BIIBILIYA ONNIRUKUNUXA MIRIMA SA ATTHU
Miyo kaawana ekhotto aka wira kimalihe ohixariya ni otakhala
Elavuliwe ni: Antoine Touma
MWAAKHA OYARIWE AWE: 1960
ELAPO ONIKHUMA AWE: OLÍBANO
MWAHA ENE: MULIPA ANWANA KUNG FU (KARATE)
MWEETTELO AKA WA KHALAI: Kinnuwale oRmaysh, omukanoni wa Isarayeli ni oLíbano, okathi yaawaniwa aya ekhotto muttetthe ole. Nlelo kinnuupuwela mapuro yaari miina, ni atthu oohittheka yaathikileya metto wala miyoono. Opuro awo waari wooxankiha, maana otakhala waahuulaana.
Emusi aka yeetta Ekerexa Katoolika Maronita, mpantta Onikhuma Nsuwa. Apaapa yaamakela waavya yoolya paahi wira ekhaliherye emusi ahu ya atthu 12; masi Amaama yaaninroiha okerexa. Mwa okathi aya, kaahipacerya woona wira ekerexa ni iguvernu khisaawerya waakhaliherya atthu oohaawa.
Okhuma emiravo aka, kaanisiveliwa ni kung fu. Kaahiina nikuruta vanci nto kinasuwela saana owana kirumeelaka matata ni metto, nave kaanirumeela ikaruma sikina sa karate. Miyo kuupuwela so: ‘Nkinwerya omaliha ekhotto, maasi kookhala oovukula otakhala’. Khuta okathi kaawoona aka atthu anli awanaka, mowaakuveya kaanituphela ekhotto eyo. Miyo kaanaakuva onanariwa, nto eyo yaahikiiriha okhala ootakhala. Atthu a mpantta wa okuusini wa oLíbano yaanikoova, vaavo kaamananihaka omaliha ohixariya ni otakhala.
Mwaakha wa 1980, kaahikela egrupu yanwana kung fu oBeirute. Khula nihiku saaniruma ibomba, igranada, ni ifoguete, masi miyo kaanirowa omwiixutta kung fu. Miyo kuupuwela olya paahi, orupa ni okhala ntoko Bruce Lee, aapaka ifilme sa kung fu Chines-Americano. Kaanitakiha moota aamettha awe ikharari, weetta, ni onyakula okathi anwana awe kung fu. Miyo nkaatheya.
MOOTA BIIBILIYA ORUKUNUNXE AWE OKUMI AKA: Yoolukama aka waari osuwela onwana kung fu ni orowa oChina. Masi, nihiku nimosa vaavo kiina aka nikuruta wira kirowe oChina, mukhora aka waahimaniwa. Owo aari mpatthani aka yoowo aari ni Anamoona anli. Kiwanre ene ekasako yooriipa kaarumeelaka wira kiine nikuruta ni kiryeene ooviheriwa, kaahaaleela Anamoona ale wira: “Khiivo etthu enisuwela aka sa Biibiliya”. Nkaasuwela wira okhuma nihiku nle, ekumi aka yaarowa oturukeya.
Anamoona ale yaahikooniherya mBiibiliyani nthowa naya atthu ahiniwerya aya omaliha ohixariya ni otakhala. Awo yaahikileela wira Satana Diabo tonikumiherya mixankiho molumwenkuni. (Wisupulula 12:12) Nto kaahitikinihiwa mwaha wa murettele ni nroromelo Anamoona ale yooniherya aya. Nave, kaahihakalala vaavo yaakiixuttinhe aya wira Muluku ookhalana nsina. (Esalimo 83:19, BE) Nave-tho yaahikooniherya 1 Timótheyo 4:8, yoowo oni: “Nikuruta ninnikhaliherya erutthu, nto nimphiyerya vakhani: vano, omphenta Muluku onniphiyerya sothene, okhala wira onniroromeliha simphavelahu vathí-va n’iye s’ekumi yohimala”. Moolumo awo yaahikivara murima.
Mooriipiha murima nkaawenhe-tho Anamoona ale, maana amusi aka yahaaleela wira ahitthikase. Masi, kaahuupuwela omuhiya kung fu, wira kimusomeke Biibiliya. Axinna aka khiyaasiveliwe ni muupuwelo owo, masi kaahilakela owaavya Anamoona wira kimusome Biibiliya.
Kaahivikaniha owaavya Anamoona, masi nkaaphwannye. Nave, kaahiriipiwa murima mwaha wa okhwa apaapa mootutuxerya, ni mixankiho sikina sa emusi aka. Okathi owo, kiira kivaraka muteko empresa yaateka ipa ni iponti. Nto nihiku nimosa, mpatthani aka Adel aahikeemexa ni okikoha nthowa naya kaariipiwaka murima. Owo aahikileela sa nlipelelo na mBiibiliyani na ohihimuxiwa. Mwa myeeri 9, Namoona ole oophenta aahikiixuttiha Biibiliya moopixa murima.
Vaavo kaavikaniha aka osoma, kaahipacerya woona otthuneya waya opaka marukunuxo. Masi khahiyo vaari vookhweya. Miyo kaamakela oviruwa ni waakuva opaceya. Biibiliya ookiixuttiha ohaakuva onanariwa ni ohipaka itthu moohuupuwela. Mwa ntakiheryo, Matheyo 5:44 Yesu oovaha miruku sini: “Mwaphenteke awanan’inyu. Mwavekeleleke ale anolupatthani”. Nave aRoma 12:19 onilopola so: “Muhiwunlelé ikuhu akhw’inyu . . . mana volempwa wira: ‘Yehova tonihimya wira: Ohukhumu muteko aka. Ti miyo kinlivela sotakhala’”. Soolepa iyo saahikikhaliherya wiiyeviha ni okhalana murettele mookumini.
MOOTA OTTOTTENLE AKA MUREERELO: Nnaamwi wanipacerya amusi aka yahaaphavela wira kimusome Biibiliya, awo yaahipacerya waattittimiha Anamoona. Nto, munna aka ookhala Namoona Yehova; nave Amaama mpakha okhwa waya, yaanaakiherya waamini wahu ohoolo wa akina.
Nave-tho, kinnihakalala omuthela muthiyana ooreera ni oororomeleya Anita, yowo ori mpatthani aka mmutekoni wa okathi wotheene. Okhuma eyaakha ya 2.000, hiyo ninkhala wEskilstuna, oSuécia, weiwo ninwiixuttiha ahu atthu Biibiliya anilavula nttaava na Arabe.
Nlelo kinnixankiheya ni atthu anihaawa mwaha wa otakhala. Masi osuwela nthowa naya siniireya aya itthu iyo, ni osuwela wira Muluku onoomaliha moohipisa, onnikivaha ohakalala wekeekhai ni murettele.—Esalimo 37:29.
[Eponto yuulupale epaaxina 9]
Miyo ni amwaaraka ninnihakalala vanceene mmutekoni woolalerya. Onisivela owiixuttiha atthu voohimya sa Yehova