Ti Pani Tthiri Ori ‘Murumeyi Òroromeleya ni Ànkhili?’
‘[Ti pani ori] murumeyi òroromeleya ni ànkhili, athanliwe ni pwiy’awe, wira awettiheke anamuteko akina?”—MATH. 24:45.
MUNNIWERYA OSUWELA WAAKHULIWA WAYA?
Ti pani okhanle murumeyi oororomeleya ni a ankhili?
Ti pani akhanle anamuteko a vatthokoni, nto silini Yesu aamuthanlale awe murumeyi oororomeleya wira aathokoreryeke?
Okathi xeeni Kristu onrowa awe, onvaha muteko murumeyi oororomeleya othokorerya muhakhu awe wotheene, nto eyo enrowa ohela muhina exeeni?
1, 2. Ti pani Yesu onimuruma awe wira onilyiheke olelo-va, nto xeeni vanitthuneya aya omusuwela ole onirummwa?
“AXINNA AKA, miyo nkiniwerya ohimya ikwaha sene sisommya aka myaha sootepa okivara murima seiyo saakhala wira kaalepeliwe yoomi okathi waatthuneya aya”. Masu ala anooniherya osiveliwa, yaalempwale ni murokora khuroiheliwa anna anivara muteko oseedi wahu wa olumwenku wotheene. Niireke ni nyuwo munoonela siiso yoolya yomunepani? Anamunceene anoona siiso. Niireke eyo etthu yootikiniha? Nnaari.
2 Yoolya yomunepani enaakhela ahu okathi wooreerela, enooniherya wira Yesu, yoowo ori Muru a muloko, onnaakhwaniherya ele yaalaihenrya awe wira aarowa onilyihaka. Nto ti pani onimurumeela awe wira onilyiheke? Ovahaka ethoonyeryo ya okhala wawe wohooneya, Yesu aahimyale wira aarowa omuruma ‘murumeyi òroromeleya ni ankhili’ wira ‘àkaweleke yolya okathi aya’ anamuteko a vatthokoni. (Mmusome Matheyo 24:45-47.) Murumeyi owo tori ephiro Yesu enirumeela awe wira aalyiheke atthareli awe eekeekhai mahiku ala a wanikisa. Nto ti vootthuneya omusuwela murumeyi owo oororomeleya. Maana okhala wahu saana womunepani ni wataana wahu ni Muluku onilipa ni yena.—Math. 4:4; Yoh. 17:3.
3. Khalai iliivuru sahu saahimya exeeni voohimya sa nlikanyiho na murumeyi oororomeleya ni ankhili?
3 Nto niiweke sai ntakiheryo na Yesu voohimya sa murumeyi oororomeleya? Khalai iliivuru sahu saahimya wira oPentekositi 33 E.C., Yesu aahimuthanla murumeyi oororomeleya wira oweettiheke anamuteko awe a vatthokoni. Nto murumeyi onithoonyerya maKristau otheene oowoottihiwa ari valaponi okathi ti okathi okhuma nihiku nenle. Anamuteko a vatthokoni onihimmwa khula muKristau oowoottihiwa. Nto 1919 Yesu aahimuruma murumeyi oororomeleya wira eettiheryeke “muhakhu awe wothene”, eyo piiyo, itthu sotheene sa Omwene siri valaponi. Masi otthikela otokosa saana ni wuupuwelela nuumala ovekela, ohooniherya wira wiiwa wahu masu a Yesu voohimya sa murumeyi oororomeleya ni a ankhili ohaana olokiheriwa. (Mir. 4:18) Nrowe nivarerye nlikanyiho nlo wira noone moota ninnihela aya muhina otheene ahu, akhale ale arina nlipelelo na wiirimu, wala nlipelelo na okhala valaponi.
NLIKANYIHO NA YESU NNIIRANEYA LIINI?
4-6. Exeeni enniiriha ohimya wira nlikanyiho na Yesu na murumeyi oororomeleya wiiraneya waya opacenrye nuumala 1914?
4 Masu a nlikanyiho na murumeyi oororomeleya ni a ankhili anooniherya wira wiiraneya waya khiwaapacenrye mPentekositi 33 E.C., masi waapacenrye mahiku ala a wanikisa. Nrowe niwehe moota Biibiliya onikhaliherya awe yoohimmwa ela.
5 Nlikanyiho na murumeyi oororomeleya nniirela mpantta wa eprofesia ya Yesu voohimya sa ‘ethoonyeryo ya okhala-vo [wa Yesu] ni wanikisa wa makhalelo a itthu’. (Math. 24:3, Tradução do Novo Mundo) Epantte yoopacerya ya eprofesia, yeeyo elempwale mMatheyo 24:4-22, wiiraneya waya ti wa inamuna piili; wanipacerya eniiraneya okhuma 33 E.C. mpakha 70 E.C., wiiraneya wa nenli, waarowa okhala mahiku ahu ala. Niireke ela enitaphulela wira masu a Yesu voohimya sa murumeyi oororomeleya wiiraneya waya waarowa okhala wa inamuna piili? Nnaari.
6 Nipaceryaka ni masu ari mMatheyo 24:29, Yesu onittittimiherya itthu saarowa wiiraneya mahiku ala. (Mmusome Matheyo 24:30, 42, 44.) Olavulaka sa ele enrowa wiiraneya okathi wa maxakha maalupale, Yesu aahimyale wira atthu ‘anomona Mwana a Mutthu arwaka mmekuni’. Nuumala-vo, aahimyaka ale anikhala mahiku ookiserya, Yesu ahaatumererya okhala ooweha-weha ariki: ‘nyuwo khamunsuwenle nihiku ninrwawe Pwiy’anyu, . . . okhala wira Mwana a mutthu onimorwa okathi ohinùpuwelanyu’. Voohimya sa muupuwelo ola, olavulaka sa itthu saarowa okhumelela mahiku ookiserya, Yesu aahivaraanyiha ni nlikanyiho na murumeyi oororomeleya. Tivonto, vannikhalela ohimya wira wiiraneya wa masu ala a murumeyi oororomeleya opacenrye paahi nuumala opacerya mahiku ookiserya 1914. Muupuwelo owo ti wookhalela. Moota xeeni?
7. Nuumala opacerya okathi woohepha, nikoho xeeni naakhumenle?
7 Nkuupuwelani vakhaani nikoho nla: Ti pani tthiri ori ‘murumeyi òroromeleya ni ànkhili?’ Waari woovila opaka nikoho nla okathi wa eseekulu yoopacerya. Ntoko soonale ahu mmwaha ovinre, arummwa yaaniwerya opaka miiriirya, ni owiiriha akina okhalana eparakha eyo ntoko ethoonyeryo yoowi yaanikhaliheriwa ni Muluku. (Miteko 5:12) Nto khiivo etthu yaarowa omwiiriha mutthu okoha wira ti pani othanliwe ni Kristu wira oweettiheke akina? Masi 1914, itthu saari soovirikana. Okathi woohepha waapacenrye mwaakha yoole. Nto waahiphiya okathi woovalaanyiwa nthakathaka ni etrigu. (Math. 13:36-43) Vaavo okathi woohepha onipacerya aya, ninnikhumela nikoho nootthuneya: Okhala wira khareere maKristau ootakiha aniihimya okhala atthareli a ekeekhai a Yesu, nto etrigu wala maKristau oowoottihiwa yaarowa osuwanyeya sai? Nlikanyiho nle na murumeyi oororomeleya ninnooniherya waakhuliwa waya. MaKristau oowoottihiwa yaarowa olyaaka saana momunepani.
TI PANI ORI MURUMEYI OOROROMELEYA NI A ANKHILI?
8. Xeeni varya aya vooreerela wira murumeyi oororomeleya okhumele eriyari ya maKristau oowoottihiwa?
8 Mwa maKristau oowoottihiwa ari valaponi ohaana okhumelela murumeyi oororomeleya. MaKristau awo anihimmwa okhala ‘anamukuttho a mwené’ ni aarummwa ‘wira alaleye [makhalelo oreera saana] a Muluku òwìhanne mwepiphini wira ekele mowaryani motikiniha’. (1 Ped. 2:9) Nto vanniphwanela wira atthu awo ari ‘anamukuttho a mwené’ ewiixuttiheke ekeekhai maKristau makina oowaamini.—Mal. 2:7; Wis. 12:17.
9. Niireke maKristau otheene owoottihiwa ti murumeyi oororomeleya? Mutthokiherye.
9 Nto niireke maKristau otheene oowoottihiwa ari valaponi ti murumeyi oororomeleya? Nnaari. Tthiri khahiyo wira oowoottihiwa otheene anivara muteko wowaakawela yoolya maKristau makina oowaamini. Eriyari ya etrigu aakhala anna oowoottihiwa, anirumeela mmulokoni mmuttettheni mwaya ntoko arummwa oorumeela wala axitokweene. Awo annirowa olaleerya empa ti empa eri mmuttettheni wa muloko aya, nto moororomeleya anneettela malakiheryo anikhuma oseedi wahu. Masi awo khaniirela mpantta wa okawa yoolya yoomunepani wa anna aya ari olumwenku wotheene. Aakhala-tho arokora oowiimaaliha oowoottihiwa, yaawo ahinlipelela wiixuttiha mmulokoni.—1 aKor. 11:3; 14:34.
10. Ti pani ori murumeyi oororomeleya ni a ankhili?
10 Nto ti pani ori murumeyi oororomeleya ni a ankhili? Natthara ntakiheryo na Yesu, na waaruma atthu vakhaani wira aakawele yoolya atthu anceene, nimphwanya wira ohaana okhala ekrupu ya atthu vakhaani ya anna owoottihiwa wala oothanliwa yaawo akhanle tthiri tanlokiherya ni okawela yoolya yomunepani okathi wa okhala-vo wa Kristu. Makihu ala ookiserya, anna owoottihiwa yaale aniirela mpantta nikhuuru na murumeyi oororomeleya, anirumeela hoothe oseedi. Iyaakha sivinre niinaano, murumeyi owo oosuweliwa okhala Nikhuuru Noolamulela na Anamoona a Yehova. Muhaana woona wira nuulumo nirumeeliwe ni Yesu noowi “murumeyi” nimmuhimya mutthu mmosa, nto eyo enooniherya wira murumeyi owo aarowa okhala nikhuuru wala ekrupu. Soothanla sa Nikhuuru Noolamulela, sinipakiwa ni anna otheene a nikhuuru nlo.
TI PANI ARI ANAMUTEKO A VATTHOKONI?
11, 12. (a) Miteko xeeni miili saavahiwe awe murumeyi oororomeleya ni a ankhili? (b) Silini Yesu aamuthanlale awe murumeyi oororomeleya wira aathokoreryeke anamuteko, nto ti pani aamuthanlale awe?
11 Tthiri vannooneya wira mwa nlikanyiho na Yesu, murumeyi oororomeleya ni a ankhili onnivahiwa miteko miili soovirikana. Muteko woopacerya: waathokorerya anamuteko a vatthokoni; wa nenli: othokorerya mihakhu sa pwiya awe. Okhala wira nlikanyiho nniiraneya mahiku ahu ala a wanikisa, miteko iyo miili saarowa ovariwa nuumala opacerya okhala-vo wa Yesu ntoko mwene oowerya 1914.
12 Nto silini Yesu aamurummye awe murumeyi waathokorerya anamuteko a vatthokoni? Wira naakhule nihaana wuupuwela mwaakha wa 1914, okathi waapacenrye aya muteko woohepha. Ntoko soonale ahu, okathi ole ikrupu sinceene saihimya okhala maKristau. Nto ekrupu xeeni Yesu yaarowa awe othanla wira ekhale murumeyi oororomeleya? Nikoho nlo nahaakhuliwa nuumala Yesu ni Tiithi awe, ovara muteko awe wootokosa empa ya Muluku, eyo piiyo, mareheryo oomunepani a okokhorela, okhuma 1914 mpakha epantte yoopacerya ya 1919. (Mal. 3:1) Yesu ni Yehova yaahisiveliwa ni ekrupu emosa yoororomeleya ya Alipa-oomusoma Biibiliya, yoonihenrye okhalana murima woomuttittimiha Yehova vamosa ni Nuulumo nawe. Ekeekhai wira ekrupu ele yahaana oreerihiwa, masi mowiiyeviha awosa yaheemya olokiheriwa okathi vakhaani wa weehereriwa ni olokiheriwa. (Mal. 3:2-4) Tthiri ekrupu ela ya Alipa-oomusoma Biibiliya yaari etrigu ya maKristau ekeekhai. Mwaakha wa 1919, okathi wa otthikela oyariwa woomunepani, eriyari ya oowoottihiwa, Yesu aahaathanla anna oophwanelela wira ekhale murumeyi oororomeleya ni a ankhili khwaaruma wathokorerya anamuteko a vatthokoni.
13. Ti pani oniheliwa mpuwa mwa anamuteko a vatthokoni, nto mwaha wa xeeni?
13 Vano ti pani ari anamuteko a vatthokoni? Ohimya vookhweya, taale anivahiwa yoolya. Wanipacerya wa mahiku ookiserya anamuteko a vatthokoni otheene aya yaari oowoottihiwa. Muhoolo mwaya anamuteko a vatthokoni yaaniheliwa muhina muttitthi muulupale wa ipwittipwitthi sikina. Vano maKristau a ipwittipwitthi sikina towaatta masi ari “nikoto nimosa” nneettihiwa ni Kristu. (Yoh. 10:16) Ikrupu iya piili sinnittottela mureerelo yoolya yoomunepani emosaru okathi woreerela enikumiheriwa ni murumeyi oororomeleya. Sai voohimya sa anna aniirela mpantta Nikhuuru Noolamulela yaawo olela-va ari murumeyi oororomeleya ni a ankhili? Anna awo ahaana-tho olyaaka omunepani. Mmukhalelo owo, annisuwela wira ntoko mutthu ekhawe, awo anamuteko anilikana ni atthareli akina otheene a Yesu.
14. (a) Murumeyi oororomeleya ovahiwe muteko xeeni, nto eyo enihela muhina exeeni? (b) Yoolopola xeeni Yesu anvanhe awe murumeyi oororomeleya ni a ankhili? (Moone ekaaxa eni: “Vano Murumeyi Ole Akhala Ohiroromeleya . . . ”)
14 Yesu onvaha muritti muulupale murumeyi oororomeleya ni a ankhili. Okathi waalempwa Biibiliya, epottha yoororomeleya wala murumeyi, ti yeettiherya mihakhu sa vatthokoni. (Luka 12:42) Tivonto murumeyi oororomeleya ni ankhili, oovahiwa muritti wooweettiha atthu a emusi yowaamini. Muritti owo onihela muhina weettiherya itthu sinivareliwa muteko, olaleerya, iprograma sa asembleia ni akongresu, ni okumiheriwa wa iliivuru sinimutthokiherya Biibiliya sinirumeeliwa woolaleeryani, mmulokoni ni yoosoma ya mutthu mwaneene. Anamuteko a vatthokoni anlipa ni yoolya yoomunepani yotheene enikumiheriwa ni nikhuuru na murumeyi.
SILINI AATHANLELIWE AWE OTHOKORERYA MIHAKHU SA PWIYA AWE?
15, 16. Silini Yesu aarumme awe epottha yoororomeleya weettiherya muhakhu awe?
15 Nto ti silini Yesu aapanke awe yooruma ya nenli, ya “wettiherya muhakhu awe”? Yesu aahimyale so: “Òreriwa murumeyi ule, onira pwiy’awe arwaka [wala ophiya], anamphwanya avaraka muteko. Kinohimeryani ekhweli wira: mwanene owo ononvaha murumeyi ule wettiherya muhakhu awe wothene”. (Math. 24:46, 47) Moone wira Yesu aahinvaha muteko murumeyi ekwaha ya nenli, nuumala owo ophiya khumphwanya “avaraka muteko”, nihimye so, okawa yoolya yomunepani moororomeleya. Tivonto wahaana ovira okathi eriyari ya miteko iyo miili. Wira nisuwele saana okathi ni moota Yesu aamuthanlale awe murumeyi weettiherya muhakhu awe, nihaana osuwela itthu piili: okathi ophiyale awe ni ele eniheliwa muhina mwa mihakhu sa pwiya.
16 Yesu aaphiyale liini? Masu a nlikanyiho na Yesu annaakhula nikoho nla. Muupuweleke wira vaavo iversiikulu soovira sinilavula aya sa ‘orwa’ wa Yesu, nuulumo nlo ninhimya okathi Yesu onrowa awe olamula ni ophukela wanikisa wa makhalelo ala. (Math. 24:30, 42, 44) Tivonto ‘orwa’ wala ‘ophiya’ wa Yesu ohimmwale ni nlikanyiho na Yesu na murumeyi oororomeleya oniireya okathi wa maxakha maalupale.
17. Muhakhu wa Yesu onihela muhina exeeni?
17 Vano exeeni ekhanle “muhakhu wothene [wa Yesu]”? Moolumo a Yesu oowi “wothene”, khanooniherya wira mihakhu sawe siri valaponi paahi. Tthiri Yesu, ookhalana owerya wuulupale wiirimu. Maana aahimyale so: “Kovahiwa owerya wothene wirimu ni vathí”. (Math. 28:18; aÉf. 1:20-23) Mihakhu sawe sinihela muhina Omwene wa oMesiya, yoowo ovahiwa awe okhuma 1914, ni onrowa awe olamulelaka hoothe ni atthareli awe owoottihiwa.—Wis. 11:15.
18. Xeeni vanrowa aya omusivela Yesu waavaha muteko wa othokorerya mihakhu sawe sotheene?
18 Nuumala othokorerya mwaha ola, etthu xeeni ekhanle ahu oohimya? Vaavo Yesu onirwa awe ophukela, okathi wa maxakha maalupale, onrowa woona wira murumeyi oororomeleya onnivikaniha waavaha anamuteko a vatthokoni yoolya, okathi wooreerela. Otteeliwe ene murima, Yesu onrowa waaruma muteko wa nenli, eyo piiyo, othokorerya mihakhu sawe sotheene. Nto ale ari nikhuuru na murumeyi oororomeleya anrowa waakhela muteko owo okathi onirowa aya wiirimu wira yalamuleleke ni Kristu.
19. Niireke murumeyi oororomeleya otthuveliwa wawe wiirimu ti wuulupale waavikana oowoottihiwa akina? Mutthokiherye.
19 Niireke murumeyi oororomeleya otthuveliwa wawe wiirimu ti wuulupale waavikana oowoottihiwa akina? Nnaari. Otthuveliwa olaiheriwe ekrupu emosa yaamukhaani, onrowa okhala omosaru wa oowoottihiwa akina. Mwa ntakiheryo thokoreryani ele Yesu yaahimmya awe wa arummwa oororomeleya 11, ohiyu omosa ohinatthi okhwa. (Mmusome Luka 22:28-30.) Yesu aahilaiherya wira ekrupu emosa yaamukhaani ya alopwana yaarowa otthuveliwa mwaha wa ororomeleya waya. Awo yaarowa okilaathi veehiceni vawe ya omwene. Masi muhoolo mwaya Yesu aahooniherya wira otheene oowiiraka 144.000 yaarowa okilaathi veehiceni wira alamuleleke hoothe. (Wis. 1:1; 3:21) Moolikanasa ntoko sihimmwale aya ni Matheyo 24:47, Yesu aalaihenrye wira ekrupu emosa ya alopwana, eyo piiyo anna oowoottihiwa aniirela mpantta wa murumeyi oororomeleya, yaarowa orummwa othokorerya mihakhu sawe sotheene. Masi otheene oowiiraka 144.000 anrowa ovahiwa-tho olamulelo muulupale a wiirimu.—Wis. 20:4, 6.
20. Exeeni emwiirinhe Yesu omuthanla murumeyi oororomeleya, nto nyuwo mulakenle opaka exeeni?
20 Mwaha woomurumeelaka murumeyi oororomeleya ni a ankhili, Yesu onitthara ntakiheryo wa ele yaapakale awe eseekulu yoopacerya, waavaha yoolya atthu anci aarumaka atthu vakhaani. Yesu oomuthanla murumeyi oororormeleya ni a ankhili wira atthareli awe ekeekhai, ale anirowa wiirimu wala ipwittipwitthi sikina, akhalaneke yoolya yoomunepani ehinimala, ya okathi wooreerela. Nto nrowe niimananihe wooniherya oxukhurela wahu naakhaliheryaka moororomeleya anna oowoottihiwa akhanle murumeyi oororomeleya ni a miruku wala ankhili.—aHéb. 13:7, 17.
INOOTA SOOKISERYA: (Ipantta iya sihaana osommwa okathi sinithokoreriwa aya ittima iyo.)
[Inoota]
Ettima 2: ohinatthi ohimya nlikanyiho nla, Yesu aahilavula sa nlikanyiho ntoko nla voohimya sa “murumeyi” okhala ‘toneettiherya empa’ ni ‘anamuteko a vatthokoni’ okhala ‘ekrupu ya atthu anivara muteko’.—Luka 12:42-44.
Ettima 6: Orwa wa Kristu (eGregu, erʹkho·mai) onnivirikana ni nuulumo noowi ‘okhala-vo’ (pa·rou·siʹa) Okhala-vo wa Yesu ohinooneya opacenrye ohinatthi orwa wira ophukele.
Ettima 12: Moone mwaha oni: “Kinokhala ni Nyuwo Mahiku Othene” erevista yeela epaaxina 11-12, ettima 7-10.
Ettima 16: Moone mwaha oni: “Munihimerye Itthu Iya Sinrowa Okhumelela Lini” erevista yeela epaaxina 7-8, ettima 14-18.
[Elatarato eri epaaxina 20]
[Ekaaxa eri epaaxina 22]
MUHIIWEXEXA MASU ALA?
“Murumeyi ororomeleya ni ànkhili”: Ekrupu yaamukhaani ya anna yaawo akhanle tanilokiherya yoolya yomunepani ni okawa mahiku ala a orwa wa Kristu. Vano, anna awo ti Nikhuuru Noolamulela
‘Anamuteko awe akina’: Ti yaale otheene anilya yoolya yomunepani; pooti okhala owoottihiwa wala ale a ipwittipwitthi sikina
‘Othanliwe wira aweettiheke anamuteko akina’: Okhuma 1919, Yesu ohaathanla anna makristau owoottihiwa wira ekhale murumeyi oororomeleya ni ankhili
“Owo ononvaha murumeyi uwo wettiherya muhakhu awe wothene”: Yaale aniirela mpantta wa murumeyi, anrowa waakhela yootthuveliwa aya wiirimu. Eyo enihela muhina otheene a 144.000 anrowa okhalana okhulupale ni Kristu wiirimu
[Elatarato eri ipaaxina 22, 23]
Hata yoolipelela ahu ekhale wiirimu wala valaponi, otheene ahu na anamuteko a vatthokoni, nto ninlipa ni yoolya emosaru yoomunepani ya okathi wooreerela.
[Ekaaxa eri epaaxina 24]
“Vano Murumeyi Ole Akhalá Òhiroromeleya . . . ”
Yesu onvaha muteko muulupale murumeyi ola oororomeleya ni ankhili wira aakhapeleleke anamuteko awe ni waavaha yoolya yomunepani mwa okathi aya. Yesu aahisuwela wira ale avahiwe muritti ola, muhoolo yaarowa waakhula. (Luka 12:48) Nto, owo aahimaliherya ntakiheryo nawe voohimya sa murumeyi oororomeleya ni ankhili, avahaka olopola wuulupale.
Yesu aahilopola wira aahikhala murumeyi ootakhala oona wira pwiyawe aanipisa orwa, nto anapacerya waamanakasa anamuteko akhwaawe. Yesu aahilavula wira okathi pwiya aaphin’ye awe, owo aahimuhukhumu murumeyi ole ‘opuro w’atakhali’.—Mmusome Matheyo 24:48-51.
Niireke Yesu aaphavela ohimya wira mahiku ookiserya aamukhala murumeyi ootakhala? Nnaari. Ekeekhai wira atthu akina annooniherya munepa wa murumeyi oohiloka olavuliwe ni Yesu. Arumeyi awo oohiloka annihimmwa okhala anammwreya hata akhumaka wa oowoottihiwa wala ‘muttitthi mulupale’. (Wis. 7:9) Masi eyo khenitaphulela wira yookhala ekrupu ya murumeyi ootakhala. Okhala wira Yesu khanalavule wira aarowa omuthanla murumeyi ootakhala. Nto masu ala, yaalopola ale yaari murumeyi oororomeleya ni ankhili.
Moone wira Yesu onipaceriha ni masu oolopola oowi “akhala wira.” Nto prusoore mmosa oosuwela onihimya wira masu ala, mwa nttaava na eGriki, “alavuliwe mwa nthoonyeryo, yooniheryaka ele enrowa okhumelela akhala wira ehiiraneya etthu eyo enihimmwa”. Nto eyo enitaphulela wira Yesu aalavula so: ‘akhala wira murumeyi oororomeleya ni ankhili onrowa ohapuxiwa, wira aahaaxeke arumeyi akhwaawe, owo aarowa ohukhummwa mwa enamuna eyo aalavunle awe okathi arowa awe ophiya.’ (Muwehe-tho Luka 12:45.) Masi, murumeyi ola ori Nikhuuru Noolamulela, ohooniherya ororomeleya ni oowehaweha vaavo onivikaniha awe ovaha yoolya yomunepani enivaha ikuru.
Anna oowoottihiwa annirumeela ntoko murumeyi oororomeleya asuwelaka wira anrowa okohiwa ni Pwiya aya, voohimya sa enamuna enaathokorerya aya anamuteko a vatthokoni. Etthu eniphavela aya ni murima wotheene ori ovara muteko moororomeleya wira yiireliwe ‘varera’, okathi Pwiyaya oniphiya awe.
[Elatarato eri epaaxina 25]
Otheene owiiraka 144.000 anrowa olamulelaka hoothe ni Yesu wiirimu. (Moone ettima 19)