Nsina na Yehova, Nintaphulela Exeeni Para Hiyo?

1-2. Ninsuwela sai wiira Yesu onnivaha efaita nsina na Yehova?

YESU onnivaha efaita yinceene nsina na Yehova. Owo ti mutthu onitepa waakiherya nsina na Yehova. Mwaha ovinre, nooweha wiira Yesu aaheemererya wiiviwa ophavelaka wooniherya wiira Yehova toowaarya, ni itthu sootheene Tiithi awe onipaka awe, ti sooloka. (Mar. 14:36; aHeeb. 10:​7-9) Nuumala Olamulelo wa Iyaakha Ekonto Emosa, Yesu onoorowa omuttikiherya Omwene Tiithi awe, maana oniphavela wiira ovuwa wootheene ovahiweke Yehova. (1 aKor. 15:​26-28) Okhala wiira Yesu onnivaha efaita yinceene nsina na Yehova, eyo ennooniherya wiira owo onninvarexexa ni omphenta vanceene Tiithi awe.

² Yesu aahirwa valaponi wiira olavule mwa nsina na Tiithi awe. (Yoh. 5:43; 12:13) Owo aahaasuweliha atthareli awe nsina na Tiithi awe. (Yoh. 17:​6, 26) Yesu aahiixuttiha ni aahipaka miiriirya mwa nsina na Tiithi awe. (Yoh. 10:25) Nave Yesu aahinvekela Yehova wiira aakhapelele awiixutti awe ‘mwaha wa nsina nawe’. (Yoh.17:11) Tthiri vannooneya wiira Yesu onnivaha efaita nsina na Yehova ovikana itthu sikina. Nkahaya muupuwele ela: Vaniweryaneya sai mutthu ohimya wiira mukristau, variki ohisuwelaka ni ohirumeelaka nsina na Tiithi awe Yesu?

3. Mwaha ola, ninrowa othokorerya exeeni?

³ Okhala wiira na makristau eekeekhai, ninnimutakiha Yesu nooniheryaka ophenta ni ottittimiha nsina na Yehova. (1 Ped. 2:21) Mwaha ola, nnoorowa oweha moota atthu ale anilaleya “ihapari . . . sooreera sa Omwene” anisuweliwa aya okhala Anamoona a Yehova. (Math. 24:14) Nave nnooweha moota nikhanle ahu oowooniherya wiira ninnivaha efaita nsina na Yehova.

“ATTHU ANROWA WIHANELIWAKA NSINA NAWE”

4. a) Ohinatthi orowa wiirimu, etthu xeeni Yesu aalenle awe awiixutti awe? b) Mwaha ola, ninrowa waakhula makoho xeeni?

⁴ Ohinatthi orowa wiirimu, Yesu aahaaleela awiixutti awe wiira: “Nyuwo munoophwanya ikuru okathi munrowa anyu waakhela munepa woowaarya. Nto munrowa okhala anamoona aka oYerusalemu, oYudeya ni oSamariya wotheene, ni elapo yotheene ya vathi”. (Mit. 1:8) Eyo yooniherya wiira, awiixutti yaarowa olaleyaka ihapari sooreera mapuro ootheene, ohiya paahi wIsarayeli. Nuuvira okathi, atthu a maloko ootheene yaamukhalana eparakha ya okhala awiixutti a Yesu. (Math. 28:​19, 20) Moone wiira Yesu aahimmye so: “Munrowa okhala anamoona aka”. Niireke awiixutti yaarowa okhala anamoona a Yesu paahi, aahiiso yahaana osuwela nsina na Yehova? Soowiiraneya siniphwanyaneya Miteko ekapiitulu 15, sinninikhaliherya ophwanya waakhuliwa wa nikoho nna.

5. Arummwa ni axitokweene a oYerusalemu, yoonihenrye sai wiira atthu ootheene ahaana osuwela nsina na Yehova? (Nwehe eteseenyu.)

⁵ Mwaakha wa 49 Nuumala Kristu Orwa, arummwa ni axitokweene yaahithukumana oYerusalemu wiira awehe etthu yaareerela aya opaka, ale yahaakhanle ayuda ni yahinnuwihiwe wiira akhale makristau. Wanikisa wa muthukumano ole, Yakobo, yoowo ari munna awe Yesu aahimmye so: “[Pedru], oonileela wira vano Muluku onniwaakhela atthu ahikhanle ayuda, wira nave aathanle eriyari ya ale ahikhanle ayuda, atthu anrowa wiihaneliwaka nsina nawe”. Masi nsina xeeni Yakobo aahimya awe? Olavulaka moolumo a profeta Amosi, owo aahihimya-tho so: “Ale anrowa ohala, amurumeeleke Yehova vamosa ni atthu a maloko otheene, yaawo anrowa wiihaneliwaka nsina naka. Ti miyo Yehova kinihimya”. (Mit. 15:​14-18) Awiixutti awo asya, ohiya paahi omusuwela Yehova, masi-tho, yaarowa ‘wiihaneliwaka nsina nawe’. Eyo enitaphulela wiira yaarowa waasuwelihaka atthu akina nsina na Yehova ni yaarowa wiihaneliwaka nsina nawe.

6-7. a) Exeeni yaamwirihale Yesu orwa valaponi? b) Mwaha xeeni muulupale okhanle onivikana woopoliwa wa apinaatamu?

⁶ Nsina na Yesu nintaphulela “Yehova ti woopowa”. Yootaphulela ela ti yookhalela, okhala wiira Yehova oomurumeela Yesu wiira owoopole atthu arina waamini. Yesu aahirwa valaponi wiira owoopole apinaatamu. (Math. 20:28) Mwaha wa eperesu Yesu olinve awe, ohaavaha eparakha apinaatamu ya woopowa ni ophwanya okumi woohimala. — Yoh. 3:16.

⁷ Masi xeeni apinaatamu yaapirisari aya woopoliwa? Yaanipirisari woopoliwa mwaha wa ele yiiraneyale oxardim wa wEdeni. Ntoko niwenhe ahu mwaha ovinre, anamathelana oopacerya Adamu ni Eva, khiyaamwiiwelenle Yehova. Awo yaahiperteri eparakha ya okhala mahiku ootheene. (Maph. 3:​6, 24) Yesu aahirwa valaponi wiira opake etthu ya faita yinceene ovikana owoopola apinaatamu. Satana aahimootherya Yehova itthu soohiloka. (Maph. 3:​4, 5) Tivonto, woopoliwa wa apinaatamu waanivarihana ni mwaha muulupale. Mwaha ene tuula: Otteelihiwa nsina na Yehova. Yesu aari representanti a Yehova, ni aahipaka ele Tiithi awe aaphavela awe mwa enamuna yoomalela. Ti maana aya, Yesu aareerela awe otteeliha nsina na Yehova.

8. Etthu xeeni atthareli oororomeleya a Yesu anireerela aya osuwela?

⁸ Ootheene ale yaaphavela okhala mutthareli a Yesu, akhale ayuda aahiiso nnaari, yaahaana osuwela wiira Yehova, yoowo ori Tiithi awe Yesu, toniphwanyiha woopowa. (Yoh. 17:3) Ohiya-vo, ntoko Yesu awo yaamurowa wiihaneliwaka nsina na Yehova. Nave-tho awo yaahaana osuwela efaita erina aya otteelihiwa nsina na Yehova. Woopowa waya, waalipa ni otteelihiwa wa nsina nlo. (Mit. 2:​21, 22) Tivonto, awiixutti ootheene oororomeleya a Yesu, yaanipirisari wiixutta woohimya sa Yehova ni Yesu. Vannikhweya osuwela etthu yaamwiirinhe Yesu omaliha nivekelo aapanke awe niri Yohani ekapiitulu 17 ni moolumo oowi: “Miyo kihaasuweliha nsina nanyu, nave kinootepa waasuweliha, wira ophenta onikiphentana anyu okhale ni yaawo, nave-tho miyo kikhale oowiiraana naawo”. — Yoh. 17:26.

“ANAMON’AKA TI NYUWO”

9. Ninrowa wooniherya sai wiira ninnivaha efaita nsina na Yehova?

⁹ Itthu nthokorerye ahu mpakha-va, sinnooniherya wiira atthareli ootheene a Yesu ahaana otteeliha nsina na Yehova. (Math. 6:​9, 10) Nto ootheene ahu nihaana ovaha efaita nsina na Yehova. Nave nnimooniherya eyo ni itthu nimpaka ahu khula nihiku. Etthu xeeni ninreerela ahu opaka wiira nitteelihe nsina na Yehova ni wooniherya wiira Satana nawoothe?

10. Etribunaali xeeni enilavuliwa Yesaya ekapiitulu 42 mpakha 44? (Yesaya 43:9; 44:​7-9) (Nwehe efootu.)

¹⁰ Yesaya ekapiitulu 42 mpakha 44, nihiixutta moota nikhanle ahu ootteeliha nsina na Yehova. Ikapiitulu iya, Yehova onnaalattula atthu a maloko ootheene, wiira athukumane opuro omosa akhalaka ntoko ari otribunaali oniphukiwa milattu. Owo onnaavekela ale aniihimya okhala amuluku, wiira yooniherye yakhala wiira awo taamuluku eekeekhai. Nave Yehova onnaavekela matestemunya aahiiso anamoona wiira ahimye itthu sinooniherya wiira amuluku awo aakhala. Masi khuuvo oniwerya opaka eyo! — Mmusome Yesaya 43:9; 44:​7-9.

11. Moovarihana ni Yesaya 43:​10-12, Yehova onaaleela exeeni arumeyi awe?

¹¹ Mmusome Yesaya 43:​10-12. Yehova aahaaleela atthu awe wiira: “Vano anamon’aka ti nyuwo . . . miyo pahi ti Muluku”. Nuumala-vo, aahaavekela arumeyi awe wiira yaakhule nikoho nla nni: “Khino ohavo muluku mukina okihiya miyo?” (Yes. 44:8) Nto nookhalana eparakha yuulupale ya waakhula nikoho nlo. Nave moolumo ahu ni miteko sahu, sinniwooniherya atthu wiira Yehova paahi tori Muluku eekeekhai. Nsina na Yehova ti nuulupalexa ovikana masina makina. Itthu nimpaka ahu mookumini mwahu, sinnooniherya wiira ninnimphenta Yehova ni ninniroromeleya wa yena, hata Satana onikhanyereryaka opaka itthu soohiloka. Okathi nimpaka ahu eyo, ninnikhalana eparakha ya okhaliherya otteelihiwa nsina na Yehova.

12. Yiiraneyale sai eprofesia eri Yesaya 40:​3, 5?

¹² Ninnimutakiha Yesu vaavo nintteeliha ahu nsina na Yehova. Eprofesia emosa, Yesaya aahihimya wiira aamukhala mutthu aarowa ‘waalokiherya Apwiya ephiro’. (Yes. 40:3) Eprofesia ela yiiraneyale sai? Yohani Mpatisa, aahilokiherya ephiro para Yesu, yoowo aarwiiye ni aalavunle mwa nsina na Yehova. (Math. 3:3; Mar. 1:​2-4; Luka 3:​3-6) Nave Yesaya aahihimya khalai ene wiira: “Atthu othene anrowa osuwela ovuwa w’Apwiya”. (Yes. 40:5) Eyo yiiraneyale sai? Okathi Yesu aaphiyale awe valaponi, owo aahimurepresentari Yehova mwa enamuna yoomalela vanakhala ntoko wiira Yehova taarwiiye valaponi. — Yoh. 12:45.

13. Ninrowa otthara sai ntakiheryo na Yesu?

¹³ Nimutakihaka Yesu, hiyo naanamoona nnaakiherya nsina na Yehova. Hiyo ninniihaneliwa nsina nlo nave ninnaaleela atthu ootheene itthu sooloka Yehova opanke awe. Masi wiira nikhale anamoona ooloka, nihihiye olaleya itthu sootheene sooloka Yesu opanke awe wiira otteelihe nsina na Yehova. (Mit. 1:8) Yesu aari Namoona a Yehova aimananihale vanceene waakiherya nsina na Yehova, nto hiyo nintthara ntakiheryo nawe. (Wiis. 1:5) Masi etthu xeeni-tho ekina ninreerela ahu opaka, wiira nooniherye wiira ninnivaha efaita nsina na Yehova?

NIVAHEKE EFAITA NSINA NA YEHOVA

14. Hiyo nnoonela sai nsina na Yehova? (Esaalimu 105:3)

¹⁴ Hiyo ninniittottopa mwaha wa nsina na Yehova. (Musome Esaalimu 105:3.) Yehova onnihakalala vanceene okathi nniittottopa ahu mwaha wa nsina nawe. (Yer. 9:​23, 24; 1 aKor. 1:31; 2 aKor. 10:17) Nookhalana eparakha yoovuwiha nsina na Yehova ni waakiherya omutthu awe. Nihuuleliweke muru waaleela makoleeka ahu a omutekoni, a oskola, mavisiinyu ahu ni atthu akina wiira na Anamoona a Yehova! Diabo oniphavela wiira nihiye waaleela atthu akina nsina na Yehova. (Yer. 11:21; Wiis. 12:17) Satana ni atthu animukhaliherya olaleya itthu onoothawa awe, aniphavela wiira atthu aliyale nsina na Yehova. (Yer. 23:​26, 27) Mwaha woophenta nsina nawe, hiyo khannihiya onvuwiha Yehova “nihiku nootheene”. — Esal. 5:11; 89:16.

15. Ontaphulela exeeni oromola nsina na Yehova?

¹⁵ Hiyo khannihiya oromola nsina na Yehova. (Yow. 2:32; aRom. 10:​13, 14) Oromola nsina na Yehova, khonihela muhina paahi osuwela ni orumeela nsina na Muluku. Maana onihela muhina omusuwela oratteene Muluku, omuroromela, onvekela nikhaliheryo ni malakiheryo awe. (Esal. 20:7; 99:6; 116:4; 145:18) Ninnaaleela atthu akina nsina na Muluku ni mikhalelo sawe, nave ninnaakhaliherya opaka marukunuxo mookumi mwaya wiira amusiveliheke Muluku ni yoopowe. — Yes. 12:4; Mit. 2:​21, 38.

16. Ninrowa wooniherya sai wiira Satana nawoothe?

¹⁶ Hiyo niheemererya ohaawa mwaha wa nsina na Muluku. (Yak. 5:​10, 11) Okathi sinniphwanya aya mixankiho nihinahiya omuroromela Yehova, ninnooniherya wiira Satana nawoothe. Okathi wa Yoobi, Satana aahiwootherya arumeyi a Yehova oriki: “[Mutthu] oolikanana oleva itthu sootheene wiira oopole okumi awe”. (Yoob. 2:4) Satana aaphavela ohimya wiira mutthu onoomurumeela Yehova vakhala wiira itthu sinoomweettela saana, masi okathi sinimphwanya aya mixankiho owo onoomunyanyala Yehova. Yoobi aahooniherya wiira ele Satana aahimmye awe, aamootha. Nave nookhalana eparakha yoowooniherya wiira moohicikha mixankiho Satana onrowa awe onikumiherya, khaninrowa omunyanyala Yehova. Ninnikupali ni murima ahu wootheene wiira Yehova khonrowa ohiya onikhapelela ni onikhaliherya mwaha wa nsina nawe. — Yoh. 17:11.

17. Moovarihana ni 1 Pedru 2:​12, mwa enamuna xeeni ekina nikhanle ahu oovuwiha nsina na Yehova?

¹⁷ Hiyo ninnittittimiha nsina na Yehova. (Mir. 30:9; Yer. 7:​8-11) Okhala wiira na arumeyi a Yehova ni ninniihaneliwa nsina nawe, miteko sahu pooti onvuwiha aahiiso onanariha nsina nawe. (Mmusome 1 Pedru 2:12.) Nto ninniimananiha opaka sootheene ninwerya ahu wiira ninvuwiheke Yehova ni moolumo ahu ni miteko sahu. Akhala wiira nnoopaka eyo hata niri ene atthu ayariwe arina ene etampi, nnoowerya ovuwiha nsina na Yehova.

18. Mwa enamuna xeeni ekina nikhanle ahu owooniherya wiira ninnivaha efaita nsina na Yehova? (Nwehe enoota.)

¹⁸ Hiyo ninnivaha efaita yinceene nsina na Yehova ovikana ele atthu akina anuupuwela aya wa hiyo. (Esal. 138:2) Moota xeeni? Okathi nimpaka ahu itthu sooloka wiira nimusiveliheke Yehova, atthu anceene khanisiveliwa ni anninlavula voohiloka.a Nrowe niwehe etthu yaamwiiranenle Yesu. Owo aaheemererya wiiviwa mwa enamuna yoowuuliha muru wiira ovuwihe nsina na Yehova. Yesu “khuuliwe muru”, eyo enitaphulela wiira Yesu khaatepexa oxanka ni ele atthu akina yaarowa aya wuupuwelaka voohimya sa yena. (aHeeb. 12:​2-4) Yoolakela awe, yaari opaka ele Yehova oniphavela awe. — Math. 26:39.

19. Munoonela sai nsina na Yehova ni mwaha wa xeeni?

¹⁹ Hiyo ninniittottopa mwaha wa nsina na Yehova ni ninniweha okhala eparakha yuulupale wiitthaniwa okhala Anamoona a Yehova. Nto mwaha wa yeeyo, hiyo ninneemererya onyokhiwa ni oveehiwa ni atthu akina. Para hiyo, ninnivaha efaita yinceene nsina na Yehova ovikana moota atthu akina annoonela aya. Moohicikha etthu Satana onipaka awe wiira onikhoottiherye, hiyo noolakela ohihiya ovuwiha nsina na Yehova. Niira siiso, nimutakihaka Yesu, nnimooniherya wiira ninnivaha efaita yinceene nsina na Yehova.