Moota Woovaha Miruku Sooloka

1. Ti pani akhanle oovaha miruku ni mwaha wa xeeni?

NIIREKE onnoosivelani waavaha miruku atthu akina? Atthu akina, vannaakhweela ovaha miruku. Masi akina, annoovelela ni khanikhala ootaphuwa waavaha miruku atthu akina. Hata vari siiso, okathi mukina ootheene ahu nihaana waavaha miruku atthu akina. Mwaha wa xeeni? Mwaha woowi, ovaha miruku enamuna nnooniherya ahu wiira ninnaaphenta anna ni arokora. Yesu aahimmye wiira atthareli awe, yaarowa ophentanaka mukina ni mukhwaawe. (Yoh. 13:35) Biibiliya onihimya wiira okathi ninvaha ahu miruku sooloka ni murima wootheene, ninnilipiha ompatthani ahu ni atthu akina. Nave onnihimya wiira “opatthani wooloka onikhumelela mwaha wa miruku seekeekhai”. — Mir. 27:9.

2. Etthu xeeni axitokweene akhanle aya oopaka ni mwaha wa xeeni? (Nwehe ekaaxa eni: “Miruku Ninvahiwa Ahu Mithukumano sa Eriyari ya Esumana”.)

² Otepexa wene axitokweene, ahaana osuwela ovaha miruku sooloka. Maana Yehova ni Yesu, ahaathanla alopwana awo wiira akhapeleleke muloko. (1Ped. 5:​2, 3) Enamuna emosa axitokweene anipaka aya eyo, okathi yoole anilavula aya myaha anivahaka miruku sinikhuma mbiibiliyani. Ohiya-vo, anninivaha miruku okathi nimpirisari ahu. Nave, annaakhaliherya ale ahiyale omurumeela Yehova wiira atthikele mmulokoni. Axitokweene ni ootheene ahu, ninrowa ovaha sai miruku sooloka?

3. a) Ninrowa wiixutta sai ovaha miruku sooloka? (Yesaya 9:5; nwehe ekaaxa eni: “Mmutakiheke Yesu Okathi Munivaha Anyu Miruku”.) b) Mwaha ola, ninrowa othokorerya exeeni?

³ Nnimwiixutta ovaha miruku sooloka, nisomaka matakiheryo a atthu aniromoliwa mbiibiliyani, otepexa wene, ntakiheryo na Yesu. Owo oovahiwa mwiihaneliwo wa nttittimiho woowi “Namiruku Òthamaleya”. (Mmusome Yesaya 9:5.) Mwaha ola, ninrowa oweha etthu nikhanle ahu oopaka, akhala wiira mutthu oonivekela miruku ni oweha vakhala wiira vannireerela onvaha miruku mutthu ohinivekenle. Nave-tho, nnooweha efaita erina aya ovaha miruku okathi wooreerela ni mwa enamuna yooloka.

OKATHI NINVEKELIWA AHU MIRUKU

4-5. Okathi mutthu onnivekela awe miruku, niikoheke exeeni? Nvahe ntakiheryo.

⁴ Okathi ninvekeliwa ahu miruku, hiyo pooti ohakalala okhala wiira mutthu owo onniniroromela. Nto eyo, pooti oniiriha ophavela onvaha miruku moowaakuveya. Masi wanipacerya, vaamuloka wuupuwela akhala wiira nnoowerya ni ninnisuwela oratteene mwaha owo. Nto nihaana wiikoha so: ‘Kiireke kinoowerya ni kinnisuwela oratteene mwaha owo?’ Okathi mukina, enamuna yooloka nikhanle ahu oomukhaliherya, ori ohinvaha miruku, masi omwaavya mutthu onisuwela oratteene mwaha owo.

⁵ Nwehe ntakiheryo nimosa. Muupuwele wiira mpatthani anyu muulupale khoreere owereiwa. Vano, owo onnooleelani wiira ohaavya inamuna soovirikana sa olooliwa. Nuumala-vo, onnoovekelani wiira mmuleele enamuna yootepexa oloka ya olooliwa. Nnaamwi musuwelaka enamuna yooloka ya olooliwa, muhiliyale wiira nyuwo khamuhiyo mwa meetiku ni khamunsuwela saana moota wooloola eretta eyo. Vakhala wiira eyo enimwiiraneya, enamuna yooloka mukhanle anyu oomukhaliherya mpatthani anyu, ori omwaavya meetiku onisuwela oloola oretta owo.

6. Etthu xeeni ninreerela ahu opaka nihinatthi ovaha miruku?

⁶ Okathi mukina, hata noonaka wiira nnoowerya onvaha mutthu miruku, ti vooloka olipelela ovira okathi vakhaani wiira ninvahe miruku mutthu owo. Mwaha wa xeeni? Mwaha woowi, eliivuru ya Miruku 15:​28, enihimya wiira: “Anaxariya annuupuwelela ahinatthi waakhula”. Ankhi vakhala wiira ninnisuwela etthu yoohimya? Hata nisuwelaka etthu yoohimya, nihaana otokosa mwaha owo, ovekela ni wuupuwelela miruku ninrowa ahu onvaha. Vakhala wiira nnoopaka eyo, miruku ninrowa ahu onvaha sinoovarihanaka ni ele Yehova oniphavela awe. Nrowe nithokorerye ntakiheryo na profeta Natani.

7. Ntakiheryo na Natani, ninniixuttiha exeeni?

⁷ Okathi aalavula awe ni profeta Natani, mwene Davidi aahimuleela wiira aaphavela oteka etemplo para Yehova. Moowaakuveya, Natani aahimuleela Davidi wiira yaari etthu yooloka oteka etemplo para Yehova. Masi, eyo khahiyo ti etthu Yehova aaphavela awe. Nto, ohinatthi onvaha miruku Davidi, Natani aahaana omukoha Yehova vakhala wiira aaneemererya Davidi omutekela etemplo. (1Wah. 17:​1-4) Yoowiiraneya ele, ennooniherya wiira okathi ninvekeliwa ahu miruku, nnimooniherya okhala atthu arina ankhili ‘nipisaka olavula’. — Yak. 1:19.

8. Etthu xeeni ekina enniiriha wuupuwela oratteene nihinatthi ovaha miruku?

⁸ Nwehe etthu ekina enooniherya wiira nihaana okhalana ephoole, okathi nninvaha ahu miruku mutthu. Etthu ene tiila: Vakhala wiira nnonvaha miruku soohiloka mutthu, nnookhalana nthowa vakhala wiira miruku sahu sinrowa omukumiherya mixankiho. Tthiri ti vooloka wuupuwela oratteene nihinatthi onvaha miruku mutthu.

OVAHA MIRUKU NIHIVEKELIWE

9. Ahinatthi onvaha mutthu miruku, etthu xeeni axitokweene anireerela aya okupali? (aKalasia 6:1)

⁹ Okathi mukina, axitokweene ahaana orowa onvaha miruku munna aahiiso murokora onivira “ephiro yootakhala”. (Mmusome aKalaasia 6:1.) Eversiikulu ela, ennooniherya wiira mutthu pooti opaka soothanla soohiloka sikhanle oomwiiriha opaka itampi suulupale. Yoolakela ya axitokweene, ori omukhaliherya mutthu owo wiira ohihiye weetta ephiro eniphwanyiha okumi woohimala. (Yak. 5:​19, 20) Wiira anvahe miruku sooloka mutthu owo, axitokweene ahaana okupali ni murima aya wootheene wiira onneetta ephiro yootakhala. Awo ahaana osuwela wiira nnaamwi mutthu opanke ene soothanla sinivirikana ni soothanla saya, eyo khenitaphulela wiira onipaka itthu sihinimusivela Yehova. (aRom. 14:​1-4) Ankhi vakhala wiira axitokweene ahoona wiira mutthu owo onnipaka itthu saarowa omwiiriha ohonona waataana wawe ni Yehova? Anrowa onvaha sai miruku?

10-12. Okathi mutokweene oninvaha awe miruku mutthu ohinvekenle, ohaana opaka exeeni? Mutthokiherye. (Nwehe ifootu.)

¹⁰ Vannaaxankiha axitokweene onvaha miruku mutthu ohaavekenle. Mwaha wa xeeni? Mwaha woowi, murummwa Paulo aahimmye wiira mutthu pooti opaka etthu yootakhala ohisuwelaka. Nto ahinatthi onvaha miruku mutthu owo, axitokweene ahaana opacerya omukhaliherya wiira eemererye miruku aninvaha aya.

¹¹ Onvaha miruku mutthu ohinivekenle, onoolikana ni waala ipyo etthaya yoolipa. Ohinatthi mulimi waala epyo, owo onipacerya toko opatthula. Opatthula, onniiriha etthaya okhala yoowoolowa ni okhweya waala. Nuumala-vo, owo pooti orekari wiira epyo eyo yaakuve omela ni wunnuwa. Mwa enamuna emosa-ru, ohinatthi mutokweene onvaha miruku mutthu ohinvekenle, owo ohaana omukhaliherya mutthu owo, wiira aiwelele miruku iyo. Mwa ntakiheryo, mutokweene pooti waavya okathi wooreerela ni omuleela munna owo, wiira onnimuthokorerya ni murima awe wootheene ni yookhala etthu oniphavela awe ovaanelana. Akhala wiira mutokweene owo onnisuweliwa okhala mutthu oophenta ni ooreera murima, eyo enimwaakhaliherya atthu akina weemererya miruku sawe ni weettela.

¹² Okathi anivaanela aya, mutokweene owo onoomukhaliherya munna owo weemererya miruku sawe, omuupuxeryaka wiira ootheene ahu ninnivonya ni nihaana ovahiwa miruku. (aRom. 3:23) Moopixa murima, ni mooreerela murima ni omuttittimihaka vanceene, mutokweene onoowerya omooniherya mbiibiliyani munna owo etthu yootakhala opanke awe. Nuumala munna woona wiira oopaka etthu yoohiloka, mutokweene owo ohaana “waala epyo”, omutthokiheryaka mwa enamuna yookhweya, etthu okhanle awe oopaka wiira olokiherye muxankiho awe. Nuumala-vo, ohaana “orekari”, niire so, omukhaliherya munna owo weemererya miruku sawe, omuttottopelaka ni ovekela ni yena. — Yak. 5:15.

13. Axitokweene anrowa osuwela sai vakhala wiira mutthu aninvaha aya miruku ohiiwexexa miruku saya?

¹³ Okathi mukina etthu onihimya awe ole onivaha miruku, pooti ohiiwexexiwa ni ole onivahiwa miruku. Nto etthu xeeni axitokweene akhanle aya oopaka, wiira yoone vakhala wiira ole aninvaha aya miruku ohiiwexexa etthu ahimmye aya? Mooreerela murima, axitokweene ahaana ompakela makoho mutthu owo wiira yoone vakhala wiira ohiiwexexa saana etthu ene. (Mus. 12:11) Nto eyo, enoomukhaliherya mutthu owo woona etthu okhanle awe oopaka wiira eettele miruku ovahiwe awe.

OVAHA MIRUKU OKATHI WOOREERELA NI MWA ENAMUNA YOOLOKA

14. Niireke nihaana ovaha miruku ninanariwe ene? Mutthokiherye.

¹⁴ Ootheene ahu, niyariwe nirina ene etampi. Tivo, pooti olavula aahiiso opaka etthu enrowa waawereya atthu akina. (aKol. 3:13) Biibiliya onihimya wiira ikwaha sikina, mutthu pooti olavula aahiiso opaka etthu enrowa oniiriha onanariwa. (aEef. 4:26) Masi, nihaana osyaka ovaha miruku ninanariwe ene. Mwaha wa xeeni? Mwaha woowi, “onanariwa wa mutthu khonikumiherya exariya ya Muluku”. (Yak. 1:20) Vakhala wiira nnonvaha miruku mutthu ninanariwe ene, hiyo pooti otepiha mwaha owo, ohiya olokiherya. Eyo kheniphavela ohimya wiira khanikhanle oomuleela mutthu owo etthu eniwereyale. Masi nihaana opacerya omaaleleya, nuumala-vo, nnamuleela mutthu owo etthu eniwereyale. Hiyo, pooti wiixutta etthu ni Elihu, yoowo anvahale Yoobi miruku sooreera.

15. Ntakiheryo na Elihu, ninniixuttiha exeeni? (Nwehe eteseenyu.)

¹⁵ Yaahivira mahiku manceene, Elihu onwiriyanaka Yoobi, yoowo aamananiha wiixaakiha ohoolo wa atthu yaale yoothererya ommaaliha. Elihu aahimoonela othunku Yoobi. Okathi Yoobi eererya awe wooniherya wiira khaapanke etthu yoohiloka ni aahikhalana erasau, owo aahimootherya Yehova itthu soohiloka. Nto eyo yaahimwiiriha Elihu onanariwa. Hata vari siiso, Elihu aahiwehererya ovira okathi wiira opacerye olavula. Nuumala omaaleleya ni mwa nttittimiho, Elihu aahinvaha miruku Yoobi. (Yoobi 32:2; 33:​1-7) Ninniixutta etthu yooreera ni ntakiheryo na Elihu. Etthu ene tiila: Ti vooloka ovaha miruku okathi wooreerela ni mwa nttittimiho ni moophenta. — Mus. 3:​1, 7.

MUHIHIYE OVAHA NI WEEMERERYA MIRUKU

16. Esaalimu 32:​8, enniixuttiha exeeni?

¹⁶ Yoolepa ya mwaha ola, enihimya wiira Yehova ‘onninivaha miruku ni onninikhapelela’. (Musome Esaalimu 32:8.) Eyo enooniherya wiira okathi wootheene Yehova onninikhaliherya. Yehova khahiyo paahi onnivaha miruku, masi-tho onninikhaliherya weettela miruku onnivaha awe. Tthiri Yehova oonivaha ntakiheryo nooloka wiira nitthareke! Okathi nnaavaha ahu miruku atthu akina, nihihiye waalipiha ni waakhaliherya wiira apake soothanla sooloka.

17. Nnoonela sai okathi axitokweene annivaha aya miruku sinikhuma mbiibiliyani? Mutthokiherye. (Yesaya 32:​1, 2)

¹⁷ Otepexa wene olelo-va, nihaana ovaha ni weemererya miruku ninvahiwa ahu. (2Tim. 3:1) Axitokweene anivaha miruku sinikhuma mbiibiliyani, ari ntoko “màsi anvira nipuro nowuma”. (Mmusome Yesaya 32:​1, 2.) Hiyo ninnaaxukhurela apatthani ahu, yaale ahinoovelela onivaha miruku nimpirisari ahu. Moolumo aya anlikana ni “masa a eweero aheliwe mutixelani ya eparatha”. (Mir. 25:11) Tivonto, nihihiye okhalana ankhili, yaawo anrowa onikhaliherya ovaha ni weemererya miruku ninvahiwa ahu.