Xeeni Ninreerela Ahu Ovekela Miruku?

1. Nihaana opaka exeeni wiira soothanla sahu ni apalano ahu akhumele saana? (Miruku 13:10; 15:22)

OOTHEENE AHU, ninniphavela opaka soothanla sooloka ni sinooniherya ankhili. Nave nimphavela wiira apalano ahu akhumeleke saana. Nuulumo na Muluku, ninnooniherya wiira naaphavelaka okhalana itthu iyo piili, nihaana ovekela miruku. — Musome Miruku 13:10; 15:22.

2. Etthu xeeni Yehova onileihenrye awe?

² Tiithi ahu a wiirimu Yehova, tokhanle oonivaha miruku sooloka. Nto nihaana onvekela wiira onivahe ankhili. Owo onnileiherya onikhaliherya, maana onihimya so: “Kinimoovahani miruku ni kinimookhapelelani”. (Esal. 32:8) Moolumo ala, khahiyo anooniherya paahi wiira Yehova onoonivahaka miruku, masi-tho, anooniherya wiira onninthokorerya ni onoonikhaliherya weettela miruku onnivaha awe.

3. Mwaha ola, ninrowa othokorerya exeeni?

³ Mwaha ola, ninrowa omurumeela Biibiliya wiira naakhule makoho 4, yaawo ani: 1) Naaphavelaka ottottela mureerelo miruku ninvahiwa ahu, mikhalelo xeeni ninreerela ahu okhalana? 2) Ti pani anireerela onivaha miruku? 3) Ninrowa wooniherya sai wiira ninniphavela ni murima wootheene ovahiwa miruku? 4) Xeeni nihinreerela ahu waavekela atthu akina onipakela soothanla?

MIKHALELO XEENI NINREERELA AHU OKHALANA?

4. Naaphavelaka ottottela mureerelo miruku ninvahiwa ahu, mikhalelo xeeni ninreerela ahu okhalana?

⁴ Naaphavelaka ottottela mureerelo miruku ninvahiwa ahu, nihaana okhala atthu oowiiyeviha ni osuwela itthu ninwerya ahu opaka ni iye nihinwerya ahu opaka. Nihaana weemererya wiira khaninsuwela itthu sootheene ni wiira nihaana okhaliheriwa ni atthu akina wiira nipake soothanla sooloka. Maana khaninwerya opaka itthu iyo mekhihu. Naahikhale atthu oowiiyeviha ni anisuwela itthu aniwerya aya opaka ni ahiniwerya aya, Yehova khonrowa onikhaliherya. Nto, okathi ninrowa ahu omusomaka Biibiliya, khaninrowa weettelaka miruku onnivaha awe. (Mik. 6:8; 1Ped. 5:5) Nakhala atthu oowiiyeviha, ninrowa weettelaka miruku sa mbiibiliyani ni ninrowa ottottelaka mureerelo miruku iyo.

5. Itthu xeeni Davidi aapanke awe saakhanle oomwiiriha okhala mutthu oowiixinnuwiha?

⁵ Ntakiheryo na mwene Davidi, ninrowa oniixuttiha itthu sinceene. Owo aanisuwela itthu sinceene ni aanipaka itthu sooreera. Nto itthu iyo sammwiiriha okhala mutthu oowiixinnuwiha. Iyaakha saavinre ohinatthi okhala mwene, owo aahikhalana efaama ni aanisuwela wiipa saana. Nave aanilattuliwa orowa omwiipela mwene. (1Sam. 16:​18, 19) Nuumala Yehova omuthanla Davidi wiira okhale mwene, aahinvaha munepa awe woowaarya, nto Davidi aahikhalana owerya wuulupale. (1Sam. 16:​11-13) Atthu anceene yaanimuttottopela Davidi, mwaha woowiiva awanani awe, omuhela muhina nfilisti, yoowo aihaniwa Goliyati. (1Sam. 17:​37, 50; 18:7) Vaakhanle wiira Davidi aari mutthu oowiixinnuwiha, aarowa wuupuwelaka wiira, mwaha woopaka itthu iya sootheene, khaapirisari ovahiwa miruku ni atthu akina. Masi Davidi khaapanke eyo.

6. Ninsuwela sai wiira Davidi aaneemererya ni aaneettela miruku aavahiwa awe? (Nwehe vakaapani.)

⁶ Nuumala okhala mwene, Davidi aahaathanla apatthani yaakhanle onvahaka miruku. (1Wah. 27:​32-34) Eyo khennitikiniha, maana ohinatthi okhala mwene, Davidi aanivekela miruku ni aaneettela miruku iyo aavahiwa awe. Owo khahiyo paahi eettela miruku aavahiwa awe ni alopwana, masi aaheettela miruku aavahiwa awe ni muthiyana aihaniwa, Abigayili. Abigayili aatheliwe ni mulopwana aihaniwa Nabali, yoowo aari oowiixinnuwiha, oowiitthuna ni ahaattittimiha atthu akina. Masi moowiiyeviha, Davidi aaheettela miruku aavahiwa awe ni Abigayili, nto eyo yaahimwiiriha ohipaka etthu yootakhala. — 1Sam. 25:​2, 3, 21-25, 32-34.

7. Ntakiheryo na Davidi, ninniixuttiha exeeni? (Musuweli 4:​13, 14) (Nwehe ifootu.)

⁷ Yoowiiraneya ya Davidi enniniixuttiha itthu sinceene. Pooti wiira ninnisuwela itthu sinceene ni nookhalana okhulupale. Hata vari siiso, nihikhala-khale nuupuwelaka wiira ninnisuwela itthu sootheene ni wiira khanimpirisari ovahiwa miruku. Nimutakihaka Davidi, nihaana weemererya miruku ninvahiwa ahu moohinweha mutthu ene onnivaha. (Mmusome Musuweli 4:​13, 14.) Vakhala wiira nnoopaka eyo, nnoosyaka opaka itthu saarowa onikumiherya mixankiho ni waakumiherya mixankiho atthu akina.

TI PANI AKHANLE OONIVAHA MIRUKU SOOLOKA?

8. Xeeni Yonathani aari awe mutthu ooreerela onvaha miruku Davidi?

⁸ Nwehe etthu ekina nniixutta ahu ni ntakiheryo na Davidi. Owo aanaavekela miruku atthu yaarina waataana wooloka ni Yehova ni yaasuwela oratteene muxankiho aarina awe. Mwa ntakiheryo, okathi aaphavela awe osuwela etthu aakhanle awe oopaka wiira okhalane waataana wooloka ni mwene Sawuli, Davidi anvekenle miruku Yonathani, yoowo aari mwaana a Sawuli. Niireke Yonathani aamurowa onvaha miruku sooloka Davidi? Aayo, maana Yonathani aahikhalana waataana wooloka ni Yehova ni aanimusuwela oratteene Sawuli. (1Sam. 20:​9-13) Eyo enniixuttiha exeeni?

9. Atthu xeeni nikhanle ahu oowaavekela miruku? Mutthokiherye. (Miruku 13:20)

⁹ Okathi nimphavela ahu ovahiwa miruku, nihaana waavekela miruku atthu arina waataana wooloka ni Yehova ni anisuwela mwaha ene onniiriha waavekela miruku iyo.a (Musome Miruku 13:20.) Mwa ntakiheryo, muupuwele wiira mmiravo oniphavela miruku sa moota womphwanya murokora ooloka. Ti pani anrowa onvaha miruku sooloka? Akhala wiira oninvekela mpatthani awe ohithenle, owo ononvaha miruku sooloka vakhala wiira miruku iyo, sinikhuma mbiibiliyani. Masi woonasa wene, anvahiwa miruku sooloka, vaakhanle wiira aamwaavekela miruku anamathelana animusuwela saana ni akhumme khalai omurumeela Yehova. Anamathelana awo, anoomuleela moota wooweettela malakiheryo a mbiibiliyani ni anoomuleela itthu siwiiranenle sinrowa omukhaliherya.

10. Vano ninrowa othokorerya exeeni?

¹⁰ Mpakha-va, nooweha mikhalelo miili ninreerela ahu okhalana ni atthu akhanle oonivaha miruku sooloka. Vano nrowe niwehe, moota nikhanle ahu oovekela miruku ni murima ahu wootheene ni woona vakhala wiira ti vooloka waavekela atthu akina onipakela soothanla.

NINROWA OVEKELA SAI MIRUKU NI MURIMA WOOTHEENE?

11-12. a) Etthu xeeni nikhanle ahu oosyaka opaka? b) Okathi mwene Robowamu aapaka awe yoothanla yaarina efaita yinceene, aapanke exeeni?

¹¹ Okathi mukina, mutthu pooti okhalaka ntoko wiira oniphavela ovahiwa miruku, variki opanke ene yoothanla awe khalai ene. Masi onnivekela miruku, ophavelaka osuwela vakhala wiira atthu akina anneemererya yoothanla opanke awe. Mutthu ntoko owo, khahiyo onivekela miruku ni murima wootheene. Mutthu siisa, ohaana wiixutta etthu ni ele yaamwiiranenle mwene Robowamu.

¹² Robowamu aahikhala mwene a wIsarayeli nuumala paapa awe aihaniwa Salomooni okhwa. Okathi Robowamu aari awe mwene, atthu a wIsarayeli yaari oothaaciri, masi awo yuupuwela wiira Salomooni aanaavariha miteko soowoma. Awo yaahirowa wa Robowamu ni yaahinvekela wiira ovukule miteko soowoma paapa awe aavariha aya. Nto Robowamu aahaavekela okathi wiira uupuwele yoothanla aarowa awe opaka. Wanipacerya, Robowamu aahaavekela miruku axitokweene, yaawo yaamukhaliherya paapa awe aihaniwa Salomooni. Nto eyo, yaari etthu yooloka aapanke awe. (1Mam. 12:​2-7) Masi Robowamu owo, aahikhootta miruku iyo aavahiwa awe ni axitokweene ale. Etthu xeeni yaamwiirihale okhootta? Woonasa wene, Robowamu aahithanla etthu aaphavela awe opaka, nave aaphavela paahi woona vakhala wiira axitokweene ale yaaneemererya yoothanla awe. Moottharelana owo aahaavekela miruku amiravo, yaawo yanvahale miruku saamusivela. (1Mam. 12:​8-14) Nto Robowamu aahaaleela atthu ale, etthu aaleeliwa awe ni apatthani awe. Mwaha woopaka eyo, atthu anceene khiyaamwiiwelela Robowamu ni yaahimuthanla mwene mukina. Nto okhuma okathi ole, Robowamu aahikhalana mixankiho sinceene. — 1Mam. 12:​16-19.

13. Ninrowa osuwela sai wiira nivenke miruku ni murima wootheene?

¹³ Yoowiiraneya ya Robowamu enniixuttiha exeeni? Khahiyo ti vooloka ovekela miruku nipanke ene yoothanla ahu khalai ene. Nihaana wiimananiha owiriyana miruku ni weettela ni murima ahu wootheene. Ninrowa osuwela sai wiira noopaka eyo? Nihaana wiikoha so: ‘Kiireke kinnivekela miruku, nuumala-vo kinakhootta, mwaha woowi khahiyo miruku kaaphavelaka ovahiwa?’ Nrowe niwehe ntakiheryo nimosa.

14. Okathi ninvahiwa ahu miruku, etthu xeeni ninreerela ahu wuupuwela? Nvahe ntakiheryo. (Nwehe eteseenyu.)

¹⁴ Nkahaya muupuwele wiira munna oovahiwa muteko onrowa awe oliviwaka musurukhu munceene. Masi ohinatthi weemererya muteko owo, onnirowa omuleela mutokweene a mmulokoni. Owo onnihimya wiira vakhala wiira onimweemererya muteko owo, onoomwiiriha ovirihaka okathi munceene ohikhanle ni etthoko awe. Mutokweene owo, onnimuupuxerya munna owo, wiira ookhalana muritti woovaha malakiheryo a mbiibiliyani etthoko awe. (aEef. 6:4; 1Tim. 5:8) Masi munna owo onnikhootta miruku onivahiwa awe ni mutokweene, onavikaniha waakoha anna akina a mmulokoni, mpakha omphwanya munna onihimya wiira ohaana weemererya muteko owo. Niireke munna owo oniphavela tthiri ovahiwa miruku, aahiiso oopaka yoothanla awe, nto onimphavela mutthu onrowa weemererya yoothanla awe? Nihiliyale wiira, murima ahu woototha. (Yer. 17:9) Okathi mukina, miruku sinrowa onikhaliherya, ti seiye nihiniphavela ahu wiiwa.

KIHAANA WAAVEKELA ATTHU AKINA OKIPAKELA SOOTHANLA?

15. Etthu xeeni nihinreerela ahu opaka ni mwaha wa xeeni?

¹⁵ Khula mmosa a hiyo, ookhalana muritti woopaka soothanla sawe. (aKal. 6:​4, 5) Ntoko niwehale ahu, mutthu ankhili onniphavelasa miruku mbiibiliyani ni sa makristau arina waataana wooloka ni Yehova, ohinatthi opaka yoothanla. Masi nihaana okhalana ephoole wiira, nihaavekeleke atthu akina wiira anipakeleke soothanla. Atthu akina pooti opaka eyo mooluluwanya, ahimyaka so: “Mwaari mwa nyuwo, mwaarowa opaka exeeni?” Akina annipaka soothanla apanke aya atthu akina, ahinatthi osuwela saana mwaha owo.

16. a) Nilavulaka sa inama saavahiwa mukuttho amuluku eethiru, muxankiho xeeni waakhumelenle muloko wa oKorinto? b) Tani yaarina etireitu ya opaka yoothanla? (1 aKorinto 8:7; 10:​25, 26)

¹⁶ Nkahaya muupuwele yoothanla makristau a oKorinto yaakhanle aya oopaka, voohimya sa okhuura enama yaavahiwe amuluku eethiru. Olavulaka sa makristau ale, murummwa Paulo aahimmye so: “Hiyo noosuwela wira amuluku eethiru khahiyo etthu, ni wira Muluku ori mmosa paahi”. (1aKor. 8:4) Mwaha wa ele Paulo aahimmye awe, woonasa wene, atthu akina a mmulokoni yaanithanla okhuura enama yaatumihiwa omerkaatu, yeeyo yaavahiwa mukuttho amuluku eethiru. Akina yaahithanla ohikhuura enama ele wiira ahixankihe murima aya. (Mmusome 1 aKorinto 8:7; 10:​25, 26.) Khula mutthu aahaana opaka yoothanla awe. Murummwa Paulo khaatonko waatumererya akorinto waapakela soothanla atthu akina, nnakhala otthara soothanla sa atthu akina. Mwaha woowi khula mutthu ‘aarowa waakhula ohoolo wa Muluku’. — aRom. 14:​10-12.

17. Etthu xeeni yaarowa wiiraneya vakhala wiira nimpaka soothanla naattharaka atthu akina? Nvahe ntakiheryo. (Nwehe ifootu.)

¹⁷ Ankhi olelo-va? Sai yiiraneya etthu ntoko ele yaakhumelenle muloko wa oKorinto? Nkahaya muupuwele voohimya sa ifrasau sa ephome. Noosuwela wiira khula mukristau ohaana opaka yoothanla awe, akhala wiira onimweemererya ifrasau sa ephome aahiiso khonrowa weemererya.b Ekeekhai wiira vannixankiwa wiiwexexa mwaha ola, masi khula mmosa a hiyo ookhalana muritti wa opaka yoothanla awe. (aRom. 14:4) Vakhala wiira nnoopaka yoothanla naatakihaka atthu akina, khaninrowa okhala atthu ankhili. Masi ninrowa okhala atthu ankhili, vakhala wiira ninrowa opaka soothanla sahu, sinivarihana ni malakiheryo a mbiibiliyani. (aHep. 5:14) Nto okathi xeeni nikhanle ahu oowaavekela miruku makristau arina waataana wooloka ni Yehova? Nihaana ovekela miruku nuumala otokosa oratteene mwaha owo, nnoona wiira ninnireerela okhaliheriwa wiira niiwexexe malakiheryo a mbiibiliyani anivarihana ni mwaha owo.

MUHIHIYE OVEKELA MIRUKU

18. Etthu xeeni Yehova onipakenle awe?

¹⁸ Yehova ohooniherya wiira onninroromela vanceene mwaha wooneemererya opaka soothanla sahu. Owo oonivaha Nuulumo nawe, eyo piiyo, Biibiliya. Nave oonivaha apatthani ankhili, yaawo annikhaliherya wiiwexexa malakiheryo a mbiibiliyani. Mwaha woopaka eyo, Yehova onninikhapelela maana Tiithi oophenta. (Mir. 3:​21-23) Etthu xeeni nikhanle ahu oopaka wiira nooniherye omuxukhurela wahu?

19. Ninrowa ohihiya sai omuhakalaliha Yehova?

¹⁹ Nkahaya muupuwele ela: Anamuyari annihakalala vanceene okathi anaaweha aya anaaya yinnuwaka, anakhala atthu ankhili, arumeyi ooloka a Yehova ni anaaweha aya yaakhaliheryaka atthu akina. Mwa enamuna emosa-ru, Yehova onnihakalala okathi ninkhala ahu makristau ooloka, nnaavekela ahu miruku atthu akina ni nimpaka ahu soothanla sinooniherya wiira ninnimphenta vanceene.