ALE ANISOMA ILIIVURU SAHU ANNIKOHA . . .

Xeeni Atthu Akina Alavuliwe mBiibiliyani Ahiniromoliwa Aya Masina Aya?

Muliivuruni ya Ruthi, mmusi aakhoottale ovara muteko awe moovarihana ni Nlamulo na Moise oniitthaniwa Munalexe. (Ruthi 4:1-12) Nto niireke atthu otheene a mBiibiliyani ahiniromoliwa masina aya yaari ootakhala wala oohikhalana efaita?

Nnaari. Muthokorerye ntakiheryo nikina. Okathi Yesu aamulokiherya awe Paasikha awe ookiserya, aahaaruma awiixutti awe ‘orowa omuttettheni, owannyawe Lexe’ wira yalokiherye itthu sa Paasikha owo. (Matheyo 26:18) Niireke ole onihimmwa eveersu ela okhala “Lexe” aari ootakhala wala oohikhalana efaita? Nnaari. Moohaaniherya, ole onihimmwa-va aari mwiixutti a Yesu. Okhala wira nsina nawe khinaatthuneya mmwaha ola, tivonto nihiromoliwe aya.

Ohiya-vo, Biibiliya onniromola masina a atthu anci ootakhala. Nave-tho ohaana matakiheryo a atthu anceene oororomeleya masi ahiromoliwe masina aya. Mwa ntakiheryo, nsina na muthiyana oopacerya, Eva ti noosuweliwa saana. Masi, wiixinnuuha ni ohiiwelela wawe waahimwiiriha omutthekiha Adamu, ni onikumiherya maxakha manceene. (aRoma 5:12) Mwa mpantta mukina, mwaarawe Nowe khonihimmwa nsina nawe mBiibiliyani. Masi hiyo ninnimuxukhuru vanceene mwaha wa wiivahererya ni omwiiwelela iyawe omukhaliheryaka muteko aarummwale awe ni Muluku. Tivonto, ohiromoliwa wa masina makina mBiibiliyani, khonitaphulela wira atthu awo yahaarina efaita wala yaari ootakhala.

Ahaavo atthu akina ahiniromoliwa masina aya mBiibiliyani masi yaavanre miteko sootthuneya ni suulupalexa mwa yoolakela ya Yehova. Nkahaya muupuwelele sa mwaaruusi ole mwIsarayeli yoowo aari epottha vapuwani va muulupale aanakhotto ooSiria, Naamani. Moolipa murima, mwaaruusi ole aahimuleela pwiyamwene awe, mwaarawe Naamani, voohimya sa profeta a Yehova wIsarayeli. Eyo yaahikumiherya mwiiriirya muulupale. (2 Mamwene 5:1-14) Nave-tho, mwaana mwaamuthiyana a mukhulupale a wIsarayeli Yefte oovaha ntakiheryo noolokexa na waamini. Mowiiveleela owo aahileva yoolipelela ya otheliwa ni waayara anamwane, masi khomwiiwelela natiri aapakiwe ni tiithi awe. (Makhulupale 11:30-40) Moolikanasa, ahaavo atthu oowiiraka 40 alempe isalimo ahiniromoliwa masina aya vamosa ni maprofeta makina yaawo moororomeleya yaavanre miteko saarumwanle aya.​—1 Mamwene 20:37-43.

Waaniheryasa, ntakiheryo nikina noovarexa murima ti na malaikha oororomeleya. Ahaavo malaikha ikonto imiya sene, masi manli paahi taniromoliwa masina aya: Gabriyeli ni Mikhayeli. (Daniyeli 7:10; Luka 1:19; Yuda 9) Malaikha makina khanihimmwa masina aya mBiibiliyani. Mwa ntakiheryo, nlaikha nimosa naahikohiwa ni Manowa, tiithi awe Sansoni wira: “Nsina ninyu mwá pani? Nimphavela woxukhuruni, sìraneya vale sihimyalyanyu”. Nlaikha nlo naakhunle sai? “Munkikoherya-ni nsina naka?” Mowiiyeviha, nlaikha nno naahikhootta weemya nttittimiho nnimphwanela Muluku paahi.​—Makhulupale 13:17, 18

Biibiliya khonitthokiherya mathowa otheene atthu akina aniromoliwa aya masina aya, masi akina khihiyaromoliwa. Masi, nnoowerya wiixutta sinceene sa atthu oororomeleya yaamurumenle Muluku voohilipelela ovuwa wala ottittimihiwa.

[Elatarato epaaxina 10]