Munnuupuwela?

Niireke moosoma saana irevista sa naanano sa Owehaweha? Nanso moone akhala wira munoowerya waakhula makoho anittharelana:

Okathi xeeni Yesu aronwa awe ‘olalèrya minepa satthukweliwe’? (1 Ped. 3:19)

Vanikhala ntoko wira okathi yoole, nuumala Yesu ohihimuxiwa, nto Yesu aahilaleya wira minepa iye sootakhala sinrowa waakhela ehukhumu yuulupale.​—15/6, epaaxina 23.

Mixankiho xeeni miraru sinitthuneya ovikana wira ekasamento ya nenli ekhumele saana?

Mixankiho iyo ti iya: Omananiha oheemya wira ekasamento yoopacerya evukule ohakalala wa ekasamento anyu esya; moota wookhala ni apatthani a khalai yaawo ahinisuweliwa saana nuule othelanne anyu niinano; wiimananiha omuroromela ole othelanne awe niinano, hata ole aathelanne anyu khalai ahaaroromelen’ye.​—1/7, ipaaxina 9-10.

Yesu onrowa ophukela liini ipwittipwitthi ni ipuri? (Math. 25:32)

Okathi yoole Yesu onrowa awe waaphukela atthu, okathi wa maxakha maalupale, nuumala opwetexiwa etiini yoowoka.​—15/7, epaaxina 6.

Okathi xeeni, ale anitthekela nlamulo ahimmwale ni nlikanyiho na etrigu ni nthakathaka anrowa aya wunla ni olumanyiha maino? (Math. 13:36, 41, 42)

Onrowa okhala okathi wa maxakha maalupale, nuumala woona wira kharina-tho opuro woorowa wiipitha.​—15/7, epaaxina 13.

Okathi xeeni oniiraneya aya moolumo a Yesu voohimya sa murumeyi oororomeleya ni ankhili? (Math. 24:45-47)

Wiiraneya waya khopacenrye oPentekositi 33 EC, masi, nuumala 1914. Mwaakha wa 1919, murumeyi aahithanliwa wira oweettiheke atthu a vatthokoni, eyo enihela muhina waalyiha omunepani maKristau otheene.​—15/7, ipaaxina 21-23.

Okathi xeeni Yesu omuthanlale awe murumeyi oororomeleya wira othokoreryeke mihakhu sawe sotheene?

Eyo enrowa wiiraneya muhoolo, okathi wa maxakha maalupale vaavo murumeyi oororomeleya onrowa awe otthuveliwa vaalupale.​—15/7, epaaxina 25.

Niireke atthu otheene ahiromoliwe masina aya mBiibiliya tootakhala wala oohifai?

Khivanireerela ohimya siiso. Biibiliya khoniromola-tho masina a atthu akina yaari ooreera murima ni akina yaari ootakhala. (Ruth. 4:1-3; Math. 26:18) Ahaavo malaikha manceene oororomeleya, masi manli paahi taromoliwe masina aya.​—1/8, epaaxina 10.

Nnaamwi yaakhaliheriwa ni ikuru sa Muluku, etthu xeeni ekina yaakhalihenrye Anamoona 230 yaatthukiwe ni maNazista khukhanyereriwa weetta mukwaha woorakama?

Hata yaari ootteettheya mwaha wa etala ni iretta, awosa yaanikhaliheryana ni olipihana mukina ni mukhwaawe wira avikaniheke weetta.​—15/8, epaaxina 18.

Xeeni onilipiha aya murima ahu osoma yoohimmwa ya aIsarayeli ya olapuwa Muro Yordani avolowaka elapo yolaiheriwa aya?

Hata muro ole waasaren’ye maasi, Yehova aaheemexa maasi waakhuma aya wira atthu awe alapuwe. Tthiri eyo yaahilipiha waamini waya ni omuroromela waya, nave-tho ennilipiha murima ahu.​—15/9, epaaxina 16.

Xeeni ikwaha sinceene Biibiliya orumeelaka ikoore?

Biibiliya onnirumeela ikoore mwaha woophavela wooniherya wira Muluku onnisuwela wira ikoore sinniwerya omwiiriha mutthu wiiwexexa saana etthu, ni sinniwerya onikhaliherya ohiliyala.​—1/10, ipaaxina 14-15.

Moota xeeni eprofesia ya Mikeya voohimya sa axitokweene ni akhukhuli eniiraneya aya olelo?

Hiyo ninkupali wira akukhuli athanu ni anli, ni axitokweene athanu ni araru, va Mikeya 5:5 ti axitokweene oothanliwa mmulokoni, yaawo anaalipiha atthu a Muluku, mwaha wotupheliwa waya wa muhoolo ohimmwale vahinatthi.​—15/11, epaaxina 20.

Exeeni enniiriha omphavelasa Muluku?

Ti vootthuneya olakiheriwa ni Muluku wira neettiheryeke saana mixankiho sahu. Owo onninikhaliherya ophavelaka wira nihakalaleke ni okhala saana, nto wira eyo yiiraneye owo ohaana owaakhwaniherya anatiri awe.​—1/12, ipaaxina 4-6.