Mulokiheryeke Murima Anyu

Okathi nimmusoma ahu Biibiliya, nimphavela wiira moolumo a Yehova anivareke murima ni anikhaliheryeke mmuupuweloni, moonelo ni soophavela sahu. Eezira oonivaha ntakiheryo nooloka okathi ‘aalokihenrye awe murima awe wiira otokose Nlamulo na Yehova’. (Eezi. 7:10) Ninrowa olokiherya sai murima ahu?

Ovekela. Muhinatthi opacerya osoma mpakeke nivekelo. Munvekeleke Yehova wiira ookhaliheryeni wiiwexexa ni weettela ele muniixutta anyu. — Esal. 119:​18, 34.

Mwiiyeviheke. Muluku khonaasuweliha ikeekhai sa mbiibiliyani atthu yaale oowiixinuwiha, yaawo anuupuwela wiira khanipirisari okhaliheriwa wiira amwiiwexexe Biibiliya. (Luka 10:21) Muhipakeke ipeskisa mphavelaka ohimmwa ni atthu wiira munnisuwela itthu sinceene. Wiiyeviha onoonikhaliherya oturuka muupuwelo ahu vakhala wiira khonivarihana ni ele Muluku oniphavela awe.

Nwiriyaneke isipo sa Omwene. Masipo aakhalana owerya wa olokiherya murima ahu ni onikhaliherya wiira nimukokhoreleke Muluku. Owiriyana masipo a Omwene nihinatthi opaceriha yoosoma ahu, pooti onikhaliherya olokiherya murima ahu.