhaliheryeke axinninyu wiilokiherya ehinatthi okhumelela ehasara. Mwaasuweliheke anna ootheene etthu yoopaka ni moota woowoolikarelani. Murokora Margaret, yoowo nimuromonle ahu mwaha ovinre, ohimmye so: “Axitokweene a muloko ahu yaahilavula mwaha, mpantta wa sootthuneya sa mmulokoni, anilopolaka wiira ehasara ele nlelo khiyaamanle. Nave yaahihimya-tho wiira, vakhala wiira makhulupale a mulaponi yaamunivekela okhuma opuro niri ahu mwaha wa ehasara ele, naahaana wiiwelela moowaakuveya”. Axitokweene yaahinivaha malakiheryo ale, okathi wooreerela, maana ehasara ele yaakhumelenle nuuvira mweeri mmosa. Okathi woomulompa Muluku vatthokoni, ahooleli a itthoko pooti wuupuwelela etthu khula mmosa a vatthokoni onrowa awe opaka. Vakhala wiira nyuwo ni aniinyu muhiilokiherya vahinatthi, woonasa wene nyuwo khamunrowa okhala ooxankiheya okathi enirowa aya okhumelela ehasara.

9. Axitokweene anrowa wiilokiherya sai ehinatthi okhumelela aahiiso nuumala okhumelela ehasara?

⁹ Vakhala wiira mwa muhooleli a ekrupu ya muteko woolaleerya, nweheke vakhala wiira mookhalana mammeru a anna ootheene a ekrupu anyu yoolaleerya, ni mpakeke eyo ehinatthi okhumelela ehasara. Nuumala-vo, mpakeke elista ni mulikariki wiira nwehe vakhala wiira mammeru ootheene anniitthana. Mwapaka eyo, munoowerya osuwela opuro ori awe khula namalaleerya ni itthu sinimuthowa okathi enikhumelela aya ehasara. Nuumala-vo, mmuleeleke mutokweene onuuraanyiha nikhuuru na axitokweene, yoowo onrowa omulikarela mutokweene a esirkwiitu. Okathi anna awo anivara aya muteko hoothe, eyo ennaakhaliherya anna anceene. Nuuvira ehasara ele, mutokweene a esirkwiitu a muloko wa murokora Margaret, aahiviriha nihiku nimosa nnimeya ovaraka muteko vamosa ni axitokweene akina wiira yaaligarele ni waakhapelela anna akina 450 yaawo yaahiyale ipa saya. (2 aKor. 11:27) Nto ootheene yaale yahaarina opuro wookhala yaahivahiwa itenta.

10. Xeeni axitokweene anivaha aya efaita okumi wa anna? (Yohani 21:15)

¹⁰ Axitokweene aakhalana muritti woowaalipiha anna, arumeelaka soolepa sa mbiibiliyani ni waamaaliha okathi sinaakhumelela aya mixankiho. (1 Ped. 5:2) Okathi enikhumelela aya ehasara axitokweene ahaana osuwela, vakhala wiira khula munna aahiiso murokora ori opuro woovareleleya, okhalana eyoolya, ikuwo ni opuro wookhala. Nuuvira okathi anna awo yaakhumelenle ehasara, anooreerelaka olipihiwa ni omaalihiwa. (Mmusome Yohani 21:15.) Munna mmosa oniitthaniwa Harold, onirumeela Ekomisau ya eFiliyaali ni onaasuwela anna anceene yaatonko waakhumelela ehasara, onihimya so: “Onnivira okathi munceene wiira mutthu oliyale itthu saamwiiranenle. Hata makhalelo atthikelaka vakhaani-vakhaani okhala saana, masi khanaaliyala amusi aya akhwiiye, mireerelo saya sirimeelale, aahiiso itthu soowoopiha saakhumelenle. Miyuupuwelo iyo pooti owiirihaka otthikela oriipiwa murima. Nave eyo khentaphulela wiira awo kharina waamini, okhala wiira awo apinaatamu nave”.

11. Axitokweene anrowa okhaliherya sai imusi?

¹¹ Axitokweene anniiwelela miruku sini: “Munleke naale aninla”. (aRom. 12:15) Axitokweene nave ahaana waakhaliherya anna yaale aphwanyiwe ni ehasara woona wiira Yehova, anna ni arokora nlelo annaaphenta. Nave axitokweene ahaana okhaliherya imusi ohihiya waataana waya ni Yehova, opakaka mavekelo, okhalanaka yoosoma aya ya omwaneene, orowela mithukumano ni ohihiya orowa olaleerya. Nave ahaana waatumererya anamuyari, waakhaliheryaka anaaya ohela nipuro noopacerya itthu ihasara sa ephattu sihinwerya opwetexa. Nyuwo anamuyari nwuupuxeryeke aniinyu wiira Yehova khula okathi onrowa okhalaka Tiithi aya, ni onimwaakhaliherya. Ni mwaasuweliheke wiira aakhala anna ni arokora anrowa waakhaliheryaka okathi wootheene. — 1 Ped. 2:17.

12. Exeeni atthu akina akhanle aya oopaka wiira yaakhaliherye anna aphwanyiwe ni ehasara? (Nwehe efootu.)

¹² Itthu atthu akina akhanle aya oopaka. Okathi enikhumelela aya ehasara, mwaavekeleke axitokweene etthu mukhanle anyu oopaka wiira mukhaliherye. Woonasa wene, nyuwo pooti waakhaliherya anna ale aphwanyiwe ni ehasara mwaavahaka opuro wookhala aahiiso orowa waakhaliherya oteka ipa saya. Nave nyuwo pooti waavaha eyoolya aahiiso itthu sikina sinaathowa. Vakhala wiira ehasara eyo yiiraneyale mapuro oorakamela, nyuwo pooti opaka itthu sikina wiira mukhaliherye. Moota xeeni? Mwaavekelelaka anna aphwanyiwe ni ehasara. (2 aKor. 1:8-11) Aahiiso nyuwo pooti waakhaliherya anna awo nvahaka musurukhu anyu, mpantta oni: Obra Mundial. (2 aKor. 8:2-5) Vakhala wiira nyuwo munniwerya orowa mapuro awo akhumelenle ehasara wiira mwaakhaliherye, nyuwo pooti waavekela axitokweene moota mukhanle anyu oopaka eyo. Nto mwalattuliwa wiira mwakhaliherye, woonasa wene mumwiixuttihiwa moota woovara miteko sikina wiira nwerye okhaliherya.

MWAAKHALIHERYEKE ANNA NI AROKORA OVILELA OLUPATTHIWA

13. Mixankiho xeeni aniviriha aya anna anikhala ilapo muteko ahu onikhoottihiwa aya?

¹³ Ilapo seiye muteko ahu onikhoottihiwa aya mwaha woolupatthiwa, anna anniviriha mixankiho sinceene. Anna anikhala ilapo iyo muteko ahu onikhoottihiwa aya, anniviriha mixankiho sinceene ntoko othoiwa musurukhu, owereiwa, ni okhweliwa ni ale anaaphenta aya. Nave mwaha wookhoottihiwa muteko ahu, pooti waaxankihaka axitokweene waaxukurya ni waalipiha anna ale aniviriha muxankiho. Eyo ti itthu yaamwiiranenle munna Andrei, yoowo nimuromonle ahu mwaha ovinre. Munna mmosa a ekrupu awe yoolaleerya aaniviriha muxankiho woothoiwa musurukhu. Nuumala-vo, aahimwiira asitente ni ekaaro. Owo ahaana wooperariwa ni khaavara muteko. Nnaamwi waari okathi wa Coronavírus, anna yaahipaka ele aniwerya aya wiira amukhaliherye nave Yehova aanimukhaliherya.

14. Axitokweene anrowa ovaha sai ntakiheryo nooloka na omuroromela Yehova?

¹⁴ Etthu xeeni axitokweene akhanle aya oopaka? Munna Andrei aanivekela ni aahipaka ele aawerya awe. Nto Yehova aamwaakhunle sai? Owo aahaarumeela anna yaarina owerya wiira amukhaliherye. Arokora akina yaahivahererya amukuxa aka ni ekaaro aya okathi aarowa awe oxipitaali. Nave anna akina yaaninvaha musurukhu. Yehova aahaarumeela anna ale wiira apake ele yaawerya aya, ni aahireeliha wiiraana waya ni wiimananiha waya. (aHeeb. 13:16) Nyuwo axitokweene okathi muteko ahu onikhoottihiwa aya, mwaavekeleke nikhaliheryo anna akina. (Yer. 36:5, 6) Nto mmuroromeleke Yehova. Owo onimookhaliheryani owerya waakhapelela anna ni arokora.

15. Ninrowa owerya sai ohihiya okhalana waataana wooloka ni anna, okathi ninlupatthiwa ahu?

¹⁵ Itthu xeeni anna akina akhanle aya oopaka? Okathi muteko ahu onikhoottihiwa aya anna akina pooti waataana aka paahi ni atthu vakhaani. Nto ti maana aya vari aya va faita okumiherya murettele. Nwaneke ni Satana ohiya ni anninyu. Mwaaleveleleke soovonya saya, aahiiso mphukeke moowaakuveya yootthekelani. (Mir. 19:11; aEef. 4:26) Mwiivahereryeke waakhaliherya anna akina. (Tito 3:14) Nikhaliheryo anna yanvanhe aya murokora ole, naahaalipiha vanceene anna akina a ekrupu ele. Nave awo yaahitepa okhala oowiiraana ntoko emusi. — Esal. 133:1.

16. Moovarihana ni aKolosi 4:3, 18, moota xeeni nikhanle ahu oowaakhaliherya anna ni arokora anlupatthiwa?

¹⁶ Anna ni arokora anceene khanihiya omurumeela Yehova, nnaamwi akhalaka ilapo seiye kuvernu onikhoottiha awe muteko ahu. Anna akina annitthukweliwa mwaha wa waamini waya. Hiyo pooti waavekelela anna awo vamosa ni emusi aya. Nave hiyo pooti waavekelela anna anooniherya olipa murima wiira yaakhaliherye anna ni arokora atthukweliwe mukhatteya. Maana awo annaakhaliherya anna atthukweliwe mukhatteya ohihiya omuroromela waya Yehova, waavaha itthu sinaathowa ni owaakiha otribunaali.c (Mmusome aKolosi 4:3, 18.) Muhiliyale wira mavekelo anyu pooti waakhaliherya anna ni arokora anceene! — 2 aTe. 3:1, 2; 1 Tim. 2:1, 2.

17. Munrowa wiilokiherya sai vano ohinatthi okhumelela olupatthiwa?

¹⁷ Nyuwo munoowerya okhaliherya emusi anyu wiilokiherya ohinatthi ophiya okathi woolupatthiwa. (Mit. 14:22) Muhiimananiheke wuupuwelela itthu soohiloka, saarowa wookhumelelani. Ohiya-vo, mwaakhaliherye aniinyu wuncererya omphenta waya Yehova ni mwaakhaliheryeke opaka etthu emosaru. Vakhala wiira ikwaha sikina munnixankiheya, mmuleeleke itthu sootheene sinooxankihani Yehova. (Esal. 62:8, 9) Nvaaneleke ni emusi anyu itthu siniwiirihani omuroromela Yehova.d Okathi enikhumelela aya ehasara wiimananiha wanyu ni omuroromela wanyu Yehova, onimwaakhaliherya aniinyu okhala oolipa murima ni okhala a murettele.

18. Exeeni ninlipelela ahu muhoolo?

¹⁸ Murettele wa Muluku onoonikhaliherya okhala oovareleleya. (aFil. 4:6, 7) Nnaamwi sinikhumelelaka iretta, ihasara ni olupatthiwa, murettele wa Yehova onoonikhaliherya okhala oomaaleleya. Owo onnaarumeela axitokweene wiira anikhapeleleke, nave onnaarumeela anna ootheene wiira akhaliheryaneke mukina ni mukhwaawe. Murettele wa Muluku nirina ahu olelo-va, onoonikhaliherya ovilela mixankiho sikhanle ooniphwanya, hata okathi wa “maxakha maalupale”. (Math. 24:21) Nave okathi owo, nnooreerelaka ohihiya okhalana murettele ni waakhaliherya atthu akina okhalana murettele owo. Nave khasinrowa okhumelelaka itthu sikhanle onixankihaka. Nto nnoorowa okhalana etthu Yehova oniphavela awe, eyo piiyo, murettele ohinimala. — Yes. 26:3, 4.