Muheemye Etthu Wira Yoorakameliheni Yehova

‘Olelo vava mmuthanle onimutthunanyu omurumela’.​—YOX. 24:15.

MWEERERYE WAAKHULA MAKOHO ALA

Ninrowa opweha sai muteko ahu wa mulaponi opuro wooreerela?

Munrowa wooniherya sai mukhalelo wa otthekula wala othweela wooloka?

Akhala wira mmusi ahu oomuhiya Yehova, ninrowa ovilela sai oriipiwa murima?

1-3. (a) Xeeni Yoxuwa orya awe ntakiheryo nooloka na mutthu aapanke soothanla sooloka? (b) Nuupuweleke exeeni okathi onipaka ahu soothanla?

‘OTHANLA’, nla nuulumo nuulupale! Mutthu onipaka yoothanla, ookhalana muritti muulupale wa okhapelela itthu sotheene sa okumi awe sinrowa okhumelela. Mwa ntakiheryo: Nkamuupuweleni mulopwana mmosa oneetta mphironi, mootutuxerya onniphwanya opuro onivalaana aya iphiro. Ephiro xeeni onkela awe othanla otthara? Akhala wira mulopwana owo onnuupuwela opuro onrowa awe, onkela otthara ephiro enimuroiha oniphavela awe ophiya, okhala wira atthara ephiro ekina, owo khaniphiya opuro oniphavela awe.

² Biibiliya onnaaromola atthu sawiiranenle itthu soolikana ni ntakiheryo nlo. Mwa ntakiheryo: Kayini ahaana othanla ovikaniha onanariwa, wala osyaka onanariwa. (Maph. 4:6, 7) Yoxuwa ahaana othanla omurumeela Muluku ekeekhai, wala waakokhorela amuluku eethiru. (Yox. 24:15) Yoothanla ya Yoxuwa yaari wataana ni Yehova; nto owo aatthanre ephiro yaarowa omukhaliherya opaka eyo. Kayini khaarina yoothanla ntoko eyo, owo aathanlale ephiro yaarowa omurakameliha ni Yehova.

³ Ikwaha sikina hiyo pooti okumananaka mixankiho sinlikana ni iphiro sivalanne khukhala piili. Eyo yakhumelela, muupuweleke yoolakela ahu, eyo piiyo, omuhakalaliha Yehova mwa itthu sotheene sinivara anyu, wira nihivalaane ni yena. (Mmusome aHéberi 3:12.) Yoosoma ela, ni eyo enittharelana, ninrowa oweha iponto thanu ni piili sinrowa onikhaliherya wira nihimurakamele Yehova.

MOOTA WOOTHANLA MUTEKO, NI SOOVARA SINNISIVELA

4. Xeeni varya aya votthuneya ovara muteko?

⁴ MaKristau ahaana ovaraka muteko wira ekhapeleleke etthoko aya. Biibiliya onihimya wira yoole ohinikhapelela etthoko awe, owo ootepa ohiloka onvikana ole ohinaamini. (2 aTes. 3:10; 1 Tim. 5:8) Ekeekhai wira ovara muteko, etthu ya efaita mookumini mwahu; masi naahikhalane ephoole muteko owo pooti onrakameliha Yehova. Moota xeeni?

5. Okathi onaavya ahu muteko makoho xeeni anireerela ahu wuupuwela?

⁵ Vano nuupuwele wira nyuwo munaavya muteko. Akhala wira munikhala elapo yoothowa muteko, pooti woophwanyani yooweeha ya weemererya khula enamuna ya muteko oniphwanya anyu. Ankhi akhala wira muteko owo khonivarihana ni malakiheryo a Biibiliya? Ankhi akhala wira eprokrama ya muteko enniwooceelihani miteko seKristau, wala muhaana weetta ekwaha yoorakama eniwiirihani ohiya emusi anyu? Nyuwo mwaarowa ovaraka muteko owo muupuwelaka wira phatari vaavo ovikana ohikhalana muteko? Muupuweleke wira othanla ephiro yoohiloka enimoovalaanihani ni Yehova. (aHéb. 2:1) Akhala wira nyuwo munitokosa enamuna ya muteko onivara anyu, wala munaavya muteko, nto munrowa opaka sai soothanla sooloka?

6, 7. (a) Soolukama xeeni akina anikhalana aya voohimya sa muteko wa mulaponi? (b) Soothanla xeeni sinrowa owataanihanai ni Yehova, mwaha wa xeeni?

⁶ Ntoko silavuliwe aya wanipacerya. Mwiikoheke so: ‘Muteko aka ola, wala soophavela saka iya, sinikiroiha woowi?’ Akhala wira munookupali wira muteko owo nikhaliheryo paahi wira muweryeke okhapelela emusi anyu vaavo munimurumeela anyu Yehova, nto Yehova owo onimooreelihani. (Math. 6:33) Yehova khaniviliwa wookhaliheryani okathi onithoiwa anyu muteko, wala okathi wa othowa musurukhu. (Yes. 59:1) Owo onnisuwela moota ‘wowakiherya sotakhala atthu òrera murima’.​—2 Ped. 2:9.

⁷ Ankhi akhala wira yoolakela anyu ori paahi ophwanya mihakhu? Waaniheryasa nyuwo pooti okhumela saana. Hata mukhumelaka saana, muupuweleke wira “othaaciri wanyu”, munooliverya; maana eyo khenivaanyiheya. (Mmusome 1 Timótheyo 6:9, 10.) Otepexa osiveliwa musurukhu ni ophavela ovara etthu ti etthu ennisivela pooti onirakameliha ni Yehova.

8, 9. Anamuyari yooneleke sai muteko wa mulaponi? Mutthokiherye.

⁸ Akhala wira nyuwo paapa wala maama, muupuweleke moota aniinyu anrowa aya wootakihani. Etthu xeeni aniinyu anoona aya wira nyuwo munnitepa ovaha efaita, muteko anyu wala omukokhorela Yehova? Awo yaweha wira ophavela ohimmwa, ovuwa, ni othaaciri teri etthu enipacerya mookumini mwanyu, niireke anrowa otthara mweettelo anyu owo woothananiha? Niireke awo anoohiya woovahani efaita nyuwo ntoko namuyari aya? Mwammiravo mmosa muKristau onihimya so: “Kinnuupuwela khalai wira apaapa yaanitepa oxankiheya ni muteko aya. Wanipacerya vaakhala wira wiimananiha waya ovara muteko waari mwaha wa mureerelo ahu. Paapa ahu aaphavela wira nikhaleke saana. Masi mahiku ala itthu soovirikana. Khomphumurya ovara muteko, nto onniruuha itthu sa musurukhu munceene, sihinitthuneya vapuwani vahu. Nto mwaha wa eyo hiyo ninsuweliwa okhala emusi erina musurukhu munceene, ohiya emusi enaalipiha atthu akina mmyaha sa omunepani. Kinoona wira muhoolo, muhakhu onimwaahapuxa apaapa”.

⁹ Anamuyari, muhiivalaaniheke ni Yehova, mwaha wa otepexa osiveliwa muteko anyu. Masi, mwaavahe ntakiheryo aniinyu wira yooneke wira muhakhu muulupale ori okhalana soolakela somunepani ohiya sa werutthuni.​—Math. 5:3.

10. Etthu xeeni yooloka wuupuwela okathi mmiravo onaavya awe muteko?

¹⁰ Akhala wira nyuwo mwa mmiravo onaavya muteko, munrowa othanla sai ephiro yooreera. Ntoko silavuliwe aya wanipacerya, muhaana oweha okumi anyu etthu enitthara aya. Niireke kursu ni muteko anyu, onnoovahani okathi wira nvareke saana miteko sa Omwene, wala muteko owo onimoorakamelihani ni Yehova? (2 Tim. 4:10) Niireke yoolakela anyu eri ntoko atthu yaale anuupuwela wira ohakalala ontaphulela okhalana musurukhu munceene obanko, wala wuukela soolya ni itthu sinceene? Wala nyuwo munrowa omutakiha Davidi olempe so: ‘okhuma omiravo aka mpakha vano kùluvanlyaka, nkinamone naxariya onyanyaliwene ni Muluku, nkinamone amusi awe elolaka yolya’? (Esal. 37:25) Muhiliyale wira ephiro emosa, enrowa woorekamelihani ni Yehova; vano ekina enrowa woovahani okumi wooloka okathi wotheene. (Musome Miruku 10:22; Malakhiya 3:10.) Nto ephiro xeeni enrowa anyu othanla?a

OTTHEKULA NI OTHWEELA

11. Biibiliya onoonela sai otthekula ni othweela wooreerela, masi ephoole xeeni enitthuneya ahu okhalana?

¹¹ Biibiliya khanikhoottiha ohakalala, hata khanikhoottiha otthekula wala khanihimya wira othweela ori ohonona okathi. Paulo aalempe so: ‘Nikuruta ninnikhaliherya erutthu’. (1 Tim. 4:8) Nave Biibiliya onnilavula wira wookhala ‘okathi wotteliwa murima’ ni ‘okathi wa wina’, nave onnitumererya wira ophumurya onnivaha ekumi. (Mus. 3:4; 4:6) Masi akhala wira nyuwo khamunikhalana ephoole, otthekula wala othweela woohiloka pooti woorekamelihani Yehova. Moota xeeni? Sookhala itthu piili sowoopiha: Enamuna ya otthekula, ni mwaattelo wa okathi oniviriha anyu mutthekulaka.

12. Itthu xeeni sinireerela otokosa okathi onithanla anyu enamuna ya otthekula wala othweela?

¹² Yoopacerya, nithokorerye enamuna ya otthekula. Nyuwo mukupaliki wira vanniweryaneya ophwanya otthekula woophwanelela. Mahiku ala, itthu sinceene sinaattela mootthekulani ori ovuwihiwa itthu seiye sinimunanara Muluku, ntoko owana, onamunepani, ni orupihana woohiloka. Nyuwaano muhaana otokosa saana enamuna ya othekula enoosivelani. Enamuna eyo enooxuttihani exeeni? Niireke otthekula iwo onootumereryani owana, ophavela waavikana atthu akina, wala waakiherya elapo? (Mir. 3:31) Niireke otthekula iwo onnimaliha mihakhu sanyu? Wala onnaakhumuliha akina? (aRom. 14:21) Atthu anitthekulana anyu anootumereryani opaka exeeni? (Mir. 13:20) Niireke otthekula wanyu onniwiirihani ophavela opaka itthu soohiloka?​—Yak. 1:14, 15.

13, 14. Exeeni nyuwo enireerela anyu otokosa moota onirumeela anyu okathi wa otthekula?

¹³ Muthokorerye-tho okathi onimaliha anyu mutthekulaka wala othweela. Mwiikoheke so: ‘Kinniviriha okathi munceene kitthekulaka paahi, ovikana okathi onirumeela aka itthu somunepani?’ Akhala wira nyuwo munnivira mootepana okathi munceene mutthekulaka, munimoona wira okathi owo khonookhaliheryani ntoko munuupuwela anyu. Ekeekhai wira yaale anitthekula moophwanelela, annihakalala vanceene. Mwaha wa xeeni? Mwaha woowi annihakalala osuwela wira aawerya ovara itthu sootepa okhalana efaita; nto annikhalana okathi wa ophumurya ni otheekula.​—Mmusome aFilipi 1:10, 11.

¹⁴ Nnaamwi vakhalaka ntoko etthu yooloka mutthu oviriha okathi munceene otthekulaka, mweettelo owo pooti woorakamelihani Yehova. Murokora orina iyaakha 20, owo ohiixutta mmansawe, owo oni: “Miyo kaari mutthu aarowa khuta efesta. Khuta wanimala wa esumana yaanikhala etthu yuulupale yiiraneya, okhuma Namathanu, Saabadu ni Dominku. Masi vano kooweha wira sookhala itthu suulupale sootepa otthuneya. Okhala wira kapioneera, kinvenya 6:00 hora ya voosiisu wira kirowe olaleerya, nto nkinrowa-tho khula efesta. Vano koosuwela wira ifesta sikina ti sooloka, masi iyo pooti onaakanyerya. Nto khula etthu ehaana okhalana okathi ni opuro aya”.

15. Anamuyari anrowa waakhaliherya sai anaaya ophwanya otthekula woohakalaliha?

¹⁵ Anamuyari aakhalana muritti wa waavaha anaaya itthu sootthekulana, nikhaliheryo na omunepani ni waahakalalihaka. Eyo enihela muhina othanla okathi woreerela otthekula. Akhala wira nyuwo mwa namuyari, muhooneke wira khula enamuna ya otthekula ti yoohiloka. Masi muhiliyale okhalana ephoole ni itthu sinihapuxa. (1 aKor. 5:6) Muupuwelela saana, munoowerya ophwanya enamuna ya otthekula wooreera onihakalaliha etthoko anyu.b Mwiira siiso, nyuwo ni aniinyu munrowa othanla ephiro eniwataanihani vanceene ni Yehova.

WIIRAANA WA ATTHU A VATTHOKONI

16, 17. Muxankiho xeeni wooriipiha murima onaaphwanya anamuyari, nto ninsuwela sai wira Yehova onnisuwela owereya iwo?

¹⁶ Wiiraana okhanle eriyari ya anamuyari ni anaaya ti wuulupale, ti nthowa naya Yehova onirumeela awe ntoko ntakiheryo aalavulaka sa niphento nawe ni apinaatamu. (Yes. 49:15) Tivonto vanitepa aya owereiha murima vaavo mmusi onimuhiya awe Yehova. Murokora oomoliwe mwanawe muthiyana mmulokoni, onihimya so: “Kaahiriipiwa murima vanceene. Kaniikoha wira: ‘Exeeni emwiirinhe omuhiya Yehova?’ Kaahipacerya wiivahaka nthowa”.

¹⁷ Yehova onnisuwela owereya onikhumelela. Owo nave ‘ahiphweleya’ okathi yoole ohinatthi orwa Mutaaseke apinaatamu yaapaka aya itthu soohiloka. (Maph. 6:5, 6) Ale ahitonko owiiraneela etthu ela pooti ohisuwelaka moota eniwereiha aya murima. Nnaamwi vari siiso, khahiyo vooloka emusi erina mutthu okumihiwe mmulokoni okhalana muupuwelo wootepa oxanka oniwiiriha orekamelana ni Yehova. Nto munrowa ovilela sai owereya onikhumelela vaavo mmusi anyu onimuhiya awe Yehova?

18. Xeeni anamuyari vanitthuneya aya osyaka wiivaha nthowa mwaha wa anaaya animuhiya Yehova?

¹⁸ Muhiivaheke nthowa wa ele yiiranen’ye. Yehova ohaavaha apinaatamu opaka soothanla saya, nto khula mutthu obatiziwe vatthokoni vahu, onimwaakhula ‘akohiwaka mwaha wa mwettelo awe’. (aGal. 6:5) Yehova onimulamula ole otthenka, ohiya nyuwo mwaha wa etthu epakiwe ni mutthu mukina. (Eze. 18:20) Nave-tho muhaavahe nthowa atthu akina. Muhaana ottittimiha marehereryo a Yehova voohimya sa olakiwa. Nto nwaneke ekhotto ni Diabo; muhiwaneke ni axitokweene yaawo-tho aniphavela okhapelela muloko.​—1 Ped. 5:8, 9.

19, 20. (a) Exeeni anamuyari yaale anaaya akumihiwe mmulokoni akhanle aya oopaka wira exintte oriipiwa waya murima. (b) Nlipelelo xeeni nekeekhai arina aya anamuyari awo?

¹⁹ Mwa mpantta-tho mukina, akhala wira nyuwo munoonanariwa ni Yehova, eyo enoowiirihani omurakamela. Etthu yuulupale enireerela anyu wooniherya etthoko anyu, ori omwiiwelela Yehova ovikana itthu sotheene, ohela muhina emusi anyu. Nto wira mweettiherye saana myaha iyo, nvikaniheke olipiha ompatthani anyu ni Muluku. Muhivalaaneke ni anna maKristau akhwiinyu oororomeleya. (Mir. 18:1) Nvekeleke wira mmuleeleke Yehova mixankiho sanyu. (Esal. 62:7, 8) Muhikhala-khale moothereryaka etthu wira mwaataaneke ni amusi anyu akumihiwe mmulokoni, wala olavulana ni telefoni, wala mensage. (1 aKor. 5:11) Muluttuweliweke ni miteko sa Muluku. (1 aKor. 15:58) Murokora olavuliwe wanipacerya, onihimya so: “Koosuwela wira kihaana oluttuweliwa ni miteko sa Yehova ni wira kilipihe ompatthani aka ni Muluku wira okathi mwanaka onitthikela awe mmulokoni, kiwerye omukhaliherya’.

²⁰ Biibiliya onihimya wira ophenta ‘onniroromela itthu sothene’. (1 aKor. 13:4, 7) Khahiyo vootthekeya ororomela wira mmusi anyu onootthikela mmulokoni. Khula mwaakha, atthu anceene yaatthenke yiittaruxa annitthikela mmulokiheryoni mwa Yehova. Yehova khanaathanya ale yiittaruxale. Masi owo ‘torera murima ni òlevelela’.—Esal. 86:5.

MPAKE YOOTHANLA YOOLOKA

21, 22. Yoolakela xeeni erina anyu voohimya sa moota woorumela otaphuwa wanyu?

²¹ Yehova ohaapaka apinaatamu ni ohaavaha otaphuwa. (Mmusome Otumererya 30:19, 20.) Masi otaphuwa iwo, woonivaha-tho muritti muulupale. Khula muKristau aikoheke so: ‘ephiro xeeni eniphavela aka otthara’? Kiireke muteko, otthekula, othweela, ni emusi aka, itthu iya sookirakameliha ni Yehova?’

²² Moota Yehova onaaphenta awe apinaatamu ti wuulupale. Muthinto mmosa paahi wa ovalaana ni Yehova ori otthara ephiro yoohiloka. (aRom. 8:38, 39) Nto etthu eyo ehiiraneye wa hiyo! Nto muhihiye etthu wira yoorakameliheni ni Yehova. Nto yoosoma enittharelana ninrowa othokorerya iponto xexe sa moota woovikaniha opaka soothanla sooloka.

[Inoota]

[Elatarato epaaxina 12]

[Elatarato epaaxina 14]

Otthekula wooreera ni mwaattelo wa okathi woophwanelela, onnihakalaliha

[Elatarato epaaxina 16]

Ti vooreera wuupuwelaka wira mmusi ahu onoomutthikela Yehova

Nvikaniheke Omwaattamela Yehova

‘Mmwattameleke Muluku, Muluku onowattamelani’.​—YAK. 4:8.

MUNNIWERYA OTTHOKIHERYA?

Ninrowa ovikaniha sai okhalana moonelo wooloka wa etekonogia?

Ninrowa ovikaniha sai okhalana moonelo wooloka voohimya sa musurukhu?

Ninrowa omwaattamela sai Yehova?

1, 2. (a) Tisivi sikhanle miraakho sa Satana? (b) Exeeni enrowa onikhaliherya omwaattamela Muluku?

YEHOVA MULUKU ohaapaka apinaatamu wira ephaveleke wataana nuuwo. Masi Satana oniphavela wira nitthareke muupuwelo awe; nooneke wira khanintthuneya malakiheryo a Yehova. Owo ti muupuwelo Satana aarumenle awe wira anwoke Eva oxardim wa Edeni. (Maph. 3:4-6) Okhuma vaavale, apinaatamu anceene annivikaniha ottheka.

² Ti voohakalaliha osuwela wira hiyo nnoowerya osyaka muraakho owo wa Satana. Maana hiyo ‘nosuwela sana simphavelawe’. (2 aKor. 2:11) Satana oniphavela onrakameliha wa Yehova vaavo onniiriha awe opaka itthu soohiloka. Masi ntoko niwenhe ahu yoosoma yoopacerya, hiyo pooti opaka soothanla sooloka voohimya sa otthekula, muteko ni soophavela sa emusi. Yoosoma ela enkela onooniherya moota woorumeela saana etekonologia ya vano, ekumi ahu, musurukhu ahu ni wiittittimiha wahu mmukhalelo wooloka ‘onnattameliha Muluku’.​—Yak. 4:8.

MOOTA WOORUMEELA ETEKONOLOGIA

3. Muhimye moota itekonologia sikhanle aya orumeeliwa mooloka ni moohiloka.

³ Mahiku ala itthu sa eletronika sinniphwanyaneya khula mapuro olumwenku wotheene. Masi orumeela mooloka itthu iyo sinnikhaliherya. Orumeela saana pooti onataaniha ni Tiithi ahu a wiirimu. Mwa ntakiheryo akomputadore. Erevista ela enisoma anyu elempwale ni okaiwa erumeeliwaka akomputadore. Komputadore pooti okhala ekaruma yooloka opaka sootokosa ovaanela ni atthu wala otthekulano. Masi naahikhalane ephoole pooti otepa olemmwaka ni etekonologia ya komputadore. Alipa anaatumiha akomputadore annilavula moosiviha ephavelaka owiirihani othuma khuta markha a komputadore. Mmiravo mmosa aahitepa osiveliwa ni muthinto mmosa wa markha a komputadore, ahimulenle mutthu, atumiha esyo awe emosa wira amuthume komputadore. Tthiri owo muupuwelo weelolo!

4. Mukristau mmosa awenrye sai omaliha yoolema ya oviriha okathi munceene ni komputadore?

⁴ Etthu yootepa otakhala ohonona wataana wanyu ni Yehova mwaha woorumeela moohiloka etekonologia. Mukristau mmosa oniihaniwa Jon arina iyaakha 20a onihimya so: “kinnisuwela yoolopola ya Biibiliya yoowi naavyeke okathi woovara itthu somunepani; Masi enamuna enimurumeela aka komputadore, ennikiiriha ohikhalana okathi”. Jon ikwaha sinceene oninvarakasa komputadore awe mpakha ohiyu. Owo onihimya so: “Hata okathi kaakhulumuwa aka, vanikivila onwala komputadore, nave okathi mukina ifilme kaaweha aka saari soohiloka”. Wira awerye omaliha yoolema ele yoohiloka, Jon aahimpakela komputadore awe eprograma wira aiwaleke ekhaweru waphiya okathi woorupa.​—Mmusome aÉfeso 5:15, 16.

5, 6. (a) Muritti xeeni anamuyari arina aya wa anaaya? (b) Anamuyari ankela waakhaliherya sai oratteene anaaya okhalana apatthani ooloka?

⁵ Anamuyari, khanitthuneya oweha-wehaka khuta etthu anaaya eniira aya, masi ahaana otokosaka etthu enivara aya mukomputadoreni. Muhaahiye ewehaka ifilme sa atthu anirupihana, axooku ootakhala, onammunepani, wala otthekula ni atthu oohiloka mphavelaka wira ehookhulumuleni paahi. Mwiiraka siiso, awo ankela wuupuwelaka so: ‘Itthu iya khasinaananara apaapa ni amaama, ti sooloka’. Nyuwo anamuyari, ola ti muteko anyu waakhapelela aniinyu, ohela muhina amiravo, wira ehikhale etthu enaarakameliha Yehova. Hata axinama, annaakhapelela axaana aya yakhumelela yowoopiha. Nkuupuwelani etthu kharamu oothiyana aarowa awe omwiiriha mutthu onimuhaaxa mwaaxaana awe!​—Mutakiherye ni Hoseya 13:8.

⁶ Mwaakhaliherye aniinyu wataana ni maKristau oowunnuwela ni amiravo arina mweettelo wooloka. Muhiliyale-tho wira aniinyu aniphavela ovirihaka okathi ni nyuwo! Nto, mwaavyeke okathi wira mutheyeke naawo, othweela, ovara miteko ni ‘omwattamela Muluku’ hoothe.b

MOOTA WOOKHAPELELA EKUMI

7. Xeeni otheene nimphavela ahu okhalana ekumi yooloka?

⁷ “Munoona sai?” Nuulumo nla noolimaleliwa mwaha woorumeeliwaka, atthu ephavelaka osuwela ehaali. Mwaha wa anamuyari oopacerya yeemerenrye omurakamela Yehova, olelo otheene ahu ninniwereiwa. Owereiwa eri yoolakela ya Satana; okhala wira naawereiwaka, vannixankiha omurumeela Yehova. Nave nakhwa vale, khaninwerya omurumeela Yehova. (Esal. 115:17) Ekeekhai wira ninniphavela opaka etthu eniwerya ahu wira nikhalane ekumi.c Nave ninnithokorerya ekumi ahu ni okhala saana wa axinnihu.

8, 9. (a) Ninrowa osyaka sai otepana oxankiheya ni ekumi? (b) Mureerelo xeeni onikhumelela nailipihaka wira nitteeliweke murima?

⁸ Masi, etthu yowoopiha, ori otepa oxankiheya ni ekumi. Atthu akina annitepa oluttuweliwa opaka edieta wala wiinanela olya, wiixutta ovoniha iretta, wala oluttuweliwa mootepana yaavyaka iprodutu ovikana oluttuweliwa ni ihapari sooreera sa Omwene wa Muluku. Awo pooti woonaka wira etthu yuulupale eniphavela aya ti waakhaliherya atthu anihaawa. Nto nakhala oSalau ya Omwene wanipacerya wala wookiseryani wa mithukumano, khahiyo vooloka olavulaka myaha sa othokorerya ekumi, itthu siniphwaneliha erutthu, ni iprodutu sa ekumi wala erutthu mmukhalelo onikhala ntoko wira mutthu owo onoolaleya itthu iyo. Xeeni vahinloka aya?

⁹ Mwaha woowi omuthukumanoni ninrowa othokorerya sowiima sa munepa wootteela wa Muluku sinikumiherya otteeliwa murima. (aGal. 5:22) Niryeene musalau, waavaha atthu malakiheryo a iprodutu sa ekumi nihivekeliwe wala nivekeliwe ene, pooti waaliyaliha atthu awo itthu sa omunepani sirweenle aya, wala ovukula-tho ohakalala waya. (aRom. 14:17) Moota mutthu oniphavela awe okhapelela okumi awe, ekhaleke yoothanla ya mutthu mwaneene. Khuuvo oniwerya openuxa iretta sotheene. Nisuweleke wira hata mameediku oolokexa, annuuluvala, owereiwa ni khiyakhwa. Nto otepexa oxankiheya vanceenexa ni ekumi ahu khonirowa osarihela okumi ahu. (Luka 12:25) Masi, Murima wootteliwa, onnikhalana “murettele wa erutthu”.​—Mir. 17:22.

10. (a) Mikhalelo xeeni siri sooreera ohoolo wa Yehova? (b) Ninrowa ophwanya sai ekumi yootepa oreera?

¹⁰ Ekeekhai wira ti vooloka okhapelela erutthu ahu. Masi, nihitepeke wiimananiha omala-maliha itthu sinooniherya wuuluvala wahu. Maana ikanyeryo iyo sa erutthu, ethoonyeryo ya wunnuwela wahu, okhulupale ni ophwanelela wa omutthu ahu. Mwa ntakiheryo Biibiliya oni: ‘Ipwí nthonyeryo nottittimiheya, naxariya onnitthuveliwa nikumi yinjene’. (Mir. 16:31) Nto Yehova onnoonela siiso, nave nihaana wiithokoreryaka ntoko Yehova onnithokorerya awe. (Mmusome 1 Pedru 3:3, 4.) Munoonela sai, khahiyo othoiwa miruku mutthu ovekela opakiwa operasau owoopiha, aphavelaka paahi wira akhalane erutthu yooreera eniwiiriha atthu osiveliwa nuuwo? ‘Otteliwa murima onrwa w’Apwiya’ Yehova tori, oreera wekeekhai wa muhina, voohimya sa wuuluvala ni ekumi. (Neh. 8:10) Okhala mmiravo mahiku otheene onkela wiiraneya paahi oparayisu. (Yobi 33:25; Yes. 33:24) Nto niwehereryaka okathi owo, nooniheryeke ankhili ni waamini wira nataaneke ni Yehova vaavo nneetta ahu saana moovarihana ni makhalelo ahu.​—1 Tim. 4:8.

MOOTA WOORUMEELA MUSURUKHU

11. Vaniweryaneya sai musurukhu okhala muraakho?

¹¹ Musurukhu khahiyo etthu yootakhala, khahiyo vootthekeya-tho omweetta nakoso ooloka. (Mus. 7:12; Luka 19:12, 13) Masi, opacerya ‘osiveliwa musurukhu’, ononirakameliha Yehova. (1 Tim. 6:9, 10) ‘Weteteya ni itthu sa vathi-va’, otepana oxanka ni itthu sa werutthuni pooti ohonona omunepani wahu. Tthiri, hiyo pooti opaceryaka okupali wira mihakhu sinniruuha ohakalala, nto iwo ti ‘wototha wa muhakhu’. (Math. 13:22) Yesu aahilavula mowiiwanyeya wira: ‘khavo’ onikhumela saana aarumeelaka atthu anli: Muluku ni mihakhu.​—Math. 6:24.

12. Miraakho xeeni sa anakoso sikhanle olelo-va, nto nisyake sai?

¹² Okhalana moonelo woohiloka ni musurukhu pooti omwiiriha mutthu opaka itthu sootakhala. (Mir. 28:20) Atthu yaale aniroromelihiwa ophwanya musurukhu moowaakuveya, onniwiiriha akina othuma iseenya sa ilotariya wala owiira axooku, opaka mapuro manceene a anakoso a khula enamuna, nto hata axinna pooti waahapuxa akina mmulokoni. Akina yaatoko owokiwa wira yamphwanya mihakhu sinceene nuumala ovara miteko suulupale. Nto ophavela othaaciri ohiwiiriheni nyuwo wiiyeriwa. Muupuweleke saana. Akhala wira etthu enilaiheriwa anyu enikhala wira ti yootepexa oloka, mukhalane ephoole.

13. Moota xeeni moonelo wa Yehova onivirikana aya ni moonelo wa elapo voohimya sa musurukhu?

¹³ Vaavo ‘nimpajeriha’ ahu ‘omwene’ ni exariya ya Muluku, Yehova onooreeliha wiimananiha wahu wooreerela wira nikhalane itthu sinitthuneya. (Math. 6:33; aÉf. 4:28) Owo khaniphavela wira nirupeke naphiya omuthukumanoni mwaha wa ovara muteko mootepana, wala ophiya Osalau ya Omwene masi khiyuupuwela musurukhu. Anamunceene mulaponi anikupali wira okathi wotheene ophavela musurukhu tonrowa okhapelela okumi aya vano ni muhoolo. Nto awo anaakhanyererya anaaya okhalana soolukama sa ophenta mihakhu. Yesu aahilavula wira muupuwelo owo othoiwa miriku. (Mmusome Luka 12:15-21.) Ela pooti onuupuxerya Gehazi yoowo aakhalela nrima mihakhu masi nlelo avikanihaka ophavela wataana ni Yehova.​—2 Mam. 5:20-27.

14, 15. Xeeni vahinloka aya waaroromela anakoso a mulaponi? Nvahe ntakiheryo.

¹⁴ Vannihimmwa wira aakhala axawawe yaahaawerya ovava mwaha woohiphavela ohiya ehopa yaatenxe aya yootepa olemela. Niireke etthu ela pooti omwiiraneela muKristau? Mutokweene mmosa oniihaniwa Alex onihimya so: “Kinnimananiha orumeela saana musurukhu, kakumiha musurukhu vakhaani, kihaana opaka etthu wira kittikiherye”. Masi hata aasuwela orumeela saana musurukhu, owo aahivareya ni anakoso anooniherya nrima; mwaha wowuupuwela wira ophwanyakaru musurukhu ole, owo aarowa okela muteko wa opioneero. Nto owo aahivareya ni omananiha osoma inamuna sinceene sa moota wookhumela saana ni nakoso ole. Arumeelaka musurukhu aasunke awe, mukina oolihiwa awe ni anna, owo aahithuma itthu seiyo alipa owaatokosa anakoso yaahimya aya wira samumphwanyiha musurukhu mowaakuveya. Masi itthu iyo saahimpwatiha vanceene. Alex onihimya so: “miyo kaaphavela ophwanya musurukhu aka paahi. Nto kuupuwela wira ovikaniha ompaka nakoso owo kaamphwanya musurukhu ole”.

¹⁵ Saahivira myeeri sinceene Alex ahiweryaka otthokiha saana itthu sawe. Vaaninvila ovara miteko somunepani; nto ikhove saanimutthyawa. Masi owo khaawenrye ophwanya musurukhu aathumanne awe itthu. Alex aahipweteiwa mihakhu sawe sotheene, nto khutumiha-tho empa awe. Owo onihimya so: “kookumiherya othunku wuulupale emusi aka”. Masi owo ohiixutta etthu yuulupale, nto onihimya so: “Kooweha wira khula mutthu yoole oniroromela olumwenku wa Satana, onoxanka vanceene”. (Mir. 11:28) Tthiri, ororomela mihakhu, owerya opaka itthu, ophwanya musurukhu mulaponi-mu, ontaphulela omukupali muluku ‘a vathí-va’, Satana. (2 aKor. 4:4; 1 Tim. 6:17) Nto vano Alex ookweiherya saana okumi awe mwaha wa ‘ihapari sooreera’. Owo onihimya so: opaka eyo woomwiiriha owo ni emusi awe ohakalala ni wataana ni Yehova.​—Mmusome Marko 10:29, 30.

WIIVAHA EFAITA

16. Ovirikana xeeni okhanle wiivaha efaita wooloka, ni woohiloka?

¹⁶ Wiivaha efaita mwaha wa itthu sooreera, ti vooloka. Mwa ntakiheryo, hiyo ninniivaha efaita mwaha wa okhala Anamoona a Yehova. (Yer. 9:24) Ovaha efaita ekumi ahu ni wiittittimiha, onninikhaliherya opaka soothanla sooloka wira nisyake mweettelo woohiloka. Masi wiivaha efaita mootepana wala wiixinnuuha, pooti onirakameliha Yehova.—Esal. 138:6; aRom. 12:3.

17, 18. (a) Muhimye matakiheryo a atthu owiiyeviha, ni ale oowiixunnuuha. (b) Munna mmosa aasyanke sai wiixinnuuha wira ahimurakamele Yehova?

¹⁷ Biibiliya onnaaromola atthu yaari owiixunnuuha ni ale yaari oowiiyeviha. Mwene Davidi aanitthara malakiheryo a Yehova, nto owo aahireelihiwa. (Esal. 131:1-3) Masi Yehova aahimuyeviha Mwene Nabukhodonosori ni Balthazari. (Dan. 4:30-37; 5:-30) Olelo-va sinnikhumelela-tho mixankiho sineehererya wiiyeviha wahu. Ryan, orina iyaakha 32 aryeene murumeyi oorumeela aahithaamela muloko mukina. Owo onihimya so: “Miyo koona wira moohipisa kaarowa okhala mutokweene a mmulokoni, masi khuvira eyaakha ntero kihivahiwe otokweene”. Niireke Ryan aamunanariwa wala oxanka uupuwelaka wira axitokwene ale khiyaamuttittimiha? Niireke aarowa ohiya orowa omuthukumanoni, nto wiixinnuuha wawe omurakameliheke Yehova ni atthu Awe? Nyuwo mwaarowa opaka exeeni?

¹⁸ Ryan onnaakhula ariki: “Miyo kaanisoma khula myaha sa iliivuru sahu sinivaha miruku, seiye saaweryaka aka ophwanya”. (Mir. 13:12) “Kaahipacerya oweha wira kihaana wiixuttaka wiiyeviha; ni wira Yehova akiixuttiheke”. Ryan aahipacerya ovarexexa waathokorerya anna mmulokoni; ni muteko woolaleerya. Moohipisa aahipacerya wiiriha soosoma sinceene sa Biibiliya sinrowa vahoolo. Owo onihimya so: “Okathi kaathanliwe aka okhala mutokweene, nuumala eyaakha emosa nnimeya, miyo kaahituthuwa maana nkaalipelela. Miyo kaahihiya oxankiheya okhala wira muteko wa olaleerya waanikisivela”.​—Musome Esalimo 37:3, 4.

MMWAATTAMELEKE YEHOVA!

19, 20. (a) Ninrowa wiikasoopa sai wira itthu sooreera sihinirakemelihe Yehova? (b) Malikanyiho xeeni ankela ahu otthara a atthu yaatonko wataana ni Yehova?

¹⁹ Myaha sotheene nithokorenrye ahu yoosoma ela ni yoosoma yoopacerya, sinnivareleya muteko mookumini mwahu. Nto ninniivaha efaita mwaha wookhala arumeyi a Yehova. Okhalana emusi yoohakalala ni ekumi yooloka, eri eparakha yuulupale enirwa wa Yehova. Hiyo ninnikupali wira ovara muteko mulaponi ni ophwanya musurukhu onoonikhaliherya okhapelela soophavela sahu sa werutthuni. Nave noosuwela wira otthekula ononlipiha mmakhuvani ni etekonologia etthu yootthuneya orumeela. Masi pooti okhala voohiloka ophavela ophwanya itthu iya okathi woohireerela wala mootepana, maana onnaakanyerya okokhorela wahu ni onrakemeliha Yehova.

²⁰ Nto eyo ti etthu Satana oniphavela awe. Masi nyuwo pooti wiilipiha nenla-va wira emusi anyu ehihaawe ni itthu iyo. (Mir. 22:3) Mmwaattamele Muluku wira mwataane nuuwo. Nookhalana matakiheryo manceene mBiibiliyani anniixuttiha enamuna ela. Henoki ni Nowe ‘yahetta ephiro ya Muluku’ ekeekhai. (Maph. 5:22; 6:9) Moise ‘ahilipiha murima awe, ntoko wira amona Muluku ohinòneya’. (aHéb. 11:27) Yesu okathi wotheene aakhaliheriwa ni Muluku, nto khula okathi aamusiveliha Tiithi awe a wiirimu. (Yoh. 8:29) Mutthareke matakiheryo ala. ‘Mutteliweke murima okathi p’ukathi. Mulompke vohihiyererya. Mmutthapeleke Muluku mwa itthu sothene’. (1 aTes. 5:16-18) Nto, muheemye etthu yoorakamelihakani Yehova!

[Inoota]

[Elatarato epaaxina 17]

[Elatarato epaaxina 18]

Anamuyari, mwaakhaliherye aniinyu orumeela mwa miruku etekonologia

[Elatarato epaaxina 21]

Muhihiye etthu yoorakamelihakani Yehova!

[Elatarato epaaxina 21]

Ohiya oxankela ni otokweene mmulokoni, mutteeliweke murima ni olaleerya!