Niireke Munnoona Otteettheya wa Apinaatamu Ntoko Yehova Sinoonela Awe?

“Itthu s’erutthu sinòniwa okhala sottèttheyaxa, seiyo ti sophaveleyexa”.​—1 AKOR. 12:22.

MUNAAKHULA SAI?

Yehova oniwoonela sai ale anooneya okhala ootteettheya mmulokoni?

Exeeni enrowa onikhaliherya okhalana moonelo wa Yehova voohimya sa sootteettheya sa apinaatamu?

Moota xeeni waakhaliherya ale ari ootteettheya onaaphwanyiha aya mureereerelo atthu anceene?

1, 2. Xeeni Paulo onaamorela awe ikharari ale ootteettheya?

OTHENE AHU okathi mukina ninnikhala ootteettheya. Mwaha wa kamasi wala eretta ekina hiyo pooti otteettheya mpakha woonaka ovila ovara miteko sahu khula nihiku. Nto nkahaya muupuwele vaakhanle wira nyuwo muri ootteettheya, ohiya esumana emosa wala piili, masi mweeri ntero wala ovikana-vo. Mmakhalelo awo khimwaarowa osiveliwa vaakhanle wira atthu akina anniwoonelani othunku?

² Murummwa Paulo aanisuwela owereya waya mutthu ohasuliwa ni atthu a ota hata atthu ammulokoni. Ikwaha sikina, owo aanoona wira khaawerya-tho ovikaniha. (2 aKor. 1:8; 7:5) Olavulaka voohimya sa mixankiho samphwannye mweekumini mwawe ntoko muKristau oororomeleya, Paulo aahimmye so: “T’ani okhanle òhilipa”, ni miyo kihitteettheya vamosa ni owo? (2 aKor. 11:29) Voohimya sa maKristau manceene yaawo yiirela mpantta muloko wa mahiku ale, yaawo yaalikanyihiwa ni ipantte sa erutthu ya mutthu, Paulo aahimmye wira seiyo sooniwa “okhala sottèttheyaxa, seiyo ti sophaveleyexa”. (1 aKor. 12:22) Masi owo aaphavela ohimya exeeni? Xeeni vanitthuneya ahu waawehaka ale ootteettheya ntoko Yehova siniwoonela awe? Ni xeeni wira siiso onrowa aya oniphwanyiha mireerelo?

MOONELO WA YEHOVA VOOHIMYA SA OTTEETTHEYA WA APINAATAMU

3. Exeeni ekhanle oopahula moonelo ahu voohimya sa ale anitthuneya okhaliheriwa mmulokoni?

³ Hiyo ninkhala olumwenku yoola atthu anixinttana aya aphavelaka wooniherya ikuru ni omiravo. Anamunceene annipaka sotheene aniwerya aya wira aphwanye ele eniphavela aya, ikwaha sinceene khanivaha efaita moonelo wa ale ootteettheya. Hiyo khanneemya mweettelo owo, masi moohilakela hiyo pooti okhalana moonelo woohiloka voohimya sa ale ikwaha sinceene anitthuneya okhaliheriwa, hata ale ari mmulokoni. Masi hiyo pooti ophavelasa okhalana moonelo wooloka onilikana ni ole wa Muluku.

4, 5. (a) Moota xeeni nlikanyiho nniphwanyaneya va 1 aKorinto 12:21-23 ninnikhaliherya aya osuwela moonelo wa Yehova voohimya sa sootteettheya sa apinaatamu? (b) Mureerelo xeeni onirowa ahu ophwanya vaavo vanaakhaliherya ahu ale ootteettheya?

⁴ Hiyo nnoowerya wiixutta etthu voohimya sa moota Yehova sinoonela awe otteettheya wa apinaatamu, mmasu alempwale mu nlikanyiho nri epaphelo yoopacerya ya Paulo aalepela awe aKorinto. Ekapitulu ya 12, Paulo onninuupuxerya wira hata mipantta seiye sootteettheya sa erutthu ya pinaatamu sookhalana muteko wootthuneya. (Mmusome 1 aKorinto 12:12, 18, 21-23.) Ivarelo saya muteko ipantte sikina sa erutthu ya pinaatamu sinnivanyihiwa ni atthu ale anikupali wira apinaatamu aroothatuwa. Masi nuumala osoma moota khula mpantta wa erutthu ya pinaatamu sinivara aya muteko ninnoona wira mipantta seiye tthiri sinnooniwa ohikhalana efaita sinnivara miteko sootthunexa.a Mwa ntakiheryo atthu akina yoona wira elipwi yaamukhaani khinivareleya muteko, masi vano ehooniwa wira elipwi eyo ennivara muteko muulupale wira mutthu oweryeke weemela oratteene.

⁵ Nlikanyiho na murummwa Paulo ninnittittimiherya wira atthu otheene a mmulokoni mwa eKristau aakhalana efaita. Moovirikana ni Satana yoowo onaaramusa apinaatamu, Yehova onnaavaha efaita arumeyi awe waahela muhina yaale anikhala ntoko tootteettheya “ahirina efaita”. (Yobi 4:18, 19) Muupuwelo ola ohaana onikhaliherya wiixoona okhala etthu mmulokoni mwahu ni mmulokiheryoni wa atthu a Muluku anikhala olumwenku wotheene. Mwa ntakiheryo nkahaya muupuwele okathi yoole nyuwo muninvarelela anyu moono mutthu oowunnuwela yoowo onitthuneya okhaliheriwa. Owehasa wene nyuwo khamwaituperya weetta. Niireke opaka eyo khiwaawirinheni wiixoona okhala oofai ni ootteeliwa murima? Aayo, vaavo vanaakhaliherya ahu atthu akina, ninniphwanya ohakalala mwaha wa opaka eyo ni ninninnuherya opixa wahu murima, ophenta ni wunnuwa omunepani. (aÉf. 4:15, 16) Tiithi ahu oophenta onnisuwela wira muloko yoole onaavaha efaita atthu otheene, moohicikha etthu sa otteettheya waya, onnooniherya okhalana moonelo wooloka ni niphento.

6. Moota xeeni Paulo aarumeelale awe moolumo oowi “ohoneliwa vatthu” ni “òwerya”?

⁶ Okathi Paulo aalepela awe aKorinto, aahirumeela masu oowi, “ohoneliwa vatthu” ni “ottettheya” waahimyaka atthu ale yahaamini eKristau a eseekulu yoopacerya vamosa ni moonelo awe. (1 aKor. 1:26, 27; 2:3) Nave-tho Paulo aahaaromola yaale yaari “òwerya”, masi khaaphavela wira maKristau makina yiixooneke okhala a faita waavikana akina. (aRom. 15:1) Ohiya-vo, owo aaphavela wira maKristau ookhoomala akhaleke oopixa murima ni ale yahaakhanle oolipa mweekeekhaini.

NIIREKE NINNITTHUNEYA OLOKIHERYA MOONELO AHU?

7. Exeeni ekhanle oonooceeliha waakhaliherya atthu akina?

⁷ Vaavo vanaakhapelela ahu “alipa-òthoiwa”, khahiyo paahi nimmutakiha Yehova, ninnimuhakalaliha-tho. (Esal. 41:2; aÉf. 5:1) Okathi mukina, okhalana moonelo woohiloka voohimya sa ale anitthuneya okhaliheriwa, onoonooceeliha waakhaliherya. Wala ohisuwela yoohimya, aahiiso wuuliwa muru, onooniiriha ohiwaattamela ale sinaaphwanya mixankiho. Murokora mmosa onitthaniwa Sintiya,b yoowo ohiiwale ni aiyawe onihimya so: “Akhala wira anna annisyaka wataana ni mutthu owo wala, khanipaka itthu ntoko mutthu owo saaphavela awe wira apatthani awe amwiiriheke, eyo enniwereya. Okathi oniphwanyiwa ahu ni mixankiho, ninniphavela nikhaliheryo na atthu”. Khalai Davidi ahoona owereya waya mutthu osyakiwa ni apatthani awe.​—Esal. 31:12.

8. Exeeni enrowa onikhaliherya waamorela ikharari atthu akina?

⁸ Hiyo nave nihaana waamorela ikharari anna akhala wira ninnisuwela wira sihaakhumelela mixankiho sinaatteettheiha mwaha wa owereyasiwa, okhala ntthoko atthu otheene ahikhanle aya anamoona wala oriipiwa murima. Nihiku nikina itthu iyo pooti onikhumelela nave. Ahinatthi okela Elapo Yooleiheriwa, aIsarayeli, yaawo yaari othoiwa ni ootteettheya elapo ya wEjiitu, yaahupuxeriwa wira “muhumihé murim’anyu” owoolo wa munninyu oxankale. Yehova aatumerenrye wira awooneke atthu othoiwa oreerela okhaliheriwa.​—Otum. 15:7, 11; Onam. 25:35-38.

9. Etthu xeeni ekhanle ahu oopacerya opaka wira naakhaliherye ale arina mixankiho? Nvahe ntakiheryo.

⁹ Ohiya waaphukela wala waathanya atthu arina mixankiho, hiyo nihaana waamaaliha momunepani. (Yob. 33:6, 7; Math. 7:1) Wira nlikanihe: Vaavale mutthu onimora awe omweettihaka mootu khuvulalaka onarowa oxiripitaali, niireke ale anaakhapelela aretta annipacerya omukoha moota simonre awe? Nnaari, awo anipacerya omukhaliherya toko. Moolikana ni eyo, akhala wira munna mmosa onnitteettheya mwaha wa muxankiho, etthu yoopacerya ori omukhaliherya omunepani.​—Mmusome 1 aTesalonika 5:14.

10. Moota xeeni ale anooneya okhala ootteettheya aryaaya “athajiri mowamini”?

¹⁰ Akhala wira hiyo ninniimananiha othokorerya makhalelo a annihu, nto nnimoona itthu sinaaxankiha. Mmuupuwele murokora yoowo onilupatthiwa ni amusi awe mu iyaakha sinceene. Nnaamwi akina a atthu awo yooneya okhala otteettheya, niireke awo khannooniherya okhala oolipa ni oororomeleya? Vaavo vanimoona anyu maama oohitheliwa orwaaka mmuthukumanoni ni anaawe moohicompela, khamunitteeliwa murima osuwela wira owo toororomeleya ni owiilipiherya? Ankhi okathi onaaweha anyu amiravo anivarexexa ekeekhai nnaamwi akhanyereriwaka opaka itthu soohiloka oxikola? Moowiiyeviha, hiyo nihaana waaxukhurela ale anooneya okhala ootteettheya okhala wira awo “athajiri mowaminini” moolikana ni ale anikhala oororomeleya masi arina makhalelo ookhweya.​—Yak. 2:5.

MULOKIHERYE MOONELO ANYU WIRA OLIKANEKE NI MOONELO WA YEHOVA

11, 12. (a) Exeeni enrowa onikhaliherya olokiherya moonelo ahu voohimya sa sootteettheya sa apinaatamu? (b) Nniixutta exeeni mwa enamuna Yehova aamuthokorenrye awe Aroni ni soovonya sawe?

¹¹ Hiyo ninnikhaliheriwa olokiherya moonelo ahu wira olikaneke ni moonelo wa Yehova, vaavo vanithokorerya ahu enamuna Yehova aakhapelenle awe myaha sa arumeyi awe khalai.(Musome Esalimo 130:3.) Mwa ntakiheryo, vaakhanle wira nyuwo mwaari ni Moise okathi yoole Aroni ampanke awe mwaanyompe a eweero, mwaarowa woonela sai enamuna Aroni aamananiha awe okhootta mulattu awe? (Okhum. 32:21-24) Wala mwaarowa woonela sai yowiiraneya ya Aroni ni murokorawe Miryamu yaawo yanveeha Moise mwaha woomuthela muthiyana ohikhanle mwIsarayeli? (Moth. 12:1, 2) Mwaarowa woonela sai vaavale Aroni ni Moise yahamuttittiminhe aya Yehova okathi aakumihenrye awe mwa mwiiriirya maasi a oMeribá?​—Moth. 20:10-13.

¹² Mwa sowiiraneya iya sotheene Yehova anwerya omuhukhumu Aroni naananoru. Masi owo ahoona wira Aroni khahiyo aari mutthu ootakhala wala aroolakela opaka itthu iye. Tthiri, vanooneya wira Aroni aaroowokiwa ni atthu akina mpakha ohiya ephiro yooloka. Okhala wira khula okathi aasuwela awe wira oopaka etthu yootakhala, owo moowakuveya aanittharuwa ni waakhulela malakiheryo a Yehova. (Okhum. 32:26; Moth. 12:11; 20:23-27) Yehova aathanla owehexexa nroromelo ni waakuva ottharuwa wa Aroni. Okhuma vaavale mpakha olelo-va Aroni ni amusi awe anisuweliwa okhala atthu yaamoova ni omurumeela Yehova moororomeleya.​—Esal. 115:10-12; 135:19, 20.

13. Etthu xeeni enitthuneya ahu otokosa voohimya sa sootteettheya sa apinaatamu?

¹³ Moophavela olokiherya moonelo ahu wira ovarihaneke ni wa Yehova, hiyo nihaana otokosa moota sinaakhapelela ahu ale anooneya okhala ootteettheya. (1 Sam. 16:7) Mwa ntakiheryo, ninrowa woonela sai akhala wira mmiravo mmosa onneetta moohisuumaaliha wala onnikhalana mweettelo woohiloka? Ohiya omuxankiha, xeeni ohuupuwelaka enamuna ya omukhaliherya wira wunnuwe omunepani? Hiyo nihaana wiimananiha waakhaliherya ale anitthuneya okhaliheriwa, neera siiso nnimwiixutta owoonela othunku ni waaphenta.

14, 15. (a) Yehova oonenle sai oriipiwa murima wa Eliya? (b) Enniixuttiha exeeni yowiiraneya ya Eliya?

¹⁴ Hiyo nave ninnikhaliheriwa wunnuuherya moonelo ahu vaavo vanilikanyiha ahu muupuwelo ahu ni wa Yehova ni inamuna saakhapelenle awe arummwa awe yaale yaariipiwe murima khalai. Mmosa wa yaawo ti Eliya. Nnaamwi aavanyinhe maprofeta 450 a Bayali moolipa murima, Eliya aahimutthyawa Pwiyamwene Yezabeli vaavo aasuwenle awe wira aaphavela omwiiva. Nuumala weetta ikiloomu 150, mpakha ophiya oBèrixeba, khukhala moothakoni. Okhulumunwe ene mwaha wa weetta ni ovya nsuwa, profeta owo aahikilaathi vathi va mwiri “anaphavela okhwa”.​—1 Mam. 18:19; 19:1-4.

¹⁵ Nto Yehova oonenle sai okathi aamoona awe Eliya oxankale? Niireke owo aahimunyanyala murumeyi awe mwaha wa oyeleela olipa wawe murima? Nnaari! Yehova aahisuwela wira Eliya aarootteettheya, nto khuruma nlaikha. Nlaikha nle naahimuttumererya ikwaha piili wira Eliya olyeeke etthu. Wira ‘ohojele ekwaha’, aarowa awe orummwa orowa. (Musome 1 Mamwene 19:5-8.) Aayo, ohiya omulaka, Yehova aahinwiriyana profeta awe ole ni khimukhaliherya vanreerela aya.

16, 17. Ninrowa otakiha sai enamuna Yehova aamukhapelenle awe Eliya?

¹⁶ Ninrowa omutakiha sai Muluku ahu ooreera murima? Hiyo nihaakuveleke waaphukela atthu akina. (Mir. 18:13) Vaamureera opacerya waakhaliherya ale aniixoona wira ‘khaniphanelela’ mwaha wa makhalelo aya ooxankiha. (1 aKor. 12:23) Nuumala-vo, nnoowerya waakhaliherya mooreerela atthu akina anitthuneya.

¹⁷ Mwa ntakiheryo, mmuupuwele Sintiya yoole oromoliwe wuupaceryani yoowo aahiiwale ni aiyawe khuhiyeriwa anamwane axithiyana anli. Awo wahaaphwanya omeekha muulupale. Anamoona akina yaamukhalihenrye sai? Owo onihimya so: “Nuumala waaligarela anna ni waaleela ele yaakhumelenle, awo yaahiphiya vatthokoni vaka muhina mwa minutu 45. Awo yaahipacerya omoroxasa maithori. Awo khiyaanihinye mekhihu mmahiku oopacerya mararu. Okhala wira khinaawerya olya oratteene ni naahakanyerereya muupuwelelo, awo yaahinikhapelela saana”. Tthiri eyo enniwuupuwelihani ele Yakobo aalempe awe wira: “Muhim’anyu walá murokor’inyu yakhalá ewaraka sothala, walá òthoiwa yolya ya khula nihiku, vano mmosá a nyuwo amuhimerya wira: ‘Muroke ni murettele, mòre, nvone’, masi khuhiyànvaha etthu sihirinawe mwerutthuni, molumo anyu awo amphiyerya-ní? Sisotho wamini, wahikhalane miteko sorera, ohòkhwa, khuna muteko”. (Yak. 2:15-17) Mwaha wa okhaliheriwa waya ni anna a mapuro ale, Sintiya ni mwanawe yaahiphwanya ikuru khukela muteko wa opioneero wookhaliherya nuuvira myeeri 6 paahi.​—2 aKor. 12:10.

ANAMUNCEENE ANNIPHWANYA MIREERELO

18, 19. (a) Ninrowa waakhaliherya sai ale okathi mukina anikhala ootteettheya? (b) Tani aniphwanya mureerelo vaavo vanaakhaliherya ahu ale ootteettheya?

¹⁸ Owehasa wene nyuwo moosuwela wira mutthu aawereiwaka onipenuwa vakhaani-vakhaani. Vamosa-ru, Kristau yoole aatteetthen’ye mwaha wa mixankiho wala sooweeha onitthuneya okathi wira otthikele okhala oolipa momunepani. Ekeekhai wira annihu ahaana olipihaka nroromelo naya orweela mwa omusoma Biibiliya, opaka mavekelo ni miteko sikina sa eKristau. Masi niireke hiyo nnoowerya waavilela mpakha otthikela okhala oolipa momunepani? Ni niireke nnoowerya ovikaniha waaphenta okathi yoowo aniimananihaya wiilokiherya? Niireke hiyo niniimananiha waakhaliherya otheene yaale atteetthen’ye woona wira aakhalana efaita ni annireerela ophentiwa mmulokoni wa eKristau?​—2 aKor. 8:8.

¹⁹ Muhiliyale wira vaavo vanaakhaliherya ahu anna, ninniphwanya ohakalala weiwo onikhumelela mwaha wa ovaha. Nave-tho ninniinuherya otunku ni opixa wahu murima. Masi yookhala etthu ekina enikhumelela niira siiso. Mulokoni wootheene onniinuwa ni ophentana. Vootepexa otthuneya okhala wira nnimutakiha Yehova yoowo oniwoona atthu otheene okhala a faita. Aayo otheene ahu nookhalana mathowa anniiriha weemererya yoolipiha eni “nakhaliherye atthu” otteettheya.​—Mit. 20:35.

[Inoota]