Nyuwo Amiravo, Mmutakiheke Marko ni Timootheyo

1-2. Mixankiho xeeni saarowa omukhoottiherya Marko ni Timootheyo, wuncererya muteko yanvarela aya Yehova ni waakhaliherya atthu akina?

AMIRAVO, niireke munniphavela wuncererya muteko muninvarela anyu Yehova ni waakhaliherya anna ni arokora a mmulokoni? Moohaanyiherya, munniphavela opaka eyo. Ninnihakalala vanceene waaweha amiravo yiimananihaka waakhaliherya ni waarumeela atthu akina! (Esal. 110:3) Masi, khivanikhweya wuncererya muteko muninvarela anyu Yehova. Niireke munnoovelela wuncererya muteko woolaleerya, mwaha woowi khamunisuwela moota makhalelo anyu anrowa aya okhala muhoolo? Aahiiso, niireke mootoko okhootta ovara muteko wa Yehova, moovaka wiira khimwaarowa ovara saana? Akhala wiira ti siiso, muhiliyale wiira atthu akina aatoko okhalana moonelo ntoko wawinyu.

² Marko ni Timootheyo yaahikhalana mixankiho iyo. Masi hata vari siiso, awo khiyeemerenrye woova ni ohisuwela itthu sinceene siwiirihaka ohiya wuncererya muteko yanvarela aya Yehova ni waakhaliherya anna ni arokora. Woonasa wene, Marko aakhala ni maama awe empa yooreera okathi aalattuliwe awe omuhoola murummwa Paulo ni Baarnaba, mukwaha aya woopacerya wa omisionaario. (Mit. 12:12, 13, 25) Marko aahaahiya amusi awe wiira incererye muteko awe woolaleerya. Wanipacerya, owo aaronwe wAntiyokiya. Muhoolo mwaya, owo aahirowa olaleerya ni Paulo ni Baarnaba ilapo soottaivela. (Mit. 13:1-5) Nave Timootheyo aakhala ni anamuyari awe okathi Paulo aamulattunle awe orowa olaleerya hoothe. Okhala wiira aari mmiravo ni khaasuwela itthu sinceene, Timootheyo uupuwela wiira khaaphwanela orowa olaleerya ni Paulo. (Mulikanyihe ni 1 aKorinto 16:10, 11 ni 1 Timootheyo 4:12.) Hata vaari siiso, owo aaheemererya nlattulo na Paulo ni aahiphwanya mareeliho mwaha woopaka eyo. — Mit. 16:3-5.

3. a) Ninsuwela sai wiira Paulo aanivaha efaita muteko Marko ni Timootheyo yaavara aya? (2 Timootheyo 4:6, 9, 11) (Nwehe iteseenyu.) b) Makoho xeeni ninrowa ahu othokorerya mwaha ola?

³ Marko ni Timootheyo yaahiixutta okhapelela miritti sinceene mmulokoni nlelo ari ene amiravo. Paulo aanixukhurela muteko yaavara aya amiravo ala ni aanaaroromela. Tivonto, okathi aasuwenle awe wiira aarowa wiiviwa, owo aahaavekela wiira arwe amukhaliherye. (Mmusome 2 Timootheyo 4:6, 9, 11.) Mikhalelo xeeni sooloka Marko ni Timootheyo yaarina aya, saamwiirihale Paulo waaphenta ni waaroromela? Amiravo anrowa otthara sai ntakiheryo na Marko ni Timootheyo? Miruku sa Paulo, sinrowa waakhaliherya sai amiravo olelo-va?

MMUTAKIHEKE MARKO MWAARUMEELAKA ATTHU AKINA

4-5. Marko oonihenrye sai wiira aaniphavela waakhaliherya atthu akina?

⁴ Moovarihana ni eliivuru emosa, waarumeela atthu akina pooti otaphulelaka waakhaliherya atthu awo ni ohihiya opaka eyo hata vavilaka. Marko, oovaha ntakiheryo nooloka na waakhaliherya atthu akina. Okathi Paulo aakhoottale awe omukuxa mukwaha awe wa nenli wa omisionaario, woonasa wene, Marko aahiriipiwa murima ni aahinyoonyiheya. (Mit. 15:37, 38) Masi eyo, khiyaamwiirihale Marko ohiya waakhaliherya anna ni arokora a mmulokoni.

⁵ Marko aaheemererya ovara muteko ni mmusi awe aihaniwa Baarnaba. Nuuvira iyaakha 11, Marko aari eriyari ya atthu yaamukhaliherya Paulo, okathi aatthukweliwe awe mukhatteya ekwaha yoopacerya oRoma. (Fil. 23, 24) Tthiri Paulo aanixukhurela vanceene nikhaliheryo na Marko, ntoko mwaneene ohimmye awe oriki: ‘Owo onnikilipiha vanceene’. — aKol. 4:10, 11.

6. Marko aattottenle sai mureerelo waataana ni anna ni arokora oororomeleya? (Nwehe enoota.)

⁶ Marko aahikhalana soowiiraneya sooreera, mwaha wa waataana ni anna ni arokora yaarina waamini woolipa. Nuumala oviriha okathi ori ene ni Paulo oRoma, Marko aahirowa oBabiloonia wiira avareke muteko ni Pedru. Awo yaakhala apatthani aalupale, tivonto Pedru aamuhimmye awe Marko okhala ‘mwanawe’. (1 Ped. 5:13) Okhala wiira yaavara hoothe, woonasa wene Pedru aahimuleela Marko itthu soovara murima sa okumi ni muteko woolaleerya wa Yesu. Nto muhoolo mwaya, itthu iyo saahimukhaliherya Marko olepa Evangelyo enikuxa nsina nawe.a

7. Munna Seung-Woo, aatthanre sai ntakiheryo na Marko? (Nwehe efootu.)

⁷ Marko aanikhalela nthiti ovara muteko wa Muluku ni okhalana waataana wooloka ni anna ni arokora oororomeleya. Munrowa otthara sai ntakiheryo na Marko? Vakhala wiira munniphavela wuncererya muteko muninvarela anyu Yehova, mukhalaka murumeyi ookhaliherya aahiiso mutokweene, masi nlelo khamurina mikhalelo sinivekeliwa mbiibiliyani, muhikhulumuwe. Ohiya-vo, mwiimananiheke waavya inamuna sikina sa omurumeela Yehova ni anna ni arokora. Nrowe niwehe etthu yaamwiiranenle Seung-Woo, yoowo onirumeela ntoko mutokweene. Okathi aari awe mmiravo, owo aaniilikanyiha ni amiravo akina a mmulokoni. Akina a yaawo yaahithanliwa okhala axitokweene ni yaanivara miteko sinceene mmulokoni, owo nlelo ohinatthi othanliwa. Seung-Woo aahiriipiwa murima ni okhulumuwa. Nuumala-vo, owo aahirowa waaleela axitokweene moonelo awe. Mutokweene mmosa, aahimuleela wiira aahaana wiimananiha waarumeela atthu akina ni opaka itthu sooloka, hata atthu akina ahisuwelaka. Miruku iye, saahimukhaliherya Seung-Woo waakhaliherya anna ni arokora oowuuluvala ni waakuxa orowaka omithukumanoni. Uupuwelaka etthu ele yaamwiiranenle, owo onihimya so: “Tthiri kihiixutta ele enitaphulela aya waarumeela atthu akina. Miyo koophwanya ohakalala weekeekhai mwaha woowaakhaliherya atthu akina”.

MMUTAKIHEKE TIMOOTHEYO MWAAPHENTAKA ATTHU AKINA

8. Xeeni Paulo aamuthanlale awe Timootheyo wiira yeetteke hoothe? (aFilipi 2:19-22)

⁸ Paulo aanimpirisari mpatthani oolipa murima okathi aarowa awe otthikela ilapo seiye aalupatthiwa awe. Wanipacerya, owo aahinvekela mukristau aarina sookumanana sinceene aihaniwa Siila wiira omuhooleke. (Mit. 15:22, 40) Muhoolo mwaya, Paulo aahimulattula Timootheyo wiira yeetteke hoothe. Etthu xeeni yaamwiirihale Paulo omuthanla Timootheyo? Etthu emosa yaamwiirihale Paulo omuthanla Timootheyo, okhala wiira owo aahikhalana mikhalelo sooloka. (Mit. 16:1, 2) Nave Timootheyo, aanaathokorerya oratteene atthu. — Mmusome aFilipi 2:19-22.

9. Timootheyo oonihenrye sai wiira aanaathokorerya anna ni arokora?

⁹ Okhuma wanipacerya wa muteko awe woolaleerya ni Paulo, Timootheyo aanooniherya wiira aanaathokorerya vanceene atthu akina ovikana enamuna aithokorerya awe. Okathi Paulo aamuhiyale awe oBereya, owo aanisuwela wiira Timootheyo aamwaathokoreryaka ni waalipiha anna ni arokora a elapo ele. (Mit. 17:13, 14) Okathi ole, Timootheyo aahiixutta itthu sinceene ni Siila, yoowo-tho aahanle oBereya. Muhoolo mwaya, Paulo aahimuruma Timootheyo mekhawe, orowa oTesaloonika waalipiha anna ni arokora a epooma ele. (1 aTes. 3:2) Iyaakha 15 saattharelana, Timootheyo aahiixutta ‘wunla ni ale [yanla]’ ni owoonela othunku ale yaahaawa. (aRom. 12:15; 2 Tim. 1:4) Amiravo makristau, anrowa otthara sai ntakiheryo na Timootheyo?

10. Munna Woo Jae, aixuntte sai waathokorerya saana atthu akina?

¹⁰ Munna oniitthaniwa Woo Jae, aahiixutta waathokorerya oratteene atthu akina. Okathi aari awe mmiravo, Woo Jae, waaninvila ovaanela ni anna ni arokora oowuuluvala. Okathi wa mithukumano, owo aakoha ihaali paahi onarowa. Mutokweene mmosa, aahimutumererya Woo Jae opaceriha ovaanela ni anna ni arokora, aaleelaka mikhalelo saya sooloka saamusivela. Mutokweene ole, aahimutumererya wuupuwela mikhalelo aareerela awe okhalana, wiira atthu akina waasiveleke okhala ni yena. Woo Jae, aaheettela miruku iye aavahiwe awe. Olelo-va, Woo Jae mutokweene. Owo onihimya so: “Vano, vannikikhweela ovaanela ni atthu a makhalelo ni iyaakha soovirikana. Okathi kinipaka aka eyo, kinniwerya osuwela mixankiho saya. Eyo ennikikhaliherya vanceene waasuwela anna ni arokora ni oweha etthu kikhanle aka oopaka wiira kaakhaliherye”.

11. Amiravo anrowa wooniherya sai wiira annaathokorerya saana anna ni arokora a mmulokoni? (Nwehe efootu.)

¹¹ Nave nyuwo amiravo, munoowerya waathokorerya saana atthu akina. Okathi wa mithukumano nvaaneleke ni atthu a makhalelo ni iyaakha soovirikana. Mwaakoheke ihaali ni mwaawiriyaneke oratteene. Opaka eyo, enimookhaliheryani waasuwela ni oweha etthu mukhanle anyu oopaka wiira mwaakhaliherye. Woonasa wene, munimoona wiira aakhala anamathelana oowuuluvala, yaawo anipirisari okhaliheriwa osuwela omurumeela aplikativo JW Library^®. Aahiiso, nyuwo pooti oweha wiira kharina munna aahiiso murokora para orowana olaleerya. Niireke mwanwerya waakhaliherya osuwela omurumeela telefooni aya aahiiso orowa olaleerya hoothe? Vakhala wiira munoopaceriha waakhaliherya atthu akina, munoovaha ntakiheryo nooloka mmulokoni.

MIRUKU SA PAULO SINIMOOKHALIHERYANI

12. Miruku Paulo anvahale awe Timootheyo, sinrowa waakhaliherya sai amiravo?

¹² Paulo aahinvaha miruku Timootheyo saarowa omukhaliherya okhumela saana mookumini mwawe ni muteko woolaleerya. (1 Tim. 1:18; 2 Tim. 4:5) Vakhala wiira nyuwo mwa mmiravo, miruku sa Paulo sinimookhaliheryani. Moota xeeni? Okathi munisoma anyu ikarta piili Paulo aamulepenle awe Timootheyo, musomeke ntoko mulepeliwe nyuwo ni mweetteleke mookumi mwanyu miruku iyo. Nrowe niwehe matakiheryo vakhaani.

13. Exeeni enrowa wookhaliheryani ohihiya omwaattamela Yehova?

¹³ “Mwiilimaleliheke omoova Muluku ni mphaveleke wooniherya eyo”. (1 Tim. 4:7b) Omoova Muluku onitaphulela exeeni? Onitaphulela ohihiya ororomeleya wa Yehova ni opaka ele enimusivela. Okhala wiira nniyariwa nihirina mukhalelo owo, nihaana wiimananiha okhalana. Moota xeeni? Nuulumo na ekereku noowi “mwiilimaleliheke”, ikwaha sinceene ninnirumeeliwa sihimmwaka itereino anipaka aya ale aniweetta axooku wiira yaxinttane. Atthu awo aniweetta axooku, anireerela okhalana mikhalelo sooloka, sinrowa waakhaliherya oxintta. Nave hiyo nihaana wiilimaleliha okhalana mikhalelo sooloka sinrowa onikhaliherya omwaattamela Yehova.

14. Xeeni vari aya vooloka wiilimaleliha omusoma Biibiliya? Nvahe ntakiheryo.

¹⁴ Ti vooloka wiilimaleliha omusoma Biibiliya, maana opaka eyo enoonikhaliherya omwaattamela Yehova. Mwa ntakiheryo, exeeni muniixutta anyu ni yoowiiraneya ya Yesu ni mmiravo thaaciri? (Mar. 10:17-22) Mmiravo ole, aanikupali wiira Yesu aari Mesiya, masi khaarina waamini wiira okhale mutthareli awe. Hata vaari siiso, Yesu “aanimphenta”. Niireke khenoosivelani enamuna Yesu aamuthokorenrye awe mmiravo ole thaaciri? Yesu aaphavela wiira mmiravo ole okhalane okumi woohakalaliha. Moohaanyiherya, Yesu aahimooniherya mmiravo ole ophenta wa Yehova. (Yoh. 14:9) Okathi munuupuwelela anyu yoowiiraneya ela, mwiikoheke so: ‘Etthu xeeni kikhanle aka oopaka wiira kimwaattamele Yehova ni waarumeela atthu akina?’

15. Xeeni amiravo anireerela aya waavaha ntakiheryo nooloka atthu akina? Nvahe ntakiheryo. (1 Timootheyo 4:12, 13)

¹⁵ “Mukhale ntakiheryo nooloka wa ale oowaamini”. (Mmusome 1 Timootheyo 4:12, 13.) Paulo aahimutumererya Timootheyo ohiya paahi osuwela osoma ni wiixuttiha, masi-tho okhalana mikhalelo sikina sooreera ntoko, ophenta, waamini ni mweettelo wooloka. Mwaha wa xeeni? Mwaha woowi, itthu mutthu onipaka awe, sookhalana efaita yinceene ovikana itthu mutthu onilavula awe. Muupuwele wiira muthanleliwe olavula mwaha onilavula sa okhalela nthiti muteko woolaleerya. Vaamookhweelani olavula mwaha owo akhala wiira nyuwo munnikhalela nthiti muteko woolaleerya. Ntakiheryo nanyu naamwaakhaliherya ale anoowiriyanani weettela itthu munihimya anyu. — 1 Tim. 3:13.

16. a) Inamuna xeeni 5 mmiravo mukristau onireerela awe okhalana wiira ovahe ntakiheryo nooloka? b) Mmiravo, onrowa ovaha sai ntakiheryo nooloka ni ‘moolumo awe’?

¹⁶ Ntoko onooniherya awe 1 Timootheyo 4:12, Paulo onnilavula mikhalelo 5 mmiravo onireerela awe okhalana wiira ovahe ntakiheryo nooloka. Munoonela sai othokorerya oratteene mikhalelo iyo okathi wa yoosoma anyu ya omwaneene? Mwa ntakiheryo, muupuwele wiira muniphavela olokiherya moota munirumeela anyu “moolumo anyu”. Muupuweleke moota mukhanle anyu oorumeela moolumo anyu wiira mwaalipiheke atthu akina. Akhala wiira munikhala ni anamuyari anyu, niireke vanweryaneya orumeela moolumo anyu wiira mwaaxukhureke mwaha wa itthu anoopakelaayani? Nuumala mithukumano, niireke mwanwerya omuxukhurela munna aahiiso murokora mwaha wa epantta aahiiso ekomentaario ovahale awe? Nave nyuwo pooti ovaha ikomentaario ni moolumo anyu okathi wa mithukumano. Okathi muniimananiha anyu ovaha ntakiheryo nooloka mwa enamuna munilavula anyu, atthu akina animoona wiira munnirowa vahoolo. — 1 Tim. 4:15.

17. Etthu xeeni enrowa omukhaliherya mmiravo ophwanya yoolukama awe ya ovara miteko sa Muluku? (2 Timootheyo 2:22)

¹⁷ “Mutthyaweke soophavela sa omiravo, masi mphaveleke exariya”. (Mmusome 2 Timootheyo 2:22.) Paulo aahimutumererya Timootheyo otthyawa khula etthu yaarowa omukhoottiherya wuncererya muteko anvarela awe Yehova ni khula etthu yaarowa ohonona waataana wawe ni Yehova. Woonasa wene, nyuwo munnoona wiira miteko sikina sihikhanle sootakhala sinniwiiyeryani okathi mwaarowa anyu orumeela wiira nvare miteko sa Muluku. Mwa ntakiheryo, muupuwele okathi muniviriha anyu muri ene munterneetini, mummanaka boola aahiiso nweettaka axooku akina. Niireke vanweryaneya orumeela okathi owo wiira nvareke miteko sa Muluku? Woonasa wene, nyuwo pooti wiivahererya olokiherya ni orattela Empa ya Omwene aahiiso olaleerya ni ekarinyu. Vakhala wiira munoovara miteko iyo, moohaanyiherya munimwaapaka apatthani anrowa wookhaliheryani okhalana ni ophwanya soolukama sanyu sa ovara miteko sa Muluku.

WAARUMEELA ATTHU AKINA ONNINIPHWANYIHA MAREELIHO

18. Xeeni ohimyaka wiira Marko ni Timootheyo yaahikhalana okumi woohakalaliha?

¹⁸ Marko ni Timootheyo, yaahipaka marukunuxo manceene mookumini mwaya wiira amurumeele Yehova ni atthu akina, nto eyo yahaaphwanyiha mareeliho manceene mookumini mwaya. (Mit. 20:35) Okhala wiira Marko aanaarumeela atthu akina, owo aahirowa ilapo sinceene. Nave owo oolepa Evangelyo yoovara murima enilavula sa okumi ni muteko woolaleerya wa Yesu. Timootheyo aahimukhaliherya Paulo opaka miloko ni waalipiha anna ni arokora. Yehova aaniweha wiimananiha Marko ni Timootheyo yaapaka aya wiira yincererye muteko yanvarela aya, nto eyo, yaanimuhakalaliha.

19. Xeeni amiravo anireerela aya otthara miruku Paulo anvahale awe Timootheyo ni anrowa ophwanya exeeni?

¹⁹ Ikarta murummwa Paulo aamulepenle awe Timootheyo, sinnooniherya oratteene wiira aanimphenta. Ikarta iyo Paulo aalempe awe, sinnooniherya wiira Yehova onnaaphenta vanceene amiravo. Owo oniphavela wiira mukhalaneke okumi woohakalaliha. Tivonto, mwiimananiheke weettela oratteene miruku sa murummwa Paulo ni waarumeela atthu akina. Nave mwaarumeeleke atthu akina ni murima wootheene. Vakhala wiira munoopaka eyo, munookhalana okumi woohakalaliha niinaano-va ni munoowerya ‘ovarexexa okumi weekeekhai’ onirwa. — 1 Tim. 6:18, 19.