Otthara Yooruma ya Waathokorerya Saana Atthu Mwaalaleeryaka

“Sothene sinosivelani wireliwa n’atthu akina nyuwo-tho, nwireleke seiyo akhw’inyu”.​—MATH. 7:12.

MWAAROWA WAAKHULA SAI?

Ninrowa omuthokorerya sai khula mutthu onimphwanya ahu nilaleeryaka?

Miruku xeeni sa Matheyo 7:12 sinrowa onikhaliherya osuwela nipuro, okathi, ni enamuna ya waalaleerya atthu?

Malakiheryo xeeni ooloka a moota woolaleerya athokoreriwe muru ola aniphavela anyu orumeela?

1. Niireke enamuna enaakhapelela ahu atthu naalaleeryaka enniwiiriha osiveliwa ekeekhai? Nvahe ntakiheryo. (Nwehe elatarato yoopacerya.)

IYAAKHA vakhaani sivinre, munna mmosa ni amwaarawe elapo ya oFiji, yiirela mpantta ekampaanya ya waalattula atthu orowa Niira na Wuupuwelela Okhwa wa Kristu. Nto yaahipacerya orupa epula okathi yaalavula aya ni muthiyana vate vawe. Munna owo aahimooliha muthiyana owo esumpuraro awe, nto owo onaikhuneela ni amwaarawe. Anna ale yaahitteeliwa murima okhala wira muthiyana owo aahirwa Niira na Wuupuwela. Owo onnihimya wira khonuupuwela itthu sinceene Anamoona ale yaahimmye aya okathi yaamulattula aya. Etthu yaamusivenle enamuna yaakhapeleliwe awe, nto khilakela orowa niira na Wuupuwelela. Nto exeeni yaamwiirinhe muthiyana owo wira siiso? Okhala wira munna ole ni amwaarawe yaahitthara Yooruma ya Waathokorerya Saana Atthu Akina.

2. Enitaphulelani Yooruma ya Waathokorerya Saana Atthu Akina, nto ninrowa weettela sai?

² Enitaphulelani yooruma eyo? Yooruma ela ti miruku saavahiwe ni Yesu okathi aahimyale awe so: “Sothene sinosivelani wireliwa n’atthu akina, nyuwo-tho nwireleke seiyo akhw’inyu”. (Math. 7:12) Nto hiyo ninrowa weettela sai yooruma eyo? Mwa inamuna iya piili. Yoopacerya, hiyo nihaana wiikohaka so: ‘Kaari mwa mutthu ole vaarowa okisivela okhapeleliwa mwa enamuna xeeni?’ Nto hiyo nipakeke ele yaarowa onisivela mwa mureerelo wa mutthu owo.​—1 aKor. 10:24.

3, 4. (a) Muhimye nthowa naya Yooruma ya Yesu ehinivareleya aya muteko wa annihu paahi? (b) Nto ninrowa othokorerya exeeni muru ola?

³ Hiyo ikwaha sinci ninneettela Yooruma eyo wira naathokorerye annihu. Masi Yesu khaahimyale wira naathokoreryeke enamuna eyo ale akhanle annihu paahi. Yesu aalavunle masu ala okathi aathokorerya awe enamuna yowaakhapelela atthu otheene hata anyokhani ahu. (Mmusome Luka 6:27, 28, 31, 35.) Akhala wira hiyo ninnirummwa waathokorerya saana anyokhani ahu, nto vaarowa okhala vooloka waathokorerya oratteene atthu yaale anaalaleerya ahu, anamunceene a yaawo ‘aniphavela ekumi ehinimala’!​—Mit. 13:48.

⁴ Vano nrowe nithokorerye makoho maxexe anitthuneya ahu wuupuwelaka naalaleeryaka: Atthu xeeni anrowaka waalaleerya? Nipuro xeeni kinrowa aka waaphwanya? Okathi xeeni wooreerela waaxukurya? Enamuna xeeni kikhanle aka olavulana? Ntoko sinrowa ahu wiixutta, makoho ala anoonikhaliherya othokorerya moonelo wa atthu anirowa ahu waalaleerya ni othanla enamuna yooreerela wira nilavulane.​—1 aKor. 9:19-23.

ATTHU XEENI ANROWA AKA WAALALEERYA?

5. Makoho xeeni anitthuneya ahu wiikohaka?

⁵ Hiyo nimmulaleerya mutthu mmosa khula okathi. Nto khula mutthu ookhalana makhalelo awe ni mixankiho sawe. (2 Wah. 6:29) Vaavo vanimulaleerya ahu mutthu, niikoheke so: ‘kaari mwa miyo, kaarowa ophavela othokoreriwa sai? Vaamukisivela kaakhanle wira kinooniwa okhala mutthu pure onikhala mmuttettheni paahi? Wala vaarowa okisivela osuweliwa ntoko mutthu oottittimiheya a mmuttettheni?’ Othokorerya makoho awo anoonikhaliherya omuthokorerya khula mutthu ntoko siniphwanela awe.

6, 7. Nipakeke exeeni okathi onimphwanya ahu mutthu oowali nilaleeryaka?

⁶ Khuuvo mutthu oniphavela wooniwaka okhala “mutakhali.” Mwa ntakiheryo, okhala wene maKristau annimananiha ottharihela miruku sa mBiibiliyani wira ‘molumo aya akhaleke òrera okathi p’ukathi’. (aKol. 4:6) Hata vari siiso, mwaha wa ohimalela wahu, ikwaha sikina ninnihimya itthu mmeeloni mwaya khiyathanana. (Yak. 3:2) Mwa ntakiheryo, hiyo pooti olavula moohiloka ni mutthu mukina mwaha woohikhala saana nihiku nlo, hata vari siiso, khavannisivela ohimmwa okhala mutthu “oowali” wala “ohinittittimiha”. Vaamunisivela owoona atthu awo anreerelaka murima. Tivonto varya aya voreerela waathokorerya saana atthu akina.

⁷ Akhala wira munnimphwanya mutthu oowali mulaleeryaka, niireke khivaarowa okhala voreera omulevelela mwaha woohisuwela etthu enimwiiriha? Owehasa wene erookhala etthu emunyoonyale omutekoni wala oxikola. Wala owo onoowereiwa. Ikwaha sinceene axineene etthoko yaale yaari oowali wanipacerya, annaakhulela ekeekhai vaavo atthu a Yehova anaakhapelela aya mwa nttittimiho ni wiiyeviha.​—Mir. 15:1; 1 Ped. 3:15.

8. Xeeni vahinireerela ahu woovelela waalaleerya “atthu” a makhalelo otheene?

⁸ Okathi onilaleerya ahu ninnaaphwanya atthu a makhalelo ni arina soolema soovirikana. Mwa ntakiheryo, iyaakha vakhaani sivinre, sowiiraneya sinivikana 60 sookumiheriwa mmyaha sini “Biibiliya Onnirukunuxa Mirima sa Atthu” mwa erevista Owehaweha. Atthu akina aniromoliwa mmyaha iyo khalai yaari anawiiye, alipa-oohapaliwa, yeetta ni alavilavi wala yaalya mirette soohapala. Akina yaari anapoliitika, ahooleli a itiini, akina yaavara miteko mmureerelo aya paahi. Akina yaarina mweettelo woohisuumaaliha. Masi, otheene awo aalaleeriwa ihapari, kheemererya yoosoma ya Biibiliya, khupaka mirukunuxo mweekumini mwaya nto khweemya ekeekhai. Tivonto, nihikhala-khale nuupuwelaka wira ookhala mutthu ohimphwanela wiiwa ihapari sa Omwene. (Mmusome 1 aKorinto 6:9-11.) Masi, nihaana osuwela wira vanniweryaneya ‘atthu a makhalelo othene’ weemya ihapari sa Omwene.​—1 aKor. 9:22.

NIPURO XEENI KINROWA AKA WAAPHWANYA?

9. Xeeni vanitthuneya ahu ottittimihaka inupa sa axineene?

⁹ Okathi onilaleerya ahu, atthu nnaaphwanya opuro xeeni? Ikwaha sinceene nnaaphwanya vatthokoni vaya. (Math. 10:11-13) Okhala wene vanninsivela atthu akina yaattittimihaka enupa ahu ni itthu sahu. Tthiri ninnoona enupa ahu okhala yootthuneya wa hiyo. Ninniphavela wira enupa ahu ekhaleke nipuro nowiitthyaaleya, na murettele ni ovareleleya. Tivonto nihaana ottittimihaka inupa sa atthu akina. Okathi onilaleerya ahu empa t’impa, nihaana ottittimihaka inupa sa axineene.​—Mit. 5:42.

10. Ninrowa osyaka sai waanyoonyiha atthu akina okathi onilaleerya ahu?

¹⁰ Mahiku ala oosareya atakhali anammawaani anceene anniwoova atthu ahinaasuwela aya aniphiya vapuwani vaya. (2 Tim. 3:1-5) Nto hiyo khanniphavela wuncererya woova waya. Mwa ntakiheryo, muupuwele akhala wira noovaha ekhumaala empa emosa. Masi khuhaakhula mutthu, hiyo pooti ophavelaka weererya omwaavya mwaneene nithurumelaka vajanelani wala orukurerya mmukhipini. Niireke opaka eyo mmuttettheni mwanyu yammwiiriha mwaneene etthoko onyoonyiwa? Atthu yaattamanne awe yaarowa wuupuwela exeeni? Ekeekhai wira nimphavela waalaleerya atthu otheene a mmuttettheni mwahu. (Mit. 10:42) Tthiri nimphavela wulaaniha ihapari sa Omwene, wira atthu awo aphwanye mureerelo. (aRom. 1:14, 15) Masi, nihaana osyaka opaka etthu yaarowa owiiriha atthu a mmuttettheni mwahu onanariwa. Murummwa Paulo aalempe so: “Nkimphavela omukwattuliha mutthu mwaha w’etthu p’itthu, wira muteko aka ohinyemuliwe”. (2 aKor. 6:3) Akhala wira ninnittittimiha inupa ni itthu sa atthu anaalaleerya ahu, mweettelo owo wooloka onoowiiriha atthu akina waakhulela ekeekhai.​—Mmusome 1 Pedru 2:12.

OKATHI XEENI WOOREERELA WAAXUKURYA?

11. Exeeni enniiriha woonaka oreera okathi atthu akina anaattittimiha aya apalano ahu?

¹¹ Anamunceene a hiyo niri maKristau, ninnikhala oowaatteliwa miteko. Masi wira nivare saana miteko sahu, hiyo ninnithanlela itthu sootthuneya ni ompaka palano saana. (aÉf. 5:16; aFil. 1:10) Akhala wira ehaavo etthu enimwaakanyerya palano ahu, hiyo pooti onyoonyiwa. Tivonto ninnoona oreera akhala wira atthu akina annimuttittimiha palano ahu, ni onireerela murima, okathi yoole onnaattamela aya analavula ni hiyo. Nto ninrowa weettela sai yooruma ya Yesu, ni wooniherya wira ninnaattittimiha ale anaalaleerya ahu?

12. Ninrowa osuwela sai okathi wooreerela waaxekurya atthu mmuttettheni mwahu?

¹² Hiyo nihaana omananihaka othanla oratteene okathi wowaaxekurya atthu vapuwani vaya. Okathi xeeni anikhala aya vate atthu a mmuttettheni mwahu? Okathi xeeni onoona anyu wira onnaasivela ovaanela? Tthiri nnimwiira saana waavya inamuna sinoona ahu oreerela olavula ni atthu. Ilapo sikina, muteko woolaleerya khuta enupa onnikumiherya mureerelo okathi wa emakaaripi wala nsuwa nikenle ene niinaano. Akhala wira vanniweryaneya mmuttettheni mwanyu, xeeni ohiimananihaka olaleerya inupa vakhaani okathi ntoko owo? (Mmusome 1 aKorinto 10:24.) Tthiri nihaana okupali wira Yehova onooreeliha wiimananiha wahu wira naaphwanye atthu okathi onikhala aya vate vaya.

13. Ninrowa waattittimiha sai atthu a mmuttettheni mwahu?

¹³ Ninrowa wunnuuherya sai waattittimiha wahu atthu anaaphwanya ahu nilaleeryaka? Namphwanya mutthu onisiveliwa wiiwa nuulumo na Muluku, nimulaleeryeke vaniphiyerya aya, masi nihipiseke niri vaavo. Nnaamwi mutthu owo ophavelaka wiiwa woonasa wene ookhalana etthu ekina eniphavela awe ovara enoona awe okhala ya faita. Ahimya wira khorina okathi, nto hiyo nihaana omuleela wira khaninrowa opisa, nto nihipiseke tthiri. (Math. 5:37) Wookiseryani waya, vaamureera omukoha mutthu owo nihiku nnoona awe oreerela hiyo omuxukurya-tho. Anamalaleerya akina ahoona ovareleya waya muteko ohimya so: “Kinniphavela orwa nihiku nikina. Nto niireke vamoosivelani opacerya woolikarelani wala woolepelani muhupi kihinatthi ophiya?” Okathi oniphavela ahu enamuna yooreerela olaleerya muttetthe ahu, hiyo nimmutakiha murummwa Paulo yoowo ‘ahaphavela oreriwa wawe pahi, masi aphavela oreriwa wa atthu othene wira yopowe’.​—1 aKor. 10:33.

MOOTA XEENI KINROWA AKA WAALAVULIHA?

14-16. (a) Xeeni varyaaya vooloka waakuvela ohimya etthu enniiriha waaxukurya atthu? Nvahe ntakiheryo. (b) Enamuna xeeni ya olaleerya mutokweene mmosa ooweetteetta oonale awe ovareleya muteko?

¹⁴ Nkuupuwelani vaarookhala wira nooligareliwa ni mutthu ohinimusuwela anyu. Nnaamwi nihimusuwelaka, owo onninikoha voohimya sa yoolya ennisivela olya. Tthiri naamutikinihiwa mwaha woohimusuwela mutthu ene, ni ele eniphavela awe! Mwaha woophavela ottittimiha, owehasa wene hiyo naamulavulana vakhaani, masi nimooniheryaka wira khanniphavela ovaanela ni yena. Vano nkuupuwelani so, niire mutthu owo oohimya nsina nawe, ni ootthokiherya wira owo musomi onisuwela saana soolya ni wira oniphavela onihimeerya enamuna ya olya saana. Owehasa wene hiyo naamweemya ovaanela ni yena. Tthiri ninnoona oreera akhala wira mowaakuveya mutthu onnihimya etthu eniphavela awe masi mwa enamuna yoopatthaneya. Nto ninrowa wooniherya sai opatthaneya okathi onilaleerya ahu?

¹⁵ Mittetthe sinceene sinilaleeriwa, hiyo nihaana ohimya etthu ene enniiriha waaxukurya atthu niphiyakaru vatthokoni vaya. Ekeekhai wira nookhalana etthu ya faita wira naaleele atthu awo, masi nkuupuwelani etthu eniireya akhala wira khannihimya nsina nahu ni ovinya wene nintuphela mwaha onilavula ahu nipakaka makoho ntoko nla: “Mwaakhanle wira munniwerya omaliha mixankiho mulaponi, mwaarowa opacerya muxankiho xeeni?” Noosuwela wira yoolakela ya nikoho nlo, ophavela osuwela moonelo wa mutthu owo, wira nimutthokiherye ele Biibiliya enihimya awe. Masi mwaneene etthoko pooti oxankiheya khiyaikoha so: ‘Mulavilavi ola ti pani, nto xeeni onipaka awe makoho siisa? Onaavyani?’ Tivonto vanitthuneya ahu omukhweeiherya mwaneene etthoko. (aFil. 2:3, 4) Nto nipakeke exeeni?

¹⁶ Mutokweene mmosa ooweetteetta ohoona okhala yoovareleya muteko enamuna ela enittharelana. Nuumala omulavuliha mwaneene etthoko, oninvahererya etratato emosa eni: Munniphavela Osuwela Ekeekhai? nuumala khiyahimya so: “Nnaakawela etratato ela enaavaha ahu atthu otheene a muttetthe ola. Ennaakhula makoho 6 atthu animakela aya okoha. Ela ti yawinyu”. Munna owo onihimya wira anamunceene vannaakhweela onaakhela, okhala wira awo annisuwela etthu enniiriha waaxukurya. Enamuna eyo, ennikhweeiherya olavulana atthu anceene. Mutokweene ole ooweetteetta onnimukoha mutthu owo so: “Mootoko wuupuwela voohimya sa makoho ala?” Akhala wira mwaneene etthoko onnithanla nikoho nimosa, munna owo onnitthukula etratato eyo ni omutthokiherya omurumeelaka Biibiliya. Okathi mukina, owo onnithanla nikoho nimosa nto khiyamutthokiherya mwaneene etthoko. Ekeekhai wira sookhala inamuna sinceene sa opaceriha ovaanela. Mittetthe sikina, atthu aniwehererya wira mutthu ohinatthi ohimya etthu emwiirinhe orwa ohaana olavula wala opaka etthu eri yoolema enooniherya nttittimiho. Etthu yuulupale enitthuneya ori olokiherya enamuna ya olaleerya wahu enaakhweiherya atthu mmuttettheni mwahu.

MUHIHIYE WEETTELA YOORUMA YA WAATHOKORERYA SAANA ATTHU ANAALALEERYA ANYU

17. Ntoko sithokorenrye ahu mwaha ola, inamuna xeeni sa waathokorerya saana atthu akina sikhanle ahu oorumeela naalaleeryaka?

¹⁷ Nto inamuna xeeni sa waathokorerya saana atthu sikhanle ahu oorumeela naalaleeryaka? Hiyo nihaana omuttittimiha khula mutthu. Nihaana ottittimihaka inupa ni itthu sa axineene. Nihaana wiimananiha orowa olaleerya okathi yoole atthu aryaaya vate ni onaasivela oxukuriwa. Nihaana orumeela inamuna sa olaleerya siniwiiriha atthu a mmuttettheni mwahu waakhulela ekeekhai.

18. Mireerelo xeeni siniphwanya ahu mwaha wa waathokorerya saana atthu mwa enamuna ntoko siniphavela ahu othokoreriwa?

¹⁸ Nnoophwanya mireerelo sinceene akhala wira ninnaakhapelela atthu a mmuttettheni mwahu, ntoko siisaale simphavela ahu okhapeleliwa. Naathokoreryaka atthu mwa enamuna yookhalela, nto nnimwiiriha omwaleya wahu okhala woowaarya, nittittimiheryaka otthuneya waya miruku sa mBiibiliyani, ni ninvuwihaka Tiithi ahu a wiirimu. (Math. 5:16) Nnoowerya waakhaliherya atthu anceene osuwela ekeekhai, mwaha wa enamuna enaalavulana ahu. (1 Tim. 4:16) Hata atthu anaalaleerya ahu yeemereryaka wala akhoottaka ihapari sa Omwene, hiyo ninnitteeliwa murima mwaha woosuwela wira nihiimananiha ovara muteko nirummwale ahu. (2 Tim. 4:5) Otheene ahu nimutakiheke murummwa Paulo yoowo aalempe so: ‘Miyo kinnìra itthu iya sothene mwaha w’ehapari yorera’. (1 aKor. 9:23) Tthiri nihaana waathokorerya saana atthu anaalaleerya ahu okathi wotheene.