Xeeni Yesu Onihimmwa Awe Okhala Mwaana a Muluku?

Moota Biibiliya Onaakhula awe

Biibiliya ikwaha sinceene onnimuhimya Yesu okhala “Mwaana a Muluku”. (Yohani 1:49) Nuulumu noowi “Mwaana a Muluku” ninninikupaliha wiira Muluku topattunxe itthu sootheene, nave maphattuwelo a ekumi, oheela muhina okumi wa Yesu. (Esalimo 36:10; Wiisuupulula 4:11) Biibiliya khonihimya wiira Muluku ootoko omuyara mwaana ntoko apinaatamu aniyarana aya.

Nave-tho onniitthana malaikha okhala “aana a Muluku”. (Yoobi 1:6, Piipiliya Emakhuwa) Nave Biibiliya onihimya wiira mulopwana oopacerya, Adamu, aari “mwaana a Muluku”. (Luka 3:38) Okhala wiira Yesu tori nlaikha noopacerya opattuxiwa ni Muluku, Biibiliya onnimuhimya Yesu okhala mwaana oopaceriwa a Muluku.

• Niireke Yesu aakhala wiirimu ohinatthi oyariwa valaponi?

• Etthu xeeni Yesu aapanke awe ohinatthi orwa valaponi?

Niireke Yesu aakhala wiirimu ohinatthi oyariwa valaponi?

Aayo. Yesu ohinatthi oyaariwa ntoko pinaatamu valaponi, aakhala wiirimu ntoko nlaikha. Yena mmeensawe aahimmwe so: “Miyo kinikhuma osulu”. — Yoh 6:38; 8:23.

Muluku ampattunxe Yesu ohinatthi opaka itthu sotheene. Nave Yesu mmensawe, aahimmye so:

• “Mwaana owo . . . topacenrye opattuxiwa mwa itthu sotheene”. — aKolosi 1:15.

• Owo “yoopattuxiwa yoopaceryexa ya Muluku”. — Wiisuupulula 3:14.

Yesu aahimaleliha iprofesiya saamulavula ‘ole ephattuwelo awe eri ya mahiku avinre khalayi’. — Mikeya 5:2; Matheyo 2:4-6.

Etthu xeeni Yesu aapanke awe ohinatthi orwa valaponi?

Yena aari nlaikha noottittimihiwa wiirimu. Yesu aahihimya okhulupale aarina awe okathi aavekenle awe so: “Tiithi, mukivuwihe . . . ni ovuwa waarina aka ni nyuwo, olumwenku ohinatthi opattuxiwa”. — Yohani 17:5.

Aahimukhaliherya Tiithi awe opaka itthu sotheene sikina. Yesu aavara muteko hoothe ni Muluku ntoko mulipa amvarela ‘miteko sothene’. (Miruku 8:30) Nave Biibiliya onihimya wiira “mwa yoowo, soopattuxiwa itthu sotheene wiirimu ni vathi”. — aKolosi 1:16.

Muluku aahimuruma Yesu opattuxa itthu sotheene sikina. Iyo sinihela muhina malaikha a wiirimu ni itthu sotheene siri valaponi. (Wiisuupulula 5:11) Wiiwanana iwo waakhanle eriyari ya Muluku ni Yesu, onoolikana ni wiiwanana onikhala eriya ya arquiteto ni peterero. Arquiteto ompaka epalanta ya empa vapapheloni; vano peterero onnirumeela epalanta eyo wiira opake empa yeekeekhai.

Aahirumeela ntoko Nsu. Okathi Biibiliya onlavula awe okumi wa Yesu ohinatthi orwa valaponi, onnimuhimya okhala “Nsu”. (Yohani 1:1) Vanooneya wiira eyo entaphulela wiira Muluku aahimurumeela Mwanawe wiira osuweliheke malaikha moolumo yaakhuma wa Muluku.

Nave vanikhala wiira Yesu aarumeela ntoko namitthaka a Muluku wiira aaleeleke apinaatamu valaponi itthu aarummwa awe Muluku. Woonasa-wene okathi Muluku anvaha awe malakiheryo Adamu ni Eva ojardim ya wEdeni, aalavunle omurumelaka Yesu. (Maphattuwelo 2:16, 17) Waanyiheryasa Yesu aari nlaikha nenle naahoola aisarayeli a khalai okathi yeetta aya moothakoni, yaarummwale aya wiiwelela moolumo aya. — Okhuma 23:20-23.a