Nilokiherye Inamuna Sahu Soolaleerya​—Niwiixuttiheke Ale Anaasomiha Ahu Biibiliya Olokiherya Yoosoma Aya

OTTHUNEYA WAYA: Vaavo ale anaasomiha ahu Biibiliya anilokiherya aya yoosoma aya, anoowerya wiiwexexa ni wuupuwelela ele eniixutta aya. Nto, eyo enoowiiriha okela vahoolo momunepani. Hata nuumala obatiziwa, awo ahaana ovikanihaka olokiherya mithukumano ni muteko woolaleerya. Eyo enimwaakhaliherya ovikaniha owehaweha. (Mat 25:13) Nto, yaxutta osoma ni okhalana yoolema yooloka ya osoma, eyo enimwaakhaliherya okumi aya wotheene. Tivonto, okhuma woopaceryani, naakhaliheryeke ale anaasomiha ahu Biibiliya olimalela olokiherya yoosoma aya.

MOOTA WOOPAKA EYO:

• 

  Nvaheke ntakiheryo nooloka. (aRo 2:21) Mulokiheryeke khula yoosoma mmuupuwelaka ole onimusomiha anyu. (km 11/15 7) Mmooniheryeke eliivuru anyu yoolokiheriwa.

• 

  Mmutumereryeke olokiherya yoosoma awe. Mmukhaliheryeke osuwela wira wiilokiherya, oniirela mpantta yoosoma ya Biibiliya, ni mmuhimeeryeke mureerelo onikumiherya aya. Munvahe malakiheryo oovareleya muteko a moota woophwanya okathi woolokiherya yoosoma awe. Okathi mukina, anna annimweemererya ole onimusomiha aya orumeela eliivuru aya yoolokiheriwa ene okathi woosoma. Eyo ennimukhaliherya woona mureerelo wa olokiherya. Mmuttottopeleke alokiherya yoosoma awe.

• Mmooniherye moota wowiilokiherya. Anna akina annirumeela yoosoma yoopacerya wira amooniherye naxikola aya moota woolokiherya yoosoma ya Biibiliya.