Etthu Yoopaka Mwaathokoreriwaka Moohixariya

1-2. a) Atthu akina anoonela sai okathi aniweha aya ohixariya oniiraneya? b) Mwaha ola, ninrowa othokorerya exeeni?

NINKHALA olumwenku atthu akina ahinipaka aya itthu mwa xariya. Atthu anceene, annithokoreriwa moohixariya mwaha wa mathowa oovirikana, ntoko mwaha woohaawa, mwaha wookhala mulopwana aahiiso muthiyana, mwaha wa makhalelo aya ni eraasa aya. Nave atthu anceene annihaawa mwaha woowi athaaciri, alipa-anakoso ni ahooleli a kuvernu, aniphavela owiiyerya musurukhu. Ootheene ahu ninnithokoreriwa moohixariya, pooti okhala mwa enamuna yooluluwanya aahiiso yoohiluluwanya.

² Khanintikinihiwa vaavo nnaaweha ahu atthu akina ananariwaka, mwaha woowi annithokoreriwa moohixariya aahiiso annaaweha atthu akina athokoreriwaka moohixariya. Masi ootheene ahu, ninniphavela othokoreriwa saana ni okhala ni murettele. Nto eyo, enniwiiriha atthu akina wiimananihaka ophuka mixankiho aniweha aya moolumwenkuni aahiiso elapo aya. Awo annipaka manifestasau, annikhootta wiiwelela malamulo ni anninvotari mutthu animoona aya wiira onoomaliha mixankiho saya. Hata vari siiso, hiyo makristau ‘khanniirela mpantta olumwenku’ nave ninlipelela Omwene wa Muluku, yoowo onrowa omaliha ohixariya wootheene. (Yoh. 17:16) Nnaamwi vari siiso, ninniriipiwa murima aahiiso ninninyoonyiheya okathi nnaaweha ahu atthu akina athokoreriwaka moohixariya. Hiyo pooti wiikoha so: ‘Exeeni kikhanle aka oopaka akhala wiira kinnithokoreriwa moohixariya? Kiireke yookhala etthu kikhanle aka oopaka mwaha wa ohixariya oniiraneya nenna-va?’ Wiira naakhule makoho ala, nrowe niwehe moota Yehova ni Yesu anoonela aya okathi anaaweha aya atthu akina athokoreriwaka moohixariya.

YEHOVA NI YESU ANNINYOKHA OHIXARIYA

3. Xeeni ninriipiwa ahu murima okathi nnaweha ahu atthu akina athokoreriwaka moohixariya? (Yesaya 5:7)

³ Biibiliya onnitthokiherya nthowa naya nihinsiveliwa ahu othokoreriwa moohixariya aahiiso vaavo nnaaweha ahu atthu akina athokoreriwaka moohixariya. Biibiliya onihimya wiira Yehova onipattunxe iilikanyihaka yena. Nto owo “ennimusivela exariya”. (Esal. 33:5; Maph. 1:26) Yehova khonaathokorerya atthu akina moohixariya ni khoniphavela wiira atthu akina yaathokoreryeke akhwaaya moohixariya! (Otum. 32:​3, 4; Mik. 6:8; Zak. 7:9) Mwa ntakiheryo, okathi wa profeta Yesaya, Yehova aaniiwa “ikuttho” sa aisarayeli, yaawo yaapuheriwa ni aisarayeli akhwaaya. (Mmusome Yesaya 5:7.) Nto Yehova aahaahukhumu atthu ale yahiiwelela malamulo awe ni yaathokorerya atthu akina moohixariya. — Yes. 5:​5, 13.

4. Yesu onoonela sai okathi onaaweha awe atthu akina ahaawaka? (Nwehe eteseenyu.)

⁴ Omutakihaka Yehova, Yesu ennimusivela exariya ni onninyokha ohixariya. Nihiku nimosa, Yesu aahinweha mulopwana aarakanle ntata. Nto Yesu aahimoonela othunku ni aahimpenuxa mulopwana ole. Masi okathi ahooleli a itiini yaawehale aya ele Yesu aapanke awe, yaahinanariwa vanceene. Awo yaahihimya wiira Yesu aahihonona nlamulo na esaabadu. Masi khiyaamoonela othunku mulopwana ole aavirihale okathi munceene ohaawaka. Yesu oonenle sai etthu ele yaapanke aya? Owo “aahiriipiwa murima vanceene mwaha wa wuumiha waya murima”. — Mar. 3:​1-6.

5. Exeeni ekhanle oowiiraneya, akhala wiira ninniviriha okathi munceene niriipiwe ene murima?

⁵ Okhala wiira Yehova ni Yesu anniriipiwa murima okathi anaaweha aya atthu akina athokoreriwaka moohixariya, nto khahiyo vootakhala hiyo nave oriipiwa murima okathi nnaaweha ahu atthu akina, athokoreriwaka moohixariya. (aEef. 4:26) Masi nihaana okhalana ephoole ni oriipiwa wahu murima, nave nihaana wuupuwela wiira khaninwerya omaliha mixankiho. Akhala wiira nnooriipiwa murima okathi munceene, eyo pooti oniiriha owereiwa aahiiso oxankiheya. (Esal. 37:​1, 8; Yak. 1:20) Nto ninrowa opaka exeeni, okathi ninthokoreriwa ahu aahiiso nnaaweha ahu atthu akina athokoreriwaka moohixariya? Ntakiheryo na Yesu, nnooniixuttiha etthu yoopaka.

ETTHU YESU AAPANKE AWE OKATHI ATTHU YAATHOKORERIWA AYA MOOHIXARIYA

6. Okathi Yesu aari awe valaponi, atthu akina yaathokoreriwa sai? (Nwehe eteseenyu.)

⁶ Okathi aari awe valaponi, Yesu aahaaweha atthu anceene athokoreriwaka moohixariya. Owo aanisuwela wiira ahooleli a itiini yaanincererya malamulo, yaawo yaawiiriha atthu akina ohaawa. (Math. 23:​2-4) Nave aanisuwela wiira makhulupale a oRoma, yaanaahasula vanceene atthu. Ayuda anceene, khiyaaphavela olamuleliwaka ni aroma. Nto yaahikhumelela ekurupu ekina ya maZeloti, yaawo yaawana ni aroma wiira akhale ootaphuwa. Masi, Yesu khaatonko wiirela mpantta nnakhala ekurupu emosa ya atthu awo, yiimananiha oturuka ikuvernu. Okathi aasuwenle awe wiira atthu akina yaaphavela omukhaliha mwene, Yesu aahikhuma moohisuweliwa. — Yoh. 6:15.

7-8. Okathi Yesu aari awe valaponi, xeeni aheerenrye awe omaliha mixankiho? (Yohani 18:36)

⁷ Okathi Yesu aari awe valaponi, owo khaatonko ovara vamosa ni mapoliitiku, wiira omalihe mixankiho ni ohixariya wiiraneya okathi ole. Mwaha wa xeeni? Mwaha woowi, Yesu aanisuwela wiira apinaatamu, kharina etireitu ya waalamulela akhwaaya ni khaniwerya weettiha mavalo aya. (Esal. 146:3; Yer. 10:23) Nave apinaatamu khaniwerya omaliha etthu enniiriha ohaawa. Satana tonilamulela olumwenku ola. Okhala wiira Satana tootakhala, nto apinaatamu anceene a olumwenku ola, annimutakiha yena. (Yoh. 8:44; aEef. 2:2) Hata apinaatamu ooreera murima, khaniwerya omaliha mixankiho sootheene sa moolumwenkuni, okhala wiira khahiyo okathi wootheene anipaka itthu mwa xariya. — Mus. 7:20.

⁸ Yesu aanisuwela wiira Omwene wa Muluku paahi, tonrowa omaliha mixankiho sootheene sinaahaaxa apinaatamu. Mwaha waivaavo, Yesu aanirumeela okathi awe ni ikuru sawe “aalaleeryaka atthu ni olaleyaka ihapari sooreera sa Omwene wa Muluku”. (Luka 8:1) Mwaha woopaka eyo, aahaamaaliha ale “animukhuwelela othana ni ohiyu wira yiireliwe exariya”, aaleelaka wiira moohipisa, ohixariya wootheene onoomala. (Math. 5:6; Luka 18:​7, 8) Ikuvernu sa apinaatamu, khasiniwerya omaliha mixankiho. Omwene wa Muluku paahi, tonrowa omaliha, maana Omwene owo “khahiyo wa olumwenku ola”. — Mmusome Yohani 18:36.

MMUTAKIHEKE YESU OKATHI ATTHU ANITHOKORERIWA AYA MOOHIXARIYA

9. Exeeni enookupalihani wiira Omwene wa Muluku paahi, tonrowa omaliha mixankiho sootheene?

⁹ Ninkhala “mahiku ookiserya” a olumwenku ola. Tivonto, atthu annihaawa vanceene ovikana okathi Yesu aari awe valaponi. Masi ntoko okathi Yesu aari awe valaponi, mutthu onikumiherya mixankiho ti Satana ni atthu ootakhala murima. (2Tim. 3:​1-5, 13; Wis. 12:12) Nimutakihaka Yesu, nihaana osuwela wiira Omwene wa Muluku paahi, tonrowa omaliha itthu sootheene sinikumiherya ohixariya. Okhala wiira ninkhaliherya ni ninlaleya Omwene wa Muluku, hiyo khanimpaka manifestasau, nave khaninroromela wiira ikuvernu sa apinaatamu sinoomaliha ohixariya. Nrowe nthokorerye yoowiiraneya ya murokora oniihaniwa Stacy.a Ohinatthi wiixutta ekeekhai, Stacy aamakela opaka manifestasau ni atthu akina, wiira omalihe ohixariya. Masi nuuvira okathi, aahoona wiira etthu aapaka awe, khiyaarowa waakhaliherya atthu ni omaliha mixankiho. Stacy onihimya so: “Okathi kaapakaka manifestasau, kaaniikoha vakhala wiira kaanipaka etthu yooloka. Masi vano kinikhaliheryaka Omwene wa Muluku, kinnisuwela wiira Omwene owo, onoomaliha ohixariya wootheene. Nave kinnisuwela wiira Yehova onoomaliha mixankiho sootheene, etthu yeeyo kihiniweryaka opaka”. — Esal. 72:​1, 4.

10. Moovarihana ni Matheyo 5:​43-48, xeeni nihinimananiha ahu oturuka malamulo aahiiso ikuvernu? (Nwehe efootu.)

¹⁰ Atthu anceene olelo-va, annipaka manifestasau wiira amuturuke kuvernu. Masi anceene a yaawo anninyoonyiheya, khaniiwelela malamulo ni annaakumiherya mixankiho atthu akina. Eyo khahiyo ti etthu Yesu oniixuttihale awe wiira nipakeke. (aEef. 4:31) Munna oniihaniwa Jeffrey, ohimmye so: “Kinnisuwela wiira okathi atthu anipaka aya manifestasau, awo anninyoonyiheya, ohonona itthu, wiiyeryana ni okumiheryana mixankiho”. Masi Yesu onniixuttiha wiira nihaana waathokoreryaka atthu moophenta, hata atthu yaale anninyokha aahiiso annilupattha. (Mmusome Matheyo 5:​43-48.) Hiyo makristau ninniimananiha otthara ntakiheryo Yesu onivahale awe.

11. Xeeni ikwaha sikina vanivila aya omutakiha Yesu?

¹¹ Nnaamwi nisuwelaka wiira Omwene wa Muluku onrowa omaliha mixankiho moomalela, pooti onixankiha omutakiha Yesu okathi ninthokoreriwa ahu moohixariya. Ela ti etthu yiiraneyale ni murokora oniihaniwa Janiya, yoowo aathokoreriwa moohixariya mwaha wa eraasa awe. Janiya aahimmye wiira: “Itthu atthu ale yaahimya aya, saanikiriipiha murima vanceene. Nave-tho, kaaninanariwa vanceene ni kaaniphavela wiira atthu ale yaapuniriwe. Nuumala-vo, kaahuupuwela okhaliherya ekurupu ya atthu yaamanifestari mwaha wa eraasa ni mwaha wa nthalu. Kuupuwela wiira opaka eyo, yaamukhaliherya olokiherya itthu”. Nuuvira okathi, Janiya aahoona wiira aahaana oturuka muupuwelo awe. Janiya onihimya so: “Kaahoona wiira ohiya omuroromela Yehova, kaahipacerya waaroromela atthu ni ororomela itthu yaahimya aya. Tivonto, kaahilakela okhuma ekurupu ele ni ohiirela-tho mpantta itthu ntoko iye”. Nnaamwi ninanariwaka okathi ninthokoreriwa ahu moohixariya aahiiso okathi atthu akina anthokoreriwa aya moohixariya, nihaana okasoopa onanariwa wahu ni okathi wootheene ohiirela mpantta olumwenku. — Yoh. 15:19.

12. Xeeni vari aya va miruku othanlela itthu ninwiriyana ahu, ninsoma ahu aahiiso ninweha ahu?

¹² Exeeni enrowa onikhaliherya okhala oomaaleleya, okathi ninthokoreriwa ahu aahiiso atthu akina anithokoreriwa aya moohixariya? Etthu enaakhaliherya atthu anceene, ori othanlela itthu anisoma aya, aniwiriyana aya aahiiso iviidiyu aniweha aya. Iviidiyu sinceene sinooniheriwa munterneetini, sinniwiiriha atthu anceene oxankiheya aahiiso opaka manifestasau. Ikwaha sinceene, maxornalista annihimya itthu sinivarihana ni moonelo aya, ohiya itthu siiraneyale. Nnaamwi nisuwelaka wiira etthu enihimmwa ekeekhai, hiyo khaninrowa omaliha muxankiho owo hata nithipelelaka osoma aahiiso oweha. Tthiri vakhala wiira nnoovirihaka okathi munceene niwiriyanaka, nisomaka aahiiso oweha itthu sinikumiheriwa munterneetini, iyo pooti oniirihaka otepa oxanka, oriipiwa murima ni onanariwa. (Mir. 24:10) Nto eyo pooti oniiriha ohihela Omwene wa Muluku nipuro noopacerya mookumini mwahu, ni oliyala wiira Omwene owo tonrowa omaliha mixankiho sootheene.

13. Omusoma Biibiliya ni wuupuwelela, onrowa onikhaliherya sai okathi atthu akina anthokoreriwa aya moohixariya?

¹³ Omusoma Biibiliya ni wuupuwelela ele ninsoma ahu, enoonikhaliherya osuwela etthu yoopaka okathi ninthokoreriwa ahu aahiiso nnaaweha ahu atthu akina athokoreriwaka moohixariya. Murokora mmosa oniihaniwa Alia, aanixanka vanceene okathi aaweha awe atthu a muttetthe awe athokoreriwaka mwa enamuna yoohiloka. Owo aanixanka vanceene, okhala wiira atthu awo anipaka itthu iyo soohiloka, khiyaahukhummwa nnakhala opuniriwa. Alia onihimya so: “Kaahaana weemela ni wiikoha so: ‘Kiireke kinnikupali wiira Yehova onoomaliha mixankiho iya?’ Nto kaahiivaha okathi wiira kimusome Yoobi 34:​22-29. Iversiikulu iya, sinnooniherya wiira Yehova onniweha itthu sootheene. Yehova paahi, toniwerya waaphukela apinaatamu ni torina owerya wa omaliha mixankiho sootheene”. Nto nihaana ovilela ohixariya, nilipelelaka Omwene wa Muluku oruuha exariya yeekeekhai. Moota xeeni?

ITTHU XEENI NIKHANLE AHU OOPAKA?

14. Etthu xeeni nikhanle ahu oopaka niinaano-va? (aKolosi 3:​10, 11)

¹⁴ Ekeekhai wiira hiyo khaninwerya waamala-maliha ale anaathokorerya moohiloka atthu akina. Masi nihaana waathokoreryaka saana atthu ootheene. Ntoko niixuntte ahu, nihaana omutakiha Yesu naaphentaka atthu ootheene. Nto ophenta iwo, ohaana oniirihaka waathokorerya mwa xariya ni mwa nttittimiho hata atthu yaale annilupattha. (Math. 7:12; aRom. 12:17) Yehova onnihakalala okathi nnaathokorerya ahu saana ni nnaareerela ahu murima atthu ootheene. — Mmusome aKolosi 3:​10, 11.

15. Owiixuttiha atthu akina ikeekhai sa mbiibiliyani, sinrowa waakhaliherya sai?

¹⁵ Enamuna emosa nikhanle ahu oowaakhaliherya atthu anithokoreriwa moohixariya, ori owiixuttiha ikeekhai sa mbiibiliyani. Etthu xeeni enniiriha ohimya siiso? Okhala wiira okathi atthu akina aniixutta aya voohimya sa Yehova, awo anniphavela omuhakalaliha, opaka marukunuxo ni anniixutta waareerela murima ni waaphenta atthu ootheene. (Yes. 11:​6, 7, 9) Ohinatthi wiixutta ekeekhai, mulopwana mmosa oniihaniwa Jemal, aahiikeliha ekurupu ya atthu ootakhala, yaawo yaaphavela omuturuka kuvernu a elapo awe, okhala wiira kuvernu owo aapaka itthu sootakhala. Jemal onihimya so: “Nyuwo khamunwerya waaturuka atthu nwanaka ni atthu awo. Masi okathi aniixutta aya ekeekhai ya mbiibiliyani, awo annipaka marukunuxo. Eyo ti etthu yaakikhalihenrye opaka marukunuxo”. Itthu Jemal aixuntte awe, saahimukhaliherya ohiya owana ekhotto. Nto vaavo ninwiixuttiha ahu atthu akina ikeekhai sa mbiibiliyani, ikeekhai iyo sinimwaakhaliherya atthu awo ohiya opaka itthu soohiloka ni ohiya waahaaxa atthu akina.

16. Exeeni enniiriha owiixuttiha atthu akina muhupi wa Omwene?

¹⁶ Nimutakihaka Yesu, nihaana waaleela atthu akina wiira Omwene wa Muluku paahi, tonrowa omaliha mixankiho sootheene. Nlipelelo nlo, nnimwaalipiha atthu ale anithokoreriwa moohixariya. (Yer. 29:11) Stacy, yoowo nimulavunle ahu ittima sivinre, onitthokiherya so: “Mwaha wa wiixutta wiira Yehova onoomaliha mixankiho sootheene, eyo ennikiiriha okhala oomaaleleya okathi kinithokoreriwaka aahiiso kinaawehaka atthu akina athokoreriwaka moohixariya. Yehova onnirumeela muhupi ori mbiibiliyani wiira onimaalihe”. Nto nihaana waamaaliha atthu akina ni waaleela itthu Muluku onileiherya awe siri mbiibiliyani. Okathi ninsuwela ahu etthu Biibiliya onihimya awe voohimya sa mixankiho, eyo enninikhaliherya otepa okupali itthu nniixutta ahu. Nave eyo, enooniiriha owiixuttiha atthu akina, okhale oskola, omutekoni aahiiso opuro mukina, etthu enniiriha ohaawa ni moota Yehova onrowa awe omaliha ohaawa wootheene.b

17. Yehova onnikhaliherya sai ovilela ohixariya?

¹⁷ Mooriipiha murima, nlelo nnoohaawaka okhala wiira Satana tori “namalamulela a olumwenku ola”. Nto okhala wiira Yehova onnileiherya onikhaliherya niinaano-va, nihaana okupali wiira itthu sinooloka. Nave onrowa ompwetexa Satana ni itthu sootheene sootakhala. (Yoh. 12:31) Mwa ntakiheryo, mbiibiliyani Yehova onninleela nthowa naya vanihaawa ahu, ni wiira owo onnaakhapelela ale anihaaxiwa. (Esal. 34:​17-19) Yesu ooniixuttiha etthu nikhanle ahu oopaka okathi ninthokoreriwa ahu moohixariya. Nave nihiixutta wiira moohipisa, Omwene wa Muluku onoomaliha mixankiho, ni khuuvo pinaatamu onrowa ohaawaka-tho. (2Ped. 3:13) Nto nihihiye olaleya ihapari sooreera sa Omwene ni olipelela okathi elapo yootheene enrowa aya osareya ‘ehakhi n’ixariya’. — Yes. 9:6.