Atthu Vakhaani Annaakawela Yoolya Atthu Anceene
“Numalá, ahikuxa iphau iyo thanu n’ihopa pili, ahiweha osulu, ahimuxukhuru Muluku, ahimeyanya iphau iyo khuwinnya awixutti awe n’awo yahakawela atthu othene”.—MATH. 14:19.
MWAAROWA WAAKHULA SAI?
Enamuna xeeni Yesu onitthara awe okathi onaavaha awe yooya atthu?
Moota xeeni Yesu aarumenle awe awiixutti ni axitokweene a oYerusalemu?
Okathi xeeni Kristu aathanlale awe ekrupu wala mulokiheryo waarowa ovahaka yoolya yomunepani?
1-3. Nkahimyani, moota Yesu aakawenle awe yoolya muttitthi wa atthu waattamela oBethania. (Moone elatarato wanipacerya wa yoosoma ela.)
NKUUPUWELANI yowiiraneya ela. (Mmusome Matheyo 14:14-21.) Waari okathi ahinatthi Paasikha a 32 E.C. Okathi owo, alopwana oowiiraka 5.000, ohaakontari athiyana ni anamwane, yaari ni Yesu ni awiixutti awe opuro waari moothakoni waattamela oBethania muttetthe ori epantte onikhuma epheyo okherekhere wa ephareya ya oGalileya.
2 Nuumala oweha muttitthi ole wa atthu, Yesu aahiwoonela othunku, nto ahaapenuxa atthu anceene yaawereiwa, nave aahiwiixuttiha itthu sinceene sa Omwene wa Muluku. Okathi vaapacerya aya wiila, awiixutti yaanimukhanyererya Yesu wira aamwarye atthu ale ni orowa opuro waattamenle mittetthe wira yathume yoolya aya. Masi Yesu aahaaleela awiixutti ariki: “Mwavahe yenyu yolya”. Awiixutti yahoona masu a Yesu okhala ootikiniha, maana yoolya yaari-vo, saari iphau thanu ni ihopa pili saamukhaani.
3 Mwaha wa owoonela othunku, Yesu aahipaka mutikiniho, nto ola mutikiniho mmosa olempwe Nvangelyoni sotheene xexe. (Mar. 6:35-44; Luka 9:10-17; Yoh. 6:1-13) Yesu ahaaleela awiixutti awe wira yaaleele atthu ale ekilaathi vamalaxini vale ethukumanaka ikrupu sa 50 ni ikrupu sa 100. Nuumala opaka nivekelo na oreeliha, aahimeyanya iphau ni okawanya ihopa. Nuuvira-vo, owo khaakanwe mmensawe yoolya eyo, masi ‘ahiwinnya awixutti awe n’awo yahakawela atthu othene’. Mootikiniha, atthu otheene yaahoolya mpakha wooceela! Nkahaya moone: Yesu aahaalyiha atthu ikonto sinceene aarumeelaka atthu vakhaani paahi, awiixutti awe.
4. (a) Yoolya xeeni-tho Yesu aaluttuweliwa awe waavaha atthu, nto nthowa xeeni? (b) Yoosoma ela, ni yoosoma enittharelana ninrowa othokorerya exeeni?
4 Ohiya vo, nave Yesu aaniluttuweliwa ni waavaha awiixutti awe yoolya yomunepani. Owo aanisuwela wira yoolya yomunepani, wala ikeekhai siri Munuulumoni na Muluku, sinniphwanyiha ekumi ehinimala. (Yoh. 6:26, 27; 17:3) Mwaha wa owoonela othunku atthu ntoko vaavale aavanhe awe iphaau ni ihopa, nave-tho Yesu aaniviriha iwoora sinceene awiixuttihaka atthareli awe. (Mar. 6:34) Masi owo aanisuwela wira okathi awe valaponi waari vakhaani wira atthikeleke wiirimu. (Math. 16:21; Yoh. 14:12) Moota xeeni Yesu aryeene wiirimu aarowa awe waalyihaka saana momunepani atthareli awe? Aarowa opaka etthu yeele aapanke awe, aarumaka atthu vakhaani wira yaakaweleke yoolya atthu anceene. Nto atthu ala vakhaani tani? Nrowe noone moota Yesu aarumenle awe atthu vakhaani eseekulu yoopacerya wira aalyiheke atthareli awe anceene oowoottihiwa. Nuumala-vo, yoosoma enittharelana ninrowa othokorerya nikoho nla nootthuneya wa khula mutthu a hiyo nni: Ninrowa waasuwela sai atthu ari vakhaani yaawo Kristu onaarumeela awe wira enilyiheke olelo-va?
YESU AHAATHANLA ATTHU VAKHAANI PAAHI
5, 6. (a) Yoothanla xeeni yuulupale Yesu aapanke awe wira atthareli awe elyihiweke saana momunepani okathi aarowa awe okhwa? (b) Moota xeeni Yesu aalokihenrye awe awiixutti awe wira evareke muteko wootthuneya nuumala owo okhwa?
5 Mulopwana onikhapelela emusi awe saana, onnipaka mareheryo wira okathi onkela awe okhwa, emusi awe ekhalane yowiikhaliheryano. Emosaru, Yesu yoowo aarowa okhala Muhooleli a muloko wa eKristau, aahipaka malokiheryo wira atthareli awe ekhaliheriweke momunepani nuumala owo okhwa. (aÉf. 1:22) Mwa ntakiheryo sihalaka iyaakha piili owo okhwa, Yesu aahipaka yoothanla yuulupale. Owo aahaathanla atthu vakhaani oopacerya yaarowa waavahaka yoolya yomunepani atthu anceene. Moone etthu yiiranen’ye.
6 Nuumala ovekela ohiyu wotheene, Yesu ahaathukumanya awiixutti awe otheene, nto aathanla 12. (Luka 6:12-16) Nto iyaakha iye piili, owo aaneettana awiixutti awe 12 awiixuttihaka ni moolumo ni mweettelo awe. Owo aahisuwela wira saahikhala itthu sinceene wira yiixutte, ti maana aya yaavikaniha aya wiihaniwa ‘awixutti’. (Math. 11:1; 20:17) Owo aahaavaha miruku sinceene sa efaita, ni owiixuttiha olaleerya. (Math. 10:1-42; 20:20-23; Luka 8:1; 9:52-55) Nto ela yaari enamuna ya waalokiherya wira evare muteko wootepa otthuneya nuumala Yesu okhwa ni otthikela wiirimu.
7. Moota xeeni Yesu oonihenrye awe ele arummwa awe yaarowa aya ottittimiheryaka?
7 Enamuna xeeni ya muteko awiixutti yaarowa aya ovaraka? Okathi aattamela awe Pentekoositi a 33 E.C., vaniweheya wira awiixutti yaarowa orumeelaka ntoko ‘[alipa-oohoolela] muteko’. (Mit. 1:20) Nto exeeni awo yaarowa aya ottittimiheryaka? Okathi aahihimunwe awe Yesu ahooniherya etthu emosa vaavo aavaanela awe ni murummwa Pedru. (Mmusome Yohani 21:1, 2, 15-17.) Awiixutti akina eryeene vaavo, Yesu aahimuleela Pedru wira ‘mulyiheke ipwittipwitthi saka’. Nto vano Yesu aahooniherya wira awiixutti awe yaarowa okhala atthu yaawo vakhaani yaarowa ovahaka yoolya ya omunepani wa atthu anceene. Tthiri ela etthu ennivara murima osuwela moota onikhapelela awe ‘ipwittipwitthi sawe’!
OKHUMA MPENTEKOSITI ANNILYIHIWA ATTHU ANCEENE
8. Moota xeeni alipa owaamini asya opentekoositi yoonihenrye aya okupali muteko awiixutti yaavahiwe aya ni Kristu?
8 Okhuma okathi wa Pentekoositi a 33 E.C.,Kristu yoowo ohihimuxiwe onnaaruma awiixutti awe ovahaka yoolya ya omunepani wa atthareli awe oowoottihiwa. (Musome Miteko 2:41, 42.) Ahooleli awo yanisuweliwa saana ni aYuda ni anamurwa yaawo yaari makristau oowoottihiwa nihiku nle. ‘Awo yanikhalela nthiti wiwa mixuttiho s’arummwa’. Ntoko sihinihimya awe Prusoore mmosa ootokosa, nuulumo na eGrego noowi ‘yanikhalela nthiti’, pooti otaphulela so “wiilipiha ni ovarexexa moororomeleya muteko”. Atthu ale oowaamini asya yaanikhalana etala yoomunepani, nto enasuwela nipuro noophwanya eyoolya ele. Yooniheryaka ororomeleya wekeekhai, awo yaanaaroromela arummwa yaatthokiherya moolumo ni miteko sa Yesu ni owooniherya soolempwa saamulavula Yesu yoowo.—Mit. 2:22-36.
9. Moota xeeni arummwa yoonihenrye aya ovikaniha ovara muteko wa olyiha ipwittipwitthi sa Yesu?
9 Awiixutti yaahivikaniha ovara muteko ola wa olyiha oratteene ipwittipwitthi sa Yesu. Mwa ntakiheryo, Moone etthu yaakhumelenle yooxankiha yaarowa okawanya muloko ole musya waapakiwe. Nto mwaha owo waahela muhina yoolya ya werutthuni. Anaamukhweli yaalavula eGrego, yaaniliyaliwa waakhelihiwa yoolya yaakaiwa khula nihiku, masi anaamukhweli yaalavula eHeeberi yaanaakhela. Awiixutti yaarowa ophuka sai mwaha ola wooxankiha? “Arummwa muloko nanli”, yaahaathanla anna athanu nanli oophwanelela wira ekhapelele ‘muteko’ ole wa okawa yoolya. Nto arummwa yaale yiirenle mpantta waakawela atthu yoolya yeele Yesu aareelinhe awe mwa mutikiniho, awo yaahisuwela wira etthu yootepexa otthuneya ori waalyiha atthu yoolya yomunepani. Nto, awo ‘yahikhalela nthiti olompa ni olaleya masu’.—Mit. 6:1-6.
10. Moota xeeni Kristu aarumeela awe arummwa ni axitokweene a mmulokoni oYerusalemu?
10 Eyaakha ya 49 E.C., awiixutti yaahanle, yaahitakaaxeryana ni axitokweene akina oophwanelela. (Musome Miteko 15:1, 2.) ‘Arummwa ni mahumu [axitokweene]’, yaanirumeela ntoko nikhuuru noolamulela. Ntoko Muhooleli a muloko, Kristu aarumeela ekrupu yeela yaamukhaani ya alopwana oophwanelela wira ekhapeleleke myaha sa waamini ni othokorerya muteko wa olaleerya, ni wiixuttiha ihapari sooreera sa Omwene.—Mit. 15:6-29; 21:17-19; aKol. 1:18.
11, 12. (a) Exeeni enooniherya wira Yehova aanireeliha mareheryo a Mwanawe voohimya sa olyiha miloko sa eseekulu yoopacerya? (b) Yaasuweliwe sai atthu Kristu aarumeela awe ovaha yoolya yomunepani?
11 Niireke Yehova aahireeliha mareheryo ale a Mwanawe wira miloko sa eseekulu yoopacerya sivahiweke yoolya yomunepani? Aayo tthiri! Exeeni ennikupaliha? Eliivuru ya Miteko ennihimya mwaha ola eriki: ‘Mittetthe saviraya, [murummwa Paulo ni akhwaawe yeettana awe] yanaléla aKristu ikano sahimalyaya arummwa ni mahumu òYerusalemu, yanatumererya wira yiwelele soruma iyo. Siso, [miloko] sa aKristu sanlipiherya wamini: Atthu òwamini yaninjerereya nihiku ti níhiku’. (Mit. 16:4, 5) Moone wira, miloko iye saanirowa vahoolo mwaha wa wiiwelela malakiheryo a nikhuuru noolamulela naari oYerusalemu. Nto ela khahiyo ethoonyeryo wira Yehova onnireeliha mareheryo a Mwanawe wira alyiheke miloko? Nihaana wuupuwela wira okhumela saana omunepani onniweryaneya akhala wira Yehova tonireeliha.—Mir. 10:22; 1 aKor. 3:6, 7.
12 Nto vano nihoona wira Yesu onitthara enamuna yeele aarumenle awe wira aalyihe atthareli awe: Owo aahaavaha yoolya atthu anceene aarumeelaka atthu vakhaani. Nto atthu awo yaarumeela awe wira evaheke yoolya yomunepani, yaahisuweliwa oratteene. Nto, arummwa ale a khalai yaari nikhuuru noolamulela, yaaniwerya wooniherya wira tthiri annivaha nikhaliheryo ninkhuma wa Muluku. Miteko 5:12, onihimya so: ‘Arummwa yanìra ithonyero ni mirirya sinjene eriyari yátthu’. Nto, yaale yaari maKristau, khiivo etthu yaarowa owiirihaka okoha so: ‘Tani tthiri Kristu aathanlale awe wira elyiheke ipwittipwitthi sawe?’ Masi wanikisa wa eseekulu yoopacerya itthu saahivirikana.
NTHAKATHAKA NAHAATTA NTO MAVISI A ETRIGU KHUKHALA VAKHAANI
13, 14. (a) Yoolopola xeeni Yesu aavanhe awe voohimya sa otupheliwa muloko, nto masu awe yiiranen’ye sai? (b) Okathi xeeni anammwareya yaarowa aya otuphela muloko? (Moone inoota sookiserya.)
13 Yesu aahihimya wira muloko weeKristau waarowa otupheliwa. Muupuwele wira, ntakiheryo nawe na etrigu ni nthakathaka, Yesu aahilopola wira etrigu esya yaaliwe, [maKristau oowoottihiwa] vasulu vaya yaarowa waaliwa nthakathaka, [maKristau owootha]. Owo aahilavula wira etrigu ni nthakathaka, naarowa wunnuwaka vamosa mpakha okathi wa ohepha; nto ohepha iwo ‘ti nihiku na omala [mukhalelo wa itthu]’. (Math. 13:24-30, 36-43) Nto khivaapinse wira masu a Yesu yiiraneye.
14 Nto anammwareya a eseekulu yoopacerya yaanivuvurya sowiixuttiha sa Yesu; masi awiixutti oororomeleya yaahivikaniha ‘okhotta’ sowiixuttiha ni soohapuxa sa ethiru. (2 aTes. 2:3, 6, 7) Masi, nuumala okhwa awiixutti ookiserya, nto ohapuwa wala omwareya waahitepa ni ovikaniha wunnuwa okathi munceene mpakha ovira iseekulu sinceene. Nto okathi owo nthakathaka nahaatta vano etrigu khukhala vakhaani. Okathi owo khiyaarivo ekrupu yaavikaniha ovaha yoolya yomunepani. Tthiri itthu saahivirikana. Masi itthu iyo siiranen’ye Liini?
OKATHI WA OHEPHA, TI PANI AAROWA OLYIHAKA?
15, 16. Alipa-Oomusoma Biibiliya yaawo yaatokosa saana Soolempwa, mireerelo xeeni yaaphwanya aya, nto nikoho xeeni ninkhumelela?
15 Vaavo waattamela aya wanikisa wa okathi ole, nto yaahikhala atthu yaaphavela vanceene masu ekeekhai a Biibiliya. Muupuwele wira iyaakha sa 1870, ekrupu yaamukhaani ya atthu aniphavela ekeekhai, yaahipacerya opaka ekrupu ya omusoma Biibiliya evalaanaka ni nthakathaka, eyo piiyo, maKristau oowootha yaarina ikerexa saya ni ahooleli a iKerexa iyo. Mowiiyeviha, atthu awo yaakunxe nsina noowi: Alipa-Oomusoma Biibiliya yaanitokosa saana Soolempwa.—Math. 11:25.
16 Alipa-Oomusoma Biibiliya, yaanisoma oratteene Soolempwa nto khuphwanya mireerelo saya. Alopwana ale ni athiyana oororomeleya, yaanihimya sowiixuttiha seethiru, nto enalaleya ikeekhai sa Biibiliya, opaka ni okawa vanceene iliivuru sinimutthokiherya Biibiliya. Muteko aya waahivara mirima ni miyuupuwelo sa atthu anceene yaavoliwa etala ni ntthona na ekeekhai yomunepani. Nikoho nootikiniha naakhumelenle tinla: Niireke iyaakha soovira, ehinatthi eyaakha ya 1914, Alipa-Oomusoma Biibiliya yaari ekrupu yaathanliwe ni Kristu wira elyiheke ipwittipwitthi sawe? Nnaari. Awosa nlelo yaari okathi wa wunnuwa, nave malokiheryo a ekrupu ya ovaha yoolya yomunepani nlelo yiira epakeyaka. Okathi ole, etrigu, wala maKristau ekeekhai, nlelo khiyaavalanne ni maKristau owootha anlikana ni nthakathaka.
17. Sowiiraneya xeeni sipacenrye eyaakha ya 1914?
17 Ntoko niwenhe ahu yoosoma yoopacerya, okathi wa ohepha opacenrye 1914. Okhuma eyaakha ele, mikhalelo sa orowa vahoolo saahipacerya wooneya saana. Yesu aahikhalihiwa Mwene, nave mahiku ookiserya yaahipacerya. (Wis. 11:15) Okhuma 1914 mpakha wanipacerya wa 1919, Yesu aahivara muteko ni Atithawe mpaani mwawe wira atokose ni olokiherya muteko. (Mal. 3:1-4) Nuumala-vo, okhuma 1919, waari okathi wa opacerya othukumanyiwa etrigu. Nto niireke owo waari okathi wira Kristu athanle mulokiheryo waarowa ovahaka yoolya yomunepani? Aayo tthiri waari okathi yoowo!
18. Yesu aalavunle wira aarowa waathanla atthu vakhaani wira epakeke exeeni, nto nikoho xeeni naatepa ophaveliwa waakhuliwa vaavo mahiku ookiserya yaattamela aya?
18 Mwa eprofesia awe yaalavula mahiku ookiserya, Yesu aahihimya wira aarowa othanla ekrupu yaarowa ovahaka yoolya yomunepani ‘okathi aya’. (Math. 24:45-47) Ekrupu xeeni aarowa awe orumeelaka? Ntoko aapanke awe eseekulu yoopacerya, Yesu aarowa waaruma atthu vakhaani wira yaavaheke yoolya yomunepani atthu anceene. Vaavo mahiku ookiserya yaatepa aya waattamela, naahikhala nikoho nla nootikiniha: Atthu ala vakhaani tani? Nikoho nla ni makoho makina voohimya sa eprofesia ya Yesu, anrowa othokoreriwa yoosoma enittharelana.
INOOTA SOOKISERYA: (Ipantta iya sihaana osommwaka okathi sinithokoreriwa aya ittima iyo.)
[Inoota]
Ettima 3: Khalai, okathi Yesu aavanhe awe yoolya alopwana 4.000 mwa mwiiriirya, ohiya athiyana ni anamwane, owo aahaavahererya yoolya ele ‘arummwa awe, n’ awo yahakawela atthu othene’.—Math. 15:32-38.
Ettima 7: Okathi wa Pedru, ‘ipwittipwitthi’ vakhaani ti saarowa waavaha yoolya otheene yaale yaarina nlipelelo na wiirimu.
Ettima 8: Mwaha wa ale owaamini asya ovikaniha ‘okhalela nthiti wiwa mixuttiho sa arummwa’, eyo ethoonyeryo yoowi arummwa yaaniixuttiha moohihiyererya. Sowiixuttiha sa arummwa akina, soolempwa mpakha vano khukhala iliivuru siniirela mpantta Soolempwa sa eKristau sa eGriki.
Ettima 12: Vaavo atthu akina yahaakhanle arummwa yaakhela aya soovaha sa miiriirya sa munepa, vanikhala ntoko wira ikwaha sinceene yaanaakhela evahiwaka ni murummwa wala yaanivahiwa murummwa owo oryeene vaavo.—Mit. 8:14-18; 10:44, 45.
Ettima 13: Masu a Paulo ari eliivuru ya Miteko 20:29, 30 annooniherya wira muloko waanitupheliwa ni ikrupu piili sa atthu. Yoopacerya: yaari maKristau owootha (nthakathaka), yaawo yaakela ‘eriyari’ ya maKristau ekeekhai. Ya nenli: akina yaari maKristau ekeekhai, yaahipacerya okhala anammwareya ‘enavanya’ ni olavula itthu soohiloka.
Ettima 17: Moone mwaha oni: “Nkawehani! Kiri ni Nyuwo Mahiku Otheene,” erevista yeela, epaaxina 11, ettima 6.
[Elatarato epaaxina 15]
[Elatarato epaaxina 17]
Atthu ikonto sinceene yaahikaweliwa yoolya ni atthu vakhaani (Moone ettima 4)
[Elatarato epaaxina 19]
Eseekulu yoopacerya, yaanisuwanyeya atthu Yesu aarumeela awe okawela miloko yoolya yomunepani (Moone ettima 12)