Niireke Munoowerya Wiileva Mwaha wa Omwene?

“Muluku onisiveliwa n’ule onvaha murima omuttenlene”.​—2 AKOR. 9:7.

SOOLEPA SINITTHUNEYA AHU WUUPUWELAKA

Moota xeeni soolepa iya sinitharelana sinirowa aya wookhaliheryani ovaha efaita mikuttho sa Omwene sininvaha anyu?

1 Wahala 29:9

1 aKorinto 16:1, 2

2 aKorinto 8:12

1. Itthu xeeni anamunceene aniwerya aya oleva, nto mwaha wa xeeni?

ATTHU okhalawene aneemererya moohikhanyereriwa oleva itthu mwaha wa ele eri yootepexa waasivela. Anamuyari annirumeela okathi, musurukhu ni ikuru saya mwaha wa anaaya. Ohiya othweelaka ntoko amiravo akina, ale aniphavela orowa wa axooku a Olimpiku annimaliha okathi munceene khula nihiku wira amwiixutte oratteene xooku anirowa aya omwiiraka. Nave-tho Yesu ahiileva mwaha wa itthu sonaawe okhala sa faita. Yesu khaphavela itthu soopuha ni khaarina anamwane. Owo aathanlale okhalela nthiti miteko sa Omwene. (Math. 4:17; Luka 9:58) Vamosamosaru atthareli awe yaahihiya itthu sikina wira avare miteko sa Omwene wa Muluku. Okhaliherya miteko sa Omwene yaari etthu yootepexa otthuneya wa awosa, tivonto yaalenve aya itthu sinceene wira akhaliherye Omwene owo. (Math. 4:18-22; 19:27) Nto hiyo nihaana wiikohaka so: ‘Etthu xeeni erina efaita yuulupale mweekumini mwaka’?

2. (a) Miteko xeeni sinivekela wiileva sinitthuneya wa maKristau otheene? (b) Miteko xeeni sikina sootthuneya anna akina aniwerya aya ovara?

² Wira ninnuuherye wataana wahu ni Yehova, sihaavo itthu sikina sinitthuneya ahu opaka moowiileva ntoko maKristau ekeekhai. Itthu iyo sinipaka ahu moowiileva sinihela muhina orumeela okathi ni ikuru sahu wira nipake mavekelo, nimusome Biibiliya, omulompa Muluku vatthokoni, orowa omuthukumanoni ni ovara muteko woolaleerya.a (Yox. 1:8; Math. 28:19, 20; aHéb. 10:24, 25) Ntoko yookhumelela ya wiimananiha wahu, vamosa ni mareeliho a Yehova, muteko woolaleerya onnirowa vahoolo nto anamunceene annirowa ‘mwako etekiwe-vo empa ya Yehova’. (Yes. 2:2) Akina ahiivahererya nto khiyavara muteko oBetheli, wooteka iSalau sa Omwene ni sa Assembleia, olokiherya mithukumano sa kongresu, aahiiso waakhaliherya atthu akhumeleliwe ihasara sa ephattu. Masi ale anivara miteko iyo, khanivara mwaha woophavela ophwanya musurukhu, anivara ntoko miteko sa mahala masi siri sootepa otthuneya momweneni.

3. (a) Mureerelo xeeni oniphwanya ahu vaavo vaniileva ahu wira nikhaliherye Omwene? (b) Makoho xeeni anireerela ahu othokorerya?

³ Mahiku ala vannitepa otthuneya okhaliherya miteko sa Omwene. Tthiri ti voohakalaliha woona wira anamunceene vootthuna waya annoorwa omuhelela mukuttho Yehova! (Musome Esalimo 54:8) Okhala mulipa-oovaha onnikumiherya ohakalala vaavo vanlipelela ahu orwa wa Omwene wa Muluku. (Otum. 16:15; Mit. 20:35) Nto khula mmosa ahiyo ohaana wiivarerya saana. Niireke sookhala inamuna sikina sikhanle ahu owuncererya wiileva wahu ovara miteko sa Omwene? Hiyo ninrumeela sayi okathi ahu, musurukhu, ikuru ni itthu sinisuwela ahu? Xeeni vanitumereriwa ahu wiikasoopa? Nrowe nuluule ntakiheryo nikhanle ahu ootthara wira nivare miteko iyo sowiileva sinirowa wuncererya ohakalala wahu.

MIKUTTHO SAAVAHIWA WIISARAYELI KHALAI

4. Moota xeeni aIsarayeli yaattottela aya mureerelo ovaha waya mikuttho?

⁴ WIsarayeli khalai ovaha mikuttho ti etthu yaakumiherya oleveleliwa soottheka. Wira aIsarayeli yataane ni Yehova yahaana ovaha mikuttho. Nnamwi saakhanle soovaha saavekeliwa munlamuloni, ikina saari soovaha sa mutthu mwaneene. (Onam. 23:37, 38) Soovaha sinceene sahaana ovahiwaka Yehova ntoko yoovaha ya mutthu mwaneene. Ntakiheryo nimosa nuulupale na soovaha iyo naapakiwe okathi woolipula empa ya Muluku yaatekiwe ni Salomoni.​—2 Wah. 7:4-6.

5. Mareheryo xeeni Yehova aapanke awe mmureerelo wa atthu oothoiwa?

⁵ Yehova moophenta onnisuwela wira atthu otheene khaniwerya ovaha mwaattelo mmosaru, tivonto vanivekela awe wira khula mutthu ovaheke moovarihana ni ele erina awe. Nlamulo na Yehova naaruma wira ephome ya mwaamunama eyiihiweke, nto eyo yaataphulela “eruku pahi ya sorera sintthuna orwa” mwa Mwanawe Yesu. (aHéb. 10:1-4) Masi, Yehova aanivarela muteko nlamulo nlo mwa enamuna yooreera murima. Mwa ntakiheryo, Muluku anaakhelela yoovaha ya masiya wala ikhuntta piili mihoro, akhala wira mutthu owo khaarina epwittipwitthi wala epuri. Hata atthu oothoiwa yanwerya onvaha etthu Yehova moohakalala. (Onam. 1:3, 10, 14; 5:7) Nnaamwi soovaha sa inama saavirikana, saahikhala itthu piili saavekeliwa khula mutthu aapaka yoovaha ya mutthu mwaneene.

6. Etthu xeeni yaavekeliwa awe khula mutthu aapaka yoovaha ya mutthu mwaneene, nto xeeni vaaryaaya vootthuneya otthara malakiheryo awo?

⁶ Etthu yoopacerya, mutthu aahaana ovaha yoolokexa aarina awe. Yehova aahaaleela aIsarayeli wira khula etthu yaavaha aya yaahaana okhala yoolokexa wira ‘yakheliwe’ ni Yehova. (Onam. 22:18, 20) Akhala wira mwaamunama owo aari oorakala, khaarowa weemereriwa okhala mukuttho wa Yehova. Etthu ya nenli, mutthu aahaana ovaha enama yoohikhalana mwiikho ni yoohirakala. Akhala wira mutthu owo ookhalana mwiikho, aahaana oruuha yoovaha ya etampi wala yoolivela mulattu ohoolo wa Yehova ohinatthi opaka yoovaha ya mutthu mwaneene. (Onam. 5:5, 6, 15) Ola waari mwaha muulupale. Yehova aahiruma oriki akhala wira mutthu orina mwiikho, onnikhuura mukuttho woopatthani yoowo waahela muhina yoovaha ya mutthu mwaneene, ohaana wiiviwa munlokoni na Muluku. (Onam. 7:20, 21) Masi, akhala wira mutthu aavaha mukuttho aahikhalana mukhalelo wooloka ohoolo wa Yehova ni yoovaha awe yaari yoohirakala, mulipa oovaha aanihakalala.​—Mmusome 1 Wahala 29:9.

MIKUTTHO SINIVAHIWA OLELO-VA

7, 8. (a) Ohakalala xeeni anamunceene aniphwanya aya mwaha wowiivahererya ovara miteko sa Omwene? (b) Itthu xeeni sa faita sirina ahu sikhanle ahu oorumeela?

⁷ Mahiku ala, anamunceene anniivahererya ovara miteko sa Yehova, nto owo onnihakalala ni miteko iyo. Ovara muteko mmureerelo wa annihu onnikumiherya mireerelo. Munna mmosa yoowo aatonko okhaliherya muteko wooteka iSalau sa Omwene, ni waakhaliherya atthu yaakhumeleliwe ihasara seephattu aahimmye wira orumeela mwa enamuna eyo onnikumiherya ohakalala wuulupale. Owo onihimya so: “oweha otteeliwa murima ni oxukhurela wa anna ni arokora a mapuro awo, vaavo vaniweha aya etekiwe eSalau aya ya Omwene, wala okhaliheriwa nuumala waaphwanya ehasara ya ephattu, onniiriha wiimananiha wahu wotheene okhala wa efaita yuulupale”.

⁸ Mulokiheryo wa Yehova mahiku ala, khuta okathi onnaavya inamuna sa okhaliherya muteko wa Yehova. Mwaakha wa 1904, munna C. T. Russell aalempe so: “Khula mutthu okathi awe, ohaana wiixoonaka okhala oothanliwa ni Pwiya Murumeyi, nto ohaana orumeela owerya, musurukhu awe ni itthu sikina, ni wira khula mutthu ophaveleke orumeela itthu sotheene sinisuwela awe mwa enamuna yoolokexa wira ninvuwihe Pwiya ahu”. Okhala wira ninnaakhela mareeliho manceene, nto nihaana onvahaka etthu Yehova. (2 Sam. 24:21-24) Niireke ninniwerya orumeela oratteene itthu sirina ahu?

9. Voohimya sa orumeela saana okathi ahu, malakiheryo xeeni ari va Luka 10:2-4 akhanle ahu ootthara?

⁹ Okathi ahu. Vanitthuneya okathi munceene wira sitaphuleliwe ni wiipirimiriwa iliivuru sahu, oteka ipa sa omukokhorela Yehova, omutthokiha kongreso, waakhaliherya anna aphwanyiwe ihasara sa ephattu ni ovara miteko sinceene sootthuneya. Ninnisuwela wira nirina iwoora 24 paahi khula nihiku. Tivonto, Yesu aahivaha yoolakiherya enrowa onikhaliherya mmwaha ola. Vaavo aarumale awe atthareli awe orowa olaleerya, Yesu aahimyale so: “muhimukohé ehali mutthu ti mutthu onkumananyu mphironi”. (Luka 10:2-4) Xeeni Yesu aavanhe awe malakiheryo ala? Musomi mmosa onitokosa itthu sa mBiibiliyani aahimmye so: “Okohana ihaali wa atthu a ilapo sa Oriente khonilikana ntoko siniira ahu, wuuramiha muru, wala onvaha matata, masi mahiku ale atthu yaahaana okhupaarelana, wuurama ohoolo wa mutthu ikwaha sinceene ni ikwaha sikina okokhora vathi. Itthu iyo sotheene saavekela okathi munceene”. Khahiyo wira Yesu aatumererya atthareli awe ohaattittimiha atthu. Yesu aaphavela waakhaliherya atthareli awe ale woona wira yaarina okathi vakhaani, tivonto yaahaana orumeela saana okathi owo wira avareke itthu sa faita. (aÉfe. 5:16) Niireke wira hiyo nnoowerya othara malakiheryo awo wira nikhalane okathi munceene wa ovara muteko wa Omwene?

10, 11. (a) Inamuna xeeni sinrumeeliwa aya misonkheryo sahu mmuteko ahu olumwenku wotheene? (b) Malakiheryo xeeni ahimmwale va 1 aKorinto 16: 1, 2 aniwerya onikhaliherya?

¹⁰ Musurukhu ahu. Vanitthuneya musurukhu munceene wira sivariwe miteko sa Omwene. Khuta mwaakha sinnirumeeliwa imilyau miloko sinceene sa idoolare wira akhaliheriwe axitokweene oweetteetta, mapioneero a vamekhaaya ni mamisionaario. Okhuma eyaakha ya 1999, sootekiwa iSalau sa Omwene sinivikana 24.500, ilapo seiyo soothowa musurukhu. Hata vari siiso nlelo vannitthuneya oteka iSalau sa Omwene sowiiraka 6.400. Khula mweeri sinnimpirimiriwa irevista Owehaweha ni Despertai! etthu yowiiraka imilyau 100. Itthu iya sotheene siniliviwa ni misonkheryo sanyu soohikhanyereriwa.

¹¹ Murummwa Paulo aahivaha malakiheryo anireerela ahu otthara voohimya sa misonkheryo. (Mmusome 1 aKorinto 16:1, 2.) Orumeelaka moolumo oowuupuxeriwa, Paulo aahaatumererya annawe oKorinto wira ahiwehereryeke omala esumana, wira yoone musurukhu onihalana aya, masi yaahaana osuka vate vaya musurukhu wuupaceryani wa esumana moovarihana ni owerya waya. Ntoko siiriwa aya eseekulu yoopacerya, anna ni arokora a mahiku ala, annimpaka palano vahinatthi wira akhaliherye Omwene moovarihana ni ele eniwerya aya. (Luka 21:1-4; Mit. 4:32-35) Yehova onnitthapela munepa owo woovaha.

12, 13. Itthu xeeni siniwiiriha atthu akina woovelelaka orumeela ikuru ni itthu sinisuwela aya opaka, masi Yehova onrowa waakhaliherya sai?

¹² Ikuru sahu ni itthu sinisuwela ahu ovara. Yehova ononikhaliherya vaavo vaniimananiha ahu orumeela ikuru sahu ni itthu sinisuwela ahu wira nikhaliherye Omwene. Owo onnilaiherya onikhaliherya okathi onikhulumuwa ahu. (Yes. 40:29-31) Niireke nnoona wira khannisuwela etthu eniphiyerya okhaliherya miteko sa Omwene? Niireke nnuupuwela wira aakhala atthu akina oophwanelela onivikana hiyo? Muupuwele wira Yehova onniwerya wuncererya osuwela etthu wa mutthu, ntoko saamwiirinha awe Besaleli ni Oholiyabi.​—Okhum. 31:1-6; nwehe elatarato yoopacerya.

¹³ Yehova onnitumererya wira nivareke sotheene siniwerya ahu nihoovelelaka. (Mir. 3:27) Okathi wootthikeliwa otekiwa etemplo, Yehova ahaaleela aYuda oYerusalemu wira yuupuweleleke mweettelo aya voohimya sa muteko wooteka. (Hag. 1:2-5) Muupuwelo aya wahaakanyereya nto khuhiya oteka etemplo. Nnimwiira saana oweha akhala wira itthu sinivaha ahu efaita sinivarihana ni otthuna wa Yehova. Niireke hiyo nnoowerya olokiherya murima ahu wira nikhaliherye oratteene miteko sa Omwene mahiku ala ookiserya?

OVAHA MOOVARIHANA NI ELE ENIWERYA AHU

14, 15. (a) Ninnikhaliherya sai ntakiheryo na annihu anikhala ilapo soothowa musurukhu? (b) Nto yoolakela ahu ekhaleke evi?

¹⁴ Anamunceene anikhala ilapo sooxankiha ni soothowa musurukhu. Mulokiheryo ahu onniimananiha waakhaliherya anna anikhala ilapo iyo. (2 aKor. 8:14) Hata vari siiso anna yaale ari oothoiwa musurukhu, annoona okhala eparakha yuulupale ovaha ele eniwerya aya. Yehova onnihakalala vaavo anna oothoiwa anivaha aya ni murima wotheene.​—2 aKor. 9:7.

¹⁵ Elapo emosa ya wAfrika yootepa ohaawa, anna akina anithala ematta aya, nto iphyo sa epantte ele sinnitumihiwa wira akhaliherye muteko wa Omwene. Elapo emosaru eyo, aahikhala palano wooteka eSalau ya Omwene. Anna ni arokora a mapuro ale yaaniphavela okhaliherya. Masi eSalau ele yaapacenrye otekiwa okathi woowaala iphyo mmatta mwaya. Nto okhala wira yaahilakela okhaliherya, anna ale yaanirowa oteka eSalau nto oxekuwa anarowa waala iphyo saya. Tthiri ola waari munepa woowiivahererya! Ela ennuupuxerya anna a eseekulu yoopacerya oMasedonia. Awo yaari ‘othoiwa’, hata vaari siiso, yahooniherya otthuna waya okhaliherya muteko waavariwa. (2 aKor. 8:1-4) Nto otheene ahu naatakihaka anna awo nrowe “khula mutthu aroiheke sovaha sawe, aphimeleleka soruwerya sivahiwawe” ni Yehova.​—Musome Otumererya 16:17.

16. Ninrowa osuwela sai wira mikuttho sahu sinnaakheliwa ni Yehova?

¹⁶ Masi ehaavo etthu enitthuneya ahu okhalana ephoole. Ntoko siiraneya aya wIsarayeeli a khalai, hiyo nihaana osuwelexa wira soovaha sahu sinrowa weemereriwa ni Muluku. Etthu xeeni enrowa omwiiriha Yehova ohaakhelela yoovaha ahu? Nihaana wuupuwela wira okhapelela etthoko ahu ni omukokhorela Yehova, teri etthu yootepa otthuneya. Okhaliherya muteko wooteka iSalau sa Omwene, miteko sowaakhaliherya ale aphwanyiwe ehasara, ni miteko sikina pooti ohikhalana efaita akhala wira ninnoolowela okhapelela etthoko ahu mwa werutthuni wala momunepani. Neera siiso ninrowa ovaha etthu ehirina ahu. (Mmusome 2 aKorinto 8:12.) Wuuncerya eyo nihaana ovaha ephoole makhalelo ahu oomunepani wira ehikhale etthu enirowa oniiriha ohiphwanelela. (1 aKor. 9:26, 27) Nihaana osuwela wira vaavo vaneettela ahu malamulo a Biibiliya, mikuttho sinivaha ahu sinooniphwanyiha ohakalala ni sinimwemereriwa ni Yehova.

MIKUTTHO SININVAHA AHU MUKULU SIHAANA EFAITA YUULUPALE

17, 18. Ninwoonela sai anna otheene yaale aniivahererya wira avareke miteko sa Muluku?

¹⁷ Anna ni arokora anceene, annivaha okumi aya ntoko mukuttho vaavo vanivara aya miteko sinikhaliherya Omwene. (aFil. 2:17) Ninnaaxukhurela ni murima ahu wotheene anna yaale anooniherya munepa wowiivahererya. Anamwane ni asaara aya anna yaale akhanle amahoolela a miteko sa Omwene aahaana oxukhureliwa mwaha woweemya wira anna awo avikaniheke ovara miteko sa Muluku.

¹⁸ Onnivariwa muteko muulupale wira sirooweke vahoolo miteko sa Omwene. Nto otheene ahu nihaana ovekela wira niwerye ovara miteko sa Muluku, moovarihana ni ele eniwerya ahu. Mukupaliki wira yootthuvela ti yuulupale vano, ni enrowa okhala yootepexa wunnuwa muhoolo”.​—Mar. 10:28-30.

[Enoota]

[Elatarato epaaxina 11]

[Elatarato ipaaxina 12, 13]

Soovaha sinceene mutthu aavaha moohikhanyereriwa, enoolikana ni mikuttho sinivaha ahu olelo-va (Nwehe ittima, 7-13)

[Elatarato epaaxina 12]

Anamalaleerya ari oSalau ya Omwene oKeniya, Afrika

[Elatarato ipaaxina 12, 13]

Mulipa owiivahererya a Ekomisau ya Muteko Wooteka Mmuttettheni, oTuxedo, Nova York EUA

[Elatarato epaaxina 13]

Munna onivara muteko oBetheli, Australia