MWAHA WOOPACERYA | NIIREKE OKUMI AHU ONLIPA NI MULUKU?

Itthu Sinniiriha Omuroromela Muluku

Ale aniloola iretta sa muupuwelo anihimya wira atthu ahaana okhalana sootthuneya sa omunepani wira aphwanye ohakalala wekeekhai. Hiyo ninnoona wira eyo ekeekhai maana atthu anniphavela opaka etthu erina yoolakela, wala omurumeela mutthu oowerya waavikana yena. Nto, wira aphwanye ohakalala, awo annirumeela okathi aya woophumurya atokosaka ephattu, itthu yiixuntte aya, masipo, ni itthu sikina. Nnaamwi vari siiso, anamunceene khanoona wiiraneya wa soophavela saya.

Tthiri eyo, khenaatikiniha ale animusoma Biibiliya, maana apinaatamu okhuma oyariwa waya annitthuneya omuroromela Muluku. Ikapiitulu soopacerya sa eliivuru ya Maphattuwelo, sinnooniherya wira nuumala Muluku waapattuxa anamathelana oopacerya, owo aanivaanela ni awosa, ni wataana nuuwo momunepani. (Maphattuwelo 3:8-10) Muluku khaapattunxe apinaatamu wira ekhaleke moovalaana ni yena. Awo ahaana olavulanaka ni Mpattuxa aya. Ikwaha sinceene Biibiliya onniromola otthuneya waya opaka eyo.

Mwa ntakiheryo, Yesu aahimyale so: “Òreriwa alipa òhawa mmunepani”. (Matheyo 5:3, Biblya Exirima) Moolumo ala, annooniherya wira etthu eniphwanyiha otteeliwa murima mookumini ori omaleliha yoophavela ahu ya omusuwela Muluku. Ninrowa owerya sai opaka eyo? Yesu ahooniherya waakhuliwa waya vaavo aahimyale awe so: “Khahiyó n’iphawu-ru pahi mutthu t’onkhalawe mukumi: nto ni khula nulumo ninkhuma mwano mwa Muluku”. (Matheyo 4:4) Moota xeeni moolumo a Muluku, aahiiso, miyuupuwelo ni malakiheryo a Muluku yaawo aniphwanyaneya mBiibiliyani, anniiriha aya okhalana okumi woohakalala? Nrowe niwehe mathowa mararu maalupale.

Hiyo Ninniphavela Malakiheryo Ooloka

Olelo-va, ahaavo asuweli ni asomi anceene yaawo anivaha miruku voohimya sa opatthani, ophenta, okumi wa vatthokoni, moota woophuka mixankiho, ohakalala, ni itthu sikina. Masi khuuvo mutthu oniwerya ovaha miruku sooloka ohikhanle paahi Mpattuxa a apinaatamu, Yehova Muluku.

Wira nlikanyiherye: Vaavo mutthu onithuma awe etthu ntoko makina anilatha ifootu, wala komputadore, owo onniwehererya wira makina awo aakhalana eliivuru enitthokiherya moota woorumeela saana. Biibiliya pooti olikanyihiwa ni eliivuru eyo. Biibiliya ti eliivuru epakiwe ni Muluku yeeyo enikhaliherya okumi wa apinaatamu. Nto Biibiliya onnitthokiherya moota wookhumela saana mookumini.

Moolikanasa ni iliivuru sinitthokiherya moota woorumeela makina, Biibiliya onnilopola voohimya sa mweettelo okhanle oohonona okumi ahu. Miruku wala malakiheryo atthu akina anivaha aya, waaniheryasa pooti okhala soovara murima; masi ti vooloka wuupuwelela wira nnoophwanya mureerelo ni osyaka mixankiho akhala wira nnootthara malakiheryo a Mpattuxa.

Nnaamwi Yehova Muluku ovahaka malakiheryo ni malamulo, owo khonnikhanyererya weettela. Masi, ntoko mutthu oophenta, owo onnintumererya oriki: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara. Nyuwo mwaiwelelá soruma saka, oreriwa wanyu wamulikana ni màsi anririha ematta, owerya wanyu wamunnuwa ntoko mawimpi a mphareya”. (Yesaya 48:17, 18) Nto, akhala wira nnimwiiwelela malakiheryo a Muluku, nnookhala saana. Niire so: wira nikhale saana ni oohakalala nihaana omphavela Muluku.

Hiyo Ninniphavela Osuwela Mathowa a Mixankiho Sahu

Atthu akina anuupuwela wira okumi aya khonlipa ni Muluku, mwaha woowi sinnaaphwanya mixankiho, seiyo sihinivarihana ni Muluku oophenta. Mwa ntakiheryo, awo annikoha so: ‘Xeeni atthu ooreera murima anihaawa aya?’ ‘Xeeni anamwane akina aniyariwa aya oorakala ene?’ ‘Xeeni okumi oryaaya woohixariya?’ Tthiri ala makoho ootthuneya, ni ophwanya waakhuliwa waya pooti onihakalaliha vanceene. Nto, ohiya waakuvela ohimya wira Muluku tonikumiherya mixankiho iyo, nrowe niwehe moota Biibiliya, onaakhula awe makoho awo.

Ekapiitulu 3 ya Maphattuwelo, ennihimya wira Satana, aahirumeela enowa wira aatthekihe anamathelana oopacerya wira ahiiwelele yooruma ya Yehova Muluku, ya ohilya muhokorokho wa mwiri waasuweliha etthu yooreera ni yootakhala. Satana aahimuhimeerya Eva wira: “Khamunokhwa! Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa”.​—Maphattuwelo 2:16, 17; 3:4, 5.

Moolumo awo annooniherya wira Satana, aahihimya wira Muluku nawoothe, ni khonilamulela mwa xariya. Diabo aahooniherya wira akhala wira apinaatamu yaamunwiriyana yena, awo yaarowa ophwanya mireerelo. Myaha iyo khisaarowa ophukiwa mowaakuveya. Nto Yehova aahivaha okathi wira atthu otheene awehe akhala wira itthu iye Satana aahimyale awe saari sekeekhai wala sowootha. Mwaha woopaka eyo, Muluku aahinvaha okathi Satana ni ale athanlale onwiriyana Nwanani owo, wira yoone akhala wira apinaatamu anoowerya okhala saana ahihooleliwaka ni Muluku.

Nyuwo munoonela sai voohimya sa ovaanyiha wa Satana? Niireke apinaatamu annikhala saana ni wiilamulela mmansaya ahihooleliwaka ni Muluku? Mixankiho sinaakhumelela apinaatamu ntoko: ohaawa, ohixariya, iretta, okhwa, ikrime, mweettelo woohiloka, ikhotto, genocídio, ni itthu sikina sootakhala sinaahaaxa apinaatamu okhuma khalai, sinooniherya wira omananiha wa atthu wa wiilamulela mmansaya ahihooleliwaka ni Muluku khonikhumela saana. Nto, ohiya wooniherya wira Muluku tonikumiherya mixankiho sa apinaatamu, Biibiliya onnihimya nthowa nuulupale nniiriha okhumelela mixankiho oriki: “Tthiri vathí-va àkhala akina arina owerya, àkhala-tho akina anihawa epuheriwaka n’awo”.​—Musuweli 8:9.

Moovarihana ni muupuwelo owo, ninnoona wira ti vootthuneya omphavela Muluku wira niphwanye waakhuliwa wa makoho annixankiha. Nto exeeni Muluku onirowa awe opaka?

Hiyo Ninniphavela Okhaliheriwa ni Muluku

Okhuma khalai, atthu anniphavela omala wa iretta, wuuluvala, ni okhwa. Nto, awo annihonona okathi aya, muhakhu aya ni anniimananiha vanci aphavelaka okhala saana, masi khaniphwanya ele eniphavela aya. Akina anuupuwela wira anoophwanya omiravo orweela wa owurya mirette sa oxipitali soorowa vahoolo, wiiniha nikuruta erutthu, ni orumeela onamminepani. Masi wiimananiha wotheene anipaka aya khonikhumela saana.

Muluku oniphavela wira apinaatamu akhaleke saana ni moohakalala. Eyo ti yaari yoolakela awe yoopacerya vaavo aapattuxale awe apinaatamu, nto owo kholiyanle yoolakela eyo. (Maphattuwelo 1:27, 28; Yesaya 45:18) Hiyo ninnikupali wira ele Yehova olakenle awe opaka, enimwiiraneya tthiri. (Yesaya 55:10, 11) Biibiliya onninleiherya wira Muluku onoottikiherya eParayiisu valaponi yeeyo yaayeleeliwe ni anamathelana oopacerya. Eliivuru yookiserya ya Biibiliya, eniira so: “Owo [Yehova] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”. (Wisupulula 21:4) Nto Muluku onrowa opaka sai itthu iyo soohakalaliha, ni ninrowa ophwanya sai?

Yesu Kristu yoowo ori Mwaana a Muluku, aahiwiixuttiha atthareli awe ovekela wira yiiraneye yootthuna ya Muluku. Atthu anceene annisuwela wala animakela oromola nivekelo nenlo akina aniitthana aya okhala: ‘Tiith’ihu muri wiirimu’. Nivekelo nlo nniira so: ‘Tith’ihu, muri wirimu! Nsina nanyu nivuwihiwe; omwene anyu orwe; otthuna wanyu wireye ntoko wirimu siso vathí-va’. (Matheyo 6:9, 10) Tthiri, Yehova Muluku onirowa orumeela Omwene awe, wira omalihe otakhala wotheene onikumiheriwa ni olamulelo wa apinaatamu, ni onookumiherya exariya elapo esya eleihenrya awe.a (Daniyeli 2:44; 2 Pedru 3:13) Exeeni nintthuneya ahu opaka wira nittottele mureerelo yooleiherya ya Muluku?

Yesu Kristu aahihimya etthu yookhweya enitthuneya ahu opaka oriki: “Vano, ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Veekeekhai, nikhaliheriwaka ni Muluku nnoowerya ophwanya okumi woohimala mwa elapo esya eleiheriwe ahu. Yoolipelela eyo pooti owiirihani okupali wira tthiri okumi ahu onlipa ni Muluku.

Okathi Womphavelasa Muluku

Iyaakha soowiiraka 2.000 sivinre, wAreopago, aahiiso, colina de Marte, murummwa Paulo aahilavula voohimya sa Muluku oryeene ni atthu a wAthena yaawo yaawerya othanla mootaphuwa oriki: “Mana ti yowo onavaha atthu othene ekumi n’umumula n’itthu sothene. Okhala wira hiyo nokhalana ekumi mwa yowo, ninnetta mwa yowo, nokhala mwa yowo. Hatá alepi anyu akina anihimya wira: ‘Vekekhayí, hiyo n’àtthu a nloko na Muluku’”.​—Miteko 17:25, 28.

Ele Paulo aalenle awe atthu a wAthena nlelo ekeekhai. Mpattuxa ahu, onninivaha iphumu nimmumula ahu, eyoolya ninlya ahu, ni maasi ninwurya ahu. Hiyo khaninwerya okhala akumi, Yehova ohinivahaka itthu iyo sooloka sinikhaliherya okumi ahu. Masi xeeni Muluku onivikaniha awe waavaha itthu iyo atthu otheene hata atthu amuupuwelaka wala ahimuupuwelaka? Paulo ohimmye wira Muluku “ahìra siso, wira atthu emphaveleke Muluku, yìlipiheryeke wira emphwanye. Tthiri Muluku khankhala ottaiwene ni hiyo”.​—Miteko 17:27.

Niireke munniphavela omusuwela saana Muluku? Niire so: Munniphavela wiixutta itthu sikina voohimya sa soolakela sawe, ni malakiheryo wira mukhale saana vano ni mahiku otheene? Akhala wira ti siiso, mulavule ni mutthu oovanheni erevista ela wala mwaalepele ale alempe erevista ela. Awo anoosiveliwa vanceene wookhaliheryani.

[Enoota]

[Elatarato epaaxina 7]

Muluku oniphavela wira apinaatamu ahakalaleke vano ni mahiku otheene

[Elatarato epaaxina 4]

Ntoko eliivuru enilakiherya moota woorumeela maakina anilatha ifootu, Biibiliya onnilakiherya okumi ahu

[Eponto yuulupale ya epaaxina 5]

“Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erina anyu otthara. Nyuwo mwaiwelelá soruma saka, oreriwa wanyu wamulikana ni màsi anririha ematta, owerya wanyu wamunnuwa ntoko mawimpi a mphareya”.​—Yesaya 48:17, 18

[Elatarato epaaxina 6]

MBiibiliyani, nnoowerya ophwanya malakiheryo ni nikhaliheryo nintthuneya ahu